مجنون سارة ,, قصة ٌ في منتهى الروعه

[الشوق]

مشاركة: مجنون سارة ,, قصة ٌ في منتهى الروعه

ساره وهي تسلم على خالتها
ساره :ها خالو شحالج ؟\
ام خالد : بخير الحمد لله اشحالج انتي يا ساره من زمان ما شفناج
ساره : والله مشاغل الدنيا ..
ام خالد ( خالة ساره ) الله يكون بعونج
نوره يت من فوق : هلا بساره والله
ساره بابتسامه : هلا فيج يا بنت خالتي
نوره تسلم على ساره : وينج لج وحشه
ساره : والله انتو اكثر
نوره : امايه عن اذنج بنروح غرفتي اوكي
ام خالد : على هواكم حبايبي

نوره وساره يالسين
نوره : ها شحالج شوحال فهد
ساره : والله الحمد لله
نوره تبى تشوف قلاده ساره : مممممممممم الصراحه اليوم متكشخه ماشاء الله عليج
ساره : تسلمين من ذوقج
نوره اونها تبى تعدل لبس ساره وين رقبتها عسب تشوف اذا هي لابسه قلاده ولالاء
نوره شافت ان ساره لابسه قلاده بلون لبسها يعني شكل احجار حلوه ..
ساره مستغربه : بلاج
نوره: قلادتج حلوه ماشاء الله
ساره : ما تغلى عليج حبيبتي
نوره : تسلمين .. مدام انتي لابستنها كاني انا اللي لابستنها ساره : تسلمين والله
نوره : ساره الصراحه ابي اقولج شي بس لا تضايقين
ساره : خير
نوره : شحالج ويا فهد ..شو ان شاء الله بديتي زينه وياه ..
ساره : والله ماعرف شو اقولج بس احس احساسي وياه احسن عن قبل ماعرف .. يعني مب اني احبه ولا اني اكره .. بس لانه طيب ومعاملته حلوه وياي وايد يستحملني
نوره : يعني بديتي تحبينه
ساره : ما اعتقد اني احبه .. يمكن اعزه او اني تعودت عليه عرفتي... وليش هالسؤال
نوره : ها ولا شي بس حبيت اعرف
ساره : اها زين وانتي شخبارج ويا عبدالله
نوره بابتسامه : الحمد لله زينين .. عبدالله مافي منه بالكون طيب وحنون وايد
ساره : عسى الله يخليكم لبعض ..

###############################

منى واقفه عند سيارتها : يالله هند تعالي
هند : لا لا شو مينونه اطلع وياج بالسياره
منى ": بلاج ما بنروح مكان بس باخذج كم دوره وبردج لا تحاتين ..
هند : واذا حد شافنا
منى : شو يعني انا قلت بوديج الديسكو قلت بودوج كم دوره بالسياره يعني ما بنزلج .. عشان تركبين سيارتي Ford
اليديده

 

[الشوق]

مشاركة: مجنون سارة ,, قصة ٌ في منتهى الروعه

هند : خايفه اخوي يدري ويذبحني
هند : اذا درى حبيبتي قوليله انت مالك خص انا وحده ومتزوجه ومب انت اللي تتحكم فيه زين.. يالله ذبحتيني ويا اخوج
هند : زين بس ما نتاخر
منى : يالله تعالي انتي عسب تشوفين سواقتي

هند ويا منى راحو يدورون بسيارة منى اليديده وطبعا معليه صوت المسجل على الاخر تتحرى عمرها انها بروحها بالشارع ..وتسرع على كيف كيفها ..

خالد موقف بشية البترول عشان يترس بترول ولا فجاه ..طافت سياره جدامه وطبعا سياره منى وهند بالسياره
منى وهي موقفه سيارتها : ها شو تبين اشتريلج من شيشة ايبكو
هند : ما بي شي يالله نرد تاخرنا
منى : اييييييييييه انتي بعد وايد خوافه ..خلاص باخذلج على راحتي ..
وسياره منى مب مخفيه وايد لانها يديده توها
وخالد وهو يرمس بالتلفون فجاه شاف السياره اللي عند يمينه شاف هند فتح عيونه اكثر ولا يشوف هند وهو متاكد بس هو توقع ان هند بالبيت واللي اكدله اكثر شاف منى وهي طالعه من شيشة بترول .. وخالد يعرف شكل منى لانها مره يت عندهم وفتح عيونه ونصدم وعشان يتاكد زياده اذا هي هند اللي بيساره اتصل فيها وقال اذا هي رفعت السماعه يعني هي لانه شكل هند واضح بما ان السياره مب مخفيه ..واتصل وشاف هند ماسكه الموبايل وهو يرد ومعصب : هند وينج
هند توترت ماتعرف شو تقول: ها انا انا ماعرف انا في بيت منى
خالد : والله في بيت منى لا ....وتقصين عليه بعد .. ماعليه دواج في البيت
وصك التلفون وهو معصب
هند وهي متوتره وماتعرف ان خالد شافها
منى ركبت السياره : ها يالله اشتريت لج كل الانواع الحلويات
منى شافت هند متوتره وايد وترتجف ..: : بلاج
هند وهي تبلع ريجها : خالد اتصل وعصب وسالني وينج قلت له بيت منى وعرف اني اجذب ..اخاف شافني ..يا ويلي شو اقوله
منى : والله انج مكبره السالفه ..شوفي اذا قالج قوليله انج معرسه واللي يتحكم فيج هو سالم ريلج .
هند : انتي ماتعرفين اخويه ..وايد عصبي
منى : لا تفكرين ولاشي قولي اللي قلت لج

خالد معصب وهو على طول رد البيت
نوره ويا ساره بالغرفه ..
ام ساره وام خالد بالصاله
خالد دخل وهو معصب على اخره : وين هند
ام خالد : باسم الله بلاك لا سلام ولا كلام
خالد واصل حده : وين هند
ام خالد : هند بيت رييعتها منى
خالد : لازم هالحريه بتخرب البنت ..وانتي تعرفين ان منى ااذا زينه ولا لاء ماعندي مشكله اذا سارت بيت رباعتها بس الاهم ان رباعتها على دين واخلاق مب من اي نوع
ام ساره : وانت ليش معصب الله يهديك

 

[الشوق]

مشاركة: مجنون سارة ,, قصة ٌ في منتهى الروعه

خالد : خالو انا شايف توني هند بالسياره مع منى ..شوفو بدون ما تستاذن
ام خالد : هند مع منى برع بالسياره
خالد : هيه ونحن خبر خير .. الاخت ماخذه راحتها انا براويها ..خلا ترد

هند توها داشه البيت وخالد يالس في الصاله ومعصب يترياها
هند دخلت وهي ترتجف : السسس سسس لام عليكم
خالد وقف : وين كنتي يا الحلوه
هند : كنت بيت ريعتي منى
خالد : وما طلعتي بعد
هند : لا ما رحت مكان
خالد تقرب من هند و صفعها بالقو : وتجذبين بعد .. يعني ما شفتج انا... تروحين وتجذبين بعد
ساره ونوره طلعو من الصريخ
هند وهي ماسكه ويها وتصيح : وانت شو لك خص اذا طلعت ولا لاء وباي حق تضربني ..
ام خالد تحاول تدافع عن بنتها : بلاك يا خالد
خالد : لو صارحتني ما بقول شي لا وتتجذب بعد يعني هي تعرف انها غلطانه ..
هند وهي تصيح : اروح المكان اللي ابيه كيفي انت ما لك خص فيه
خالد يبى يضربها يت امه تمنعه
خالد : خليني اضربها خلا تعرف اذا لي خص ولا لاء
خالد : حبيبتي انا اخوج وغصبن عنج اتحكم فيج ..وبعدين كيف تروحين ويا ربيعتج هاي اللي ماتعرف لا ادب ولا احترام ومعليه صوب الاغاني على اخر اللي يشوفج وياها بيقول انج مثلها حركات
هند : بس انا ما سويت شي بس طلعت وياها بالسياره
خالد : على الاقل لازم تستاذنين مني او من ابويه او امايه مب على كيفج يعني مالجه خلاص .. لا تنسين انج عايشه بعدج في البيت لا والاخت تتجذب بعد .. ( ياشر بصبعه ) يا ويلج اذا رحتي مره ثانيه عندها..
هند وهي تصيح ..راحت غرفتها

خالد حتى ماحس بوجود ساره راح غرفته من الصوب الثاني
ام خالد : لا حول ولا قوه الا بالله
نوره : الصراحه خالد معاه حق .. هاي منى ما ارتاحلها لو وحده ثانيه بنقول عادي بس هالنوع من البنات ينخاف منهم
ام خالد : دايما المشاكل اتيه على راسنا
ساره متفاجاه شوي من الموقف..
نوره تصد تشوف ساره : شو بلاج
ساره : حرام هند انضربت قلبي عورني عليها اول مره اشوف خالد بهالعصبيه ...
نوره : واول مره حد يضرب هند هند عمرها ما انضربت ..بس اللي سوته غلط
ساره : يحليلها والله

نوره : عن اذنج يا ساره بروح اهدي اخويه وبييج خذي راحتج
ساره : انتي اللي خذي راحتج ترى انا مب غريبه

 

[الشوق]

