::][مــــوعــــد مــع الـــســـــعـــادة][ :: قصه في منتهى الروعه

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الجمعه..
المكان: بيت ام سلطان...
الوقت: الواحدة ظهرا...
--------------------------------
(ناصر)...

سكرت عن علي التيلفون بعد مابلغته بقراري.... مزاجي مايتحمل اني اقعد في العين اكثر...عشان جي بسافر معاهم وبغير جو...يمكن ارتاح شوي من الهم اللي فيني....
كفايه اني من امس وانا رقادي متقطع بسبب مهرة وطيحتها وخوفي عليها....اخاف صابها شي.... طيحتها عووفه....
تمنيت مية مره من امس لليوم اني كنت عدالها وقت ماطاحت عشان امسكها او عالاقل..اخفف من طيحتها...
بس من اتخيل الشكل اللي بنكون عليه ادرك انه بيسبب المشاكل الكبيره لمهرة ولي...انا ماهتم بنفسي لكن ماريد المشاكل اكثر لمهرة...!!...
كنت اتمنى اني يبت الدفتر معاي هالمره...بس خليته في الكبت ورفضت اني احطه في الشنطه عشان اعود نفسي اني ما اشوفه دايما...لكني احس اني بحاجته احين....
انا مريض...شو فيني.؟ مب صاحي والله....
كنت يالس على مقدمه سيارتي ..ماسك تيلفوني والعب به بدون انتباه..لانه بالي كان مشغول في شي ثاني... مادريت الا وحد واقف جدامي...
رفعت راسي وانصدمت بعيون نوره...
ناصر:......هلا نوره...
نورة: ناصر..!!...شفيك يالس في الشمس..؟!!..
ماعرفت شو اقولها.... احين شو يايبنها هذي عندي ...!!
ناصر: حسيت ببروده قلت اوقف هني شوي..
نورة: انته اصلا مب طبيعي ....شفيك.؟
ناصر: ماشي...
سكتت نورة... وبعدها قالت بتردد..
نورة: آآآه..ناصر..!!.. من شوي قبل ماتطلع...حسيت يوسف يتكلم عني..صح؟
رفعت نظري وانا معقد حياتي.... هذي شو بالضبط؟ جنيه والا آدميه..!!...
ناصر: هي...صح...
نورة: شو كان يقولك..؟؟؟...
ماجاوبتها...بالتالي اعتدلت في يلستي وقلت لها بتهور..
ناصر: نوره..اسالج سؤال..؟
نورة: اكيد..
ناصر: كم واحد تقدم لخطبتج ورديتيه..؟!!..
ابتسمت نوره وقالت بفخر...
نورة: وايدين...
ناصر: حرام عليج اللي تسوينه....بتظيعين مستقبلج..
نورة: كل حد له نصيب ياخذه...
ناصر: منو تترييين يخطبج بالضبط..؟!!...
اطالعتني نوره بنظره وبعدها نزلت عيونها للارض.....انا مب غبي...فاهم عليها...ودامني فتحت السالفه خلني اقولها وارتاح....
ناصر: نوره...سمحيلي بس..اذا كنتي تتريني انا...شلي هالفكره من بالج... انا مابخطبج...
رفعت نورة نظرها لي متفاجاه....نظرة مصدومه.... ظربه في الكبرياء ماتوقعتها...
ناصر: رجاءا لا ترفضين الرياييل بسببي... لا تقطعين نصيبج بايدج تسمعيني..!!.. والسموحه منج...
خليتها بصدمتها ودخلت داخل البيت...ورجعت مكاني عدال يوسف...
-----------------------------
اليوم: الجمعه...
المكان: بيت خلفان..
الوقت: الخامسة مساءا..
----------------------------
(سهيل)...

دخلت البيت ادور شخص محدد... كنت ابا مهرة بموضوع مستعجل... يوم دخلت الصالة حصلتها تتكلم في التيلفون... اول ماشافتني اشرت لي عشان ايي...
سهيل: شوو.؟؟ حد يباني عالتيلفون.؟
اشرت لي مره ثانيه بالنفي... وقعدت تسويلي حركات تحاولت فهمني...اخر شي فهمت انها تبا تسكر وتباني اسويلها عذر...جان اتحنحن واقولها بصوت عالي..
سهيل: مهرووووووووووه....سكري التيلفون وتعالي اباج....
ابتسمت مره وقالت ..
مهرة: ان شاء الله... آآه اقوولج سلوى بخليج احينه اوكي اخويه يباني وشكله معصب.....اوكي....باجر ان شاء الله.....مع السلامه...
سكرت مهرة وهي تتنهد بارتياح...
مهرة: يزاك الله خير....
سهيل: انا فعلا اباج بموضوع... ..
واستغليت فرصه ان الصالة فاظيه ويلست عدال مهرة عالكرسي...
مهرة: خير سهيل...شفيك؟
سهيل: وليش متروعه..سمعي...اليوم عملية شويخ..
مهرة: بعدها عينها وارمه..؟!!..
سهيل: شفتها امس..خف الالتهاب لكن الورم بعده مايخوز هذا الا بعملية...
مهرة: بس هي مب طايعه تسير المستشفى...
سهيل: ادري..بس بنوديها غصب... راشد تكلم مع الدكتور اللي عالجها وقاله هاتها بعد المغرب لانه هو متواجد في المستشفى وبيسوي لها العملية...وقال انها بسيطه جدا يعني ماتستاهل هالتعقيد الي مسوتنه شويخ..
مهرة: شويخ خايفه من الابر والمشارط...
سهيل: ادري...بس بيبنجون عينها مابتحس...بس لازم هذا ينشال..
مهرة: انزين وكيف بتشلوونها غصب وهي رافضه مابترومون لها...
سهيل: سمعي... نحن بنسير بيتهم انا وراشد وبقولها اني بوديج السينما وبعزمها عالسيره ...وبنسير نحن الاربع...انا وانتي وشويخ وراشد...وبنقص عليها وبنوديها المستشفى... هناك مابتروم ترفض وتستقوي..مابتسوي فضيحه جدام الناس..
مهرة: حرام عليكم جي تسووووبها...
سهيل: هي اللي يابته لنفسها... المهم انتي بعد المغرب خلج جاهزه وسوي نفسج متحمسه لسيره السينما انزين؟
مهرة: اووكي...والله يستر شو بيصير من تحت روسكم...
ابتسمت...
سهيل: بيصير كل خير ان شاء الله...

وبعد المغرب...

رحت انا لبيتهم واستقبلني راشد... واتفقنا شوي على خطتنا وقعدنا نظحك ونحن نتخيل شكل شويخ... راشد بيتكفل وبيرمس امه عشان تعطيه بطاقة شيخه الصحية الخاصه بالمستشفى..... دخلت البيت مسوي عمري ابا اسلم على خالووه....شيخه كانت يالسه جدام التلفزيووون بعينها الوارمه...يوم شافتني..اعتدلت في قعدتها وتحجبت...
وبعد ماسلمت على خالتي...
سهيل: شحالج شويخ..؟!!..
شيخه: بخير الحمد لله شحالك سهيل..
سهيل: بخير وسهاله...هاااه شوو عينج احين اهون؟؟
شيخه: الحمد لله افتكيت من الحكه والاحمرار.... شحالها مهره؟؟؟؟
يلست عالكرسي بينما راشد كان يكلم امه بصوت واطي على طرف...
سهيل: يووووووووه تلقينها تنطنط الحين في البيت من الوناسه...
ابتسمت شيخه وقالت بحماس..
شيخه: لييييييييش شو عندها مستانسه؟؟
سهيل: ههههه بوديها السينما بعد شوي....
بطلت شيخه عيونها متفاجئه..
شيخه: اووووووه من وين طالعه الشمس .....غرييييييييييييبه...!!
سهيل: ماغريب الا الشيطان....كسرت خاطري ملانه قلت بوديها اطلعها....
شيخه: انا ماكد طحت السينما....
قالتها شيخه بحسره...يا راشد ويلس عدالي بعد ماراحت خالتي حجرتها ...على ما اعتقد علشان اطلع بطاقه شيخه الطبية....
راشد: تبينا نسير وياهم..؟؟
شيخه: اللـــــــــه يااااااااريييييييييييييييييييت راشد والله دخيييييييييلك...
حسينا بحماس شيخه ..كنا مخططين نزيد حماسها اكثر عشان تبلع اي شي ينقال ويصير....كله في سبيل انها تروح السينما....
سهيل: بعد نص ساعه بيبدا الفلم واحين بسير اشل مهره انا...بس تعال وين توديها وهي جي...لالا ماتروم تشوف الفلم بعين وارمه...
شيخه: لالالالالالالالا اشوف اشوف والله اشوف زييين....لا تسمع له راشد فديتك ودني ماكد سرت...
مسكنا الظحكه ونحن نشوف شويخ متخبله تبا تسير....
راشد: هممممم لالا صدقه سهيل...مره ثانيه يوم بتصح عينج بوديج ...
شيخه: لاااااااااااااء حرام عليك والله اشوف زين....دخيلك راشد دخييييييلك...ابا اسير ويا مهره انا فديتك...
طول راشد وهو يفكر يبا يذل شيخه....
راشد:,,,,, عيل يالله بسرعه سيري تلبسي...دقيقه وحده بعطيج ...اذا مانزلتي بنروح عنج...
قامت شيخه وهي ميته من الوناسه لدرجه اني بديت احس بالذنب قبل مايصير اي شي....
شيخه: ثواااااااااااااني....
ركبت شيخه فوق عشان تلبس عباتها....اما نحن نقعنا من الظحك...
سهيل: حراااااااام والله حراااااااام...
راشد: شفت ويهها..؟؟ باقي بس نظحك عليها يوم بتكتشف انها في المستشفى....
سهيل: ههههههههههههههههههههه الفلم اللي بتشووفه فلم رعب....وبيصير جدام عينها وهي تشوفهم يطعزونها بابره...ياخي والله صدقها مهرة نحن مجرمين....
راشد: هههههههههههههه تستاهل...محد قالها تتبزى...
وبعد دقيقه نزلت شيخه وطلعنا لسيارتي بعد ماخذنا البطاقه من عند خالتي وهي اطالع بنتها بحسره....كاسره خاطرها عاللي بيصيرلها من تحت روسنا...
وبصراحه بديت احس بنفس الاحساس...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الجمعة..
المكان: سيارة سهيل...
الوقت: السابعه مساءا...
--------------------------------------
(شيخه)...

كنت ميته من وناستي...اول مره اروح السينما....مايهم الفلم اللي بنشوووفه المهم ارووح...ياسلاااااااام ومهرة بتروح بعد....!!!...وناسه...
توجهنا لبيت خالتي المرحوومه..واول مانزلنا راحوا راشد وسهيل المسيد عشان يصلون المغرب..اما انا استقبلتني مهرة عند الباب...
وبعد مايلسنا في الصالة...
شيخه: وين اهلج؟
مهرة: عموووه اظني تتسبح في حجرتها....ابويه بعده مايا...سيف طالع...وحمد اظني راح يسلم على نسايبه وبالمره اييب عفرا اللي من الصبح عند اهلها...
شيخه: ياااحيهم...تعالي تعالي...شقايل اقنعتي سهيل يوديج السينما؟؟ غريبه بصراحه...
ظحكت مهرة وقالت..
مهرة: بعد ربج...تطلع عليه هفاااات يرحمني...
شيخه: زييين والله كنت اتحسبه مووول مهمل اهله... انا وراشد دوم نعاتبه على هالشي...
مهرة: حرام عليج...سهيل مب انه مهملنا لكن معرووف عذره ليش مايقعد في البيت...
شيخه: ليش؟!..
مهرة: مايتحمل البيت بدون امي...
حسيت بزعل...ماكنت ادري ان هذا هو سبب غياب سهيل عن بيته بكثره....لهالدرجه كان متعلق بخالتي؟!..
شيخه: بس مر على وفاتها حوالي خمس سنين.... او اكثر يمكن...!!..
قالت مهرة بحزن..
مهرة: صدقيني...كل اللي في البيت يحسون انها ماتت قبل اسبوع بس...ولا حد منا تعود على غيابها...!!
شيخه: الله يعينكم ويصبركم...
بعد دقايق بسيطه رجعوا الشباب وركبنا معاهم في سيارة سهيل...
سيارة سهيل كانت مغمجه...والدنيا ليل...بالتالي ماكنت اشوف المناطق بالضبط وماكنت ادري نحن وين متوجهين بالتحديد....هم يدلون اكثر مني.... بالتالي سكت وانشغلت بالسوالف مع مهرة اللي كل شوي تطلع لي بسالفه ...
بعد عشر دقايق في السياره... وقف سهيل في باركن..وشفته يلتفت لراشد اللي يالس جدامي ويطالعه بنظره غريبه...عقب فتح راشد الباب وقال...
راشد: يالله شويخ انزلي...
تغشيت ..وتغشت مهرة...ونزلنا كلنا من السياره....
كنت امشي مع راشد وهو ماسك ايدي ...شكله خايف اني اطيح اواتخرطف وافشله...ابتسمت ورفعت راسي له كنت بقوله هالتعليق لكن التعليق ماطلع من حلجي.....لساني اصلا ماتحرك....وفوق هذا الابتسامه اختفت..!!
نحن وين يايين..!!!...
التفت لسهيل ووقفت مكاني...
شيخه: منو مريض..؟!!..ليش يايين المستشفى.؟!..مهرة انتي مريضه.؟!!
سكتوا كلهم عني....سكوتهم مريب....
اليوم شوو؟؟...الجمعه..!!..مر اسبوع على سيرتي الاخيره للمستشفى....!!...
شميت ريحه خيانه....هزيت راسي وانا اتراجع على ورا...كنت ناويه ارد السياره....
شيخه: لالالا لا تحاولووون...انا حلفت ماسوييها....
لكن قبضه راشد على ايدي زادت....وسحبني مره ثانيه صوبه بقو...
راشد: بتضطرين تصومين ثلاث ايام شو نسويبج...!!
رديت اتراجع وانا رافضه الوضع اللي انا فيه كليا....
شيخه: ليش تقصوون علي حرام عليكم....ماريد اسويها ماريد انا اخاف...
مهرة: فديت رووحج ياشيخه دخيلج سوي العملية...العملية بسيطه وايد ولا بتحسين بشي...
شيخه: لااااااا لااااااا... مب بسيطه ماريد اسويها...امي تدري انكم يايبيني هني...؟؟!!
راشد: هي تدري...امشي جدامي اشوف...
ثبت ريلي عالارض مثل اليهال.... كنت في حاله مايعلم بها غير ربي لدرجه اني ما انتبهت ان الناس قاموا يتلفتون لنا باستغراب وفضول...
شيخه: بخبر ابوويه عليكم.....راشد دخيلك وغلاة الغالي عندك فجني ماريد اسوي هالعملية ....
راشد: انا ماعترف بحلفه بغير الله وحلفت عليج ياليووم انج بتسوين العملية هذي...لا تفظحيينا..
بدت الدموع تتجمع فعيني... والخوف يتزايد فيني... ليش يجبرووني هذي عيني انا وانا المسؤوله عن نفسي هم شولهم خص..؟!!...
سهيل: شيخه... نحن يايبينج هني وسوينا هالخطه كلها لانه خايفين عليج....انتي زايغه من البنج ...بنشووف له حل مع الدكتووور يوم ندخل يمكن فيه طريقه ثانيه... لو بتكرهينا وبتقاطعينا طول عمرج بس المهم تسوين هالعملية وتشلين هالكيس الدهني من عينج... لا تتصرفين مثل اليهال احيدج حرمه عاقل...

لا تحلموون..!!... ما أثر فيني كلامه ولا حرك فيني شعره....ببساطه لاني خايفه مووووت من اللي بيصير في العمليات... وهذي عيني...لو اي منطقه من جسمي عادي بس عيني..!!!!...
شيخه: لاااااااااا ماريد...
لكن غصبن عني ارادتي ظعفت...سحبني راشد سحاب وانا امشي معاه بصعوبه احاول اقاوم لكن بدون فايده...ترجيتهم كلهم لكن ماسمعوا لي...
كرهتهم كلهم..!!

دخلوني عالدكتور المتخصص ويلسوني جدامه على كرسي والبقية متحاوطيبي يخافوني اشرد...
راشد: عقي غشوتج خلي الدكتور يشوفج...
غصبن عني...عقيتها وتحجبت...وبانت الدموع في عيني ...شافها الدكتور وقال باستغراب..
الدكتور: ليساااااتووون عينيكي عم بيدمعووا..؟!!..مافادك الدوا اللي عطيتك ايااااه..؟!!..
راشد: هذي مب دموع الالتهاب يادكتور...هذي دموع الصياح البنت ميته من الخوف من هالعملية...
اطالعهم الدكتور باستغراب...
الدكتور: عفوا مين حضراتكون..؟!!..
سهيل: خوانها...!.

عورتني هالكلمه بشكل....رفعت نظري لسهيل اللي كان يطالعني بنظرة غريبه ماقدرت افسرها... هذا بعده يتحسبني اعتبره اخويه..!!!...
يالثور..
لو اعتبره اخويه جان طحتبه الحين ولعنت خيره وكفخته... لكن هيّن ياسهيل...!!..
الدكتور: آآآآه تشرفنا... وليه ستنا خايفي..؟!!..
راشد: زايغه من الابره اللي بتعطيها اياها..
الدكتور: اني ابري..؟؟؟..ابريت البنج..؟!!..
راشد: هي...
انقهرت ...كانوا يرمسون عني كاني مب موجوده....لكن على اي حال ماكنت اقدر اتكلم وانا بهالحال... عبراتي تخنقني وتمنعني من الكلام...
سمعت الدكتور يضحك...
الدكتور: لك مووو لازم ياست الحسن مابنعطيكي ابري....!!..
رفعت نظري للدكتور مستغربه...وفجاه العقده انفجت....
شيخه: انته قلت لازم ماشي عمليه من دون بنج...
الدكتور: اييه بس فيه انواع تانيي من البنج...بنقطر لك في عينك قطور اذا كنتي خايفي من الابري....
سهيل: ايوااااااااا هذا اللي نحن نباه...لانه البنت متعقده من الآبار ...سحبناها للمستشفى سحاب والا هي حالفه ماتسويها...
ظحك الدكتور...وبغيت ارفع ريلي واجووووته ....انا في حاله وهو يالس يظحك..!!.
ياب الدكتور العده وقعد يفحص عيني عن قرب.. وبعد ماخذ بطاقتي من راشد ودون معلومات على ملفي الصحي... قال..
الدكتور: انتي جاهزه للعمليي... تفضلي معي...

وين اتفضل...!!..لصقت في الكرسي وماقدرت انش... مسكتني مهرة وقومتني ...وانا احس انهم يسحبوني للاعدام...
دخلت غرفة العمليات بروحي... مسكتني سيستر هناك وجهزتني ولبستني لبس خاص بالعملية... ويلست على طاوله العمليات مب لاني استسلمت..بس لاني ماكنت قادره اوقف اكثر من جذي..!!!

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الجمعه..
المكان: المستشفى..
الوقت: الثامنه الا عشر دقائق مساءا..
-------------------------------------
( راشد)....

يلست على كرسي برا غرفة العمليات اتريا نتيجة عملية شيخه....تعبتني من كثر ماعارضت ماتوقعتها جي..!!.. هالكثر خووف...!!
رفعت نظري ...مهرة كانت يالسه في كرسي مقابل...متغشيه...وسهيل واقف حذالها...
اليوم بعد اكتفت بـ"السلام عليكم"... يوم ركبت السياره وتجاهلت تسالني عن حالي... فيوم من الايام بصفعها هالبنت....!!
مادري ليش تعاملني جي...والاخس واللي يقهرني اكثر..مادري ليش انا انقهر من تجاهلها لي...
ياخي افهم..البنت مب طايقتنك...ماتحبك...ماتحب تشوفك او تكلمك شحقه انته حارق عمرك عشانها..!!!

راشد: برايكم سهيل جان بتروحون...!!
سهيل: لا حشى انا مب ساير...مهرة تبين اردج البيت.؟؟
توقعت توافق عشان بس تفتك من ويهي.....لكن ولدهشتي..هزت راسها بالرفض...
مهرة: بطمن على شيخه اول...وبنسير رباعه...
رفعت نظري لسهيل وابتسمت...شكله مستهم الريال....
راشد: شووو ياسهيل...اشوف ماظحكنا يوم دخلنا شويخ المستشفى...!! ههههههه..
سهيل: اسكت ياريال قسم بالله كسرت خاطري ماتوقعت توصل لدرجه انها تصيح....
راشد: ولا انا...غربلات بليسها مستويه شرا اليهال... مابا مابا....مابا ابره..واااااااااااااع...
ظحك سهيل...
سهيل: ههههههههههههههههههه...عاد عن اللواته مادرينابها انها تصيح الا يوم عقت الغشوه...!!
راشد: انا سمعت الصيحه فصوتها من نزلنا من السياره...بس ماتوقعت انها صدق بتصيح بدموع يعني..
سهيل: ليش شي صياح بعد بلا دمووع...؟!
راشد: يووووووووووووه ماعرفت شويخ عيل...
يتنا سيستر محرجه علينا وقالت لنا...
السيستر: اششششششششششش...اسكيوزمي كيب كوايت اور قيت آوت....!!..ثيري از اوبريشنز قوينغ هير..!!!!.. ( معناها تقولهم لو سمحتوا يا تسكتون والا تطلعون.... لانه شي عمليات تصير هني)...
فجينا حلوجنا نحن انا وسهيل من هالهزبه المحترمه...واول ماراحت السيستر نقعت مهرة بالضحك بصوت واطي وهي تحاول تمسك نفسها وماتضحك...!!
راشد: شوف اختك تظحك علينا....؟!!
سهيل: شحقه اظحكين..؟ هزبوج انتي بعد...
مهرة: حشى عليه الهزبه لكم انا ماتكلمت...
راشد: وهذي السيستر شو حارنها ياناس..!!!...
مهرة: والله اللي حارنها انكم ماتقولون عندكم اخت في العمليات.... تظحكون وتسولفون..!!!
راشد: يالله عاد على ذيج العملية يقول زراعه مخ...!!!