مشاركة: مجنون سارة ,, قصة ٌ في منتهى الروعه

نوره دخلت غرفة خالد وشافته معصب ..
نوره : خالد هد اعصابك
خالد : هالبنت قاهرتني لا وبعد ما تعتذر تتجذب وتعاند
نوره : ماعليه هي ماعرفت باللي تسويه هذا كله من منى ربيعتها حسبي الله عليها ..
خالد صد : تعالي سويتي اللي قلتلج عليه
نوره : ماشاء الله مانسيت
خالد: لا طبعا هي وينها مب في بيتنا
نوره : لازم من عصبيتك ما شفتنا حتى
خالد : هي كانت موجوده
نوره : هي كنا ويا بعض طلعنا من صريخك
خالد : فضيحه شافتني بعصبيتي
نوره : عادي ما فيها شي
خالد : زين بشري شو استوى
نوره : ممممممممم الصراحه شفتها لابسه قلاده بنفسجيه بالاحجار
خالد : يعني مب قلادتها على شكل القلب فيه حرفها
نوره : لاء
خالد عصب زياده : يعني صدق مثل اللي توقعته .. نستني
نوره : انت شو تقول
خالد : نوره الله يخليج ابي اكلم ساره الحينه وضروري
نوره : ليش
خالد : بعدين بقولج ..روحي ازقريها خليها اتيه
نوره: مب حلوه بغرفتك شوف اذا تبى تكلمها روح الصاله ترى امايه وام ساره راحو الميلس توهم .. بس اكون موجوده
خالد : بس في اشياء خاصه بيني وبينها كيف اتين
نوره : يالله الحينه عليه ..ترى ما يستوي اخليكم بروحكم
خالد : والله بس بقولها شي ..انتي راقبي الوضع زين
نوره : شو نسوي بعد ما نزعلك اليوم روحك معصب

ساره وهي يالسه بالصاله نوره يت عندها
نوره : اقول ساروه ترى خالد بيكلمج
ساره قلبها دق وتوترت : ها ليش
نوره : ماعرف بس دقايق بيكلمج وبيطلع
ساره : بس انتي تمي مب حلوه بروحنا
نوره : انا بروح وبييه براقب الوضع لان الاخ عنده اسرار
ساره : بس
خالد دخل هو معصب : السلام عليج يا ساره
ساره استحت ونزلت راسها : وعليكم السلام
خالد بحزن : شحالج يا بنت خالتي
ساره : بخير الحمد لله يسرك الحال
نوره طلعت وقالت انها بتشو ف ااذا حد بيه ولا لاء
خالد : ها ياساره نسيتي الوعد اللي بينا ونسيتي الحب اللي كان بينا
ساره رفعت راسها وتشوف خالد : ليش تقول جي
خالد : انتي وعدتيني انج تلبسن القلاده دايما لاخر حياتج وهذا دليل على حبج لي .ومدام ما لبستي القلاده معناته انج ناستني
ساره : ساكته
خالد : شو ياساره وين الوعد انا كنت اترياج .. عسب نكون لبعض واخر شي تنسيني وتنسين الوعد .. نسيتي انا لازم نكون لبعض وانا لبعض لاخر العمر
ساره :بس يا خالد انا حاولت بالبدايه والله حتى بشهر العسل اكون قاسيه عليه بس ما شي فايده
خالد : قولي انج حبيتيه

 

[الشوق]

مشاركة: مجنون سارة ,, قصة ٌ في منتهى الروعه

ساره : لا مب اني حبيته بس هو مستحيل يودرني مهما كان حاولت بكل الطرق ومليت خلاص اعرف ان ما شي فايده
خالد : يعني شو .. خلاص بتكونين له .احلامنا تبخرت عشان خاطره ..هو يستانس بحسا ب غيره وانا شو مشكلتي اذا هو مريض نفسي وحبج من اول نظره .. انا حبيتح من الطفوله تعرفين شو يعني .. ساره انتي بداخلي ... والله اني عمري ما حبيت غيرج ..واخر شي ااييه هالنذل وياخذج بكل سهوله ..ونحن شو لنا خص نتعذب وننحرم من بعض بسبته هو ..
ساره : شو اسوي
خالد : اللي ابيج تعرفينه وما تنسينه يا ساره ان هالانسان اللي عايشه وياه انتي هو سبب فراقنا ..وبعدين لا تنسين انه كان يهددج فيه وفي اعز انسانه عندج اللي هي امج ..
ساره سكتت وما قالت شي تذكرت كل شي
خالد : تعيشين مع انسان كان في يوم بيحرمج من امج اذا ما خذتيه .و بتعيشين ويا انسان هو سبب عذابي وعذابج ... بتعيشين ويا انسان كان يستخدم التهديد .. قوليلي كيف كيف
ساره والدموع بعيونها : شو اسوي زين شو اسوي
خالد : اذا صدق تحبيني وتبيني .. حاولي انج تنكدين عليه مره ثانيه بس اقسى عن قبل ..حاولي انج تقللين من رجولته ساره رفعت راسها: كيف يعني
خالد : يعني تعاندينه وما تهتمين فيه وسوي اللي هو ما يحب والريال يوم يحس ان كلمته ما تمشي وبالعناد راح يمل بس كوني اقسى عن قبل .. وصدقيني باقل من شهر بيمل من هالشي..ونرد بعض ..ساره ( ياشر على قلبه )) ترى قلبي لين الحينه يذكرج على الاقل تزوجين بسعاده وبحب من طرفين بدل حب من طرف واحد .. وكل ما تشوفينه لا تنسين انه كان يهددج انه ينتقم من امج .. يعني هو بالبدايه كان عدو.ولا تقولين مريض نفسي ترى عادي هو يسوي هالشي عسب ياخذج وقلبج يعورج عليه.. ساره خلا نكمل حياتنا ويا بعض مثل ما كنا نباه ..فكري عدل ..وخلا نرجع لبعض ونكمل حياتنا
ساره تذكرت تهديد فهد .. انه يبى ينتقم من امه وكان يبى يؤذي خالد والفضيحه اللي استوت وتذكرت ايامها في المدرسه يوم كانت كله تفكر باليوم اللي تشوف عمرها زوجه لخالد ..لان خالد وساره حبهم من الطفوله ...تذكرت كل شي وحقدت اكثر على فهد وقررت انها تحاول تكون اقسى من الحجر على فهد لين يودرها وترجع لحلم طفولتها ترجع لخالد

 

[الشوق]

مشاركة: مجنون سارة ,, قصة ٌ في منتهى الروعه

اعرف ان الجزء قصير
بس مب اهم الطول
اهم شي الاحداث
و الكاتبه عندهاامتحانات بالجامعه لين اسبوعين وهي هدت مذاكرتها وكتبت

بس ان شاء الله ما باجي شي وتخلص امتحانات ونعوض عليكم

 

[اليوم الآخر]

مشاركة: مجنون سارة ,, قصة ٌ في منتهى الروعه

[align=center]شكرا خيوووووووه تسلمين والله تعبناك

والله يساعدك ويه الامتحانات وموفقين ان شاء الله[/align]

 

[الشوق]

مشاركة: مجنون سارة ,, قصة ٌ في منتهى الروعه

اجمعين خيو اليوم الاخر

و انشالله على ما تنزل الاجزاء الجاية راح انزلها لكم

تستاهلون

 

[رهف]

مشاركة: مجنون سارة ,, قصة ٌ في منتهى الروعه

قوة ..

اممممممم انتظر المزيد

لاكمل تعليقي ولكنه جزء مليىء بالاحداث

 

[حكايا الشموع]

مشاركة: مجنون سارة ,, قصة ٌ في منتهى الروعه

قصة في غاية الروعه
وحنا ننظر باقي الاحداث
تحياتي

 

[الشوق]

مشاركة: مجنون سارة ,, قصة ٌ في منتهى الروعه

تفضــلــوا !
جِـــزء حلــو وطويِـــل !

وقتٌ ممتِــــع !
}${ الجزء الخامس والاربعين }${

وبعد كلام خالد لساره ساره وقفت وهي سرحانه وتبى تروح خالد زقرها ( ناداها )
خالد : ساره
ساره صدت وهي متضايجه :
خالد بكل حنيه : اعرف ان اللي اسويه غلط ومالي حق اني اطلب منج الانفصال .. بس لو كان هو ياي قبلي ما بقول شي ..بس لا تنسين ان حبنا من الطفوله يعني من زمان واللي يسمعني بيقول لازم استسلم للامر الواقع صح .. بس العاشق واللي مر بتجربة الحب صدقيني بيحس فيه .. يوم انا اكبر بس عشان اخطبج ويوم اخطبج اييه واحد بالتهديد ياخذج مني . صعبه والله .. ولو كنتي تحبينه صدقيني مابعارض هالشي بس المشكله الكبيره ان حبنا متبادل
ساره نزلت راسها وماقالت شي ..
خالد : ساره اذا انتي تحبينه قوليلي بخليج وياه بس قهر انج ما تحبينه واتمين وياه ترى الدنيا لحظه .. خلينا نعيش بسلام وبحب ..ولو انسان ثاني حبيبته اتزوجت بينساها وبتشوفينه متزوج غيرها بس انا لاني اموت فيج مستحيل افكر بغيرج لين ما اتين وتقوليلي انج ما تبيني ..
ساره ماتعرف شو تقول وشو تعلق وتذكرت ان فهد دمر حياة عاشقين اللي قصتهم معروفه بين العايله بان كل واحد يبى الثاني وتذكرت موقف فهد وتهديده وتصرفاته ان خذاها بالغصب ..وهي رايحه ..
خالد : ساره اترياج لاخر العمر .. لا تنسين الوعد
ساره هي واقفه عند باب الصاله تبى تروح يت نوره مستغربه
نوره : ساره وين بتروحين
ساره ميوده عمرها شوي تبى تصيح : بروح بيتنا
نوره يت عندها : ليش تو الناس توج يايه
ساره بحزن : بييه مره ثانيه عن اذنج
ساره راحت وهي ضايعه ماتعرف شو تسوي ..
نوره قربت صوب خالد وبعجب : شو صار بينكم
خالد بجديه : قلت لها منو يكون فهد وشو اللي سواه قبل وانها لازم ترجع لي ..وترجع لحبنا ..وهالانسان اللي عايشه وياه حرمها من الحب
نوره فتحت عيونها : يعني انت تبى ادمر حياتها ..والله ما توقعت منك .لو كنتي ادري انك تبى تقولها جي صدقني والله ما خليتك تكلمها ..
خالد : ليش اللي اسويه غلط
نوره : غلط الا فوق الغلط .اصلا حرام تفكر بانسانه متزوجه هذا اولا ..واعرف ان فهد غلطان بس خلاص هي زوجته وغصبن عليها تحترمه وتصونه..
خالد بعصبيه وبحزن : لانج ما تحسين باللي يصير فيه ..هالانسان حرمني الضحكه والسعاده والحب .. شو تبيني احبه ..انتي يا نوره تحبين ريلج وتحسين بقهر اذا انسانه ثانيه خذته صح
نوره : اكيد
خالد : عيل انا تخيلي ..ساره كانت خطيبتي يعني جريب نتزوج .. واييه انسان ثاني ياخذها مني ..هاي ولا في الاحلام انتي اكثر وحده لازم تحسين فيه لانج تذكرين يوم كنت في المدرسه كيف كنت العوزج وابهدلج عشان اشوفها وفي كتبي كله حرفها .. وما اطلع من البيت اا ذا عرفت انها بتيه بيتنا مع اني كنت صغير بس حبها بقلبي ..ويوم كبرت فرحت وايد لانه واخيرا اقدر اتزوجها .. يعني صعب عليه يا نوره اشوفها مع انسان ثاني وهي ما تحبه صعبه صعبه
نوره راحت عند خالد وحطت ايدها على كتفه : والله حاسه فيك يا اخويه واعرف انك اكثر واحد تحبها وحبك اكبر من كل شي .. بس ساره متزوجه
خالد بعصبيه والدموع بعيونه : متزوجه من غير رضاها ليش هو يستانس وانا اتعذب شو ذنبي انا .. شو ذنبنا نحن
..نوره : بس يا خالد
خالد : بس يا نوره كافي خليني الحينه ما ابي اكلم حد ..وانا اكيد ان ساره بتكون لي .. غصبن عن الكل