طلعت مره ثانيه السيستر وشكلها مفووووووووووله علينا...مهرة ظحكت..اما انا رفعت ايدي اهديها من بعيد..
راشد: اووكي اووكي ام ليفنغ...!! بسير اييبلكم عصير وبرد...
طلعت من قسم العمليات ورحت ادور الهندي راعي العصير...!!!..
مسكينه ياشويخ الله يعينها ...


رايكم يا حلوين ^__^

 

[اليوم الآخر]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

حلوووووووووووووو

تسلمين خيووووووووووه

بس ماقريت الباقي لانه تعبت


راجعه

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

مشكورة فديتك ع المتابعه ..

لا خليت منج

والحين ان شاء الله بحطلكم أجزاء جديدة

يامرحبا الساااااع

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

-----------------------------
اليوم: الجمعة..
المكان: المستشفى...
الوقت: التاسعه والنصف مساءا..
------------------------------
(سهيل)....

صارلي نص ساعه وانا امشي في الممر ساير راد...احس ان عملية شيخه طولت وايد...عنبو الا كيس دهني وبيطلعونه ليش كل هالتاخير.؟!!...الا جان هي لعوزتهم..!!..يصير والله...!
حطيت ايدي فمخابية بقلق....ياربي متى بيخلصوون...!!..
في البدايه كنت اتصنع الهدوء لكن احين ماقدر...هذي شيخه والله يعلم شو يسووون فيها داخل...!!
راشد: يابوويه قرّ... فريت لي راسي فر....ايلس الله يرضى عليك...
سهيل: ماتشوف الساعه كم..؟؟؟ تاخروا وايد...
مهرة: العين منطقة حساسه ولازم يتخذون الدقه....والدقه تخليك بطيئ شوي..
سكت..ورفضت الكرسي اللي يابوه لي عشان اقعد ورديت امشي.. وبعد دقايق...طلع الدكتور من الغرفه....وعيوني كانت تاكله اكل ... متلهف اني اسمع اي شي عن شيخه...لكني تجاهلته يوم شفت شيخه طالعه وراه مع سيستر عدالها...كانت متغشيه...
وقف الدكتور ووقفت شيخه في الوسط.... تقدم راشد منهم ومهرة بعد...
راشد: هااااه..شيخه سلامات..
رفعت شيخه صبعها السبابه في ويوهنا انا وراشد كانها تحذرنا وقالت بهدوء..
شيخه: ....اكـــــــرهــــكـــــم كلكم...!!!
الدكتور: هههههههههههههههه لك خلووها شوي البنت زعلاني عليكون... تفضلوا معي لحتى اوصفلها دوا... وما تخافوا بالنسبه للعمليي كل شي صار تمام...
راشد: يعني قصدك شيخه مالعنت خيركم..؟
الدكتور: شووو؟!!..
ابتسمت يوم الدكتور مافهم على راشد..
سهيل: قصده يعني شيخه ما قاومت..
الدكتور: اي لكااااااااااااااان.... كانت خايفي كتير وعشان هيك تأخرنا شوي.. تفضلوا معي..
مشى الدكتور...مشيت انا وراه راشد اطالع شيخه بفضول... لكن شيخه تجاهلته ومسكت ايد مهرة ومشت معاها بدل ماتمشي مع اخوها...
وفي المكتب... الدكتور كان مشغول يكتب لشيخه الوصفه... وراشد يتحرش بشيخه.. وانا ومهرة ساكتين ونراقب..
راشد: شو سووبج؟ عقي الغشوه بشوف..
شيخه:........................
راشد: ارمسج انا...عقيها بشوف عينج...
ومد ايده راشد عشان يعق غشوه شيخه لكنها كافأته بظربه محترمه على ايده...
شيخه: مابا...خز عني بعيد...
ظحكنا انا ومهرة على ويه راشد اللي كانت له ملامح غريبه... كانه زعلان لانه اخته زعلانه عليه.... ماعنده غير هالاخت في البيت ويهتم فيها وايد..
الظاهر كل العصبية والظيجه بطيح على راسه هو..الله يعينه..
خلص الدكتور وعطى الوصفه لراشد... وشرح لشيخه كيفية استخدامه...وهو عباره عن مرهم تحطه شيخه على عينها قبل النوم....
ووصاها بعد تغير القطن والشاش اذا خاس او اخترب... ومن هالامور الروتينية...
شكرنا الدكتور على وقته وطلعنا كلنا من المستشفى وركبنا السياره...
وفي الطريج للبيت...الكل ...حتى انا..حاولنا نقنع شيخه بانها تخلينا نشوف عينها ..لكنها رفضت رفض قاطع...
كانت معصبه حدها حتى ماطاعت تشرح لنا شو سووا في العملية بالضبط...
سهيل: شوو تبينا نقولج يعني آسفين؟؟... شوفي بصراحه انا مب اسف لاني تعاونت وياهم عشان تسوين العملية هذي.. لكني اسف اني قصيت عليج...بس ماشي طريقه ثانيه عشان نيبج هني وتسوينها..!!
شيخه: جب انته محد كلمك....!!
كتمت ظحكتي وسكت....
كنت متوقع هالعصبية كلها بعد العملية.... وماظني ترضى الا بعد فتره...!!.. برايها اهم شي صحتها.. وبعدين انا شو ابا من رضاها وزعلها.... اللي يهمني انها تكون بخير ومستانسه...لاني في النهاية "اخوها".. ومستحيل تكون من نصيبي دام هذا شعورها صوبي...!!

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

----------------------------------
اليوم: الجمعه..
المكان: صالة بيت سلطان...
الوقت: العاشره مساءا..
----------------------------------
(ناصر)...

كنت يالس مع امي وابويه ومحمد اخوي في الصالة بعد ماتعشينا وخلصنا...
تاخرت اليوم بالسيره لبوظبي بس لاني ابا اخبرهم اني بسافر...لكن لين الحين مب عارف كيف ابدا بالموضوع...
دخل يوسف اللي كان مع ربعه يهوم.... ويوم شافني استغرب...وبعد ماسلم..قال لي..
يوسف: انته بعدك هني؟ تحرييتك روحت بوظبي..
ناصر: بسير بعد شوي..
يلس يوسف عدالي...وقالت امي..
ام محمد: ياولدي وين تمسك خط نص الليل ودرب بوظبي زيااااااااغ... ارقد عندنا وباجر من الغبشه انشر بوظبي...
ناصر: لا امي مافيني بتعب جي..ماعليج انا صرت حافظ درب بوظبي لو بسوق وانا مغمض بعد بوصل سالم ههههههه...
محمد: عاد هذي صبّه عوووده.... (صبّه يعني كذبه)...
ناصر: اسكت عاد انته... تدريبها امك بتم تحاتي...
محمد: مادري ليش ماتحاتيني انا يوم اسير مكان...
يوسف: هي..ولا انا بعد تحاتيني...
بو محمد: بدينا عاد شغل الغياره...
يوسف: لا والله صدق ليش التفرقه يعني... امااايه انا اصغر اولادج المفروض تبزيني...
ام محمد: يووووووووووه اكثر عن جي..؟!..
يوسف: والله انج تبزين ناصر اكثر عني.... تتصليبه في اليوم عشر مرات وانا مره وحده..
ظحكت انا على هالموال اللي دوووووووم يرمسون فيه ولا يوصلوون لنتيجه...
ناصر: وابوي عليك انته ريال وتبا بزا بعد..!!!..
يوسف: مالي خص...
ام محمد: يابويه انتوا جدامي وتحت نظري...اخوك مسكين ساكن هناك اروحه محد يونسه ولا شي لازم اني بستهم عليه....لو معرس ومستقر بيتغير الوضع...
ناصر: امايه...دخييل والديج لا تكملين...
بومحمد: اسكتوا والا سيروا الصالة الثانيه اذيتونا...
ابويه كان محرج يبا يسمع الاخبار...
ناصر: انا احين بسير ...
ام محمد: لا تعال..شحقه ماكمل...انته شو ناقصنك..ابا افهم انا شو مكرهنك في العرس جي...
قلت بصوت واطي عشان ابويه مايحتشر..
ناصر: مابغيه يامايه ماريد اعرس احين...
ام محمد: متى عيل..؟؟ يوم توصل الثلاثين..؟؟؟
ناصر: ليش لا... ؟!
ام محمد: بتعرس وانته شويبه.؟؟
ناصر: بالعكس...ثلاثين عمر وايد مناسب للعرس..ويعتبر السن المطلوب عند اكثر البنات...
محمد: وشووو عرفك انته بالسن المطلوب عند كل البنات..!!!
انحرجت من سؤال محمد...شو اقوله؟؟..عندي خبره في البنات؟!!..واعرف شو يحبن وشو مايحبن؟
قلت له بسخرية..
ناصر: سويت احصائية.....اصلا هالشي معروف..
ام محمد: وشو بيتغير عليك لين ثلاثين عاد..؟؟
ناصر: بتتغير وايد اشياء..عنبوو يامايه الناس فيوم واحد يموتون وناس يحييووون.. وبعدين اذا فخاطرج انتي تسوين عرس عندج يوسف بيخلص جامعه هالكورس وبيتخرج...وعقبها بيشتغل..عندج ايااه اخطبيله...
يوسف: هاي هاي...لا يابوويه لا تفرها على راسي...
ام محمد: انا مابيوز الصغير قبل العود....
محمد: امايه شو هالافكار اللي بعدكم متمسكين فيها...!!.. يعني اذا الصغير فخاطره العرس تحرموونه عشان اخوه العود ماعرس..!!!.
يوسف: هي بس الصغير مب فخاطره العرس بليز سكروا الموضوع..
ناصر: هههههههههههههههههههههههه احين تروعت هااااه..؟؟؟ حس شويه باللي انا احس فيه كل يوم من اربع سنين..
يوسف: حشى يابوك ماريد احس... امبوني مطمش يوم كله على راسك بس يوم عقيتها علي لا هذا موضوع ثاني...
ام محمد: اسمعني انزين ابويه...فكر في بنت عمك...عمرها الحين 22 سنه... وين بتترياك لين ما انته تصك الثلاثين..بتكون هي 27 سنه... مب زين تصبرها هالكثر فديت روحك...
ناصر: امايه...شحقه تغصبون البنت علي...وشحقه تغصبوني عليها...يمكن هي ماتباني ...سالتووها انتوا عن رايها.؟
قلت هالكلام لاني اعرف ان نوره كرامتها مابتسمح لها انها توافق علي الحين بعد اللي قلته لها اليوم...!! هذا اذا كانت هي نوره اللي انا اعرفها....المتفاخره والخقاقه....مابترضى ابدا..
ام محمد: وهي مسودة الويه وين بتحصل اخير عنك..؟!!..
ناصر: عاد اللي يسمعج يقول اني انا موووول ما اتفوت... يامايه انا حالي حال الناس فيني عيوووب وايد..
ام محمد: لاا..انته ريال وماعليك قصور..راعي اصل واخلاق ودين شو تبغي هي اكثر من جي؟ وفوق هذا ولد عمها...
ناصر: انزين انا مابغيها....!! كم مره بقولج مابغيها...
ام محمد: هذي بنت عمك... حلوه ومزيوونه ومتخرجة من الجامعه..وانااشوفها راعية بيت...شو ماتبغي فيها بالله.؟!!..
ناصر: شخصيتها ماتعيبني...احسها راعية مشاكل امي..مابغيها مالي خاطر عليها شقايل اخذها..
ام محمد: كل هذا يتغير بعد العرس....
حسيت بظيجه...المصيبه ماذكر منو فتح هالموضوع من الاسااس...لو اذكر جان عطيته بكس..
ناصر: يامااااااايه...
قاطعتني وقالت بعصبية..
ام محمد: انته شووو..؟!...تبا تفضحنا بين الناس..؟!!.. بنت عمك يتيمه ومالها غيرك تبا تفرها عالغريب بسبب دلعك وبزاك..؟!!!.. اكووه اخوك محمد يوم يوزناه ميثا ماقال لا ووافق على طول...والحين ماشاء الله مستقر ومستانس وياها وعندهم عيال...
ناصر: امايه الحال مب نفسه.. لو نوره كانت مثل ميثا انا بنفسي بقولج خطبيها...بس هي مب مثلها...مابينهن شبه ابدا...بعدين مب شرط تكررين نفس القصة...محمد خذ ميثا...يعني انا لازم اخذ نوره...ويوسف ياخذ كنه.؟!!..
فز يوسف من مكانه ومسك ايدي وقال..
يوسف: ياخي شو تقول انته لا تحط الافكار فبالها...!!!
لكن امي قالت بسرعه جوابا على سؤالي..
ام محمد: هي عيل شو تتحسب...هذا اللي بيصير...!!
يوسف: امااايه شووووووو هذا لا تجمعين.... الله يغربل بليسك انزين..!!..
ابتسمت غصبن عني ...
ناصر: انزين امايه...ولو صار.... مافكرتي بالصغار...عويش ولطوف...منو بياخذهن؟ مب الغرب؟ نحن ماعندنا عيال غير حقهن ...شقايل نخلي بنات عمنا ياخذونهن الغرب..؟؟
يوسف: هي والله صدقه...
يوسف كان مشتط لاني دخلته في الموضوع...عشان جي قاعد يحاول يشن حمله اقناع وياي...
ام محمد: ذيلاك صغار...ولو عندي عيال مابيوزهم غير بنات عمهن..لكن ماعندي عيال غير..لكن انتوا اللي ماتستحون على ويوهكم موجودين وبنات عمكم موجودات ومناسبات وفيهن الجمال والحشمه وتقولون لا..صدق انكم تبون تفضحونا...
قعدنا انا ويوسف نتبادل النظرات اليائسه....امي راسها يابس...واللي قاهرني ابويه ماقاعد يتدخل مندمج في الاخبار... لكن بيني وبينكم احسن...لانه ابويه لو اتدخل في السالفه بيحسمها وبيحلف عليه اخذ نوره وخلاص...مابروم اقول لا... الله يبارك في الجزيره خلك مشغول فيها يابويه احسن..!!
التفت لامي...وقلت لها..
ناصر: كنه مناسبه ليوسف .....لكن نوره مب مناسبه لي بصراحه....
يوسف: اقول ناصر اطلع من بيتنا.....روح بوظبي الله يخليك روح بوظبي...
ظحكت وقررت اني اعق السالفه كلها على يوسف...لاني صدعت بصراحه...
ناصر: شوفي حتى يوسف رافض ليش عيل طايحتبي انا تقنعيني..؟!!
ام محمد: يوسف عقب بيي دوووره عقب عرسك...
ناصر: لا الحين..
ام محمد: وانته مسود الويه شو شايف على كنه ماتبغيها.؟!..
بطل يوسف عيونه مندهش...
يوسف: امايه..مب اني مابغيها يعني بس مافكرت بصراحه فيها...
ام محمد: مب لازم تفكر فيها....كنه ماتتعوض..
يوسف: ادري انزين بس انا بعدني صغير..
ام محمد: ناصر كان اصغر عنك يوم اني رمسته عن العرس اول مره...
ناصر: يعني انته محظوظ...
يوسف: انزين امي البنت بعدها تدرس...
ام محمد: مافيها شي نحن مابنمنعها عن الدراسه بتكمل دراسه ويا اختك...
يوسف: انزين انزين خلاص لا تعصبين... اللي تبينه سويه..
بطلت عيوني واطالعت يوسف مستغرب.... توقعت انه يقاوم اكثر من جذي...وهو من كلمتين وافق... ابتسمت...معناها ان يوسف متقبل كنه نوعا ما.... ياحيه....
ام محمد: هي توك...هذيلا هم العيال صدق مايعارضون اهلهم...
مديت ايدي وحطيتها في ايد يوسف...
ناصر: مبرووووك...
اطالعني يوسف بطرف عينه ولا قال شي...وانا اضحك عليه...
ام محمد: وانته وياه...
ناصر: حشى علي امايه.... انا متاخر بسيرة بوظبي اليوم عشان اقولكم شي...
ام محمد: شو مستوي ؟ خير..؟
اطالعوني كلهم بفضول ما عدا ابويه..
ناصر: ابووويه....يااابوووومحمد...
التفت لي ابوي متفاجئ..
بومحمد: هاااه..؟
ناصر: ابغي اقولك شي عطنا ويه شويه...
التفت لنا ابوي بالكامل ...
ناصر: ابغي اقولكم اني بسافر ويا ربعي يوم الثلاثاء الياي..
عقدوا حياتهم كلهم...
بومحمد: شوووه؟ بتسافر؟ وين؟
ناصر: بسافر الشام....اتحوط..
عقد ابويه حياته زياده...
بومحمد: تتحوط والاااا.؟!!..
فهمت شو يقصد ابويه وانقهرت.... لو انا مازلت مثل قبل غير ملتزم ولعاب كنت صدق بسير عشان العب هناك... لكن الوضع تغير..
ناصر: لا والله يابويه ...سايرين الا نتحوط ونغير جو... والشباب اللي ساير انا وياهم كلهم معرسين وفوق هذا متدينين وملتزمين.. يعني ماعندهم هاللعب..ولا انا عندي هاللعب...
ام محمد: يابويه جي فجاه بتسير عنا...ماقلت من قبل..
ناصر: قررت اليوم... امايه انا من زمان ماسافرت ...من سرت بوظبي وانا اكرف كراف في هالشغل .. مليت..
يوسف: وكم بتيلس هناك؟
ناصر: حوالي اسبوعين جي...
ام محمد: الله يوفقك ياولدي..برايك روح استانس انا اشوفك بعد مب على طبيعتك من فتره.. والسفر بيريحك شوي...
ناصر: ان شاء الله يامايه...

وصلت الساعه 11 وانا مازلت اسولف وياهم..اخر شي ترخصت منهم...لاني لازم اروح بوظبي احين...ووعدتهم اني ايي اسلم عليهم يوم الاثنين... وبعدها ركبت سيارتي ورحت لبوظبي..

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: السبت..
المكان: الجامعه..
الوقت: الواحده الا ربع ظهرا..
-------------------------------
(مهرة)...