ساره وهي تسوق ..تذكرت كل شي وهي تمسح دموعها
ساره بخاطرها : صح كلامك يا خالد ..كيف نسيت ان فهد اللي حرمني من حب الاول لا وكان يهدد يعني اذا ما خذته كان بيكون عدو لانه بيهدم حياتي ..وانا السبب بعذاب الانسان اللي حبيته من الطفوله اللي هو خالد كيف نسيت هالشي كيف .. بس لازم اوفي بالوعد واكون اقسى من الحجر ..عسب يودرني فهد ويمل مني وارجع لخالد


فهد وهو لابس يبى يطلع ويا ربعه
ساره وصلت البيت وشكلها يبين انها تعبانه ومتضايجه
ساره راحت غرفتها وشافت فهد ..
فهد وهو يتعطر شاف ساره استغرب : ساره حبيبتي ..غريبه رديتي بسرعه ما كملتي الا ساعه ورديتي ليش
ساره شافته وتذكرت كلام خالد وبعصبيه : من دون سبب .. بس ابي ارتاح شويه في البيت ولا ممنوع بعد
فهد قرب منها : بلاج حبيبتي ..شكلج مبين انج تعبانه حتى صوتج.. شو كنتي تصيحين
ساره بصريخ : مافيني شي .. يعني لازم يكون فيني شي
فهد مستغرب : بلاج ساره...
ساره : اوووووووووووووووووه وبعدين وياك انت ما تفهم قلت لك مافيني شي ابي ارتاح ..يمكن تخليني وتطلع برع
فهد فاتح عيونه واقف مكانه مستغرب
ساره بعصبيه : الكلام ما ينفع وياك ..خلا اروح بالغرفه الثانيه وايد احسن
ساره طلعت وصكت الباب بالقو
فهد فاتح عيونه واقف مكانه ويكلم عمره: لا لا هاي اكيد مب ساره ..

فهد راح الغرفه الثانيه اللي ساره موجوده فيها..
فهد يدق الباب : ساره ساره بلاج ..قوليلي شو فيج
ساره وهي تصيح : مافيني شي خلني بروحي يا فهد خلني
فهد : ساره ساره زين قوليلي بلاج متغيره عليه
ساره ما ردت عليه ..

فهد وايد مستغرب على طول بركيض راح غرفة الريم
الريم تفتح الباب : هلا فهد
فهد متوتر : الريم الله يخليج روحي عند ساره وشوفيها بلاها
الريم مستغربه : ليش شو صار
فهد : ما ادري بلاها تغيرت 180 درجه مب ساره الاوليه ..قبل ما تروح بيت خالتها ما شي احسن منها والحينه ردت اقسى من ايام الملجه روحي شوفيها ترى مهما كان انتي ربيعتها .. يمكن صار شي في بيت خالتها عسب جي متضايجه
الريم: والله حيرتني بشوف بلاها ..انت تم مكانك بروح اشوف بلاها وبرد عليك
فهد بحزن : زين الله يخليج بسرعه ترى والله احاتي
الريم : ان شاء الله ولا يهمك

الريم تدق الباب على ساره : ساره انا الريم
ساره متسانده على السرير وهي تمسح دموعها : شو تبين يا الريم
الريم : ساره فتحي الباب شويه
ساره راحت تفتح الباب وهي واقفه عند الباب : خير يا الريم
الريم شافت ويه ساره اللي مبين عليه انها صايحه ومتضايجه الريم : بلاج ساره
ساره : مافيني شي ..ليش الاخ فهد قالج
الريم : ساره ليش متضايجه لا يكون صار شي بيت خالتج
ساره : ماصار شي ..بس انا متضايجه وما لي نفس اكلم حد
الريم : من دون سبب جي بروحج اتضايجتي ..قبل شويه محلاج
ساره : الريم دخيلج خليني بروحي ...والله مافيني شي بس ابي اتم بروحي شوي يمكن
الريم تهز راسها : على راحتج حبيبتي ترى اذا فيج شي لا تنسين ان عندج ربيعه اللي هي الريم اللي كنتي تخبرينها كل شي بس للاسف تغيرتي عليه
ساره صدت صوب ثاني وماعلقت ..