كنت يالسه اليوم مع شلة سلوى الخبله...بعد ماتغدينا يلسن كل بنات الشلة يلعبن لعبة اسمها "حكم".. وهي نفس اللعبه اللي كانن يلعبنها وقت ماطرشن لي الرساله.... قالن لي اشترك في اللعبه بس انا مارضيت واكتفيت بس بالتفرج...
لكن بصراحه كل شوي انقع من الظحك عليهن... هالبنات مب صاحيات..وخبايل درجه اولى.. وبسبب هاللعبه ...كل وحده تسوي في الثانيه مقلب اخس عن الثاني...ولعوزن بنات الكافتيريا كلهن....
صحيح بعض الحركات كانت ماتعجبني....لكن الاغلبية اجبرني على الضحك...
ومر الوقت وانا اضحك على هاي...واشوف هاي..وعلى هالحال...واللعب داير عالطاوله كلها...
انتبهت ان سلوى كانت جريئه وايد وايد...اي حكم يحكمون عليها به ماتتردد...وتروح تنفذه على طول...واغلب بنات الطاوله كانن يسون لسلوى قدر وشخصية..
وقفن البنات اللعبه بسبب ان نص الشله ماكانن متغديات..فاضطرن يوقفن عشان يروحن يتغدن..التفتت لي سلوى وقالت..
سلوى: ياريتج لعبتي عشان اضحك عليج...
مهرة: ههههههههههه انا ماقصرت بالضحك عليج بصراحه....سلوى كيف قدرتي تروحين تسالين البنت اي شامبو تستخدم والله فظيحه..
سلوى: هههههههههاي..عادي..
مهرة: والله انج خبله..
رفعت ايدي لا اراديا واطالعت الساعه كم...وانصعقت يوم شفتها وحده وثلث....شهقت..
سلوى: شفيج.؟؟
مهرة: بدت محاضره الكمبيوتر...شو اسوي الحين..؟؟؟..
قالت سلوى بدون اهتمام...
سلوى: طنشيها...
مهرة: كيف اطنشها انتي بعد..
سلوى: ببساطه لا تحظرين...
مهرة: بس جذي بيفوتني وايد...
سلوى: عادي مب هند وياج في الكمبيوتر.؟؟.. هي بتقولج شو فايتنج...
عقدت حياتي وانا اتذكر ان هند اللي عرفتني على هالشله من الاساس معاي في الكمبيوتر..
مهرة: هي والله وهذي هند شحقه مانبهتني ان المحاضره بدت..روحت جذي وخلتني...
سلوى: ههههههههه يمكن نست مثل ما انتي نسيتي....
مهرة: لاحول ولا قوة الا باللـــــــــــــــــــه.....!!..
سلوى: يابنتي هدّي...هذا اول غياب لج...لا تخافين..
مهرة: احين شو بنقعد نسوي لين 2... انتي عليج محاضرات؟
سلوى: انا لين 3 ماعندي ولا محاضره...بس بيني وبينج لازم اروح السكن عشان اييب كتابي لمحاضره الساعه 3..
قلت لها بترجي..
مهرة: روحي بعد الساعه 2...لين ماتبدا محاضرتي الانجليزي عالاقل..
سلوى: ماقدر ياعمري...الساعه 2 بتيني بنت تباني اشرح لها اللي طافها الاسبوع اللي فات...يعني لازم ارد هني.. انزين تعالي وياي السكن..
مهرة: لالالالالالالالالالالالالالالا...
سلوى: شوو لالالا..ليش؟...شو بيصيرلج يعني؟
مهرة: لا انااخاف شو يسيرني مكان مالي حايه فيه..
سلوى: بتين معاي...براويج السكن وبراويج غرفتي..بنيب الكتب وبنرجع...
مهرة: مايفتشوون؟ بيدرون اني مب من طالبات السكن...
سلوى: محد يفتش...وبنات العين دايما ايوونا السكن..
مهرة: والله....عادي يعني؟
سلوى: هيييي عاااااااادي ...
مهرة: بس السكن مايعتبر برا الجامعه...اخاف والله..
سلوى: اولا السكن مب برا الجامعه صحيح بينا وبين الجامعه جدار لكن هذا بس للفصل..لا غير...يالله قومي بلا دلع...
قمت بتردد وخذت كتبي واغراضي معاي...
سلوى: خلي كتبج هني لانه نحن بنرجع...شلي شنطتج بس...
مهرة: بينسرقن...
سلوى: منو يبا يسرق كتب بالله عليج...بعدين الطاوله متروسه بنات محد يتجرا يسرق شي من هني..
مهرة: على ضمانتج...
خليت كتبي عالطاوله وشليت شنطتي ورحت مع سلوى....
رحنا لمركز الباصات اللي اول مره اروح له...وركبت الباص اللي مثل ماقالت سلوى...ان هالباص يلف عالجامعه كلها والسكنات...
وبعد دقيقتين تحرك الباص ...ويوم وصلنا سكن سلوى..نزلنا...
كنت خايفه ومتردده ادخل السكن... يعني شي اول مره اسويه لازم بخاف... بس شفت البنات يدخلن ويطلعن بكل سهوله وعادي وهن يسولفن ولا عالبال....
سحبتني سلوى من ايدي ودخلنا السكن وهي تسولف علي وتخربط اما انا فكنت اتلفت واطالع كل شي حوالي...
دخلناالمبنى اللي فيه غرفة سلوى...ودخلنا المصعد...
مهرة: اييه سلوى...شي بنات وايد هناك؟
سلوى: ههههه هالحزه كلهن بريكات ويالسات ...
مهرة: خيبه عيل بيعرفني اني من بنات العين..
سلوى: هذيلا يحبن يشوفن بنات العين يايات السكن... بس انتي ماعليج ...
طلعنا من المصعد ودخلنا القسم اللي فيه الغرفه...
اول مادخلنا القسم وقفت مصدومه.... جابلتني وحده يالسه عالكرسي ولابسه قميص نوم...لكن كان قصير..يعني اطول من الركب بشوي....كيف هذيل البنات يلبسن جي..؟!!..
غضيت البصر ومشيت مع سلوى واسمعها وهي تكلم هاي وتسلم على هاي بصوت عالي..ومعظمهن علقن واصدرن اصوات مغايظ يوم شافني..
حسيت كل العيون متعلقه فيني اطالعني بفضول..
مشينا عادي في ممر كانت فيه الغرف من اليمين واليسار..طلعت وحده من غرفه وسلمت على سلوى ويوم شافتني قالت..
البنت: لااااااااااااااه سلوى..!!.. انا جذي اغار..
سلوى: فديت روحج والله شحقه تغارين انتي لج مكانه خاصه...
البنت: والله مب مبين اشوف وياج مزاييين...
سلوى: ههههههههههه مهرة هذي مها...سنه ثالثه وتخصص علوم حاسب آلي...مها هذي مهرة..ربيعتي وتوها في التاسيسي...
باستني مها وهي تسالني عن حالي وترحب بي..
مهرة: بخير الله يعافيج شحالج انتي.؟
مها: بخير وسهاله..
سلوى: يالله انتي لا تعطلينا نحن مستعيلين...
مها: ماتنلامين والله ههههههههه..
سحبتني سلوى وانا ابتسمت لمها معتذره ورحت مع سلوى للغرفه...
الغرفه كانت صغيره نوعا ما..لكن مرتبه جدا..فيها سريرين...
مهرة: واااااو والله مب مقصره معدله حجرتج..
سلوى: هذي بيتي الحين لازم بعدلها...شو رايج فيها؟
مهرة: حلللوه...
سلوى: وشو رايج في السكن...
مهرة: يخوف بصراحه..
سلوى: ههههههههههههههه استريحي حبيبتي...
يلست عالشبريه بينما سلوى راحت وسكرت الباب..وقفلته..
وراحت عقب وفتحت الثلاجه الصغيره..
سلوى: شو تشربين مهااري..؟؟ عندي بيبسي وعصير وماي وفيتامين سي..وحلاوه..
مهرة: لا سلوى ماشتهي شي مشكوره..
سلوى: افاااااااا ...لازم تشربين شي..
مهرة: خلاص هاتي عصير..
خذت العصير من ايد سلوى وانا اتفحص محتويات الحجره حوالي..
مهرة: مشكوره..يالله سلوى هاتي كتبج وخلينا نـــ....(قطعت رمستي يوم شفتها تعق عباتها وشيلتها وتفتح الكبت الصغير)... شو تسوين؟؟؟
سلوى: ببدل ثيابي اول مظايقتني التنوره...
مهرة: شو بتبدلين ثيابج جدامي؟
سلوى: ههههههههههه اذا تستحين بروح الحمام...!!
بطلت عيوني وانا ماعرف هذي تمزح او تتكلم جد...بس كانت تبتسم...يمكن تمزح..
مهرة: لا يابوي روحي الحمام ...
خذت سلوى ثيابها وضحكت..
سلوى: ههههههههههه اوكي دقايق...
طلعت سلوى من الغرفه ...
ويلست انا اشرب عصير واتمشى في الغرفه الصغيره واتفحص محتوياتها... كانت الصور والبراويز منتشره في الغرفه....وفي الجدار فوق وحده من الشباري مسوية سلوى مثل الالبوم الكبير المفتوح... ومتروس صور...
كلها صور بنات...معقوله كل هذيلا ربع سلوى.؟؟ ماشاء الله..
انفتح الباب ودخلت سلوى...
نقلت نظري من فوق لتحت عليها....كانت لابسه قميص بودي لونه سماوي ونص كم...ولابسه بنطلون جينز لونه كحلي غامق....
سلوى: تاخرت..؟؟
مهرة: سلوى..!!..تلبسين بناطلين؟
سلوى: انا ما ارتاح الا بالبناطلين..
مهرة: عاد بتلبسين فوقه عباة مسكره؟
سلوى: عيل شو الفرق لو بلبس عباة مسكره؟؟.. نفس الشي بتربط حركتي.. انا ماحب شي حوالي ريولي يمنعني من الحركة بحرية...
سكت..وماحبيت اناقشها او اني افرض رايي عليها...هي حررره...لكن ماعجبني اللي عرفته...
مهرة: يالله خلينا نروح ماشي وقت عن محاظرة الانجليزي..
سلوى: يالله كيف طفرانه من السكن ههههههه... اوكي دقيقه..
لبست سلوى عباتها وشيلتها ...وفتشت في الادراج عن نظاره شمسية وطلعتها..خذت كتبها وطلعنا....
نفس الشي النظراات كانت تلاحقنا ونحن نمشي...البنات هني شي غريب بصراحه...وحركاتهن بعد غريبه وعليها علامات تعجب...!!!!!!...
لكني طنشت...نزلت راسي ومشيت عنهن...وبعد ماطلعنا من المبنى ارتحت شوي..طلعنا من السكن ..كانت سلوى تبا تقعد في الكراسي عشان نتريا الباص اللي بيمر علينا بعد دقايق لكني رفضت وقلت لها نمشي احسن...
صحيح حر لكني مابغيت اقعد مع شلة البنات اللي يالسه في الكراسي جدام السكن... شكلهن مايطمن بصراحه...
مهرة: سلوى... في غرفتج شي شبريتين..شبرية منو الثانيه.؟!
حاست سلوى بوزها بطريقه تدل على انها متظايقه...
سلوى: هذي شريكتي بالغرفه ما اطيقني مادري ليش...مخلية الغرفه بس مكان لتغيير الملابس والتعديل وتطلع... حتى الدراسه ماتدرس فيها..والرقاد ترقد عند ربعها في غرفه ثانيه بدون علم المشرفات...
مهرة: يصير ترقد في غرفة غير غرفتها؟
سلوى: هييييييي عااااااااااااااادي....المهم ان نحن موجودين في المبنى في الوقت المحدد...
مهرة: وليش ما ادانيج شو مسوتبها؟
سلوى: ماسويتبها شي بس احسها جي ماادانيني...
مهرة: هممممممممم اي كلية هي؟
سلوى:......شريعه وقانون...
وفلحظة...عرفت سبب كره البنت هذي لسلوى...
يعني شي طبيعي بنت شريعه وقانون اكيد متدينه ومابتحب نوعية البنات اللي مثل سلوى...وبصراحه مالوومها ...حتى انا انصدمت فيها....لكن الحق يقال سلوى لها طبيعه طيبه نوعا ما....

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم : الاحد...
المكان: مطبخ بيت بو راشد..
الوقت: الثامنه مساءا..
------------------------------
( شيخه)...

فتحت الثلاجه وطلعت الموز والفيمتو والحليب ورحت عند الخلاط... كنت مشتهية اليوم عصير موز بالفيمتوو..ولا طاع يخوز من بالي فقررت اني اسويلي كوب...
بديت بالتجهيز والتقطيع ...كنت متظايقه من اللزقه الكبيره المحطوطه على عيني...وكانت شوي تعورني...
الله يسامح هالمجرمين اللي اجبروني عالعملية هذي والا انا كنت مرتاحه...
شغلت الخلاط بعد ماحطيت المكونات ...وارتفع صوت الازعاج وغطى على اي صوت ثاني...
فجاه شفت بياضه واقفه عدالي جان افز واصرخ...
يوم التفت حصلت سهيل يطالعني مع ابتسامه بايخه....هي ابتسامه عادية الصراحه بس انا اشوفها بايخه لاني معصبه وزعلانه عليه...
شيخه: وياااااااااااااا هالويه...ماتعرف تقول السلام عليكم والا هود...؟؟
كنت اصارخ عشان اسمعه صوتي بسبب ازعاج الخلاط...مد سهيل ايده وبند الخلاط عشان يقدر يتكلم..
سهيل: اول شي...انا سلمت...انتي ماسمعتيني بسبب صوت الخلاط... ثانيا شحالج.؟
مابغيت ارد عليه...انا زعلانه...
اطالعته من فوق لتحت وصديت عنه ورجعت اشغل الخلاط... ثواني ورجع بنده عني...
سهيل: سالتج سؤال...
التفت له وقررت اتجاهل سؤاله مره ثانيه...
شيخه: وين راشد؟
سهيل: دخل الحمام...
عقدت حياتي...
شيخه: انتوا وين كنتوا طول اليوم؟؟...من بعد الغدا طالعين..
سهيل: زين يوم انتبهتي لنا متى طلعنا...الله يسلمج كنا في دبي... اخوج غياااااااار وقرر يشتري سياره غير عن هذي...وتونا واصلين....
شيخه: وليش مادخلت الميلس..؟؟ليش ياي المطبخ؟ سمعت صوت الخلاط وييت؟
سهيل: لا..دخلت اترس لي دبة ماي للسياره...
وبعد ماعرفت اللي ابغي اعرفه..اظفت الثلج للعصير في الخلاط ورديت شغلت الخلاط وانا متجاهله وجود سهيل...رغم اني مستحيل اطنشه لكني حاولت...
رجع سهيل بند الخلاط عني..
شيخه: اوهووووووو...
سهيل: سالتج سؤال....
كان يطالعني بنظره بارده....وسهيل يوم يطالع بنظرة بارده معناته على وشك يعصب...!!!..
قلت له وانا افاتن عليه تقريبا...
شيخه: مب بخير انزين..!!!.
سهيل: شو يعورج؟
شيخه: عيني تعورني.. والا ماتذكر بعد.؟
سهيل:................. ماتستخدمين الدوا؟؟
شيخه: بلى...بس بعد هذا يوم احطه ييتم يحرقني وعيني ادمع...وفوق هذا عيني ينزل منها دم...
سهيل: انزين شويخ هذا شي طبيعي لانهم يارحين عينج من داخل اكيد ما التحم بعده...
اعرف انه كلامه صدق...بس انا معصبه ولازم اعق الغلط عليه..عشان يتلوم شوي..
بس اللي قاهرني انه لا هو ولا راشد اظهروا لووم ولو شوي....كانهم ماسووا شي ابدا...
وامي وابويه مستانسين عالي سوووه فيني....
رحت ويبت كوب وصبيت محتويات الخلاط لكن العصير زاد وطلع يكفي كوبين مب كوب واحد....
دزيت الكوب صوب سهيل وانا ساكته ورحت يبت كوب ثاني.... وصبيت باقي العصير لي..
ابتسم سهيل وشرب شوي من العصير..
سهيل: مشكوووره... لذيذ...
سكت ومارديت عليه... شليت عصيري وتوجهت لبرا المطبخ...
سهيل: اييييييييييييه...!!!
وقفت مكاني ..
شيخه: نعم؟
سهيل: بتمين زعلانه جي يعني؟!..
التفت له وقلت...
شيخه: ماظني يهمك ولا يهم راشد زعلي والا رضاي...
سكت سهيل واطالعني بنظره تلمع وقال بحزن..
سهيل: بعد اللي عرفتيه وقلته لج ..تقولين مايهمني.؟!!.
قلبي فقد دقه من دقاته.... ماتوقعت سهيل يرجع يذكرني باللي قاله لي في المستشفى...لاني حسب ماعرفه كرامته ماتسمح له وهو اهم شي عنده كرامته....
لكني قويت نفسي وقلت له بسخريية مقتبسه من كلامه...
شيخه: تراك انته وراشد " خواني"..على قولتك والاخوان مايهتمون بزعل خواتهم ....
عقد سهيل حياته وطالعني بنظرة مستغربه..
سهيل: شوو؟...مافهمت عيدي..
حركت ايدي بعصبية وانا اعطيه ظهري واطلع...
شيخه: يابويه افهم اللي تبغي تفهمه ..من متى انته تفهم صح اصلا....!!!.
طلعت من المطبخ وتوجهت صوب البيت واطرافي ترتجف....مادري اللي سويته صح او غلط...لكنه صار وانتهى الموضوع...وخله يفهم اللي يبغيه...


اليوم: الاحد ..
المكان: بيت سلطان...
الوقت: الثامنه والنصف مساءا..
------------------------------
(يوسف)...

حطيت سماعة التيلفون عالكرسي وركبت فوق ازقر منى...
هذيلا ربعها مايحصلن يدقن الا يوم يشوفني توني داخل البيت.... كل مادخل بيتنا يرن التيلفون.. ليش ؟!.. الله اعلم..!!.
دخلت حجرة منى حصلتها اطقطق كالعاده عالكمبيوتر..
يوسف: لا تقوليلي اني من خليتج العصر وانتي يالسه...؟!
منى: اوكي مابقول...
يوسف: مــنّــــوووووووووه..!!!!..
منى: ههههه قمت صليت المغرب ورديت يلست بصراحه..
يوسف: عنبووج عيووووونج... انتي من ركبنالج الخط المنفصل عن تيلفون البيت وانتي اربع وعشرين ساعه عليه...!!!..
منى: انته تقعد اكثر عني...
يوسف: ومن زيني انا تراني البس عدسات طبية..!!!.. المهم انزلي تيلفون...
منى: يوووه منوووه؟؟..
يوسف: شو دراني..ربيعتج بعد منووه...
منى: اووكي..
قامت منى من المكتب بدون ماتسكر الكمبيوتر او النت... وطلعت برا الغرفه ونزلت ركظ...
رحت انا ويلست كعادتي مكانها عالمكتب اشوف منو تكلم....
كان كل شي مفتوح ...المسنجر بعد مفتوح بس محطوط على مشغول.. شفت المسجات وحصلت كنه وحده من البنات...
ابتسمت وكتبت لها... " باااااااااااك"...
كنه:" ولكم باك هلا... ماواحيتي توج تقولين بتشوفين منو عالتيلفون"
تورطت..ماعرفت شو اقول...
يوسف:" هي سرت تحت وحصلتها مسكره ورديت"...
كنه:" غيرت رايها البنت ماتبا تكلمج لوووووووووول"...
يوسف:" يالسباله"..
كنه:" ماغيرج...المهم كملي السالفه ...شو صار ؟ ماقال شي الاستاذ يوم طلعتي معصبه من الكلاس؟"
بطلت عيوني مستغرب...شو سالفه منى والطلعه من الكلاس هذي...انا ماعرف السالفه كيف اكملها...ورطه صدق...
يوسف:" بكملها عقب بس بغيت اسالج سؤال... "
كنه:" سالي عيوني.."
يوسف:" بس اجاوبيني بصراحه..."
كنه:" ولووو....معقوله بجذب عليج انتي"..
يوسف:" انتي تحبين يوسف صدق والا بس تسلية وتمضية وقت"...
طولت كنه لين ماردت علي...اما انا كنت على اعصابي....لاني بصراحه بديت اشك بشعور كنه تجاهي...تعاملني بكل برووود..
كنه:" منى شو هالسؤال انتي تعرفيني احسن من جذي.."
يوسف:" هذا مب جواب سؤالي"...
كنه:" ولا بجاوبج ادب لج علىهالسؤال البايخ"..
ابتسمت...شو هالحظ..يعني ماعرفت اييب السؤال بطريح احسن من جذي بدون ما اعصببها..؟!!.. هالبنت عصبية وايد بسرعه تعصب...
تشجعت وحاولت مره ثانيه..
يوسف:" انزين اذا يا يوسف يخطبج بتوافقين عليه؟"
طولت مره ثانيه كنه ....وبعدها قالت..
كنه:" منى.."..
يوسف:" نعم"..
طولت مره ثانيه وعقب قالت...
كنه:".. لو يا اخوج يخطب بجووووته .."...
انصدمت...وحسيت كان حد صفعني كف... وحسيت بالاهانه فوق كل هذا....
انا...يجوتوني..؟؟...انا..؟!!...
بدون حاسية كتبت لها..
يوسف:" ليش؟"..
كنه:" هههههههه انتي تعرفين زين ان اخوج هذا ماينزل لي من زووور..."..
انصدمت مره ثانيه..هذي شو تقول..؟؟؟ وانا اللي كنت واثق من حبها لي... عيل شو الي كانت كاتبتنه ومخزنتنه في كمبيوترها عني؟ لعب؟ والا تسلية والا شو بالضبط.؟؟؟
اسميك يايوسف استويت مقصّة من هالبنات...
مره وضحه...والحين بنت عمي اللي من لحمي ودمي....وانا اللي من يومين موافق عليها انهم يخطبونها لي رغم اني ماريد اعرس احين ...!!!
انتبهت على كنه وهي ترسل لي مسج.. او لمنى..
كنه:" الووه...وين رحتي؟"
يوسف: اقولج... برب"..
كنه:" خذي راحتج"..
قمت انا سكرت النافذه اللي فيه كلامنا عشان منى يوم ترجع ماتقرا اللي انكتب...خليت مكتبها ورحت لغرفتي وانا متظايق حدي...
ماتصورت ان هالرد اللي بحصله من كنه...توقعت كلام ثاني يشرح الصدر ويحسسني باني محبوب ومهم....
ياربي كيف كنت متاكد من مشاعرها كيف جي صار؟ شو هالمقلب اللي سوووه فيني..!!..
تووووووووووووووبه اهتم باي بنت مره ثانيه...
قسم بالله كلهن مايستاهلن الاهتمام...!!!

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاحد...
المكان: غرفة كنه...
الوقت: التاسعه الا ربع مساءا..
--------------------------------------
(كنه)....