الريم راحت عند فهد
فهد كان يالس يترياها ويوم دخلت الريم وقف وبسرعه راح عندها : ها شو بشري
الريم : ماعرف بلاها طلبت مني انها اتم بروحها
فهد : ما حسيتي انها متغيره
الريم : الصراحه هيه ..بس يمكن شوي متضايجه واكيد بترد مثل قبل ترى وايد ناس جي فجأه يتضايجون وبعدين يردون عادي
فهد : انا اقول يوم تروح بيت خالتها تتغير .. ياريت ما خليتها تروح
الريم : يمكن يا فهد نحن مكبرين السالفه بنشوف باجر اذا ترد مثل قبل ولا لاء وبعدين نقدر نحكم عليها ..انت الحينه اطلع ويا ربعك ترى قبل شوي قلت لي انك بتطلع
فهد : وين اطلع وساره متغيره ..مالي نفس اطلع مكان
الريم : زين اتعشى على الاقل
فهد : والله مالي نفس يالريم ..بروح غرفتي
الريم : فهد لا تحاتي يمكن اتضايجت من شي ... وان شاء الله باجر بتكون احسن
فهد : اتمنى والله ..ما صدقت انها صارت زينه ويايه وبدت تحترمني ..ما ابي اعيش بعذاب ثاني ..والله تعبت تعبت
الريم : ان شاء الله ايامك كلها تكون حلوه
فهد : ايامي عمرها ماراح تحلى الا بوجود ساره عندي وبحبها ..
الريم : الله كريم يالله انت روح ارتاح ..وما بيصير شي
فهد طلع من الغرفه وهو متضايق
فهد متساند على السرير وبضيج يكلم نفسه : اييييييييييييييييييه ماعرف شو صار فيج ياساره شفت الكره بعيونج ..ماعرف ليش عندي احساس انج بتردين مثل قبل قاسيه بس شو اللي غيرج فجأه.. يالله ابي السعاده تعم بهالبيت ..والله جربت انواع الحرمان من صغري فيارب عطني السعاده مع الانسانه اللي اخترتها وحبيتها ..يارب

~~~~~~~~~~~~~~

 

[الشوق]

مشاركة: مجنون سارة ,, قصة ٌ في منتهى الروعه

نوره بعد ماراح خالد ..اتصلت في ساره عشان تكلمها ..بس ما قدرت تكلمها لانه موبايل ساره مغلق ..
فراحت على طول عند هند لانها ماطلعت من غرفتها من بعد صفعت خالد لها ..
نوره دخلت غرفة هند وشافتها منسدحه على السرير وهي تصيح ..
نوره يلست عندها : ها بعدج تصيحين
هند بقهر : لا تبيني ارقص ..يعني اخوج ضربني صفعني جدام الكل تبيني استانس ..والله حقير
نوره عصبت : هند احترمي نفسج لا تقولين حق اخوج الكبير هالكلام ..
هند ..: عيل تبيني شو اقول دايما حاط دوبه بدوبي.. دومه يحط عليه ويضاربني
نوره : لانج تغلطين يا هند ..معقوله تحريتج يوم بتملجين بتعقلين بس اشوفج نفس الشي
هند قامت من مكانها ويلست : ليش تشوفيني مينونه يعني
نوره : هند انتي تعرفين ان اللي سويته غلط بغلط


هند : يعني انا اول وحده اطلع ويا ربيعتي انتو اصلا عايله غريبه
نوره : لو صدق ما فيها شي على الاقل اتصلتي ..نحن مب منقهرين عسب هالشي اول شي لانج ما استاذنتي منا ...ثانيا لان منى هي ربيعتج يعني لو وحده ثانيه يمكن ما نعصب لهالدرجه .. الناس يا هند اذا شافو بنت لو تكون زينه مع بنت مب زينه وسمعتها مب حلوه .. صدقني بيقول انهم نفس الشي حتى لو هي زينه ..لان الصاحب ساحب .. يعني ليش تخربين سمعتج عشان خاطر منى
هند : منى زينه وطيبه بس انتو اللي ظالمينها يعني بس لانها مب متحجبه وتتمكيج
نوره : وايد اشياء ..والسبب الاكبر لا تنسين انها علمتج المغازله ..
هند : بس الحينه يريب يكون ريلي
نوره : وبدايتها حرام ..يعني نهايتها شو .. الزواج يكون عن طريق الحلال مب بالمغازله ..
هند : المهم الحينه شو ..وبعدين انا خلاص ما ابيج تتكلمين عن سالم لانه صار ريلي اوكي ..
نوره : ولا انا ابي اصدع راسي مره ثانيه بس كنت ابي اوضح لج ان اخوج على حق ..والغلط منج وترى حمدي ربج ان امج موجوده جان خالد ذبحج ..
هند ماقالت شي ..
نوره : الحنيه انا بروح بس فكري عدل ترى البنت ماعندها الا سمعتها ومب يعني انج ملجتي تسوينن اللي تبين ..ويوم تبين تسوين اي شي فكري بعلقج مب بقلبج .. عشان تفكرين صح اوكي
هند صاده صوب ثاني وهي منقهره
نوره طلعت من الغرفه
هند وهي تكلم عمرها: والله خلا يقولون اللي يبونه انا مقتنعه ان اللي اسويه صح وهم اللي مكبرين السالفه ..اف ياربي متى اتزوج وافتك من هالبيت ومن هالتسلط ..

وفي اليوم الثاني ..
فهد ما قدر ينام وتفكيره كله بساره وبتغيرها المفاجئ ..
فهد اول ما قام من الرقاد راح الغرفه الثانيه يعني عند ساره دخل فهد وشاف ساره ترمس تلفون
ساره : انزين يا عاشه لا تنسين تقولين حق المسؤول .. اها اوكي عيل ..مشكوره ما قصرتي ..مع السلامه
فهد مستغرب : هلا حبيبتي شحالج
ساره ماسكه الموبايل ومن غير نفس : بخير
فهد : شو سالفة المسؤول
ساره وهي تطالعه بجديه : اتصلت الشغل عسب( علشان ) اقطع اجازتي وارد الشغل
فهد عاقد حوايبه : بس انتي قلتي انج بتاخذين اجازه 3 اشهر وانتي بعدج ما كملتي الا شهرين
ساره : بس مليت من البيت ابي اروح الشغل
فهد بلطف : ساره حبيبتي شو تبين بالشغل .. ترى انتي مب محتاجه بعطيج ثلاثة ارباع الراتب لو تبين ..لا تنسين ان معاشي الحمد لله اوكي ..والوالد الله يرحمه عنده كم عقار يعني دخلنا وايد زين واقد ر اعيشج ملكه ترى هالحلال كله لي ولج وللريم ..
ساره بعصبيه :/ ليش منو قال اني اشتغل عسب الفلوس ..ترى مب كل وحده تشتغل لانها محتاجه ..وبعدين انا يوم كنت اشتغل بيت اهلي ما كنت محتاجه الحمد لله ..مثل ما انتو ما عليكم قصور ترى نحن بعد من عايله معروفه الحمد لله وشايفه خير ..بس حبيت اشتغل عسب احس بالمسؤوليه اكثر
فهد : بس انتي متزوجه الحينه
ساره : شوو يعني ..وبعدين لا تنسى ان هذا شرطي من زمان ..ومستحيل اتخلى عن شغلي ..سمعت لا انت ولا غيرك يقدر يفرض عليه شي ..
فهد استغرب من جرأه ساره : ساره بلاج انتي ترى من البارحه مب طبيعيه .. انا قلت يوم تروحين بيت خالتج تتغرين اكيد شفتي هالنذل خالد
ساره : خالد ماله خص بالسالفه اوكي ولا تهينه لا تنسى انه ولد خالتي قبل كل شي
فهد عصب: لا وبعد ادافعين عنه
ساره : وليش ما ادافع عنه ..هو ولد خالتي قبل ما تكون(تأشر بصبعها ) انت زوجي ..
فهد : عيل سمعي ..مره ثانيه ماراح اخليج تروحين بيت خالتج اوكي
ساره بتكبر : والله بس احلف .. لا حبيبي مستحيل هالشي ..بيت خالتي مستحيل انقطع عنه .. اوكي

ساره طلعت من الغرفه .
فهد ماسك اعصابه مستغرب من الموقف ..ساره صارت اقسى من كل مره والقهر انها تعانده
فهد راح الصاله وهو معصب ..
الريم شافت اخوها والغضب بعيونه ..الريم يلست عند فهد
الريم : فهد بلاك ليش معصب
فهد : هاي ساره ماعرف شو فيها لو تشوفين كيف تعاندني يا الريم والله اني ماسك اعصابي القهر انها تعاند تعاند
الريم : حتى في المجله معاملتها جي مدام انت تحبها لازم تستحمل
فهد وقف : ما اقدر اقولج تعاندني وتقهرني كاني ولا شي ..
الريم : صدق غريبه
فهد : خاطري اعرف شو صار ..اكيد كلمت خالد ..مستحيل تتغير من دون سبب ..
الريم : والله يا فهد ماعرف شو اقولك ..
فهد ماسك راسه : ماعرف شو اسوي ماعرف كيف اتصرف
الريم : ما عليه يا اخويه هد اعصابك كل شي بالهدوء والطيبه يستوي ..لا تكدر روحك .. واذا صدق تحبها استحمل
فهد :المشكله اني اموت عليها مب بس احبها يوم اشوف دمعه من عيونها قلبي يتقطع قبل قلبها ..حزنها من حزني وفرحها من فرحي ..وانا اعرف ساره طيبه وحنونه واللي تسويه مب من قلبها ..بس لين متى لين متى
الريم: استحمل كم يوم .. وان شاء الله بالحب كل شي بيتغير مثل ما غيرتها قبل ..تقدر بحبك تغيرها الحينه بعد
فهد يتنهد : الله يعيني يا رب ..


ساره وهي بغرفتها تسحي شعرها وبخاطرها تقول: اعرف اني قسيت عليك يا فهد .. بس لازم اسوي جي عسب تمل مني وننفصل ..


##################################
هند وهي تكلم منى
هند : كله منج يا منى انضربت بسبتج
منى : والله انا شو لي خص ..هذا اخوج المعقد
هند : والله صفعني بالقو لين الحينه احس بالالم
منى : هذا اخوج عفريت كيف شافنا
هند : ما ادري والله .. المشكله انه حذرني اروح وياج لو شافني اكيد بيذبحني
منى : الحينه انتي اونج سمعي كلامه بس بعد ما تزوجين مابيعرف وين رحتي ولا وين ييتي ..
هند : هي والله
منى : تعالي متى عرسج
هند بدلع : احم احم ماباقي شي
منى وهي غيرانه : وسالم شو اخباره
هند : والله تمام التمام بس تصدقين ما احصله وايد موبايله كله مشغول
منى : وماتعرفين مع منو
هند : يقول ربعي ..
منى : انتبهي مب يلعب على ذيله ترى الرياييل مالهم امان
هند ماسكه قلبها : وي باسم الله عليه لا تفاولين اعرف سالم واثقه فيه مستحيل يكلم ويشوف غيري اصلا ماخذني عن حب
منى بخاطرها (( يحليلج بعدج ماعرفتي سالم ))
هند : زين بخليج عيل بروح اكلم اختي نوره عسب نطلع اليوم ..ماباجي شي على عرسي ان شاء الله لازم من الحينه ادور على الفستان والموديل والمصمم
منى : اوكي عيل باااي

منى بعد ما بندت من عند هند بخاطرها (( والله قهرانا اكلم اكثر عن 10 شباب ولا اتزوجت لين الحينه وانا اللي عرفت هند على سالم وهي قبلي تزوجت لا وبعد اصغر مني صدق قهر ))

فهد في غرفته وايد متضايج وقرر يكلم ساره بكل هدوء عشان يعرف شو فيها
فهد يدخل الغرفه ويشوفها متلبسه : على وين رايحه
ساره وهي ماسكه شنطتها تبى تتطلع : بروح بيت امي ولا عندك مانع
فهد مستغرب: زين ليش ما خبرتيني
ساره : مب لازم اخبرك على كل شي وبعدين انا مب رايحه مكان غريب ابي اتغدى عند امي
فهد : زين على الاقل تساليني يمكن اروح وياج
ساره بعصبيه : وانت لازم كل مكان اروح اتييه ويايه .. امايه عازمه بنتها انت شو خصك ..
فهد عصب: ساره وبعدين وياج
ساره : ليش شو فيني
فهد : هاللي بساله شو فيج
ساره : ما فيني شي ابي اطلع يالله باي
فهد وهو ميود اعصابه وبهدوء : ساره يمكن دقايق اكلمج
ساره واقفه تبى تتطلع : سوري ماعندي وقت
فهد : قلت ما بأخرج بس دقايق
ساره يلست وهي ما تطالعه : نعم ..
فهد يلس عندها : ساره يا بعد عمري بلاج عليه سامعه شي .. متضايجه مني .. حد ضايقج بلاج .. والله ماكنتي جي .. ليش تغيرتي ..
ساره : اصلا محد يقدر يضايقني بس انا مليت من هالبيت ومليت من كل شي
فهد : باخذلج بيت ثاني اذا تبين بس ما احب اشوفج بهالقساوه
ساره وقفت : والله انا جي وتصرفاتي بتكون دوم جي .. تباني حياك .ماتباني ابرقها من ساعه
ساره وهي رايحه ..
فهد : شو قصدج
ساره صدت صوبه : افهمها مثل ما تبى او تعرف ان قصدي واضح عن اذنك

فهد واقف والدم يغلي بقلبه .. ساره عمرها ماكانت جي ..راح عند الريم
الريم وهي تقرى المجلات ..
فهد فتح الباب بالقو : الريم
الريم نقزت: وي باسم الله بلاك خوفتني الله يهديك
فهد : الريم بسرعه اتصلي في نوره قوليلها شو صار البارحه في بيت امها ..ساره بلاها متغيره اكيد هي تعرف شو سبب تغيرها بسرعه اتصلي فيها ترى والله ما اقدر استحمل
الريم : زين زين هد اعصابك
فهد : هي خلت فيني اعصاب ..اقولج صارت عنيده وتقهرني ..احاول ادوس على قلبي واكون زين وياها بس هي معانده يالريم ..
الريم ماسكه موبايلها : ولا يهمك اخويه الحينه بتصل في نوره بس انت ايلس وهد اعصابك
فهد : يلس ومنزل راسه ويحرك ريوله وايد منقهر ..

 

[الشوق]

مشاركة: مجنون سارة ,, قصة ٌ في منتهى الروعه

الريم وهي تتصل في نوره
نوره بفرح : مرحبا الساع هلا بالريم
الريم : هلا فيج شحالج يا نوره
نوره : بخير يسرج الحال وانتي شو اخبارج واخبار ساره
الريم : والله اخبار ساره عندكم
نوره استغربت: شو قصدج
الريم : ابيج تكلميني بصراحه يا نوره ..نوره شو صار البارحه في بيتكم
نوره بعجب: ليش
الريم : ساره من يوم ما ردت من بيت ابوج وهي متغيره وايد .صارت عنيده وقاسيه بالذات ويا فهد ..اقولج ساره تغيرت وايد وايد
نوره عرفت السالفه : ماعرف
الريم : شو صار البارحه هي كلمت حد ..مثلا كلمت خالد
نوره اكيد تبى تغطي السالفه : لا هي كانت زينه ويايه وما كلمت حد .. يعني عادي
الرمي : عيل كيف تغيرت
نوره : ماعرف ش اقولج
الريم : كلميها يانوره ..ترى حالة اخويه صعبه والله يغمض ..ماصدقنا على الله انها تتغير للاحسن ..
نوره : خلاص بكلمها وبرد عليج


الريم بعد ما بندت من عند نوره
فهد : ها شو صار
الريم : ماعرف ..هي بتكلم ساره وبتعرف شو بلاها
فهد : مستحيل مااستوى شي ..
الريم : خلاص ان شاء الله ما بيصير الا الخير
فهد : الله يعيني يارب .

نوره وهي تكلم ساره : ساره بلاج
ساره بحزن : ليش
نوره : الريم كلمتني وقالت انج متغيره اكيد من كلام خالد صح
ساره : خالد فتح عيوني .. على شي كنت ناستنه كيف كنت اضحك واسولف مع انسان دمر حياتنا
نوره : بس خلاص لازم تنسين هالشي .. ترى فهد ريلج
ساره : انتي تقولين هالكلام شو نسيتي ان فهد دمر حياة اخوج خالد يعني لازم توقفين ويا اخوج
نوره : انا ويالحق ..انا حاسه في اخويه والله بس بعد الله ما يرضى باللي يصير انتي متزوجه وحرام تفكرين بانسان ثاني
ساره : عسب جي ابي انفصل عنه واكون لخالد
نوره : وفهد
ساره : خالد اولى منه حبني من الصغر اما فهد من مده قصيره
نوره : ساره صدقت تغيرتي
ساره : قولي وعيت للصح .. بس كافي ما ابي اكمل حياتي مع انسان ما احبه
نوره : بس قبل ما قلتي هالكلام
ساره : قبل ماكنت احبه ولا اكرهه .. بس الحينه الوضع تغير .. انا ما اكره لا والله بس لازم اقسى عليه عشان يودرني
نوره : وتتوقعين فهد اللي يموت على الهوى اللي تتنفسينه بيودرج بهالسهوله
ساره : قبل كنت اتوقع ان هالشي صعب ومستحيل بس من ملامحه يوم كنت اقهره حسيت انه صدق عصب وتضايق واكيد بيصبر يوم يومين او اسبوع بس مستحيل اكثر
نوره : فكري باللي تسوينه
ساره : فكرت عدل
نوره : والله والله لو ادري ان خالد جي نيته جان ما خليته يكلمج
ساره : لا تتلومينه ..هالشي لا زم من زمان يصير
نوره : الله يعين
ساره : زين حبيبتي بخليج ترى توني واصله بيت امايه اوكي
نوره : بحفظ الله

~~~~~~~~~~~

ام عبدالله يالسه تكلم بنتها بالتلفون ..مر عبدالله
ام عبدالله : زين يا مريم اخليج الحينه ..
ام عبدالله : عبدالله
عبدالله صد : لبيه
ام عبدالله تاشر على الغنفه : ايلس شويه
عبدالله : ان شاء الله
ام عبدالله مستحيه من الكلام اللي تبى تقوله : اقول عبدالله ما في شي لين الحينه
عبدالله مستغرب : شو قصدج
ام عبدالله : يعني كملتو كم شهر اخاف مرتك حامل وانت ما تبى تخبرنا
عبدالله بابتسامه : لا والله بعدها .. ليش يا امايه مستعيله تونا بعز شبابنا
ام عبدالله : اي توكم الله يهديك في ناس من شهر الاول وحريمهم حوامل .. بعدين حلو يوم تكون بعز شبابك وولدك كبرك ..وانت تهتم فيه .. مب تكون كبير وشايب وولدك يهتم فيك
عبدالله : الله كريم يا امايه
ام عبدالله : الله يرزقكم بذريه الصالحه
عبدالله : ان شاء الله

عبدالله فكر بكلام امه .. ورد غرفته وهو يفكر بكلام امه
نوره تشوف عبدالله سرحان قربت منه وتلوح بايدها :
نوره : وين وصلت
عبدالله بابتسامه : بكلام امايه
نوره : ليش شو قالت
عبدالله ما يبى يزعل نوره : ها ولا شي ..
نوره : بلاك عبدالله
عبدالله : مافيني شي
نوره : توك تبى تقول شي وفجأه غيرت رايك
عبدالله يمسح على شعر نوره : حبيبتي ما فيني شي انتي لا تحاتين اذا بفكر ما بفكر الا فيج . يالله عن اذنج بروح اتسبح
نوره مستغربه : على راحتك حبيبي

نوره حست ان عبدالله فيه شي .. وقالت لازم تسال امه وهي اكيد بتقول شو قالتله لان عبدالله دوم يقول لنوره باصغر الاشياء يعني عمره ما خبى شي عنها ..



اما اشواق فهي تجهز احلى الملابس والبدل
فاطمه : شو تسوين ابي اعرف من الصبح تختارين بدله ودخلينها بالكبت وين رايحه
اشواق : قولي وين نبى نروح
فاطمه مستغربه : ليش حاطه ف بالج نروح مكان
اشواق :شو نسيتي اني بروح بيت ساره (( وهي ماسكه البدله )) عشان اشوف عمري فهد
فاطمه فاتحه عيونها : وانا قلت اكيد البنت عقلت ونست السالفه
اشواق : انا انساه ..مستحيل انساه
فاطمه : وان شاء الله متى حاطه بالج تروحين لهم
اشواق : اول شي مب بس انا اللي بروح انا وانتي .. وان شاء الله باجر بنروح لهم
فاطمه : بس لازم نخبرهم قبل
اشواق : الصبح بكلمها وبقول انا بنييه المغرب عشان اعطيهم هدية زواجهم
فاطمه : اشواق بلا قلة ادب هناك
اشواق : لا تخافين ما بسوي شي بس ابي اشوف فهد
فاطمه : قلبي يقول انج مخططه لشي
اشواق : لا صدقيني ما بسوي شي .. بس اللي ابي منج تاخذين ساره على صوب وتسالينها اذا هي سعيده بحياتها ولا لاء وصدقيني لو كانت مستانسه بودرهم بهدوووء
فاطمه : واذا لاء
اشواق : طبعا ما بودر فهد ..
فاطمه : خلا اروح عنج احسن
اشواق : قبل ما تروحين لاتنسين باجر ان شاء الله
فاطمه تهز راسها : لا حول ولا قوه الا بالله الله يستر منج
اشواق بابتسامه : وواثقه ان فهد وساره حبهم مستحيل واني بكون لفهد ..


فهد هل راح يمل من تصرفات ساره وبينفصل عنها ؟
وهل راح يعرف بخطط ساره وخالد ؟
اشواق شو اللي تخططه ؟ و هل راح تتقرب من فهد وتاخذه ؟
نوره شو اللي ينتظرها ؟
شو اللي بيصير بينهم !!

تــــــــابعونـــــــــا !
نبي توقعــــاتكُـــم !

 

[حكايا الشموع]

مشاركة: مجنون سارة ,, قصة ٌ في منتهى الروعه

مشكورة اختي الشوق
وننتظر الجزاء الباقية

تحياتي

 

[اليوم الآخر]

مشاركة: مجنون سارة ,, قصة ٌ في منتهى الروعه

تسلمـــــــــــــــين والله

وننتظر الباقيييييييييييييييييييي

 

[الشوق]

مشاركة: مجنون سارة ,, قصة ٌ في منتهى الروعه

آسفَـــة ع التَـــأخيـــر !


تَفضـــلو الجِـــزء !

! الجزء السادس والاربعين !