سويت كوبي للمحادثه اللي دارت بيني وبين ولد عمي المخضرم وحطيتها في فايل بروحها وخزنتها مع المجموعه السابقه من الفايلات...
كنت ميته من الظحك على ردة فعله المصدومه... بس يستاااااااااهل....يلعبها على غيري مب علي..
انا في البدايه استغربت سؤال منى لي..اذا كنت احبه او العب بس..لانه هي تعرف عدل شعوري تجاه يوسف...وتعرف اني اموووت فيه... عيل ليش سؤالها هذا...!!..
لكنه يوم سالني سؤال بايخ ثاني شكيت بالموضوع...وقررت استخدم كلمه السر اللي انا ومنى متفقين عليها للحذر.... كنا متفقين باني اذا زقرتها باسمها ترد علي هي وتقولي" عيون منى الحولا"...
لكني يوم زقرت منى هالمره رد علي هو بكلمه نعم...
ساعتها عرفت انه يوسف وقاعد يلعب علي ويحاول يسحب معلومات.... ورديت عليه برد يخليه فعلا يحس اني ماحبه....
وهذي اكبر ظربه ممكن اني اوجهها له عقابا له على قرايته ملفاتي الشخصية...
لاني ماكنت اباه يعرف اني احبه....واللي صار اليوم بيخليه يشك...هذا اذا ما اقتنع فعلا باني ماحبه...
لاني باختصار كنت اباه يهتم فيني لشخصي انا ومن نفسه وبدون دفع....
ماكنت اباه يهتم فيني ويلاحظني بس لاني احبه...!!.. يعني شفقه لاغير...
قطعت حبل افكاري لطوف اختي الصغيره...يتني بملامح زايغه وقالت لي...
لطيفه: كنووه ....كنوووووه.... لحقي نوره تصيح...!!
عقدت حياتي واستغربت..
كنه: شوووه؟
لطيفه: نوووره اختي تصيح....
كنه: ليش تصيح؟ شفيها؟
لطيفه: مادري كانت ادرسني وفجاه قعدت تصيح وراحت حجرتها...
كنه: خبرتي حد؟
لطيفه: لا ماخبرت حد بس انتي..
كنه: ولا تخبرين حد بعد...انا احين بسير اشوفها اوكي؟
لطيفه: اووكي..
طلعت لطيفه من حجرتي وهي بعدها مستغربه وخايفه...سكرت انا الماسنجر والنت والكمبيوتر مره وحده وطلعت اشوف نوره شفيها...
دقيت باب غرفتها...وماوصلني رد...رجعت ادق مره ثانيه بشكل اقوى...
نوره: منووووووووووه..؟!!.
كانت تفاتن بصوت عالي... وكنا في البيت متعودين على اطباعها السيئه...
كنه: انا كنووه بطلي نوره..
نوره: خليني بروحي ماريد اشوف حد...
كنه: انزين لا تشوفيني غمضي عينيج وبطلي الباب انا اللي بشوفج...
نوره: كنوووه قلت لج ذلفي عني مالي خلق...
كنه: بطلي الباب لا اخبر مايد عليج... وتعرفينه انتي بيطلع الرمسه منج غصب....
وبعد تاخير بسيط..فتحت نوره الباب وويهها كله خرسان دموع...ورجعت تقعد عالشبرية وتحظن المخده وهي كاتمه عبراتها وتمسح دموعها...
سكرت الباب وراي وقفلته....
مب عادتها نوره تصيح....شفيها ياترى..!!.. بصراحه رغم اني انا ونوره مانتفق..لكني احبها وااايد وماحب اشوفها متظايقه...
يلست عدالها عالشبريه ...
كنه: نوره حبيبتي شفيج.؟ ليش تصيحين منو زعلج...
تنفست نوره بصعوبه وقالت بصوت واطي هزّه الصياح..
نورة: ماشي...
كنه: كيف ماشي مستحيل تصيحين بلا سبب.... يدووه نازعتج؟
نورة: لا...
كنه: امي.؟ ..مايد؟؟
هزت راسها مره ثانيه بالرفض...واحترت انا بشو افكر...نوره مابتصيح بسبب اي شخص غير هالثلاث اشخاص بس..اما البقية ماتسمح لهم اصلا انهم يظايقونها...
كنه: عيل شفيج لا تخوفيني....
اطالعتني نوره بعيون مليانه دموع...وقالت لي بشكل مؤثر..
نورة: كنه....ليش الناس يحبونج ومايحبوني..؟!!..
تفاجات بسبب كلامها هذا....
كنه: فديتج كلهم يحبونج ليش جي تفكرين.؟؟
نورة: محد يحبني كثرج....الكل يحبج انتي اكثر مني..
كنه: حرام عليج انتي بس تحسين جي والا انا اشوف الكل يحبج..
نورة: انتي ماتحسين لانه وضعج غير..انتي محبوبه بين الكل...انا اللي احس بتجاهل الكل لي ونفورهم مني..
كنه: ماصدق...عطيني مثال...
نورة: شفتي عمي يوم يا هو وعياله يوم الجمعه؟؟.. يلسج عداله وقعد يسولف وياج اما انا سلم علي عادي... منى تفضلج انتي علي وماتسولف وياي وايد.....حتى...حتى عياله مايطيقوني...
كنه: حرام عليج انتي ليش جي تفكرين...عمي مب انه يحبني انا لشخصي هو يحب يسولف وياي لاني اذكره بيدته الله يرحمها....ومنى ربيعتي من الصغر بسبب تقارب السن يعني.. وبعدين عيال عمي يعاملوني مثل مايعاملونج ماشي فرق...
قالت لي باندفاع وهي معصبه...
نورة: ماظني يوسف سمعج رمسه تسم البدن مثل ماناصر سمعني....
كنه: شوووه؟؟؟... شو تقولين انتي؟؟
نوره: ماشي..
حسيت ان نوره بتتراجع وبتسكت مره ثانيه..
كنه: والله ياتقولين...شو قالج ناصر..
نورة: ماشي...كنه خليني بروحي..
كنه: خبريني اول وبروح..
نورة: اووووووف...شو اقولج يعني...ناصر قال لي انه مابيخطبني...جرحني وطعني في الصميم...قال لي لا ترفضين اللي ايونج بسببي لاني انا مابخطبج وطلعي هالفكره من بالج... وانا اللي اترياه من سنين يجازيني بهالطريقه..!!!..
ورجعت نوره غرقت في موجه صياح مؤلمة بصراحه....
شو اقولكم... ساعتها كرهت ناصر ولد عمي عاللي سواه في اختي...واضطريت اني امد ايدي واحضنها بقو عشان تهدا...
فعلا هي صبرت سنين ورفضت وايدين عشان ناصر...اخر شي جي يسوي فيها.؟!!..
ليش مايعرس عشان يفهمها بطريقه ثانيه انه مايبغيها...مب يقولها جي فويهها وبطريقه مهينه ومؤلمه...
كنه: ياعمري شو تبين فيه..هذا واحد سبال انتي تستاهلين اللي احسن منه... يعني ماتذكرين كل هالرياييل اللي تجدموا لخطبتج..؟ كلهم شارينج ولين الحين عندهم امل انج توافقين اذا رجعوا تقدموا لج... وفوقهم بيييج بدال الواحد عشره يبونج وبتشوفين...
قالت لي بصوت باكي ومنهار..
نورة: انا ماريدهم... ماقدر اخذ واحد غير ناصر ماقدر...
كنه: لانج حاطه هالفكره فبالج من انتي صغيره وصعب تغيرينها فجاه... لكن بتتعودين بسرعه على أي ريال ثاني خصوصا لانهم شارينج يانوره...
ابتعدت عنها ومسكت ويهها واطالعت فعيونها المليانه دموع..
كنه: سمعتيني؟؟.. انتي الف من يتمناج مب شرط ناصر...
نورة: كنووه...انا مب عشان هالسبب بس اصيح...انا احس ان الكل مايحبني...
كنه: غلطانه...
نورة: انا فيني شي غلط.؟ فيني عيب.؟؟ حلفت عليج ياكنه تقوليلي الصدق...
احترت شو اقولها...اصارحها..؟!!..يمكن يساعدها هالشي بانها تصلح شخصيتها شوي..
كنه: حبيبتي انتي فنانه من كل شي ماعدا انج شوي...شوي بس فيج تكبر وغرور..
بطلت نوره عيونها ووقفت عن الصياح...وقالت بصدمه...
نورة: انا..!!!..
كنه: شويه بس...يمكن هذا اللي يخليهم يتظايقون لانج تحسسينهم بانج انتي احسن منهم...
نورة: مش قصدي..
كنه: ادري حبيبتي مب قصدج ...بس لازم شوي تنتبهين لعمرج وتتواضعين للناس...
نوره: بس انا ماحس بنفسي اني مغرووره...ومااتقصد اني اغتر..
قلت بصوت مازح عشان اخفف شوي عن نوره..
كنه: يحقلج ياعمتي تغترين يوم انتي الله منعم عليج بكل هالجمال والحسن...والله اللي يشوفج يتعذب والا ماتعرفين يعني شحقه هالكثر ايوون يخطبونج..!!..
ابتسمت نوره غصبن عنها...مثل ماتوقعت...نوره تحب المدح وهذا يرجع لشخصيتها الفخوره...
وقالت وهي تمسح دموعها...
نورة: خليني اعرس وبتشوفين شكثر ايوون يخطبونج انتي..
كنه: انا اول واحد ايي يخطبني برضى فيه...ههههههههههههههه..
ظحكت نوره معاي ... وفرحت لدرجه اني بستها على خدها...
كنه: فديت هالضحكه ياربي..قومي حبيبتي غسلي ويهج ونزلي تحت لطوف ميته من الزياغ عليج..
نوره: اوكي..
خليت نوره ترتاح شوي وطلعت من غرفتها وانا فرحانه لاني نوعا ما توصلت لتفاهم مع نوره..بالاضافه اني جبرت بخاطرها وراضيتها....لاني اول مره اشوفها منجرحه وزعلانه وتصيح بهالطريقه... !!!... اما ناصر هذا فصدق انه مايستحي يقول لبنت عمه جي... السبال...!!!

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاثنين...
المكان: بيت خلفان..
الوقت: السابعه صباحا..
---------------------------------
(سيف)....

وقفت جدام المنظرة مستعيل وتسفرت بسرعه...خذت اغراضي وكتبي ونزلت تحت ركظ... شفت سهيل على وشك انه يروح...
سيف: وين سااير.؟
سهيل: تاخرت سواف انته اليوم...وانا بتاخر عالدوام جي...
سيف: عطني دقيقتين بس بشرب جاهي...
سهيل: نص الكوب بس صب لك مب كله..
سيف: يالزطّي... لحظه...
دخلت غرفة الطعام وسلمت على عمتي ومحمد....
سيف: وين ابويه؟
آمنه: ابوك عنده صداع اليوم يقول...يعوره راسه...
سيف: لا يكون مريض..؟
آمنه: مادريبه مافيه لاحمى ولا شي بس يقول عنده صداع...
دخل سهيل وراي ...
سهيل: سرعه ياخي ...
يلست وصبيت لي حليب وشربته فوقت قياسي...وبعدها طلعت مع سهيل اللي واقف على راسي ومستعيل..
في السياره...قلت لسهيل..
سيف: اوو ه تذكرت...تراني مابتغدى في البيت اليوم..جمال بيخطف عليه في المدرسه عقب الدوام وبنسير دبي..
التفت لي سهيل بفضول..
سهيل: سيراتك لدبي كثرانه هالايام...
سيف: شوفيها يعني انته امس ساير دبي..
سهيل: انا ساير ويا راشد ندور له سياره...
سيف: وانا ساير مع جمال مافيها شي..
سهيل: بس انته ثانويه عامه ولازم تنتبه لدراستك ياسيف...
سيف: كل هذا مب محسوب ..مايحسبون الا نتايجي في اخر السنه...وبهتم على اخر السنه...
سهيل: لاحول ولا قوة الا بالله....امحق درجات بتيبها عيل...
سيف: خلني انا احاتي هالموضوع هذا...لا تهتم...
سهيل: ماعرفنالكم... اذا اهتمينا قلتوا لنا لا تهتمون...واذا ما افتكرنا ولا سالنا قلتولنا والله انتوا ماتهتمون فينا... شو تبونا نسويبكم يعني.؟!..
سيف: انته شفيك متنكد اليوم..؟ طايح عن الشبريه؟!..
سهيل: مب منك من اللي يسال عن احوالك...
ابتسمت وسكت عن سهيل ... افكر بالحفله اللي بيسووونها الليله في دبي مع الشباب....
هذي ثالث حفله بنسجلها... والمجموعه فيها كذا صوت يستحق اني اتحداه بصوتي... واضطريت اني اجهز الاغاني اللي تناسب صوتي اكثر شي واقدر اني ابدع فيها وابرز صوتي...وبسبب التجهيز هذا اضطريت اني اسهر..وهالشي اللي خلاني اتاخر بالنشّه اليوم...
اما بالنسبه لدق العوود...خلاص صرت متمكن منه..وبصراحه ماقدر اتدرب فبيتنا عالعود لاني ماقدر ادخله البيت عن يعصبون علي... عشان جي اضطريت اني اخلي عودي فدبة السياره مالت جمال... وبتدرب في الدرب لدبي ان شاء الله.. بالمره اسمع جمال الاغاني اللي جهزتها... لانه جمال من اكبر المعجبين بصوتي وطبيعي يشجعني...ويحمسني شوي...
نزلت من سيارة سهيل ودخلت المدرسه وانا ادندن واغني بصوت واطي.. وبالي ماكان بال دراسه ابدا....




اليوم: الاثنين...
المكان: شقة ناصر..
الوقت: الحادية عشره صباحا..
--------------------------
(ناصر).....

طلعت من المطبخ وانا اكل سندويشه الجبن والجام اللي سويتها لي...وفي ايدي الثانيه كوب عصير منغا...توجهت لغرفتي وحطيت اكلي على التوليت...ومسكت الاكياس اللي كانت مليانه ثياب وبدلات شريتهم امس...
زين اني اليوم خذت اجازه عشان اتفرغ لتجهيز شنطتي...لاني مابحصل وقت ثاني...
فرغت الاكياس على الشبريه عدال الشنطه وتفاجئت لعدد القمصان والبناطلين اللي خذتها...هذا غير البدلات اللي عندي اصلا في الكبت....
دايما كنت احب القمصان والبناطلين واحب البسها ..كنت كل ماشوف قميص يعجبني اشتريه...لكني مااقدر البسه هني في الدوله....بينقدون علي...عشان جي كنت اشتري واخزن..
لكن امس دام حصلت العذر باني اشتري قمصان وبدلات ماقصرت..شريت كل شي عجبني ...
بديت بتجهيز الشنطه وحطيت كل الملابس والجواتي والاغراض الشخصية اللي بحتاجها..

وبعد ساعه ونص ..طلعت من المسيد وانا اتكلم مع عبد العزيز...
عبدالعزيز: هااا جهزت اغراضك..؟؟
ناصر: هي والله توني مخلص...وانته؟
عبدالعزيز: بجهزهم باجر الصبح يوم برجع من خور فكان....
ناصر: بتودي اهلك؟
عبدالعزيز: هي بعد تدري... حرمتي من كم يوم بس مربي وماتروم تيلس اروحها..قلت بوديها عند الاهل يساعدونها احسن...
ناصر: ههههه هي صح...اسميك سويت فينا مقلب ذاك اليوم...
عبدالعزيز: ههههههههههه السموحه ... انا اروحي ارتبشت يوم اتصلوبي من البيت...
ناصر: مسكين علي كان زايغ عليك...حتى انا زغت... اخر شي طلعت في المستشفى ويا حرمتك؟ انزين جان شليت التيلفون وياك...
عبدالعزيز: نسيييته والله....ولا تذكرته اصلا الا يوم بغيت اتصل باهلها واهلي عشان ابشرهم بالولد...
ناصر: عالعموم تستاهلون والله....وانا اليوم بسير العين بسلم على اهليه... متى قال علي الطياره؟
عبدالعزيز: يقول الساعه ثلاث بعد الغدا...
ناصر: تمااام وقت مناسب..
رن تيلفوني في هالوقت وطلع مايد متصل بي...
دخلنا البنايه انا وعبدالعزيز...
ناصر: السلام عليكم...
مايد: هلاااا وعليكم السلام ...شحالك ناصر..
ناصر: مرحبا الساع....بخير مايد شحالك انته؟
مايد: بخير وسهاله...وين دارك؟
ناصر: والله توني ياي من المسيد واحين بسير الشقه...وانته؟
مايد: انا احوص في بوظبي ...
ناصر: لا والله ...ياحيك...وشو تسوي فبوظبي؟
مايد: ياي فشغل وخلصته قلت بمر على ناصر...واحين افتر راسي وانا ادور في الشوارع نسيت شكل البنايه اللي انته فيها...احيدها فشارع الـ ..... بس نسيت وين بالضبط...
ناصر: هههههههههههههه انا بدليك اياها...
دخل عبدالعزيز شقته بعد سلام صامت وجهه لي لاني اتكلم في التيلفون...ورديت عليه سلامه بايدي ودخلت الشقه وانا ادلي مايد مكان البنايه واي طابق ورقم كم....يوم حفظ سكر عني وقال انه باييني...
حطيت تيلفوني عالطاوله ورتبت الصالة عالسريع...
وبعد عشر دقايق وصل مايد...
فتحت الباب عنه وانا مبتسم...
مايد: السلام عليك....
ناصر: مرحبتين الساع.. وعليك السلام والرحمه..
توايهت مع مايد...
ناصر: اقـــــــــرب...
مايد: قريييب...(دخل مايد الشقه اللي اول مره يدخلها)... ماشاء الله ماشاء الله....شعليييييييييييك مفتك من صدعه الاهل وزابن هني..
ناصر: هههههههههههههه والله اني اتوله على صدعتهم لا اتحسبني مرتاح....
خذت مايد في جوله عالشقه...اللي كانت عباره عن صالة متوسطه ومطبخ...وغرفة رئيسية لها حمام خاص وهي غرفتي... وغرفتين ثانيات بينهن حمام...خليتهم فاظيات لاني ماعرفت شو اسوي فيهم ولا احتاجهم...
وكان فيه حمام ثاني مطل على الصالة وكان بسيط وصغير بدون دش...
مايد: حلوه والله ومريحه.... بس تعال شفت شنطه على شبريتك وين ناوي؟
رجعنا للصالة ويلسنا...
ناصر: والله ناوي على الشام باجر ان شاء الله...
مايد: شو تبابها؟
ناصر: اغير جو...وارفه عن نفسي شوي ..من زمان ماسافرت...
مايد: اهااااا عشان جي ماخذ اجازه يعني...
ناصر: هي...
كان مايد متصل بي امس وعرف ان عندي اجازه ....
مايد: بصراحه انا مافكر اسافر لين عشر سنين.... عفت السفر..
ناصر: هههههههههه شعليك اربع سنين اظن وانته مسافر لازم بتشبع..
مايد: المصيبه شو اللي بيقنع الحرمه اني ماسافر... بتنحبط مسكينه اذا ماطلعتها فشهر العسل على قولتها...
ناصر: ههههههههه لا حرام عليك لازم تحوطها شوي...
مايد: الله يعين...اخبرك تراني امس مب متعشي ولا اليوم تريقت..وميت من يوعي...قم نسير مكان نتغدا فيه..
ناصر: حاااضرين افا عليك ولد العم...
قمت انا ومايد وطلعنا من الشقة ورحنا واحد من المطاعم وتغدينا....وبعد الغدا رجعنا الشقه وخذت سيارتي وركب هو سيارته وتوجهنا للعين ....

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

الجزء السادس والعشريـــــــــن....



---------------------------
اليوم: الاثنين..
المكان: سيارة ناصر...
الوقت: الثالثه ظهرا...
---------------------------
(ناصر)...