ساره راحت بيت امها وتفكيرها كله بانها كيف تقنع فهد انه يودرها

اما فهد فما قدر يطلع من البيت وهو يفكر بحبيته ساره اللي مايعرف شو سبب قسوتها المفاجأه ويبى يعرف شو السالفه بس ما يعرف كيف ..

اما نوره فماقدرت تسكت اكثر لان عبدالله كان يبى يقول شي وسكت وهي تعرف ان اكيد امه قالتله شي وقررت انها تعرف باي طريقه عسب( عشان ) جي راحت عند ام عبدالله اللي هي ام ريلها
ام عبدالله يالسه في الصاله تشوف الاخبار
نوره بكل ادب تحب راس عمتها اللي هي ام ريلها : سلام عليج عمتي
ام عبدالله بابتسامه : هلا ببنيتي .. وعليج السلام حياج
نوره يلست عندها : الله يحيج .. . شو تسوين
ام عبدالله : اشوف هالاخبار اللي تعور القلب
نوره : مدام تعور القلب لا تشوفين شو تبين بالحزن
ام عبدالله : شو نسوي يا بنيتي لازم نعرف اخبار العالم وبعدين ما شي برامج زينه بالتلفزيون
نوره تبى تفتح السالفه بس ماتعرف كيف نوره وهي تلعب باصابعها وتفكر : ممممممم اقول عمتي شوسالفة عبدالله اشوف سرحان بكلامج .
ام عبدالله تضحك : والله ليش هو قالج
نوره : عبدالله ما يخبي شي عني بس هالشي ماقالي يمكن اسرار بينكم بس شفته سرحان واستغربت
ام عبدالله : ما شي بس كنت اقنعه انه ما ياجل بالاطفال ولا تمنعون
نوره حست بالاحراج : ليش هو قالج انا نمنع
ام عبدالله : حسيت من كلامه جي قال تو الناس ونحن صغار وفهمته وقلته ان احلى شي انكم اتمون صغار و عندكم يهال مب تعيزون وهم اللي يربونكن بدل ما انتو تربونهم
نوره بحزن وهي منزله راسها : هي صح كلامج
ام عبدالله : انا مب قصدي شي يا نوره يعلم الله اني اعتبرج كبنت لي ..بس توقعت انكم ما تبون تخبروني يعني تسوون مفاجأه لي ..
نوره رفعت راسها : لا اكيد اول ما يصير الحمل اول وحده راح اقولج ..
ام عبدالله : ادريبج اصليه يا بنتي صدق عرف ولدي يختار
نوره : تسلمين عمو ما قصرتي هذا من طيب اصلج

نوره استاذنت عمتها وراحت غرفتها واول ما وصلت غرفتها تمت منسدحه على السرير وهي تصيح من الخاطر تخاف ام عبدالله تقنع عبدالله يتزوج عليها او ان عبدالله ما بيحبها مثل قبل اذا تاخرت من الحمل



ساره ردت من بيت امها وهي متضايجه وكارهه حياتها ماتعرف كيف تتصرف كانها تايهه.. مره مع قلبها اللي يقول خالد ومره مع عقلها اللي هو فهد واللي عقلها يقولها انها لازم تكون مع زوجها لانه في النهايه هو زوجها وحلالها

فهد يترياها بالغرفه وشافها يايه ..
فهد : تاخرتي وايد يا ساره
ساره من غير نفس : شو اسوي يعني تباني اييه بالطياره ساره فتحت كبتها ( خزانتها ) وتمت تاخذ اغراضها عسب اتوديه باجي ملابسها بالغرفه الثانيه
فهد يشوفها ومستغرب : وين بتودين ملابسج
ساره وهي شاله ملابسها : وين بعد بالغرفه الثانيه ولا عندك مانع يا سيد فهد
فهد : ليش ااذا كان عندي مانع بتسمعين كلامي
ساره باستهزاء : طبعا لاء عن اذنك
فهد : ساره يمكن اعرف شو فيج
ساره صدت : قلت لك ما فيني شي .. بس انا وعيت للصح
فهد : الصح انج تجافيني وتعامليني بالقساوه والله لو ريال ثاني جان ما رضى

ساره : يعني شو بيسوي الريال الثاني او بيضرب زوجته او بيهجرها او بيطلقها وانا صدقني ما يهمني اي شي منهم سو اللي تباه
فهد : انا مب من النوع اللي ما تفاهم بس اتمنى ما تجبريني على اي شي
ساره : عادي عندي صدقني
فهد تقرب منها : ساره تعرفين اني مستحيل أأذيج لاني اتنفس هواج وانتي كل دنيتي بس انتي وايد قاسيه معايه من وين يبتي هالقسوه فجاه
ساره : الحب من طرف واحد ما ينفع يا فهد لو شو يصير
فهد : كيف تبين الحب يكون من طرفين وانتي كل مره تبتعدين عني اصلا انتي ما تعطيني فرصه اتقرب منج
ساره : عطيتك بمافيه الكفايه
فهد : اي فرصه تتكلمين عنها كل ما تقرب منج تبتعدين كل ما ابي اقولج شي تسكتيني بس بالفتره الاخيره كنتي شوي زينه ويايه .. الحب يمكن يكون من طرفين اذا الطرف الثاني عطاه عمره فرصه.. ياما ناس كانو ما يحبون ازواجهن بس الحينه شو في كيف يموتون عليهم
ساره : بس انا غير
فهد : انتي مب غير عنهم بس انتي حد لاعب براسج ومغير تصرفاتج
ساره بعصبيه : جي تشوفني ياهل حد يقص عليه او يغير تصرفاتي
فهد بعصبيه اكثر : عيل يمكن تقولين شو سبب هالتغير المفاجئ
ساره : قلت لك وعيت للصح وبعدين ما ابي ارمس زياده بروح انااام
فهد : دايما يوم تبين تتهربين تقولين جي
ساره صدت وطنشته وراحت الغرفه الثانيه
فهد عصب وضرب بايده على اليدار ( الجدار) وهو معصب ويقول ( يالله كيف اتصرف معاها ما اقدر استحمل اكثر والله تعبت تعبت )

ساره وهي بالغرفه الثانيه متسانده على السرير ومتضاجيه من اللي تسويه بس ما في ايديها شي لانه هاي الطريقه الوحيده اللي تقدر تخلي فهد يمل منها وتقدر بسهوله تنفصل منه


وفي اليوم الثاني

هند تكلم نوره وتحاول وياها عسب تروح تجهز حق عرسها لان ما باجي شي على عرسها
نوره وهي ماسكه راسها : والله ما قدر اليوم صدق مصدعه
هند : هيه لو حد ثاني ما بتقولين شي بس حقي مصدعه بس اخت على فاضي
نوره بعصبيه : هند بلا حركات اول مره اردج كل مره ما اقصر وياج يا ناكرة المعروف
هند : والله اهم شي عندي هالايام اذا انتي مارحتي ويايه منو اللي بييه ويايه.. ترى بروح ويا منى
نوره : هذا ويهي اذا خالد خلاج
هند : يعني حاله محد بييه ويايه ما باجي شي على عرسي رحمي حالي
نوره : هند والله مصدعه اليوم ..
هند : شي اختراع اسمه بندول ما سمعتي عنه
نوره : تستعبطين وياويهج
هند : والله ذبحتيني مصدعه مصدعه اكيد هذا عبوود مخرب راسج البارحه صح
نوره عاقده حياتها : منو عبود
هند : ريلج بعد منو
نوره : ايييييه احترمي عمرج شو اصغر عيالج
هند بدلع : عادي نسيبي ريل اختي
نوره : لانه ريل اختج احترميه وتبين ادلعين حد دلعي ريلج سالم
هند : وي ويعلني فدااااااااااااه اصلا الدلع كله له
نوره بصوت واطي : مالت عليج وعليه
هند شو قلتي
نوره مب متفيجه حق حشرتها ( ضرابتها) : ولا شي الحينه يمكن تخليني
هند : زين بس باجر اذا ما ييتي ويايه بتشوفين شو راح اسوي

نوره : اقول هند ترى انا ما احب التهديداات ..اقدر بكل بساطه اقول ما بييه وياج
هند : لا فديتج لا تزعلين الحينه زعلي بعد عرسي ترى انا محتايتنج ما عندي غيرج
نوره : زين عرفتي هالشي يالله باي
هند وهي منقهره : باااي



خالد من الصوب الثاني يحاتي سالفة ساره ويا فهد وشو اللي صار بينهم ويبى يعرف شو السالفه فما عنده حل غير الواسطه نوره تقدر تقوله شو السالفه واتصل فيها
نوره وهي ترد وتعبانه
نوره : اليوم العايله كلها متصله فيه شو السالفه اليوم اخاف عيد الاخت
خالد : ههههههههههههههههه جيف حالج يا اختي الغاليه
نوره : يسرك الحال وانت شحالك
خالد بخير
نوره : متصل بهالوقت اكيد تبى شي اعرفك
خالد يضحك باستهزاء : فاهمتني يعني
نوره : الله يستر خير يا اخويه
خالد: بغيتج ما عليج أماره تتصلين بساره وتعرفين منها شو استوى بينها وبين هالنذل فهد يعني فهد مل منها ولا بعده ما قرر ينفصل عنها
نوره بجديه : خالد انت تسولف ولا
خالد : لاصدق ارمس وياج ليش
نوره : اسمحلي خالد بس صح انا في البدايه غلطت بس هذا مب يعني اني اكون وياك ويعلم الله اني مادريت باللي تبى تقوله لساره ولا جان ماساعدتك .. واخر شي تباني اخرب علاقه زوجيه هالشي حرام والله ما يرضى عليه
خالد : يعني انتي واقفه ويا فهد مب ويا اخوج
نوره : انا واقفه ويا العقل وويا الصح وبعدين الريم اخت فهد متصله وتسال عن جفاء وقسوة ساره حتى فهد مستغرب والصراحه تلومت فيهم وحسيت اني انا السبب
خالد : يستاهل اكثر خلا يحس بالقهر اللي فيه هو يوم واحد وجي انقهر عيل انا شو اقول بالاشهر متعذب
نوره : والله عاذرتنك بس انا ما اقدر اوقف وياك لان ساره متزوجه لو مب متزوجه جان صدقني سويت المستحيل وبخليها تكون لك
خالد معصب : يعني ما بتكونين ويايه ولا بتساعديني
نوره : السموحه ما اقدر اساعدك لانك على غلط حتى لو كنت انت اخويه
خالد : الله يسامحج بدل ما تكونين ويايه هذا اونج تعزيني وما ترديلي طلب
نوره : والله يا خالد يعلم الله اني اعزك واحبك بس ما اقدر ادمر حياه زوجيه والله ما يرضى على هالشي وانت اخويه وكل شي بس ما اقدر اوقف ويا الخطا مهما يكون افهمني
خالد : خلاص مشكوره ما قصرتي انا بتصرف
نوره استغربت : كيف يعني بتتصرف شو بتسوي
خالد : خلاص قلت انا بتصرف افمهم بخليج الحينه يالله مع السلامه
نوره بعد ما صكت من خالد استغربت من خالد واتوترت خافت ان خالد يسوي شي لان خالد دومه ويا عاطفته مب بعقله