هديت سرعه سيارتي وانا اظحك على مايد اللي كان على طول الخط يحاول يسابقني...
ماينلام كان متغرب فتره طويله وتوله على خراش الشباب هني... خلني اعطيه فرصه ويسبقني ويستانس شوي...
كان طريق بوظبي – العين اليوم مزحوم على غير العاده...يعني وايد سيارات راجعه معانا العين او مناطق ثانيه تتبع نفس الطريج....
فقررت اتصل بمايد واقوله يهدي السرعه شوي... اتصلت بتيلفونه وحصلته مشغول...
حسبي الله عبليسه... يرمس في التيلفون ومسرع بعد وفي هالزحمه..؟!.. الله يستر ...
رجعت تيلفوني مكانه وسقت بهداوه...وعيني على سياره مايد بحذر....
لكن غصبن عني سرحت... وتراوالي طيف عزيز علي ..كان واضح شديد الوضوح...واقف بالشارع يطالعني بدهشه....فجاه طاح واغمى عليه...
عطيت بريك مفاجئ خوفا من اني ادعمها....!!!!
ويوم بطلت عيني على وسعهن....ماحصلت الطيف المالوف في الشارع....!!...وين راحت...
غمضت عيني بالم على الصوره اللي ترجعلي مية مره في اليوم ودايما بنفس الالم المصاحب...
هرن السيارة اللي وراي نبهني من سرحاني فحركت سيارتي بسرعه وانا اهدي اعصابي....
السياره اللي كانت وراي تجاوزتني بسرعه جنونية غريبه ولمحت فيها شاب كان مطلع راسه من دريشته ويسبني وهو معصب علي من بريكي المفاجئ.....ذكرني بنفسي يوم كنت طايش... الله يهديـــ.....
شهقت...وقطعت دعوتي له بالهداية وانا اشوف السياره المقصوده ينفجر تايرها فجاه واطير في الهوا... تجلبت عدة جلبات لجدام وفي النهاية اداعمت مع سياره ثانيه ووقفت....!!!
ادركت وانفاسي مقطوعه من المشهد اللي شفته توني....بان السياره الثانيه اللي كانت سبب بوقوف السياره هذي كانت سياره مايد...لا غير...
صرخت وبشكل هستيري...
ناصر: لا...لااااااا..مايد....
سقت سيارتي وزين اني انا نفسي مادعمت سياره ثانيه من السرعه...وعطيت بريك حاد على طرف الشارع ونزلت ركض وخليت باب سيارتي مفتوح....!!
حسيت ان عقلي طار ماعرفت شو اسوي بالضبط .... كنت اصرخ ...." مايد...مايد.."... وانا الاحظ وقوف عدد ثااني من السيارات الماره...وفي منهم اكتفى بالسواقه ببطء عدال الحادث يتفرج شوي وعقب مشا ولا عالبال...!!!!...
اندفعت لسياره مايد وانا عقلي خلاص طار مني... فجيت باب سياره مايد من صوبه وهو كان فيها... راسه ينزل منه دم وهو متساند على السكان جدامه...ويئن بالم...
ناصر: مايد... مايد تسمعني...ماايد...
تنهد مايد وتجمعوا علينا شباب....والبقية تجمعت عالسياره الثانيه...
فتح مايد عيونه ببطئ شديد ورجع غمضهن...
صرخ واحد من الرياييل...
الريال: طلعوووه طلعوه من السياره....
صرخ ريال ثاني..
الريال: لالا يمكن ظهره انظرب او شي لا تحركونه بتظرووونه اكثر....!!
صرخت انا وياهم...
ناصر: شو يعني تبونا نتريا لين الاسعاف تي....؟!
الريال: نحن بنص الطريج والاسعاف بعيده لازم حد يوديه المستشفى باسرع فرصه...
قال لي ريال ثاني..
الريال: تعرفه انته اسمعك تزقره...
ناصر: ولد عمي...
الريال: شله انزين شله شو اتريا....
اعترض الريال القبلي..
الريال: لالا يمكن تضره ياريال... هيّد هيّد شويه بنفكر شو بنسوي...
عصبت انا ووصلت حدّي... بعدنا بنفكر؟؟ عندنا وقت نحن؟!!.....
ناصر: قوموا عني لااااااااااه.....
توجهت لمايد اللي كان شوي شوي يسترجع وعيه..
ناصر: مااايد...مايد شو بالضبط يعورك....مايد تسمعني...
مايد: جتفي...راسي....ماعرف...
تنهدت بظيج... الوقت يظيع منا...مسكت مايد بطريقه ماحسيت ساعتها انها كانت خشنه....تالم مايد من الحركه الخشنه هذي...وصرخ بالم.. تلومت .. فيه شي يعوره يمكن جتفه..!!. شليته انا وواحد من الشباب وحطيناه فسيارتي... ويوم سكرت البيبان وتوجهت لمقعد السايق ياني ريال ثاني عطاني سويج سياره مايد وتيلفونه...
الريال: الله يعينكم ياخوي وان شاء الله يقوم بالسلامه...هذا سويج سيارته وتيلفونه هذا اللي قدرت اطلعه من السياره...هي متكسره لكني عالعموم قفلتها.... واتصلت بالشرطه... انته لا تحاتي وروح سيده المستشفى ...
اطالعته بامتنان...
ناصر: مشكور ياخويه ماتقصر...اسمحلنا...
الريال: مسموح بالحل..الله وياك...
رحت عنه وركبت سيارتي...يزاه الله خير... انا كنت ناسي سالفه السياره كنت بخليها مفتوحه باغراضها اللي فيها وبروح....زين انه تذكر....
انطلقت بمايد اللي كان يون من الويع وانا اراقب السياره الثانيه اللي انطلقت معاي بنفس السرعه وهي شاله معاها الريال الثاني المتعور...
ولسبب غريب حسيت اني انا المسؤول عن هالحادث كله...
لو ما تراوت لي مهرة في الشارع ماعطيت بريك...ولو ماعطيت بريك ماعصب الريال اللي وراي وتجاوزني بهالطريقه وسرع...
فصخت سفرتي وفريتها عدال مايد وقلت له...
ناصر: امسكها مايد دخيلك واضغط بها على راسك عشان ماينزل دم وايد.... مايد دخيلك تشجع وساعدني انا اروحي في السياره وماروم اسوي هالشي لك....مايد تسمعني؟!!!.!...
كنت خايف حدي بصراحه.... مايد مثل اخوي واعز وماريد شي يصيرله ابد... خصوصا اذا كنت احس نفسي اني انا السبب ....
تنهد مايد بتعب وقالي بصوت متقطع..
مايد: ناصر...ناصر لا..لا تسرع...انا بخير...لا تسرع...
ناصر: ان شاء الله...

قلت له ان شا ءالله وانا مب معزم اني انفذ....ماقدر...ريلي تدوس على دواسة السرعه غصبن عني وبدون ماحس.... وصارت سرعتي مب الا جنونيه....الا اخس من جنونيه...
لو اطوف عدال سياره بطيرها بعيد...!!... ومادري كم رادار مسكني...
لكني كنت سايق ماهر وحذر.... ومايد لازم يوصل المستشفى باسرع فرصه...
حمدت ربي ان مستشفى توام قريب على دخلة العين من طريج بوظبي...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاثنين..
المكان: سيارة سهيل..
الوقت: الرابعه وعشر دقائق عصرا...
-------------------------------
(مهرة)...

ركبت سيارة سهيل وانا اتنفس بتعب من هالحر...
مهرة: السلام عليكم...اووووووف...يازين البراد نعمه.....!!
ابتسم سهيل بتسامح ووجه المكيفات عليه عشان يبردني..
سهيل: وعليج السلام.... اشوفج هلكانه اليوم على غير المعتاد شفيج.؟
مهرة: وايد مشيت اليوم تعبت...واليوم الحر بلا قياس بصراحه...وفوق هذا لابسه قميص غليظ شوي فطسني... يالله ورانا المستشفى بس وبروح البيت وببخها برقده...
التفت لي سهيل متفاجئ وعلى ويه 100 علامه تعجب واستفهام...
سهيل: أي مستشفى؟...
التفت له وانا متظايقه...اكيد نسى....ليش هو بشو يفتكر اصلا عشان يتذكر موعدي...
مهرة: شووووو سهيل نسيت؟؟؟ قايليلي تعالي كل اسبوعين عشان افحص ايدي ..خبرتك تراني اخر مره ..!!! وذكرتك يوم الجمعه بعد ماردينا من عملية شيخه...!!!
اعتفس ويه سهيل بتانيب واسف...
سهيل: والله اني بوديج يامهرة لو اني مب مواعد ريال...قايل له بعد مااييب اهلي من الجامعه بييك على طول... والا والله بوديج والله اني نسيت السموحه...
برطمت واطالعت سهيل بقهر....
مهرة: احين منو بيوديني انا؟
سهيل: ابويه احيده في البيت...
مهرة: ابيوه احين بيسير مزرعته اذا مالحقنا عليه قبل مايطلع....
سهيل: عيل لازم نسرع...
وشفته يزر السياره ويطير...بصراحه خفت...
مهرة: لالا يابوي لا تسرع.... اتصلبه تيلفون قول له لا تطلع من البيت الا يوم نيك عندنا سالفه...
سهيل: نخوفه يعني..
مهرة: هي هي خوفه هههههه...
سهيل: مشتهيتنها العصا انتي؟؟؟؟...والا تفضلين العقال..!!!
مهرة: عااااااااد مابيقولي شي ابويه طيب اصلا احسن منكم.. مب انتوا مافيكم فايده...!!
التفت لي سهيل مستغرب....
سهيل: عنبو هالويه لج ....من وين يبتي هاللسان انتي؟؟؟...
سكت وانا اطالع جدامي بخوف...وارتباك....فعلا من وين يبت هاللسان؟...من متى انا ارادد خواني؟؟؟..والا اطلع اللي فخاطري..!!..
لايكون بسبب هالشله المخروشه اللي اقعد معاها كل يوم... علمني سلاطه اللسان والرمسه خسهن الله...!!!!...
مهرة: آسفه...!!
سكت عني سهيل وكملنا طريج البيت في سكوت تام...ويوم وصلنا نزلت انا مع كتبي...وريوس سهيل بسيارته وطلع من البيت مره ثانيه...
دورت ابويه في البيت وحمدت ربي يوم حصلته حجرته يلبس ثيابه...
سرت ووايهته...
بو حمد:.. ها مهرة توج يايه من الجامعه..؟
مهرة: هي ابويه...ها شو راسك الحين احسن؟..خاز ويع راسك؟
عقد ابويه حياته وقال...
بو حمد: شوي..
مهرة: هممم... ابويه بتسير المزرعه؟
بو حمد: هي..شو فخاطرج؟
مهرة: ابويه انا عندي موعد في المستشفى اليوم عشان ايدي...سهيل ماطاع يوديني اون متواعد مع ريال....
بو حمد: وحمد؟
مهرة: ماشفته ابويه مادري حمد موجود والا لا...
فكر ابويه شويه وقالي...
بوحمد: ماعليه ركبي السياره وبوديج...
حسيت بفرح من انه ابويه طلع فعلا طيب واحسن من خواني كلهم...
مهرة: مشكووووور يابويه...
هز ابويه راسه بصمت وطلعت انا عنه وحطيت كتبي في الصالة عالمكتبه وترييت ابويه عدال سيارته لين مايا... زين اني جاهزه وبعباتي وبنقابي....
ركبت مع ابويه وانا احس بالرهبه معاه واحترم نفسي غصبن عني... حتى النفس كنت اخذه بهدوء وبصمت... وما تحركت ولا حركه.... لين ماوصلنا مستشفى توام...

وبعد الفحص والتشييييكات...اثبت ابويه خلالها انه له صبر وطوله بال... وتفهم ماله حدود يوم اكتشفنا بصدمه كبيره ان الدكتور اللي بيستلمني دكتور مواطن يديد متخصص بالكسور...
حسيت بالنفور لكني كنت مجبوره ارضخ للدكتور هذا واخليه يفحص ايدي...
وبعد الفحص والاشعه لبس الدكتور نظارته ويلس عالمكتب يفحص الصوره...
الدكتور: اصلا انتي عندج كسر بسيط شحقه حاطين لج جبس هالكبر ومسوينها سالفه عوده..!!!!...
سكت عنه ولا رديت...وابويه مارد...نزلت نظري لحظني وانا متوتره من ان الدكتور يقدر يشوف عيني..
ليش ماتغشيت انا الغبيه..!!!!...
استغرب الدكتور من سكوتي ورفع عينه عن الاشعه واطالعني بعيون كبار ووساع...وتخوف...
الدكتور: هاااااه..؟!!..
فزيت وتراجعت على وراي...
مهرة:..ما...ماقلت شي...!!
الدكتور:ادريبج ماقلتي شي بس انا سالتج...المهم منو الدكتور اللي جبس لج ايدج...
مهرة:...مـــ....ــــادري... آآآه...كان في الطوارئ...
هز الدكتور راسه باسف كانه متظايق ورجع يطالع الاشعه....
الدكتور: تحسين بالم فيها الحين؟
قلت له بغباء...
مهرة: الحين يعني؟؟؟
رجع يرفع عينه لي بنظرة ماكره مع شبح ابتسامه..
الدكتور: اقصد الفتره الاخيره....تعورج مثل قبل؟
هزيت راسي بالنفي ونزلت عيوني مرتبكه....الله ياخذك...ماشي دكاتره غيرك في العالم مسوي نفسك فاهم....!!!!
الدكتور: اووكي...شوفي انا بعطيج مشد تقريبا هو مثل الجبس لكن ميزته انه متحرك...ايدج قربت للشفا... لكن اباج...آآه...شو اسمج انتي...( واطالع في الملف وقال بعدها)..هي ..مهرة...اباج تكونين حذره جدا في استخدام ايدج... ومن تحسين بالم رجعي المشد عليها... وانا انصحج باستخدامه طول الوقت لكن تقدرين تشلينه متى ماتبغين مثلا...خلال الوضوء او السبوح او غيره مثل ماتبين...
حرك ايده وهو يشرح بطريقه مضحكه ..وتخلي الواحد يتنرفز ويحس بعدم اهميته بنفس الوقت...
مهرة: ان شاء الله...
طنشني وقعد يكتب على ورقه اشياء بالانجليزي وكلم ابويه مع ابتسامه مهذبه مرسومه على حلجه...
الدكتور: الوالد ماشربناك شي اسمحلنا.... شو تشرب قهوة والا شاي والا عصير.؟؟
بوحمد: يطولي بعمرك ماتقصر ...
الدكتور: مايصير عاد .... بصراحه والله اني مستحي منك... اول مره يدخل عليه ريال يذكرني بابويه المرحوم وماودي تطلع من عندي بدون ظيافه...
ابتسم ابويه بينما انا وبطريقه غريبه بحلقت في الدكتور بطريقه جريئة من دون قصد مني...
بوحمد: ماتقصر ياولدي اعتبر الظيافه تمت ونحن مانبا نعطلك اكيد عندك مرضى يتريووون... بس خلصلنا البنت وبنروح عنك ومشكور وماتقصر والله...فيك الخير....
الدكتور: خلاص ولا يهمك...وترا البنت مافيها شي الا تدلع عليكم هههههههه...
فرت من غيظي وانا اشوف ابويه يظحك معاه....!!!..انا اتدلع..!!!.. خسك الله يالسبال انا طايحه عن الدري...!!!!!.... خلني اشوفك واقف على دري وبتشوف جان ماادزك عشان تندبغ على راسك ...ساعتها بتعرف كيف الدلع يكون..... يادكتور..
الدكتور: المهم هذي الوصفه مع شوية ادوية وفيتامينات عشان تقوي عظام هالبنت وماتتكسر عظامها بسرعه جي.... على فكره هي شقايل انكسرت ايدها؟؟
انقهرت اكثر واكثر....شو بعد يقول "هالبنت"...يتكلم عني كاني مب موجوده او كاني ياهل....فقدتك مالت على شكلك...ومالت على اللي خلاك دكتور....ماعنده اسلوووووب..!!!
بوحمد: يابوك طايحه عن الدري في البيت...
هز الدكتور راسه وقال..
الدكتور: اهاااااا....
واطالعني بنظرة كانه يقولي عنبووو يالبقره ماتشوفين جدامج..!!!!...
طلعنا عنه بعد ماوصلنا لين الباب وتبادل السلامات مع ابويه ودخل مريض ثاني عنده..
كرهت هالدكتور..والحمد لله انه ماقال تعالوا مره ثانيه بعد اسبوعين...خلاص افتكينا قاربت ايدي على الشفاء...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

-------------------------
اليوم: الاثنين..
المكان: المستشفى..
الوقت: الخامسه والنصف مساءا..
-------------------------
(يوسف)....

طلعنا انا وخالد مندفعين اندفاع من المستشفى...بعد ما اكتشفنا ان مايد تم نقله للقسم الخاص الملحق بالمستشفى وهو في مبنى منفصل....
كنا نمشي مشي سريع سايرين صوب السياره...
توني واصل السياره الا واسمع حد يزقرني...!!!
التفت وشفت ريال كبير....يالله يالله ميزته...
بو حمد..!!!...
يوسف: مرحبتييين هلا...
توايهت مع بو حمد وتبادلنا السلامات... وتقرب خالد بعد وسلم على بوحمد بشكل رسمي....
بوحمد: خير يابويه شو تسوي في المستشفى..؟!..عسى ماشر...
ماعرفت بصراحه اقوله والا ماقوله....وبعدين فكرت...ليش ماقوله وخلاص...مافيها شي..
يوسف: والله ياخالي ولد عمي توه مسوي حادث على طريج بوظبي العين ونقلوه القسم الخاص...
بوحمد: لاحول ولا قوة الا بالله.... منو ولد عمك..؟؟ مايد.؟!..
غمضت عيوني بشكل متكرر متفاجئ....
يوسف: ماشاء الله ياخالي تعرف مايد ثرك...!!
بوحمد: انا يابويه اعرفكم واحد واحد .الا انتوا ماتعرفوني... انا ربيع ابوك من سنين وكنت اعرف عمك الله يرحمه واعرف عياله... ربه ماتعور مايد وايد..!!!..طمني؟
يوسف: والله علمي علمك ياخالي انا اتصلوبي وخبروني عالسريع ويييت طاير من الجامعه حتى يايب ربيعي وياي...
بوحمد: انا بلحقكم بسيارتي وبسلم عليه اذا مافيها ازعاج او تكليف...
يوسف: افا عليك ياخالي حياك حياك....اركب ويانا السياره نحن بنوصلك..
بوحمد: لا الغالي مشكور انا بنتي في السياره ماروم اخليها....
يوسف: اللي يريحك خالي ...عيل بتلحقنا؟
بوحمد: وراكم على طول...
يوسف: على خيرعيل..عن اذنك..
بوحمد: اذنك معاك...
ركبت انا سيارتي وركب خالد معاي...
خالد: يوسف منو هالريال؟
يوسف: ربيع ابوويه...وولده حمد ربيع اخويه محمد...يعني تعارف بسيط بينا...
حركت سيارتي مستعيل ورحنا للمبنى الخاص..وقفنا وبركن بوحمد سيارته فمكان قريب ونزل منها...الظاهر ناوي يخلي بنته في السياره... ساعتها خذني التفكير... لا يكون هي نفس البنت اللي اغمى عليها جدامنا؟؟ مسكينه لا يكون صايرلها شي من الطيحه عشان جي يايبنها المستشفى؟؟... آآآخ بس لو اعرف شو بينها وبين ناصر...!!!...
نزلنا وتريينا بوحمد لين ماوصل عندنا ورحنا معاه لغرفة مايد اللي قالولي عنها....
الموجودين كانوا ناصر وابويه...ومايد طبعا... وامي وام مايد ويدوووه ونوره...كلهم كانوا معاه في الغرفه...
دخلت انا اول عشان اسوي للبقية درب...سلمت على ابويه وناصر ويدوووه والبقية...
كان مايد تعبان وشكله على وشك انه يرقد...يعني عيونه يغمضهن بثقل...شكلهم عاطينه مخدر عن الالم...
سالت عن حال ناصر وقالولي انه عنده خلع عنيف في الكتف ورضوض منتشره في ظهرة وصدره ويديه..فوق هذا عنده ظربه في الراس خاطوها له والحمد لله انه ماشكلت أي خطر... لكن خلع الكتف يباله شوية وقت...
يوسف: مسكييين... امايه... ويايه رياييل يبغون يسلمون على مايد سيرن صالة الحريم...
نفذن الحريم الامر وانسحبن من الغرفه... اما ابويه قال لي بفضول..
بومحمد: منو ياي وياك..؟
يوسف: خالد وبوحمد ربيعك...تلاقيت وياه جدام المستشفى واصر انه ايي يسلم على مايد...
نقلت نظري لناصر ابا اخبره باي طريقه ان بنت الريال هذا موجوده في السياره تحت ..لكنه ما التفت لي وعقد حياته من اللي سمعه واعتفس ويهه واستمر يطالع الارض باهتمام...!!!!
بومحمد: بو حمد..!!!!..فيه الخير والله ...حيااااااااااه...
كان ابويه متحمس لشوفة ربيعه الظاهر انهم يحبون بعض وايد..وراح بنفسه للباب واستقبله ودخله على مايد عشان يسلم عليه ويتشكرله بالسلامه...بالاضافه على خالد المسكين...
دخلوا بو حمد وخالد وسلموا على ناصر...و"حاولوا". انهم يسلمون على مايد اللي ماكان واعي لاي شخص ساعتها...
قعد ناصر بعدها يشرح لهم كيف صار الحادث بالتفصيل...
يوسف: لاحظت ان كندورتك خايسه دم ؟؟؟؟
ناصر: هي..ولا صليت العصر لين الحين...ماقدر اصلي وكندورتي خايسه...احين بسير البيت وببدلها..
بوحمد: بنزل وياك...
بومحمد: افااااااا عنبووووو ياخلفان ماتفاولت ولا شي سيده بتروح..!!
بوحمد: بيييكم مره ثانيه ان شاء الله ياسلطان ...بيلس وياكم والله ياغير بنتي يالسه في السياره وتترياني ماروم ابطي...
نقلت نظري لفضول لويه ناصر من هالخبر اليديد....اللي كان تاثيره عليه واضح جدا.... اول مره اشوف ناصر مستهم بهالطريقه...كانه شايل هم الدنيا كلها....
بطل عيونه وبحلق في الريال كانه بياكله بعيونه من اللي سمعه....اموت واعرف شو بينه وبين هالبنت...
يقولي مب حب...عيل شو هذا اللي يطفح من عيونه..ومب قادر يغبيه..!!!!..
وبعد لحظات...انسحب بو حمد مع ناصر المرتبك وطلعوا من الغرفه... وتم خالد معانا... سمعت صوت انفتاح الباب مره ثانيه...وبما اني الاصغر سنا بين الجميع رحت اشوف منو ياي اذا ريال بقرب به في الميلس ...
لكنهن كانن حريم.... عقن غشاتهن وبانت ويوههن الخايفه والمرعوبه على اخوهن الوحيد وسندهن...
اول ماشفت كنه تنفست بحده....كان خاطري اعطيها طراق معتبر...على لعبها الماصخ علي....
شو شايفتني انا لعبه يعني؟؟!!!...
على طول قلت لهن..
يوسف: يالله يالله يالله... الجياكر من هالصوب لا ادخلون عالريال تسووون له سكته قلبيه...
اشرت لهن على صالة الحريم عشان يروحن لها...تمن يطالعني باستغراب... لكن في النهاية عايشه ولطيفه انسحبن وخافن من شكلي المعصب....!!!
لكن منو يقول كنه تخاف..!!!
وقفت وقالت لي بويه معتفس ومعصب ومصدوم..
كنه: ماغيرك جياكــــ....
قاطعتها وقلت لها بصوت واطي وهادي ..
يوسف: اووووووووووووووص.... ولا كلمه... ذلفي صالة الحريم ولا تعلين حسج احسن لج..
اطالعتني باستغراب اكثر...
كنه: ابا اشوف اخووويه...
يوسف: والله مابيشوف ملاك الرحمه..!!.. بيشوف جنيّة من جنانوة الليل...
كنه: شفيك انته ..!!!...بسم الله...
يوسف: كنوه دشي صالة الحريم لانه عندنا ريال....
كنه: هي قول جي من الصبح مب تقولي ذلفي....مستلمني من ييت...شحقه تقولي ذلفي...
يوسف: باختصار لاني اباج تذلفين...
وقفت مكانها وقالت لي بعناد...
كنه: مابذلف....
فار دمي....مب ساد شو سوت بي امس وبعد يايه تعاندني.... احين انا ما انزل لج من زور؟؟ انا لو ييت اخطبج بتشوتيني برا البيت..!!!!.. بتشوفين احين كيف المعامله السيئه وهذا ويهي ان ماصيحتج فيوم من الايام....!!
مديت ايدي واشرت لها بصمت لباب صالة الحريم عشان تدخل وتفكني من صدعتها وبدون مناقشه...
كانت على ملامح ويهي العصبية واني مب ناوي على خير وعادي امد ايدي واظربها على هالعناد...فقررت انها تستلم وتروح...لكن صدق طلعت ياهل يوم مدت لي لسانها بغيظ ودخلت.....!!!
هاللي قدرتي عليه...!!!..
حتى هاللسان بنقصه فيوم وبتشوفين.... غادي اطول عنج ويرضفج مرتين...حشى..!!!
رجعت لغرفة مايد وانا احس انه بعده فيني غضب مكبوت على كنه لازم اطلعه وانتقم...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاثنين...
المكان: في المستشفى...
الوقت: السادسه الا ربعا مساءا...
----------------------------------
(ناصر)...