خالد طبعا ما عنده حل ثاني الا انه يتصل بساره وطبعا هو حافظ رقمها من ايام الخطوبه وقرر يتصل فيها عسب يعرف شو اللي صار بينها وبين فهد
ساره بغرفتها رن موبايلها وهي تبى تشيل الموبايل شافت رقم وهي مستغربه من المتصل وقالت انها بترد :
ساره : الو
خالد بفرح : هلا باللي ماخذه العقل كله
ساره فتحت عيونها : خالد
خالد : هي خالد ما غيري
ساره تصد يمين يسار تخاف حد يشوفها : خالد انت ليش متصل
خالد : اول شي شو اخبارج
ساره : والله احر ما عندي ابرد ماعند يا خالد ..خالد ليش متصل
خالد : ليش يعني ما تبين تكلميني
ساره : لا بس ما اقدر اكلمك وما يستوي اكلمك صح نحن اتفقنا اني اسوي المستحيل عسب انفصل من فهد بس مب اكلمك لا تنسى اني لين الحينه بذمت ريال
خالد : انا ما يهمني
ساره / بس انا بعد ما اقدر اكلمك والله ما ايوز وحرام
خالد : انا مب ياي عسب شي والله ابي اسالج شو سويتي عن سالفتج ويا ريلج الخايس
ساره : ليش ما قلت خلا نوره تتصل مب انت
خالد : نوره اونها تقول ما ابي اكون ويا الغلط
ساره بحزن : والله معاها حق
خالد : ساره شو جنج تبين تغيرين رايج .. شو نسيتي كلامنا
ساره : والله ما نسيت الدليل اني قسيت على فهد وايد واحيانا احس بتأنيب الضمير
خالد : الله يخليج ودري عنج الطيبه هالايام
ساره : حرام هو ما اذاني
خالد : شو نسيتي انه السبب بدمار حياتنا لو لاه جان نحن الحينه متزوجين تصدقين اقول احيانا ياريت خبرنا عليه الشرطه وشتكينا عليه
ساره : مستحيل اسويها لاتنسى انه اخو ربيعتي الريم وكيف اشتكي على اخو ربيعة طفولتي مب حلوه
خالد : المهم فهد مل من تصرفاتج
ساره : احس جي .. بس يباله وقت
خالد : انا معاج لاخر عمري يا ساره وعمري ما بفكر بغيرج
ساره : المهم خالد بخليك الحينه جنه حد ياي اوكي الله باي
فهد دخل على ساره فجأه وشاف الموبايل بايدها وهي متوتره فهد بتعجب : بلاج متوتره
ساره صدق توترت خافت ان فهد سمع كلامها ويا خالد : ها ولا شي بس جي
فهد يشوف الموبايل : شو كنتي تكلمين منو
ساره : ما اكلم حد كنت بتصل بامايه وبعدين يمكن اعرف ليش هالتحقيق كله
فهد : شفتج متوتره وقلت بشوف بلاج
ساره : وبعدين يا فهد لازم يكون عندك شوي من الادب والاحترام يعني ما تقدر تستأذن قبل ما تدخل
فهد وهو واقف عند الباب مستغرب : أستأذن على مرتي
ساره : هيه تستاذن واتمنى مره اليايه تستأذن مب تدخل بهالطريقه اوكي
فهد عصب وطلع برع وصط الباب بالقو
فهد : لا حول ولا قوه الا بالله ..

الريم تشوف فهد مصعب وهو واقف عند الباب
الريم : بلاك فهد
فهد وهو يبى يروح : مافيني شي
الريم : فهد
فهد صد : خير
الريم : بلاك يا فهد ليش معصب
فهد : قلت ما فيني شي ولا تعرفين والله تمنيت موتي ويا امي قبل ما اشوف هالمعاناه بحياتي
فهد راح وهو معصب ومنقهر
اما الريم فتمت تصيح على كلام فهد ..
الريم وهي تمسح دموعها : ليش يا فهد تقول جي لو صار لك شي انا اللي بموت ماعندي غير الله ثم انت .. الله يسامحج يا ساره ما توقعتج بهالقساوه

 

[الشوق]

مشاركة: مجنون سارة ,, قصة ٌ في منتهى الروعه

اشواق وهي ماسكه الهديه : ها يا فاطمه شرايج بالهديه فاطمه : الصراحه الساعه غاويه بس من وين يبتي جيمة هالهديه ترى الساعتين ماركات
اشواق : ما يا عليه وايد الساعتين يمكن ب6000 درهم يعني من الماركات الزينه
فاطمه : زين من وين يبتي الفلوس
اشواق : شويه من عند امايه وشوي من ابويه وها دبرت عمري
اشواق / الحينه بدل ما تخسرين حق غيرج جان استفدتي من هالفلوس حقج
اشواق : شوفت فهد عندي بالدنيا كلها
فاطمه : الله يهديج
اشواق يالله تجهزي اليوم ان شاء الله بنروح
فاطمه : اتصلتي بساره



--------------------------------------------------------------------------------

اشواق : بتصل فيها الحينه وبقول خلا فهد يتم في البيت بعد عسب اشوفه
فاطمه/ انا مالي خص انتي اتصلي
اشواق : هيه اكيد



نوره طبعا من كلام ام ريلها كانت وايد متوتره وحزينه
وهي تكلم ساره
ساره : زين ليش هالدموع كلها
نوره : اخاف امه تقنعه وتخليه يتزوج عليه
ساره : مستحيل امه وايد تحبج
نوره : صح بس سعادة الولد اهم
نوره : بس انتي بعدج ما كملتي سنه على زواجج يا نوره
نوره : عيل ليش عبدالله ما قالي ..شو قالت امه له
ساره : ما حب يزعلج يعرفج حساسه
نوره : ساره والله بموت اذا عبدالله خذ غيري ما اقدر بدونه
ساره : بعيد الشر عنج لا تقولين جي مستحيل عبدالله شارنج ويحبج مب من هالنوع من الشباب اللي ما يتريون على طول يتزوجون
نوره : خايفه حد يقنعه ماعرف شو اسوي
ساره تذكرت شي: صح نوره تذكرت انتي رحتي للعياده صح وقالو ان ما فيج شي
نوره تهز راسها : هيه
ساره : زين وعبدالله راح فحص
نوره استغربت : لا
ساره : لازم بعد الريال يفحص
نوره : شو تقصدين
ساره : والله مب قصدي شي بس مثل ما انتي فحصتي لازم الريال يفحص ويشوف
نوره : قصدج يمكن العيب منه
ساره : والله ما ابي افاول عليكن بس اقول لازم كل منكم يفحص ولا الفحص بس للحريم
نوره : مستحيل اقول حق عبدالله هالشي احس بهين كبريائه
ساره : ليش الفحص يقلل من رجولة الشخص .. بس عسب كل منكم يطمن ..وبعدين انتي ييبيها بسياسه عسب ما يشك انج قاصده تجرحينه
نوره : ماعرف والله
ساره : انا اقول عسب تطمنين اكثر وتعرفين شو السبب
نوره : لا ان شاء الله ما يكون فيه شي
ساره : والله اتمنى هالشي ..واتمنى الله يرزقج بذريه صالحه يا نوره انتي طيبه وتستاهلين كل خير
نوره وهي مسحت دموعها :الخير بدربج وممشاج يا ساره
ساره : اوكي حبيبتي يالله من رخصتج ..
نوره : اسمحيلي ساره اذا ازعجتج ترى ما عندي غير الله ثم انتي اشكيه له
ساره : لا تقولين جي ترى انا مب بس بنت خالتج انا شرات اختج
نوره : هي وربي
ساره : يالله بحفظ الله

واشواق طبعا بعد ما كلمت ساره وقررو ايون بيتهم طبعا مع وجود فهد بعذر هدية زواجهم ..ساره طبعا ما مانعت هالشي لانه ساره تحب زيارة الضيوف وايد ولانه فاطمه كان ربيعتها في المدرسه بس مب وايد ربيعتها يعني كزميله لها ..