كنت اتنافض من قمة راسي لين ريلي....مب ساد الحادث....مب ساد اني شفت بوحمد.... والحين على وشك اني اشوف مهرة بعد..!!!... شو هاليوم النحس...!!
كنت اسولف مع بوحمد عن امور تافهه وخبرته باحتمال تاجيلي لسفري بسبب حادث مايد... وماعلق عالموضوع...
قبل ماننزل تحت مديت ايدي لمخباي وطلعت نظارتي الشمسية ولبستها... حاليا ماكنت لابس سفره لانها خاست دم.... احتمال مهرة ماتعرفني بهالطريقه...لانها ماكد شافتني بنظاره او بدون سفره ..... ان شاء الله ماتعرفني..
بصراحه...
انا خلاص قررت اني ما اسبب لها عذاب اكثر عن اللي سببته لها....
وايد عليها يوم عايشه ومستحمله.... ماقدر ازيد عليها اكثر... واتمنى انها ماتعرفني اليوم....
وصلنا برا المبنى...وبسؤال خادع سالت بو حمد عن مكان سيارته... ويوم سرت بوصله عطيت السياره ظهري...
صحيح اني لمحت مهرة..لان سيارة بوحمد ماكانت مخفي..وصحيح ان قلبي طاح فبطني...الا اني تماسكت... اليوم شفت وايد اشياء اقوى من جذي.... ليش بالذات شوفتها هي تخليني ضعيف جذي..!!!...
سلمت على بو حمد بشكل عادي وحسيت انه ما انتبه لتوتري وحمدت ربي على هالشي... خليته وتوجهت لسيارتي المورسيدس وركبتها....
التفط انفاسي.... واتمالك اعصابي....
ماحركت سيارتي الا بعد ماهم تحركوا.... وغصبن عني مشيت وراهم مسافه لاباس فيها... لكني في النهاية اضطريت اني امسك طريج ثاني عشان اتوجه للبيت... واودع مهرة بنظري من بعيد....
وقلبي يعتصره الالم....نفسي تقولي اني ابا اشوفها دايما جدامي....
بس عقلي يقولي خلاص خل البنت فحالها...
وانا بخليها فحالها ... لانه رغبتي بالاعتذار مستحيل تتنفذ.... مافي مجال بيني وبينها عشان ابرر لها موقفي...
وصلت البيت... وقفت سيارتي وانا اشوف محمد اخويه في سيارته يتريا حد...
نزلت ورحت صوبه ووايهته...
محمد: هاااااااااه شحاله ولد عمك؟ وليش ماخبرتونا من قبل؟؟؟؟...
ناصر: اتصلت بك حصلته مغلق...
محمد: اوهوووووووو كنت راقد... وينه هو احين؟ وشو حاله...
ناصر: بخير الحمد لله اصابته بسيطه نوعا ما... عنده خلع في الكتف وظربه في الراس خيطوها له والحمد لله ما اثرت عليه بشكل كبير يعني...ورضوض.. غرفته في القسم الخاص يوم بتوصل هناك اتصل بيوسف بيدليك...
محمد: ماعليه مب مشكله...
ناصر: منو بيسير وياك؟؟
محمد: ميثا بتسير زايغه على خوها..
ناصر: والعيال؟
محمد: بنخليهم عند منى...
ناصر: خلاص عيل برايك انا العصر ماصليتها لين الحين...
محمد: الله وياك...
رحت البيت وحصلت منى يالسه وجدامها بنت محمد الصغيره شمسه اللي عمرها حوالي 8 شهور... هالبنت من تشوفني اتم تناقز وهي يالسه وتظحك ...وتخلي الواحد يظحك غصبن عنه... في ويهها براءه غير طبيعية...
ناصر: فديييت شماااااااس انا ..حبيبي ماروم اشلج كندورتي خايسه...!!
نشت منى ووايهتني....واطالعتني برعب...
ناصر: لا تخافين مب دمي هذا...
منى: مسكيييييييييييييين مايد والله...عساه بخير الحين؟
ناصر: بخير الحمد لله لا تخافون...بسير انا اتسبح احس عمري لايث...
منى: انزين...انزل عاد عقب لا تخليني تراني اروحي في البيت ....
ابتسمت لها وركبت فوق.... وانا احس اني اسحب اثقال الدنيا كلها وراي...شو هالتعب المفاجئ.؟؟..
وبعد ماتسبحت حسيت بنفسي خفيف شوي... لبست ملابس نظيفه وتعطرت وتسفرت ورجعت انزل تحت ..
يلست عند منى وانا الاعب شماس الصغيره...اللي من اقل حركه تقعد تتكركر....
شي غريب الواحد يوم يقعد بين يهال يحس ان الدنيا بخير...!!!..
------------------------------------
اليوم: الاثنين...
المكان: سيارة راشد..
الوقت: السابعه والنصف مسااء...
------------------------------------
(شيخه)...

حظنت الكيس اللي بين ايدي بحرص شديد وانا مستانسه.... بنسوي مفاجاه لمهرة....
لو كنت في ظرووف ثانيه ماظني حد بيفتكر يوديني...لكن لاني كنت زعلانه ومنتطبه فحبوا انهم يراضوني بانهم يوافقون على سيرتي هذي...
بالتالي رحت العصر السوق مع راشد واشتريت هدية حلوه و"حيّه" لمهرة.... اليوم عيد ميلادها... والظاهر انها ناستنه... وانا تعمدت اني ماا تصل بها ولا اباركلها وابين لها اني ناسيه ....
عشان اسويلها مفاجاه...
التفت لي راشد بظيج وقال..
راشد: كم بتطولين عندهم؟؟؟...
شيخه: مادري..لا تقعد تحاسبني احين تقولي خمس دقايق ورايحين؟؟..مابا....
راشد: عيل بفرج وبروح عنج لانه سهيل عنده شغل اليوم مشغول ومب موجود في البيت من العصر...
نوعا ما حسيت بظيج من هالشي....
يعني مابشوف سهيل..؟؟؟... خساره...يالله ماعليه لاحقين.....
شيخه: انزين اتصل به خله اييييك...
راشد: لا مابتصلبه اقولج مشغول تبيني اقوله ودر شغلك وتعال جابلني؟... المهم متى تبيني ارد لج؟ ساعه تسدج...؟؟؟
شيخه: لاا ماتسدني...
راشد: حشىىىىىىىى ...
شيخه: انا بتصلبك يوم ابا ايي ...امي مرخصتني اليوم حتى ابويه وانا نادر ما اطلع من البيت...
راشد: امي لو تدري انج من ركبتي السياره عقيتي اللزقه عن عيونج مادري شو بتسويبج..
شيخه: عيل تباني اسير عند الناس بلزقتي علىعيني؟؟ فظيحه...
راشد: يابوي كيفج... صدعتيلي راسي..
سكت وانا ابتسم....
وصلنا بيت خالتي... نزلت من السياره بينما راشد تراجع على طول وطلع من البيت....استغربت تصرفه شكله مايبا يسلم على حد....!!!..
دخلت الصاله بحذر اوايج حصلت عمة مهرة وحرمه اخوها عفرا يالسات ويسولفن...
تفاجئن من دخولي عليهن بهالطريقه ونشن يسلمن عليه...
وبعد السلامات وغيره... سالتهم عن مهرة...
عفرا: مهرة يت من المستشفى تعبانه وقالت بترتاح فوق شوي...
شيخه: عسى ماشر شفيها؟؟؟
آمنه: لا ابدا سايره تفحص ايدها وشلوا عنها الجبس هالمره...
شيخه: والله زييييين ياحيها...خلاص انا بسيرلها فوق افاجئها... عن اذنكم...
عفرا +آمنه: اذنج معاج...
ركبت فوق... مريت حرجة سهيل وكان بابها مفتوح ومكيفها مشغل... كنت متاكده انه مب موجود في البيت عيل ليش كل شي مشغل عنده.؟؟؟... طليت براسي للغرفه وشفتها مجلوبه فوق تحت...
شو هالمهمل هذا.... سهيل فوضوي...!!!..
تجاهلت الغرفه ورحت غرفة مهرة القريبه من غرفة سهيل...ودقيت الباب بهدوء..
بعد دقايق فتحت لي مهرة ... كانت ناشله شعرها الحلوو والاسود اللي يوصل لين خصرها ومقصوص مدرج... كان شعرها ناعم وسايح وحيوي يتحرك بسرعه... يعجبني وايد...
كانت لابسه بجامه نوم كمها قصير.... وفي ايدها اليسرى مشد شكله يديد...
قالت لي متفاجئه والابتسامه على ويهها...
مهرة: اهلييييييييييييييييييييييييين شو هالمفاجأه الحلوه...
سلمت على مهرة وانا ابتسم لها ابتسامه واسعه....
شيخه: كل عام وانتي بخير ويا هالراس...وعقبال ماشوفج عيوز بلا ظروس..
ظحكت مهرة وعقب سكتت...متفاجاه...
مهرة: اليوم يوم ميلادي؟؟....هي والله تعالي نحن اخر شهر تسعه مالت علي ماكنت ادري ههههههههههه...مشكوووره الغاليه وانتي بخير يارب... قربي..
دخلت الحجرة ومازلت احظن الكيس بين ايدي...
شيخه: شو يالسه تسوين..؟
مهرة: امبوني منسدحه عقب نشيت ارتب الغرفه شوي...شوفي كيف عندي حاسه سادسه.... رتبت الغرفه قبل ماتين الحمد لله...
بغيت اقولها تكرمي علىغرفه اخوج ورتبيها....لكني تراجعت وخفت تنقد علي يوم اني دخلت حجرة اخوها بلا اذن...
شيخة: ياحيج والله...
مهرة: منوو يابج؟.. خالووه تحت؟
شيخه: لا والله امي تسلم عليج... راشد فرني هني وراح....
مهرة:ا هااااااا.... استريحي شيخه يلسي...
يلست عالشبريه وقلت لها بحماس...
شيخه: بنقعد براحتنا بس خلينا اول ننقذ هالهدية عن تفطس...
اطالعت مهرة باستغراب الكيس الي فحظني...
مهرة: ليش عبلتي على عمرج....شو يايبه..هههههههههه...
شيخه: يايبتلج شي بيسليج وبيخليج تراقبينه ليل نهار...
مهرة:ا لله... فجي فجي خلينا نشوف...
فتحت الكيس الكبير وطلعت منه علبة متوسطه الحجم مقفوله باحكام...وفيها ماي داخل...
مهرة: اللـــــــــــــــــــه... سمجه..!!!...
شيخه: ههههههههه ومش اي سمجه ... هذي الله يسلمج يسمونها النمريه...تعيش بلا فلتر...وبروحها...ماتحطين حد معاها لانها تظارب... بس حلوه وذيلها كبييييييييييير...
رفعت مهرة العلبه على مستوى نظرها وقعدت اطالع فيها باعجاب وفرح...
مهرة: فنااااااااااااااانه....بس وين بحطهاماعندي حوض لها..
شيخه: افا عليج يبت لج كل شي في هالكيس....
بدينا انا ومهرة نطلع الحوض الدائري الشفاف... ومليناه ماي وحطينا فيه حصى صغير خاص بالاحواض وحطينا زراعه بعد...اخر شي اظفنا السمجه في الحوض اللي قعدت ادور فيه فرحانه ببيتها اليديد...وانا ومهرة نراقبها بدهشة واعجاب....
مهرة: وااااااااااااااااايد حلوه مشكووووره ياشويخ فرحتيني والله...امبوني كنت متظيجه...
اطالعتها باستغراب وقلت لها..
شيخه: ليش متظيجه شو صار؟
قعدت مهرة تخبرني عن الدكتور السخيف اللي عالجها وكيف انه اطنز عليها وخلا مزاجها زفت من ساعتها....
انا قعدت اظحك بصراحه ....
مهرة: ومش هذا كل شي...
شيخه: شو بعد استوى....
مهرة: مادريتي شو صار بي ياشيخه... الخميس اللي طاف يوم كانت عندنا عزيمه....شفته...
على طول عرفت منو تقصد وحسيت بقهر....هذا متى بيخلي مهرة في حالها شو يبا منها....شو يترياها تتعقد اكثر من جي..؟؟؟
قعدت مهرة تخبرني تفصيلات الموقف وكيف انه الاغماء انقذها من موقف صعب ماكانت تتحمله... وانا اسمع بدهشة....
حاولت اواسيها شوي...لكن صعب اني اصلح اللي انكسر...البنت ثقتها بالرياييل انعدمت وصارت تكره طاريهم واي شي يسووونه.... وهذا غلط... لانه لا الحرمه تيوز عن الريال ولا الريال ايوز عن الحرمه وهذي سنه الحياة والمفروض ماتاخذ هالموقف الصعب.... وخفت خوووف كبير من انها بتلحق عمتها آمنه وبتعنس...
كملنا ساعه ونحن نسولف عن اشياء مختلفه...
فجاه انفتح الباب وتلاقت عيوني مع عيون بارده مثل الثلج...!!!..

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاثنين...
المكان: بيت خلفان...
الوقت: الثامنه والنصف مساءا....
------------------------------------
(سهيل)...

دخلت البيت وانا اتنهد من مشاوير اليوم اللي ماخلصت...حصلت عمتي وحرمه حمد عفرا يالسات في الصاله...
سلمت...وسالتهم عن ابويه..
آمنه: ابوك ساير عند عرب في المستشفى بيسلم عليهم...
عقدت حياتي ...
سهيل: منووو.؟؟
آمنه: مادريبه ماقالي...
سهيل: زين...وين مهرة؟؟؟
كنت متلوم من مهرة لاني ماوديتها المستشفى..وخوفي ان ابويه طقع فيها وماوداها بعد...لاني ماتاكدت انا وصلتها البتي ورديت طلعت ...
آمنه: فووق...عندها شيخه بنت خالتك...
انصدمت...شيخه..!!!..شو تسوي هني... منو يابها؟؟؟...غريبه...
حسيت بقلبي يسيح داخل صدري...وانفاسي تتسارع...
سهيل: احم...زين... سارت مهرة اليوم المستشفى والا ماحد وداها..؟
عفرا: بلى سارت وداها عمي وردت قراب المغرب...
هزيت راسي باستحسان...
سهيل: سيف مايا من دبي؟؟
عفرا: لا بعده...
خليتهن وبديت اركب الدري بتثاقل....
شيخه هني....موجوده في البيت.... شو تسوي؟ غريبه زيارتها بصراحه..
تذكرت الكلام اللي دار بينا امس وماخلاني ارقد ابدا...
صحيح فاجأتني... وخلتني فصدمه مابعدها صدمه.... وتميت حوالي نص ساعه مب فاهم ولا كلمه من اللي قالتهم...
لكن كلامها واضح ماعليه لبس...لكن خوفي ان هذا قلبي اللي متعطش انه يسمع هالكلام فهمني هالشي بالغلط.... يمكن هي ماتقصد جي....اووفففف...لازم اتاكد...
ومافي فرصه احين من احين...
ومن زود ارتباكي وتشتت فكري فتحت باب مهرة من دون حتى ما ادق الباب...
كانت النتيجه اني شفت شيخه والشيله على كتفها... تفاجأت يوم شافتني وعدلت الشيله بسرعه وتحجبت...
سهيل: السلام عليكم...
شيخه: وعليكم السلام...
مهرة: سهيل شو جي تفج الباب ماتعرف ادق..؟؟؟
سهيل: تحريييتج بروحج...
تورطت وماعرفت شو اقولها واضطريت اني اجذب....
مهرة: حتى لو كنت بروحي انا بنت ومن الادب انك ادق الباب قبل ماتفجه علي...!!!...
اطالعت مهرة باستغراب.....كلامها صحيح 100% بس...بس هذي شوفيها اليوم كله تراددني؟؟؟
سهيل: هذا مب لسانج....انتي مب صاحيه اليوم شي فيج....حد قاري عليج....
مهرة: لا بس هذا الصدق الواحد يقول الحق...
تنهدت بظيجه.... حتى نستني اسلم على شيخه واتخبرها عن حالها...انتبهت انها عقت اللزقه عن عينها...واستغربت من هالشي...المفروض تخليها اكثر من جي...!!..
التفت لمهرة وقلت لها...
سهيل: مهرة ممكن تخليني اروحي ويا شيخه ابغي اكلمها بموضوع مهم...!!..
شفت زوجين من العيون مفتوحه على وسعهن ويطالعني باستغراب شديد....
مهرة: نعم..؟!!!...
سهيل: ممكن؟؟...
شيخه: لا مش ممكن ارمس جدام مهرة...
كررت لها جملتها اللي قالتها لي في السياره...
سهيل: جب انتي محد كلمج...
مهرة: سهيل ماقدر اخليكم رواحكم عيب...
سهيل: ابا ارمسها بموضوع يخصني ويخصها واذا بغيتي تسمعي من عند الباب لاني مابسكره بس في كل الاحوال ماعرف ارمس جدامج...يالله خلصيني...
التفتت مهرة لشيخه وعقب قامت وطلعت..اما انا فلايمت الباب وماسكرته....
شيخه مازالت يالسه ومتوتره واطالعني باستغراب....وانا واقف جدامها وعاقد يديني جدام صدري...
سهيل: ليش عقيتي اللزقه عن عينج...؟!..
شيخه: استحيت ايي بها هني جدام الناس...
سهيل: ادري ان البيت بيتج وتين متى مابغيتي بس انا اعرفج مابتين بلا سبب...
ابتسمت شيخه وقالت..
شيخه: اليوم يوم ميلاد مهرة وحبيت افاجأها... ويبت لها هدية...
اشرت بصبعها على حوض صغير محطوط على وحده من الطاولات...وفي سمجه تتحرك..!!!..
سهيل: اهاااا... شيخه انامابلف ولا بدور بدخل في الموضوع بشكل مباشر.... احم.... انتي تبيني اخطبج والا لا..؟!!!...

رفعت شيخه حواجبها باستغراب وانصبغ ويهها بلون احمر....رفعت كتوفها بحيره وقالت..
شيخه: ههههه ..على كيفك والله....
عقدت حياتي..معصب...
سهيل: انا مابيي اذا كنتي بترفضيني شيخه...
رفعت نظرها لي وشكلها جي بدت تتنرفز...
شيخه: ومب شيخه بنت بو راشد اللي بتقول حق اي ريال كان تعال اخطبني بوافق عليك.....!!!..
قهرتني بتفاخرها.... هي تدري انا شو اقصد ليش تتعمد تفهم غلط..!!!..
سهيل: يابنت الحلال انا احين اسالج..اعتبريني يييت وخطبت بتوافقين؟؟؟
شيخه: بس انته لا ييت ولا خطبت اللي انا اشوفه انك يالس تتشاور...
سهيل: شيخه لا تلعوزيني فكري بالموضوع احين...
شيخه: انا ما افكر بعرض بعده ما انطرح...
سهيل: يووووووووووووووووووووه علينا ...شيخه لا تذليني عاد تعرفين ان هالموضوع صعب عليه وايد...
شيخه: وسهل عليه يعني..؟؟؟؟.... انته طريقتك وسؤالك غريب بصراحه هالاسلوب مايتكلمون به مع اي بنت...
سهيل: انتي تعرفين اني دفش وماعندي اسلوب عدل في الرمسه ويا البنات.... وابا اعرف رايج في هالموضوع لاني اباج تكونين حرمتي على سنة الله ورسوله وشارنج....شو رايج؟؟
شيخه: لو كنت تقدرني وتحشمني ياسهيل ماييت تسالني انا... جان حفظت كرامتي ورحت على طول عند اهلي ...مب ياي تسالني انا كانه لا لي لا ولي ولا حسيب ولا اهل.....!!!
انصدمت من طريقه تفكيرها...انا مب هذا قصدي...
سهيل: والله اني ماقصدت جي...انا اسالج لاني ادري بنفسي مابتحمل الرفض منج فاذا كنتي بترفضين مابييي اخطب... من احين قولي..
شيخه: كل شي في هالدنيا نصيب... واعيد مره ثانيه واقولك انا مابرد على عرض ما انطرح بشكل مناسب...
مت من غيظي....الظاهر اني مابطلع بنتيجه...
سهيل: يعني.؟؟
ابتسمت شيخه وقالت..
شيخه: يعني اكوووه الدرب طايح جدامك...سر عند اهلي اذا فخاطرك تخطب...وساعتها بفكر بعرضك وبرد عليك براييي...
مافي حل معاها غير هذا....البنت راسها يابس....عملية سحبناها سحاب للمستشفى عشان تسويها.... فمابالك بموضوع حساس مثل هذا...!!!...
قلت لها بتهديد...
سهيل: شويخ....ان رفضتي... مابراويج ويهي لين اخر عمري ترا...
ابتسمت...وعقب ظحكت ...وقالت وعيونها تلعب بطرف شيلتها...
شيخه: هههههههههههه... بنشوف...
غصبن عني ابتسمت....لاني من داخل كنت ميت من وناستي.... بنشوف هذي تعتبر ثقة من شيخه من ان هالتهديد مابيتنفذ... يعني شو افهم؟؟ بتوافق..؟؟؟؟ والله مادري بشو افكر بس شكلها جي...
وقبل ماضعف واقولها كلام اكثر خليتها وانسحبت بهدوء...
--------------------

يتبع باذن الله ^_^

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

الجزء السابع والعشـــــــــــــــــــــــــرين..




-------------------------

اليوم: الاثنين..
المكان: غرفة مهرة..
الوقت: الحادية عشره والنصف مساءا..
---------------------------
(مهرة)....

اسندت ويهي على كفوفي وانا اراقب سمجتي اليديده وهي ادور وادور في الحوض الصغير... كانت حلوه... وفرحت بها وايد...
والحين يالسه افكر شو اسميها..!!.. ياترى ان كلمتها بتسمع مثل باقي الحيوانات؟...والا السمج مايسمع بسبب الماي؟؟..
تحول تفكيري بالتدريج لشيخه اللي يابت لي هالهدية... ومن شيخه لسهيل والكلام اللي سمعته منه وهو يتكلم مع شيخه...!!..
ابتسمت يوم تذكرت كيف كان شكله يوم طلع وحصلني واقفه عند الباب.... قال لي..
سهيل: شو تسوين انتي؟
ساعتها قلت له ببراءه مصطنعه..
مهرة: انته قلت لي تسمعي...!!
سهيل: وانتي ماصدقتي..!..
ابتسمت ابتسامه واسعه وانا مستانسه بالكلام الي سمعته منه لشيخه... وهو المسكين احمر ويهه حرج وراح حجرته وماطلع منها لين الحين ...يمكن رقد..لكن حتى العشا ماتعشى لانه شيخه تعشت ويانا...!!..
ساعتها يوم دخلت على شيخه حصلتها منعفسه فوق تحت...تبتسم بتوتر ومحمره... صحيح انا ماكلمتها عن الموضوع اللي دار بينها وبين سهيل..لكن تمين من ارمسها تسرح...وتفكر... !!
انا ماعرف شو هو الحب او كيف الوحده ممكن تحب شخص...لكني حسيت اني اشوف الحب جدامي يطفح من عيون شيخه..!!...
هل من الممكن انها حبته بمجرد انه كلمها عن الخطبه..؟؟ والا هي تحبه من قبل..!!!.... مادري... ما انتبهت لهالشي من قبل...
للحظة وحده بس حطيت نفسي مكانها... باني متزوجه او مخطوبه..واحب شخص معين... لكني رجعت وصرفت هالفكره نهائيا من بالي...!!..
مش كل الرياييل مثل خواني...
صحيح خواني كل حد وسيئاته اكثر من حسناته....!...لكن بعد يتمون خواني... واحبهم..
لكن اني اتحمل شخص غريب عني ايي ويسوي عمره ريلي ويتسلط علي ويطالبني بالاحترام والمحبه..!!!..لالا يخسي.. شحقه ابلي عمري ..!!..
جذي احسن لي.. مفتكه..
فجاه انفتح الباب بكبره وبخشوونه.... شهقت انا من الخوف وقمت من يلستي..
مهرة: بسم الله ...ســـــــــيــــــــف...!!!..
ضحك سيف ظحكه حلوه زينت ويهه..
سيف: ههههههههه يالذلاله...شفيج..
مهرة: اوووووف...انته وخوانك غير شكل ماتعرفون ادقون الباب..!!..
سيف: ليش داخلين على حريم نحن ندق الباب..؟؟
مهرة: لا داخل على واحد من الشباب... شو بعد ماتشوفني حرمه جدامك بنت ولي خصوصياتي؟؟..
طنشني وبحلق في السمجه والحوض اليديد...تقرب منه وقعد يطالعها بفضول...
سيف: حلييييييييييييييلها.... من وين يبتيها؟
مهرة: شيخه يابت لي اياها هدية...
سيف: اهاااااااااااا.... انزين سمعي مهرووه...
ويلس عالشبريه وخش ايده في مخباه يطلع شي....وعقبها عطاني كاسيت (شريط) صغير..
وقال لي بابتسامه وسيعه...
سيف: سمعي هذا..
يلست عداله عالشبرية وخذت الشريط...
مهرة: شو هذا...
سيف: انتي بس سمعيه... وقوليلي رايج... بروحج بتعرفين منو انا منهم لانه فيه ذكر اسامي قبل كل اغنية...
عقدت حياتي..!!!.. شووووه.!!!!..
مهرة: سيف...شو تقول انته؟... أي اغاني أي ذكر اسامي ...شو مسوي بعد.؟!..
سيف: مب مسوي شي ابا اسمعج بس حرام؟...
مهرة: تسمعني شوووه؟
سيف: صوتي..
مهرة: تغني.؟!!!!...
سيف: اوهوووو قعده شبابية عاديه يابنتي يالسين نلعب بس المهم انتي سمعيه وباخذه عنج باجر وعطيني رايج...بس هااه...بيني وبينج ومايطلع ولا تخبرين حد عنه...
وكانه موافقتي مضمونه... خلاني وطلع من الغرفه قبل مايسمع ردي عليه...شكله بيروح يرقد...
اطالعت الشريط برعب...
ياويلي ويلاه من هالولد اللي كل يوم شي... امس زقاره واليوم غنا... وليته ودر الزقاره بعد لاني شميته في ثيابه اليوم رغم اني ماشميتها فيه الايام اللي طافت...الظاهر رجع لها ...!!.. او قعد عند حد ثاني يدوخ ...ولصقت الريحه فيه...!
الله يستر من بلاويك ياسيف...!

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الثلاثاء...
المكان: المستشفى..
الوقت: العاشره صباحا..
-------------------------------
(ناصر)...

وصلنا غرفه مايد..مديت ايدي وفتحت الباب لامايه اللي كانت يايه وياي...دخلت قبلي وانا ترييت لين ماتقولي ان الدرب امان...
ام محمد: تعال ابويه محد غريب...!!
تحنحنت ودخلت الصالة الملحقه بغرفه مايد... هناك حصلت يدووه..وام مايد...ميثا حرمه اخوي مع عيالها سلطان الصغير وشمووس...واخيرا نوره... اللي من شافتني نزلت عينها للارض على غير عادتها...تلومت.. الظاهر كلامي ياب نتيجه... لاباس فتره وبتتعود عالوضع...
حطيت الكيس اللي محملتني اياه امي عدال الباب..اللي كان فيه ريوق وفواله وغيره...
ناصر: السلام عليكم...
تقربت وسلمت على يدوه وحبيتها على راسها...
ام سلطان: مرحبتيين الساع بالغالي..شحالك فديتك؟
ناصر: بخير الحمد لله يدوه شحالج انتي..وشو اصبحتي؟
تبادلت السلامات الرسمية مع الكل حتى نوره ماقصرتها سلمت عليها برسمية وردت هي بعد علي برسمية شديده...!!...
شماس يوم شافتني ابتسمت ابتسامه وسيعه وطلعن ظرسين صغار على وشك انهن يكتملن.. ورفعت ايدها فوق تباني اشلها...
ميثا: ههههههههه شوفي امايه...شوفي شقايل اتخبل على عمها...
ظحكت انا ومديت ايدي وشليت شماس اللي تمت تلعب باذني بصبعها الصغير وهي تصدر اصوات غير مفهومه..
ناصر: ههههههههه فديتها انا...ماتنلام اصلا...مب الا هي...كل البنات يتخبلن علي...!!!
نورة اللي كانت تشرب ماي من كوب صغير بغت تختنق يوم سمعت كلامي هذا....التفتنا لها كلنا مستغربين...اما هي فتمت تسعل وتسعل...
ام مايد: حلال حلال...
وبعد ما انتهت نوبه السعال... مسحت نوره دموعها اللي طلعت بسبب الشرقه..وقالت بصوت واطي..
نوره: سوري..احم...الله يحلي ايامج امايه..
التفت عنها واطالعت ام مايد ...
ناصر: مايد واعي؟..بسير اشوفه..
ام مايد: هي نعم واعي مايد ...
ناصر: زين..عن اذنكم..
طلعت من الصالة وتوجهت لغرفة مايد وانا الاعب شماس وارمسها وهي مب فاهمه شي... كانت غرفه مايد مفتوحه.. دخلت وانصدمت بيوسف متفيزر مع مايد وداق سوالف معاه...
ناصر: السلام عليكم ورحمة الله...
ردوا علي السلام..تقربت من مايد ووايهته..
ناصر: هاااه مايد ..شو الهبات اليوم ان شاء الله احسن.؟؟
مايد: الحمد لله بخير لكن هالجتف لعوزني مارمت ارقد منه...
عقدت حياتي باسف... وانا مازلت احس نفسي السبب في هالحادث..
ناصر: يعورك وايد.؟؟...وراسك؟..
مايد: لا الحمد لله راسي مافيه شي لكن مازلت احس بخدر فيه.. وانته شو حالك؟؟..
سحبت لي كرسي عدال شبرية مايد ويلست ويلّست شماس على ريولي وعطيتها سويج سيارتي تلعب به وتتسلى.. ...
ناصر: الحمد لله بخير وسهاله.... (نقلت نظري ليوسف).. وانته شو تسوي هني احيدك ساير الجامعه..!!..
يوسف: حظرت محاظرة الصبح وعقب ييت ..وبيلس لين ما ايي ابويه الظهر ....وعقب برد الجامعه...
ناصر: وابويه وين..؟؟
يوسف: يقول بيسير يعابل في سيارة مايد....
ناصر: اهااا...شحقه محمد مايسد عنه..!!
يوسف: مادري والله محمد وايد شاغلينه في الشغل هالايام...!!..
مايد: وانته ناصر شو تسوي في العين.؟؟.. وراك سفر..!!..
ناصر: همممم...والله يامايد شكلي باجل السفر.... (التفت لشماس وقلت بسرعه)..لالا حبيبي اخ لا تحطينه فحلجج..!..
مايد: شحقه تاجل السفر عاد.؟؟..انته مجهز كل شي وحاجز...
ناصر: ماقدر اسافر مايد وانته بهالحاله..يوم تقوم بالسلامه بلحقهم...
هز مايد راسه برفض..
مايد: لا... سافر اليوم وماعليك مني انا عقب يومين ثلاثه بظهر مافيني شي غير العافيه...
ناصر: بس يامايد..
قاطعني مايد وقال...
مايد: لا بس ولا شي... لا تخليني احلف عليك... تحيدني ماحب حد يتعبل مني زود والله اتظايج... وبعدين انته ماقصرت ويايه ولو مب انته موجود وقت الحادث مادري شو بيصير بي...!!..
سكت عنه وانا افكر..باني اذا ماكنت موجود على ذاك الخط كان الحادث ماصار اصلا...لكن سبحان الله هذي ارادة الله وحمد لله يت سليمه وبسيطه...
ناصر: على راحتك... بس من احين اقولك بسافر وانا مب مرتاح...
مايد: قلت لك انا مافيني غير العافيه روح واستانس حتى اتصل يوم بتوصل وبتشوفني بخير مافيني شي..
دام هذا رايه ومصر عليه... عيل لازم اني اروح لبوظبي عشان اروح مع عبدالعزيز وعلي ...
ناصر: يوسف بتوصلني؟... لاني ابا اخلي سيارتي في العين عشان ينظفونها خايسه دم داخل..
يوسف: الحين..؟؟.. والله ياناصر مادري انا وراي عرض اليوم في المحاضره الساعه اربع.. وابويه قال لي ايلس بعد..
ناصر: خلاص بتصل بمحمد بخليه هو يوديني...
يوسف: اسمحلي ناصر والله لو ماورايه شي جان وديتك...
ناصر: ادريبك ماتقصر يوسف ماعليك...
شماس قامت تتظايق وتتحرك ...شليتها وطلعت عن الغرفه اوديها لامها...
ويوم دخلت الصاله حصلتهن على حالهن يالسات ويسولفن...
ناصر: اندوج بنتج... الا عشقه..شويه وعقب تزهق مني...
ظحكت ميثا وخذت شماس فحظنها...
ناصر: ميثا وين محمد.؟؟
ميثا: في الدوام...
ناصر: زين... امايه تراني بسافر اليوم...
حسيت كل العيون تتوجه صوبي باستغراب... حتى نوره...اللي تركت كل شي من ايدها وبحلقت فيني...
ام سلطان: وابويه ياولدي وين بتسافر وين بتروح عنا وهذي نحن حالتنا..!!!!..
ابتسمت...
هالعيوز دوم تبالغ...
اللي يسمع يقول ميت عندهم حد لا سمح الله..!!...
ناصر: يدووه بغيت اني اأجل سفري بس مايد ماطاع مووول..وطال عمرج بسافر سوريا اغير جو شوي انا وربعي...
ام محمد: انزين فديتك اجله يوم يومين... وعقب الحق ربعك...
ناصر: بغييت والله يامايه لكن مايد ماطاع مول...شوية وبيحلف عليه اسير..
اشرت لي يدووه بايدها المحنايه وعقب حطت ايدها عالارض وادق عليها تباني ايلس عدالها...
ام سلطان: تعال انته تعال هنه انا بتخبرك..!!..
ظحكت انا وظحكوا كلهم على حركه يدووه...وقلت اكيد بتسويلي تحقيق...ييت ويسلت جدامها...
وفعلا فتحت معاي تحقيق ...
الا وين بتسير... وشو بتسوي...وويا منوووه؟.. وعيال منو ربعك؟... من عرب والا لا... معرسين والا لا...
ويوم جاوبتها عالسؤال الاخير قالت
ام سلطان: هذيلا كلهم معرسين انته وين تبا داير من بينهم ماعندك حرمه..!!!..
ناصر: يعلني ماخلى من هالمنطق هذا... يدوه مابيشلون حريمهم بنسير رواحنا...
ام سلطان: اسميهم مافيهم خير ربعك جان بيخلون حريمهم وبيسيرون عنهن يتحوطون..!!..
ناصر: والله انتن يالحريم مادري شو تبغن بالظبط.. تسحتن الريال سحااااات وتبنه اربع وعشرين ساعه مجابلنكن..واذا جابلكن تقولن له اطلع شو هذا اف زهقنا من مجابلك...واذا طلع قلتن له ياحافظ عليك انته مول ماتقعد في البيت ولا تدري عن هوا دارنا.... عنبوو خلونا شوي نعيش حياتها نتفرج عالمناظر ونشم هوا بعيد عنكن..!!!...
سكتن كلهن يطالعني مب عايبتنهن رمستي....فجأه مدت ايدها يدوه وظربتني ظرب... لكن كله ماحسيت فيه وانا اظحك عليها...
ام سلطان: قم ...قم منييه مسود الويه ماتستحي...!!! هذا انته مب معرس هاذي رمستك شقايل عيل يوم بتعرس الله يعينها حرمتك...!!..
ناصر: مالكم انتوا غير هالطاري..؟!!... قضية عرسي صارت اهم من قضية الشرق الاوسط والعراق..
مسحت يدوه على ويهها تهددني...
ام سلطان: هذا ويهي ان حد يوزك انته..!!!...
ناصر: وين تمسحين على ويهج بعد يدوووه وين تبين ماعندج لحية..!!..
تلفتت يدوه حواليها بشكل يظحك..
ام سلطان: وينها عصايه هي..!!!...عطوني اياها بأدب هالولد...!!
مت من الظحك عليها وقمت عنها....انا ولد..!!..ريال شكبري خلتني ولد ولااا بعد تبا تادبني...
ناصر: محد قالج تيلسيني وترمسيني... ماتدرين يعني اني طالع عليج ملسون..!!..
ام سلطان:انا ملسونه.. عنبو هالطوله لك ماتستحي صدق...
ناصر: هههههههههههههههه...ذكريني الوي عليج قبل ماسير...
ام سلطان: ماباها لويتك انا روح ...ياربي من هالولد..!!!...
وخليتهم وسط الضحكات وانا كنت اظحك بعد عليها وطلعت عنهم برا القسم...والله طماشه يدوه صراحه...!!..
وقفت في الممر اتصل بمحمد عشان ارتب وياه وخليه يوصلني لبوظبي قبل موعد الطياره...
وبعد مااتفقت معاه عالترتيبات ..رجعت ادخل الغرفه في نفس الوقت اللي وصلت فيه بنت عمي كنه مع الخدامه الي شاله شنطه صغيره الظاهر فيها ملابس لمايد وكيسه ثانيه فيها المزيد والمزيد من الفواله ... اذا ماترسوا الغرفه كلها اكل مايرتاحون هذيلا..خليتهن ورحت عند مايد ويوسف...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الثلاثاء...
المكان: المستشفى..
الوقت: الثانيه الا ربع ظهرا..
-----------------------------------
(يوسف)....