اشواق وهي متجهزه ومتكشخه : واخيرا بروح بيتهم
فاطمه : اشوق ما وصيج اثقلي الله يخليج بلا فضايح
اشواق : جي تشوفيني خفيفه
فاطمه : ما ادري عنج
اشواق : يالله تجهزتي
فاطمه : هيه ..جي مثلج كانج رايحه عيد ميلاد..
اشواق ( كانت متكشخه زياده عن اللزوم ولبست احلى ما عندها هذا غير العدسات والمكياج الكامل هذا كله طبعا عسب تتجذب فهد ))
ساره وهي لابسه جلابييه غاويه بلون التركوازي والجلابيه وايد فخمه وحلوه ورفعت شوي شعرها وحطت مكياج خفيف وايد مع لمعه على شفاتها )
ساره راحت غرفة فهد عسب تشوفه اذا جاهز : شو جاهز
فهد لابس كندورته وعقال وغترته يعني عادي بس كان وايد وسيم لانه بالعقال والغتره ( الشماغ ) يطلع احلى بوايد
ساره : خلصت
فهد وهو يعدل غترته : يعني شو يباني جي انا حرمه يبالي ساعه اتجهز
ساره طنشته وهي تبى تروح
فهد ساره هم ليش يايين
ساره : يعني حرام رباعتي يزوروني
فهد : لا بس حبيت اسال يعني اذا شي مناسبه
ساره : يبون يزورونا لانهم كانو ويانا بشهر العسل اونه شهر العسل ( تستعبط )
فهد صد : منو قصدج
ساره : اشواق وفاطمه
فهد تذكر اشواق وتصرفاتها لانها وايد جريئه: زين انتو حريم لازم اتمون ويا بعض انا شو دخلني مب حلوه ريال بينكم
ساره : لا تطول باليلسه اذا ما تبى وبعدين انا ما قلت اني ابيك تيلس هم اللي قالو يمكن حسب ما قالو يبون يعطونا هدية زواجنا
فهد : زين خلا يعطونج الهديه انا ما احب ايلس ويا الحريم والله مب حلوه
ساره وهي رايحه : فهد الله يخليك مب متفيجه ..تم بس دقايق وروح اذا تباه


ساره جهزت كل شي اما الريم فتمت بالصاله تتريه الضيوف
وساره بالمطبخ مع الطباخ عسب تشوف الاكل

اشواق وفاطمه يو واشواق طايره من الفرح
ساره طلعت من المطبخ يوم سمعت الجرس: اكيد هم
ساره : الريم روحي الله يخليج زقري( نادي ) اخوج
الريم مستغربه : اخويه شو يخصه بالسالفه
ساره : الحينه روحي زقريه بعدين بخبرج
الريم : اوكي
ساره استقبلتهم مرحبا الملايين هلا والله
\اشواق : هلا فيج
فاطمه وهي تحب ساره : شحالج يا ساره
ساره : بخير يسرج الحال (تأشر بايدنها )) تفضلو ليش واقفين
اشواق وهي تشوف البيت من فوق وبصوت واطي تكلم فاطمه :شو في البيت محلاه وايد فخم
فطمه :قولي ماشاء الله اخاف البيت يطيح علينا
اشواق : جي تشوفني الحسود ام النار يعني
فاطمه : العين حق ..وبعدين هذا وبيتكم حلو وجي تقولين عيل لو بيتكم عادي شو بتقولين
اشواق وهي معصبه : ما بقول شي ..
ساره والريم يالسين وياهم وفهد بغرفته
ساره مع فاطمه يرمسون اما اشواق فتصد يمين يساره تتريه المنتظر فهد
ساره شات اشواق مب وياهم : وين وصلتي
اشواق : ها وووولا مكان قصدي وياكم
ساهر تضحك : والله ما اعتقد ويانا اللي ماخذ عقلج يتهنابه
اشواق استحت
فاطمه بنفسها ( والله لو تعرفين يا ساره ان اللي بعقلها هو ريلج جان ما اتوقع قلتي هالرمسه ))
الريم بابتسامه : عيل جي سوالفكم
فاطمه : هيه والله ..اقول ساره ما دريت عندج اخت ريل جي حلوه ماشاء الله
الريم استحت : لازم ماخذه من حلاة مرت اخويه
ساره ابتسمت : اصلا الريم حلوه ماشاء الله من صغرها

فهد دخل عيلهم وهو طبعا ثقيل : السلام عليكم
اشواق شوي بيغمى عليها تمت تشوفه وبرقه : وعليكم السلام
فهد يلس بغنفه بروحه ..
اشواق عيونها على فهد..
اشواق وبرقه : زين فهد ياي عسب اعطيكم الهديه


ساره : ليش كلفتي على عمرج
اشواق وعيونها على فهد : ولا كلافه ولا شي ..لازم هديه زواجكم
اشواق طلعت الهديه وعطت حق سار ه : تفضلي هاي مني ومن فاطمه ..<< (طبعا عسب محد يشك اذا عرفو ان الهديه بس منها ))
ساره : تسلمون والله ما قصرتو
فهد :ماكان له داعي
اشواق : بالعكس له داعي ترى نحن مب غرب
اشواق اتفقت ويا فاطمه من زمان انها تاخذ ساره على صوب عشان تعرف اذا هي تحب فهد ولالاء
اشواق تبى تنفذ اللي براسها: ساره لو سمحتي يمكن موبايلج لاني نسيت موبايلي وابي اتصل في امايه واقولها انا شويه بنتاخر
فاطمه استغربت تعرف ان اشواق عندها موبايل
ساره بابتسامه : اكيد تفضلي
اشواق /مشكوره
وفاطمه لان اشواق طلبت منها انها تاخذ ساره بالغرفه عشان تعرف عن ساره وعلاقتها مع فهد اكثر
..اما الريم فهي في المطبخ تشوف شو التجهيزات
اشواق استاذنت من ساره اونها تبى تتصل في امها ومن هناك كانت تدور على رقم فهد..ومني ومناك وهي تدور على الارقام حصلت مكتوب فهد وعرفت وتاكدت انه اكيد هو وخذت الرقم
فهد كان يدور على ساره دخل الصاله وماشاف غير اشواق .. اللي كانت يالسه بعد ماخذت اللي تباه اللي هو رقم فهد
فهد :عيل وين ساره
اشواق وقفت بابتسامه : ساره ويا فاطمه ..ليش بغيت اقولها شي
فهد : لا مشكوره اختي بس حبيت اقولها اني مروح
اشواق : ليش تو الناس ما يلسنا وياك ..
فهد : المره اليايه ان شاء الله
اشواق /تذكر يا فهد يوم كنا يالسين ويا بعض في استراليا بس ماكنت ترمس وكان فيك غموض
فهد منزل راسه : هيه زين عن اذنج بروح اوكي
اشواق : بحفظ الله يا فهد

اشواق مستانسه حدها لانها رمسته اول شي وبعدين لانها خذت رقمه بدون ما حد يعرف
(( وطبعا هالشي اولا حرام والله ما يرضى عليه ..وكافي انها تبيع عمرها وترخص عمرها ))

اشواق وفاطمه بالسياره بعد ما روحو البيت
اشواق : ها كلمتي ساره
فاطمه : هيه وسالتها كيف انها كانت لخالد وبعدين استوت لفهد قالت ان هالشي غصبن عنها
اشواق استانست : شفتي ما قلت لج قلت ان الحب من طرف واحد والله اني حسيت هالشي من ملامح فهد وبعدين شو قالت
فاطمه : ما حبت تفصل وايد عن حياتها وغيرنا السالفه
اشواق : ياريت لو ساره اللي تحبه وفهد اللي ما يباها يعني العكس عسب يسهل يحبني
فاطمه: انتي شو تخرفين
اشواق : ولا شي..

بعد ما اشواق وفاطمه روحو بيتهم

ساره بعد ما بدلت ولبست لبس البيت
الريم لاحظت شي وراحت غرفة ساره ..
الريم واقفه عند الباب : يمكن ادخل
ساره وهي تمسح المكياج : اكيد حبيبتي
الريم : شو استانستي اليوم
ساره : هيه استانست سوالف فاطمه حلوه
الريم : واشواق مول ماترمس
ساره : يمكن ما تعودت علينا
الريم : ساره مالاحظتي شي
ساره صدت صوب الريم : شو
الريم : اشوا ق يوم فهد دخل وايد تمت تشوفه
ساره : مالاحظت وبعدين خلا تشوفه
الريم: معقوله ما تغارين
ساره : ليش شو صار ...
الريم : بس نظراتها مب عاديه مبين انها معجبه فيه
ساره : عادي خلا تنعجب فيه .. شو يعني
الريم مستغربه : والله غريبه انتي ..لو وحده ثانيه جان عصبت
ساره : قلتي لو وحده ثانيه مب انا
الريم : لانج واثقه ان فهد يموت عليج ومستحيل يشوف غيرج .. بس لو مب واثقه جان غرتي
ساره : لا حتى لو واثقه اذا صدق حاسه بالغيره بغار لانه الغيره نابعه من القلب وبالذات من الحب
الريم بحزن : شو قصدج قصدج انج ما تحبين فهد
ساره سكتت ما قالت شي



شو اللي بيصير بين اشواق وفهد ؟
هل اشواق بتخلي فهد يبتعد عن ساره ولا فهد بيصدها ؟
نوره بتقدر تقنع عبدالله انه يفحص ؟ وهل بيطلع العيب منه ؟
ساره بتغار من اشواق؟ وهل بترد لخالد ؟
ارق تحيَـــة
][ الشوق ][

 

[حكايا الشموع]

مشاركة: مجنون سارة ,, قصة ٌ في منتهى الروعه

مشكورة اختي الشوق
وننتظر الاجزاء الباقيه

وان شاء الله ما تتأخرين علينا

تحياتي

 

[رهف]

مشاركة: مجنون سارة ,, قصة ٌ في منتهى الروعه

ننتظر؟؟!!

قصة روعه

 

[اليوم الآخر]

مشاركة: مجنون سارة ,, قصة ٌ في منتهى الروعه

تسلمين والله .....