قمت من مكاني وسلمت على مايد وخليته مع ابويه... مسكين ابويه محد بيقعد غيره ...محمد راح يوصل ناصر بوظبي ومابيرجع الحين...وانا مضطره اروح اجهز لمحاضرة الساعه 4... عندي عرض وبرزنتيشن مايندرا اذا قدرت اخلصهم مع خالد او لا...
وصلت للغرفة اللي يالسات فيها الحريم... وسمعت كنه محتشره..
كنه: شووو هذا احين شو بسوي انا..؟!!!..
نوعا ما استانست لانها متظيجه... وتمنيت "بخبث" ان المشكله اللي هي فيها ماتنحل... عشان شوي تتادب..!!!..
تحنحنت ودخلت الغرفه.... التفتوا كلهم يطالعوني لكن انا طنشت الكل واطالعت امايه...
يوسف: امايه انا بروح تامروني بشي؟
ام محمد: وين بتسير ابويه؟..
يوسف: بسير البيت باخذ اغراضي وبروح الجامعه..
ام سلطان: الجامعه بتسير؟؟.. عيل وصّل بنت عمك صدعت لنا روسنا...
بطلت عيني منصدم... ونفس الشي كنه...
كنه: يدوووووه..!!!..
يوسف: جي مب مختلط نحن يدووه جامعتهم غير ونحن غير...
ام سلطان: انزين مب هي هذي الجامعه اللي جدام توام؟ الا هني عدالنا..
قلت بقهرمكبوت..
يوسف: هي يدوه..
ام سلطان: عيل وصلها بطريجك...
مت من غيظي... احين انا ادعي ان مشكلتها ماتنحل اخر شي يشوفون الحل فيني انا..!!!!!!... ماقدر اتحمل وجودها فسيارتي بتطنز مره ثانيه عليها ..!!!. وهالمره عاد شو بيردني عنها ما اظربها..!!.. بروحي انا مب ناقص وشال عليها فخاطري وايد...اوف..
يوسف: ان شاء الله يدوه...
ام مايد: برايها ابويه اذا مافيك خلها....
يوسف: انا عادي عندي خالتي...
ام سلطان: بارك الله فيك...
حسيت بكنه متظايجه... تغشت وقعدت ادور شنطتها عشان تطلع معاي...
وعقب ماحصلتها قالت لنوره..
كنه: يالله نوره نسير...
نورة: شووه؟.. لا انا مب سايره وياج.. بيلس هني... مالي حاجه في البيت اسير هناك اتم يالسه اروحي...
كنه: نورووووه...!!!!..
ام مايد: سيري الريال يترياج ربّه مستعيل والا شي وانتي يالسه تتشاورين..!!..
كنه: انزين الخدامه..!!.. يالله روز..
ام مايد: وين تبيبها محتايينها نحن هني..
ام سلطان: يابنتي سيري صدعتيلنا روسنا سيري..!!!..
تاففت كنه ومشت ويوم وصلت عدالي فتحت لها الباب عشان تمشي وانا في عيني نظرة سخرية... ورطتني بمشكلتها.. لكن ماعليه هذا وقته عشان اطفربها...
طلعت وراها وسكرنا الباب ورانا .. مشينا خطوتين وعقبها قلت وانا اطنز عليها..
يوسف: شو فاكره نفسج حلاوه تتحسبيني باكلج..!!..(وعقب قلدت صوتها بسخريه) ..يالله نوره...يالله روووز.... !!!
وقفت كنه واطالعتني من ورا الغشوه..
كنه: شويعني تباني اسير وياك رواحنا محد عندنا..؟؟ عيــــــب...
مشيت عنها وقلت...
يوسف: اووووه تعرفين العيب... شي طيب...!!..
لحقتني كنه بخطوات سريعه....
كنه: اكيد اعرف العيب وحاشمه نفسي...
يوسف: طوفي طوفي...
وصلنا للمصاعد.. ويوم فتحته كان فيه هندي مسكين واقف على طرف...ركبت انا ويوم التفت حصلت كنه واقفه بعدها برا المصعد ...
يوسف: دخلي..
كنه: ماتشوفه ريال في المصعد وين تباني اركب..؟!!..
يوسف: لا والله... لا اسمحيلي انا اعرف العيب وبعدين اخاف منج بصراحه ماقدر اركب وياج المصعد رواحنا لازم معانا حد....!!!..
عرفت انها مقهوره....تمت واقفه مكانها وتعابيرها غير معروفه بسبب الغشوه...جان اصرخ عليها..
يوسف: اركبي خلصيني...
خافت كنه وركبت ...تسكر الباب وانا اقول..
يوسف: مشكله دلع بنات ماصخ بعد...!!..
من طريقه كنه بتكتيف يديها حسيت انها مب عارفه بالضبط تزعل او تعصب... او الثنينه مع بعض...!!..
ماعليه مابوقف الا يوم اصيحها فيوم...وعقب بسكت عنها...!!
انفتح المصعد وطلعنا منه...تعمدت امشي بخطوات واسعه وسريعه...وكنه تحاول تجاريني لكن ماتقدر..بالتالي تاخرت عني على بعد خطوات...التفت لها وقلت لها وانا اتصنع العصبية..لكن من داخلي اضحك عليها...
يوسف: بتمشين عدل والا..؟!..
قالت لي بصوت يترجا ويتمسكن...
كنه: يوسف عاد الكندوره مافيها فتحه وماقدر امشي بخطوات واسعه انته تتعمد تسوي جي...
يوسف: لا تتوقعين اني بتمخطر شراتج...امشي بسرعه...
قالت بصوت واطي.. كانها تكلم نفسها...لكني سمعتها على أي حال...
كنه: اووفففففف... انذلينا ذل على هالتوصيله..!!.
يوسف: شو قلتي..؟!!!..
كنه: ماشي..ماقلت شي ...
كتمت ابتسامتي غصب لين ماوصلنا السياره... اللي كنت عارف من قبل انها مبهدله عالآخر هالمره..
في السيت الوراني مجموعه كتب وسفر..وفيها جهازين كومبيوتر مال ربيعي يباني اشوف شو المشكله معاهن...
باختصار.. السيت الوراني لايث من الخاطر...
ركبت انا في كرسي السايق وترييت كنه تركب بعد..فتحت كنه الباب الوراني وتمت مبحلقه في الفوظى..
وقبل ماتقول أي شي..
يوسف: كلمه وحده عن لعوزه سيارتي بطراق... كيفج عاد...!!!
سكتت كنه وهي تدري اني ماداني حد يطنز بسيارتي اللي دوم لايثه...وبعدها قالت بهدوء..
كنه: اوكي مابقول شي...بس وين تتوقع اركب؟؟...بين هالفوضـــ... آآه...بين هالاغراض ؟؟؟!!!..
كتمت ابتسامتي للمره الثالثه....
الاخت تتريا مني اعزمها تركب جدام عدالي... ده بعدك..!!..
قلت لها ببرود..
يوسف: ركبي في الدبه...!!..
سكرت كنه الباب بعصبية ..ومشت..توقعت انها يايه بتركب جدام وبتخلصني...لكنها ولدهشتي التامه... تخطت سيارتي وعبرت الشارع ناويه ترجع للمستشفى....!!!!
شو اقولكم.... ساعتها صدق نقعت من الظحك بصوت عالي...!!!...
لبست نظارتي الشمسية بسرعه وبطلت الباب وركظت وراها....وقفت جدامها ..
يوسف: خلاص خلااص الا اسوي سوالف عليج ردي السياره بوصلج...
لكنها تخطتني واجاهلتني وكملت مشي...
يوسف: كنوووه..وين سايره..
كنه: خز عني....
كانت تمشي بسرعه ورافضه نهائيا انها توقف وتكلمني...مديت ايدي ومسكت شنطتها وسحبتها على ورا... ماقدر امسك ايدها او أي شي..وهذا اللي وصلت له ايدي..!!..
كنه: قم عني لا تصكني...
يوسف: ماصكيتج انا...
كنه: خل شنطتي خلني ارووح ماريد اروح وياك...
يوسف: بتسيرين غصبن عنج....تعالي...
مشيت وسحبت شنطتها وراي وهي متمسكه في الشنطه وتمشي...
كنه: طالع..!!.. اييه ماريد اسير وياك والله خلاص غيرت رايي....فجني...
يوسف: جب كنوووه... امشي وانتي ساكته... عنبو ما اتحملين سوالف..!!..
كنه: هذي مب سوالف...
يوسف: متى ماتبين انتي سويتيها سوالف لو هي تعور القلب...ومتى ماتبين سويتيها مب سوالف مع انها عادية جدا...
سكت انا ولعنت عمري يوم زل لساني..... احين بتسالني شو اقصد...وليش قلت هالكلام..وبتسحب مني الرمسه لين تعرف اخر شي اني انا اللي كلمتها ذاك اليوم مب منى....!!..
لكن كنه سكتت....وماقالت شي...مشت وراي بهدوء تام....في الاخير فجيت شنطتها يوم شفتها مستسلمه وانها خلاص بترجع معاي السياره...
يوم وصلنا السياره رحت وفتحت لها الباب اللي عدال مقعد السايق وترييتها تركب وعاملتها مثل مايعاملون الاميرات بكل سخرية...
يوسف: تفضلي سمو الشيخه...
كنه: هههههههههههههههه سبال...
يوسف: ماغيرج... عاد صدقتي عمرج اشوف...
كنه: بسم الله..
ركبت كنه وسكرت الباب وراها ودرت حوالي السياره وركبت في مقعد السايق ....
شغلت سيارتي وحركتها...وانا اتنهد... احس اني بذلت مجهود..
يوسف: وين دريولكم.؟؟
كنه: سار اييب لطوف وعويش من مدارسهن...
يوسف: اهااا...شو...شو تسوين...؟؟!!..
كانت كنه تفتش في سيارتي...وتفتح السدات وحالتها حاله..
كنه: يعيبني افتش بالسيايير..
يوسف: هااااي انتي...ياللي تعرفين العيب ....احشمي نفسج على قولتج ووفري عليه هزبه محترمه... لا تفتشين...!!
كنه: ادور شريط عدل...!!!..
يوسف: كله ميحد ماعندي اللي تبغينه... بحط لج اف ام...
وحطيت لها اف ام لكنها ما اعطت أي اهمية للموضوع واستمرت بالتفتيش...
يوسف: كنوووووه..!!..
مدت ايدها داخل السده اللي جدامها وطلعت عطري المفضل...
كنه: الله...هالعطر احبه... هذا اللي تتعطربه دوم صح..!!..
عقدت حياتي...شو دراها هذي.. دام اني ما انزل لها من زور شحقه مفتكره تشم ريحة عطري وتعرفها.؟؟ وفوق هذا قالت احبها..!!!...غريبه هالبنت...
يوسف: هي هذا هو..
فتحته كنه وتعطرت شويه منه ورجعته....ظحكت غصبن عني...تتعطر بعطر رياييل..!!!..
يوسف: شليه جان تبينه. واصل..!
كنه: لا شاريه مثله في البيت...
يوسف: شاريه عطر رجالي..؟؟؟.. شو تبينه؟..
كنه: اشمه بس...
يوسف: هالعطر غالي...شارتنه بس عشان تشمينه؟؟!!!!..
كنه: هي لاني احبه ماقدر اتعطر بعطر رجالي...
يوسف: مب صاحيه انتي...
ظحكت كنه ورفعت راسها تشوف الشارع عقب على طول اختفت ظحكتها..
كنه: وين ساير؟...
يوسف: الجامعه...
كنه: ماريد اسير الجامعه الحين...
صارت عندي العصبية فووووول...
يوسف: شووووووووووووووه..!!!.. توج تقولين بسير الجامعه..!!!!
كنه: بسير البيت اول بعدين الجامعه...مايبت كتبي ولا شي وبعدين مابروح الجامعه بجلابية..!!!..
مت قهر...بعدني بوصلها البيت وبردها الجامعه..!!!. بيتهم بعيييييييييييد... اووووف..وقفت عدال الرصيف خارج البوابه من غيظي..
يوسف: نزلي...نزلي لابركةٍ فيـ... عدوينج انزين... !!.. انزلي...
كنه: ههههههههههههههههه...يوسف الله يرضى عليك حرك السياره ....
يوسف: مابااا...
كنه: بلييييييييييز..
وبعد تافف حركت سيارتي وزدت سرعتي ساير صوب البيت.. بيت يدووه...عشان ست الحسن والجمال كنه تقدر تبدل ملابسها وتتعدل وتيب كتبها واوصلها الجامعه....شو هالقهر...!!!..

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الثلاثاء..
المكان: بيت ام سلطان..
الوقت: الثانيه وعشر دقائق ظهرا...
--------------------------------------
(كنه)..

دخلت حجرتي بسرعه وسكرت الباب وراي وانا قلبي يدق مثل الطبل...
فديييته فديييييييته كيف يخبل.... حتى لو ينازعني ويشرشحني اموت فيه...ياربي كيف بتحمل طريج الجامعه مره ثانيه وانا متماسكه..!!..
بدلت ثيابي بسرعه ودخلت الحمام اغسل ويهي عالسريع....
يوسف عطاني عشر دقايق...طلبت منه ربع ساعه بس عشان اتجحل وماطاع قال لي مب لازم تجحلين سيري جلحا ملحا... ماعليه بحط الجحال والشادو في شنطتي وبتجحل في الجامعه...!!
طلعت من الحمام ورحت التواليت ارتب شعري...طاح نظري عالعطر اللي شارتنه مخصوص بس لانه مثل عطر يوسف...اللي دايما اشمه فيه...
كل ما اشتاق له افتح العطر واشمه واظيع في عالم وردي ماله آخر..ظحكت..زين ماكشفت نفسي جدامه انا الخبله يوم قلت له انه عندي مثله...
بس المسكين شكله من خاطر مقهور عاللي قلته له...وحازه فخاطره...عشان يعاملني بكل جفاف...
لكن في النهاية عندي احساس غريب باني ماهون عليه....
ياربي كيف احبه... كيف اقدر اخليه يحبني بنفس القدر.... ماظن حتى لو حبني مع ذلك ماظن انه بيحبني نفس ما انا احبه....
اووه..شو يالسه اسوي انا الريال يترياني وانا يالسه احلم هني...!!!..
فتحت الكبت وطلعت بدله خفيفه ولبستها..رجعت البس عباة الجامعة مع الشيله ..حطيت شوية اغراض في الشنطه... شليت كتبي ودفتري وطلعت ركظ...
في طريج الجامعه كان يوسف ساكت وهادي...
وحسيت بالتوتر يسيطر عالمكان...
لازم حد يكسر الصمت هذا..
كنه: آآه... اخوك ناصر وين بيسافر؟
يوسف: سوريا...
كنه: اهاااا... غريب سفره فجاه...
يوسف: زهق من الروتين بيروح يغير جو....
سكت مره ثانيه مب عارفه شو اقول....ويوم خطر على بالي سؤال رجعت اسال..
كنه: انته عندك جامعه الحين؟
اطالع يوسف ساعته وقال..
يوسف: عندي محاضرة الساعه اربع...بس عندي بريزنتيشن فيها ولازم احضر له...
كنه: سوري عطلتك...
يوسف: هي عطلتيني..مالت على ويهج....
قال جملته مع شبح ابتسامه على شفايفه الحلوه...عشان جي ماخذت بخاطري وظحكت... وانا افكر باني اشوف في يوسف كل شي حلوو حتى لو ماكان حلو... بس الحق يقال...شفايفه حلوه..!!
رن تيلفون يوسف ومسكه... كان واحد من ربعه..وسمعته يذكر اسم خالد...هذا هو الي متعلقه به منى..!!..
الله يعينها... تواعد معاه يوسف انهم يتلاقون في قاعه من القاعات في الجامعه...
وبعدها التفت لي وقالي..
يوسف: متى محاظرتج انتي؟..
كنه: الساعه 3...
يوسف: وعقب؟
كنه: بنقعد شوي انا ومنى بعد الكلاس وبنرد البيت...
يوسف: ماشي يلسه في الجامعه بلا حايه...ردن البيت سيده..وقوليلها هالرمسه قوليلها يقولج يوسف ردي البيت سيده لانه فاظي وامي في المستشفى عندكم مب زين...
كنه: ان شاء الله....
وباندفاع مفاجئ قلت له..
كنه: يوسف لاتستوي عصبي مايليق عليك..!!..
عقد يوسف حياته اكثر...
يوسف: مزاجي هالايام مايسمح اني اكون رايق...
حسيت انه يقصدني بكلامه وباني انا السبب بمزاجه المعتفس...
بديت اتندم عاللي قلته....يعني ماكنت اقدر اجاوبه بشي ثاني اخف من كلامي..؟؟...
ياربي انا شو سويت..!!!



-----------------

اليوم: الثلاثاء..
المكان: الجامعه...
الوقت: الرابعه عصرا..
----------------------------------
(مهرة)...

طلعت من كلاسي وانا اتنهد مستانسه انه خلص دوامي...فجاه سمعت حد يزقرني... التفت حصلت سلوى... اطالعتها باستغراب... اول مره تترياني بعد كلاس الساعه اربع..
مهرة: اهلييين سلوى...شو تسوين هني..
سلوى: اتريااااااج...
يت سلوى وحطت ايدها على كتوفي وهي تمشي معاي...
مهرة: خير شو مستوي؟؟؟...
كنت مستغربه من انتظار سلوى لي اليوم...اول مره تسويها..
سلوى: ابد حبيبتي بس نسيت اطلب منج وقت البريك شي...
مهرة: آآمري...
سلوى: اباج تتاخرين معانا اليوم...
مهرة: اتاخر؟؟ وين؟
سلوى: هني في الجامعه..
مهرة: شو نسوي؟؟؟
سلوى: حبيبتي اليوم الثلاثاء...وكل ثلاثاء البنات يتاخرن لانه اخر الاسبوع يقعدن ويسولفن ويلعبن ويظحكن ويفرفشن شوي ....
مهرة: ماقدر ماقلت لاهلي...
سلوى: بسيطه اتصليبهم قوليلهم عندي بحث بقعد في المكتبه شوي وعقب برجع...
مهرة: شو تقولين انتي اجذب عليهم يعني..؟!!..
سلوى: اذا كانوا بيتفهمون قعدتج مع ربعج عشان تسولفين وتظحكين قوليلهم الصدق...لكن اذا مابيتفهمون وبيقولولج لا ورجعي..قوليلهم عندي بحث وجي...مابيرومون يقولون لا...في النهاية هم شو دراهم انتي شو تسوين بالجامعه..!!!!..
طلعنا من المبنى اللي كنا فيه ومينا في الممرات...
افكر بكلامها..شو اقولهم..!!..اجذب مثل ماقالت سلوى..والا اقولهم الصدق...
مهرة: عاد شو بتسووون الا جذي يلسه؟..
سلوى: قلت لج نغير جو نسولف نظحك نلعب..نغلس على بنات..,, يعني..!! بتستانسين مهاري بليز حبيبي تاخري معانا..جربي انزين هالمره اذا ما استانستي لا تتاخرين مره ثانيه...
فكرت بكلامها... ليش ما اتاخر..؟؟ اروح البيت شو اسوي..؟!! بجابل منووه..؟ السمجه؟..
مهرة: اوكي.. تعالي معاي عند الكابينات...
سلوى: فديت هالويه والله ( وباستني على خدي)...بروح وياج وين ماتبين افا عليج بس...
رحنا للكابينات وهناك عرضت علي سلوى اني استخدم موبايلها بدل ما اخسر نفسي.. اطالعتها باستغراب..
مهرة : انا بتصل باخوويه...
رفعت سلوى كتوفها ببرود..
سلوى: عادي..
مهرة: رقمج بيطلع عنه...عادي عندج؟
سلوى: ليش اخوج مغازلجي يعني بيرد يتصلبي..؟!!
قالت سلوى جملتها ساخره..وبصراحه مارظيت هالكلام على سهيل...سهيل على وشك انه يخطب..
مهرة: لا الغاليه خواني مب من هالنوع...
سلوى: ياعمري كل الشباب من هالنوع...عالعموم استخدمي الكابينه على راحتج...!!..
انقهرت..كل الشباب اوكي بس خواني لا...خواني غير..رغم عيوبهم لكنهم مايتحرشون ببنات الناس...مب مثل ذااك الريال...الله يخسه..
رحت للكابينه واتصلت بسهيل...
سهيل: آآآلوووه...!!
مهرة: هلا سهيل...انا مهرة..
سهيل: هااا مهرة تبيني اييبج؟؟
مهرة: لا سهيل..هممم..اقولك...ربايعي كلهن بيتاخرن شويه يسولفن وجي مابيطولن وايد.. وانا ابا اتاخر معاهن شويه اغير جو...عادي..؟
سهيل: لين متى..
مهرة: مابطول وايد...
سهيل: ماتتاخرين اكثر عن المغرب...الساعه ست بوقف عند الباب واحصلج موجوده...تسمعين؟
مهرة: ان شاء الله..مشكور...
سهيل: يالله باي.
مهرة: باي..
سكرت عن سهيل مبتسمه...والحمد لله اني ما اضطريت للجذب..
رحت مع سلوى للكافتيريا ويلسنا مع الشله...
سلوى: لين متى بتتاخرين؟..
مهرة: قال لي حدج لين ست...
سلوى: حلوو ساعتين لاباس كبدايه...
مهرة: ههههه عاد لازم نستغل هالساعتين احسن استغلال...
سلوى: اكيــــــــد... تبينا نشتري كابتشينو..!!..
مهرة: على شرط انا ادفع...
سلوى: هممم مب مشكله..
مهرة: صبري بطلع بوكي..
حطيت شنطتي اللي فيها يميع الاغراض عالطاوله..وقعدت ادور فيها على بوكي الصغير.. طلعت كم غرض من الشنطه عشان تعطيني مساحه للتفتيش...
مدت سلوى ايدها ومسكت شريط سيف اللي عطاني اياه امس عشان اسمعه..لانه كان من بين الاغراض الموجوده في شنطتي..
حطيته في الشنطه لاني خفت حد يحصله في حجرتي وسيف موصني ما اعلم حد عنه....
سلوى: شريط شوو هذا مهاري.؟!..
مهرة:..آآه..هي هذا شريط عطاني اياه اخويه امس عشان اسمعه...
سلوى: منوعات؟ والا لمطرب معين؟
مهرة: لا هذا الشريط مسجلين اصواتهم هم يغنون هو وربعه..تعالي صدق ماسمعته لين الحين وهو قالي اسمعيه لانه بيشله اليوم عني...مابيواحيلي اسمعه في البيت...
سلوى: بنسمعه هني شو رايج..؟؟ تعيبني هالسوالف ابا اسمع معاج...
مهرة: هههههه اوكي عندج مسجل صغير مع سماعات.؟!..
سلوى: موجود اكيد عالطاوله بس صدعه هني مابنسمع شي..
مهرة : عيل شو نسوي؟
سلوى: نروح غرفتي في السكن...عندي هناك مسجل بنقعد نحن وربعنا وبنسمع الشريط وبنطمش عليهم..شرايج؟
مهرة: مره ثانيه السكن؟
سلوى: ليش حد ظرّج فيي المره الاولى...
مهرة: لا ..بس...
سلوى: لا بس ولا شي.. هالمره بنسير كلنا وبنستانس هناك..بعدين في السكن براااااد وهني حر.. قومي قومي...
قمت معاها بتكاسل وعرضت سلوى الفكره على بنات الشله..حد منهن قال بيسير معانا وحد كانت عنده خطط ثانيه وبيقعد في الكافتيريا...
بالتالي رحنا كلنا للسكن...واللي ريحني شوي وجود كذا بنت من بنات العين معانا...يعني السالفه عادي بس انا مصعبه الامور ومكبره السالفه..!!!..