::][مــــوعــــد مــع الـــســـــعـــادة][ :: قصه في منتهى الروعه

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاربعاء..

المكان: بيت سلطان..

الوقت: الثامنه والنصف...

-------------------------

(ناصر)....



وقفت سيارة ابويه الستيشن في الغراج وانا مستانس يوم شفت سيارتي المورسيدس انهم صلحووها وردوها البيت ... نزلت من السياره وشليت شنطتي... ودخلت بيتنا....

اول مادخلت الصالة شفت يوسف وابويه ومحمد اخويه وسلطان الصغير..قاعدين يتعشووون... بينما منى وامي وميثا حرمه محمد وفي ثبانها شمسه الصغيره.. يالسات بعيد شوي يسولفن....

عقيت شنطتي عالارض وحطيت ايدي فخواصري...

ناصر: ليش اتعشووون عني؟؟.... انا يوعاااااااااان....!!!

كلهم صدوا صوووبي متفاجئين والابتسامه على ويوههم...

ام محمد: هلا والله بولدي الغالي....

ابتسمت...وسلمت عليهم كلهم....كنت فرحان بشوفة الفرحة على ويوههم يوم وصلت.....

يلست بين ابوويه ومحمد اخوي وانا اطالع ويهه...

ناصر: خازت الحمجه عنك..؟؟؟

محمد: لا تذكرني خلني ناسي...والله اني مفتشل..

ناصر: ههههههههههه ليش عاد..؟

محمد: منقهر من اني شكبري وبعد يتني الحمجه...!!

يوسف: يالله عليك يامحمد...عاادي مافيها شي...

ابو محمد: اشوفك استويت دلووع...!!!..

نقعت انا من الظحك على كلمة ابويه.... لانه عمره مايبزي الاولاد...البزا كله للبنات...شما اختي العوده..ومنى اختي الصغيره...

ناصر: شفت سيارتي في الغراج...منو عابلها..؟؟

يوسف: محمد خلصها لك ويابها امس...

ناصر: مشكوور يامحمد ماتقصر...

محمد: ماسوينا شي... بس عاد لازم تسلفنا اياها نكشخ بها فيوم..

ناصر: ههههههههه فالك طيب...

محمد: فالك مايخيب...

ابو محمد: بتسير ويانا باجر المزرعه..؟؟

عقدت حياتي...

ناصر: منو بيسير...؟

يوسف: ابويه وانا وامي...ومنى تلصقت فينا بعد...

ناصر: شو تسووون كلكم هناك..؟

ابو محمد: نتفرّي...ونتابع حلالنا...وامك تبا تشيّك عالنخل...

يوسف: وانا مخلي الدراجه هناك بعد...

وغمز لي يوسف بخبث...

وابتسمت انا...

ناصر: ان شاء الله بنشوووف...محمد ليش مابيسير..!!!...

محمد: انا بودي ميثا دبي تتشرا لملجه اخووها...

ناصر: ليش متى بيملج مايد..!!!..

يوسف: الاسبوع الياي...

ناصر: مستعيل ماشاء الله عليه....يالله بالبركه...

يوسف: وانته متى بتعزم..؟؟

رفعت نظري ليوسف...

ناصر: اعزم على شووو..؟

يوسف: عالعرس...ترا امي حشرتنا عليك...

ابتسمت ...

ناصر: جانك مستعيل عالعرس عرس لا تترياني انا...

بومحمد: وليش ان شاء الله...؟؟ شو عندك انته ماتبا تعرس هااااااه..؟؟!!...

ناصر: يابويه الله يهديك ليش تفاتن..؟؟.. لا تفتحولي هالسالفه احين...

بومحمد: ليش عاد ليش ماتبا تعرس...

ناصر: اتريا حد غيري يعرس وعقب انا بعرس..

بومحمد: ومنوو هذا اللي تترياه يعرس...؟!!..

ناصر: يوم بيعرس وبفتك منه بقوولكم احين خطبوولي...بس تريووا علي شوي...

اطالعني ابويه بنظرة معصبه وهو مب فاهم شي من كلامي.... ويوسف ومحمد كانوا يطالعوني باستغراب بعد....

بومحمد: والله انك مب صاحي...



وكملنا عشانا بصمت... دايما دايما يستلمووني اول ما ايي من بوظبي...مايتريوووني لين ما ارتاح شوي وعقب يبدون تحقيق... تراني صدق ببدا اعاف الرجعه للبيت بسبب اطباعهم هذي....

تنهدت بظيج... المشكله اني ما اقدر اشرح لهم...

ان الشخص اللي اترياه يعرس هو بنت عمي نوره...!!...

لاني باختصار..ادري ان امي وكل العايله تتوقع اني اخذها هي في النهاية...

لكني ماريدها..مالي خاطر عليها..صحيح هي حلوه وايد...لكن نفسها خبيثه ...واحسها راعية مشاكل...وانا يوم ابا اعرس ابا ارتاح مب اييب لي المشاكل اكثر..!!!...

بس كيف اقولهم هالكلام...!! بيعطوني محاضره وسين وجيم... وبيكلموني عن بنت العم اليتيمه اللي انا احق بها من الغريب وكيف يخلونها تروح بيوت ناس غرب وانا موجود وغيره من هالخرابيط....

عشان جي بسكت...لين ما اييها نصيبها وتعرس...ساعتها بقول لامي تخطب لي...

اما نوره لا....من سابع المستحيلات اني اخذها...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاربعاء..

المكان: صالة بيت سلطان..

الوقت: التاسعه مساءا..

-----------------------------

(منى)....



سحبت التيلفون بعيد عن الصالة ورحت اتكلم في الممر... اخواني كلهم متيمعين في الصالة يسولفون ...وماريد حد يسمع كلامي خصوصا يوسف...

توقيت كنه بالاتصال كان غير مناسب ...بس انا مقدره موقفها...وحاسه بالخووف اللي هي حاسه فيه....

المشكله اني ماكنت ادري بانها تحتفظ بكل هالامور في الكمبيوتر عندها..اون ماخبرتني عشان ماتبين لي شكثر هي تحب اخووي...تخيلوا البقرة كييف تفكر..!!..

احين الله اعلم اذا يوسف شاف هالامور والا لا....



كنه: ماقالج شي..؟؟ مالمح لج باي شي...

منى: قتلج لا كنووه موول مارمس عن شي....ماظني انه فتش ملفاتج الشخصية....

كنه: شو دراااج يمكن فتش وساااكت...!!..ياوييلي ياويلي يامنى لو كان يدري بموت...!!

منى: بسم الله عليج لا تموتين ولا عندج خبر.... بس انا سالته في السياره...قالي انه فتش ملفات الويندوز وجي ومادخل للدوكيومنت ابدا...

كنه: انا حاسه انه يجذب عليج....

منى: يجوز...بس يوسف مايجذب...مب من عادته يعني...

كنه: والله اتمنى...أي شي ولا انه يدري عن شعوري بهالطريقه....يالله قمة في الاحراج..!!

منى: انتي لاحظتي شي تغير عليه اليوم يوم شافج.؟؟

كنه:........ لا... انا بروحي كنت متوتره يمكن ماانتبهت...

منى: انا مالاحظت أي تغييير....اطمني...

كنه: ياريت...انزين وشو اسوي بايميله اللي عطاني اياه...؟؟ شو رايج اظيفه عالمسن والعب عليه...!!

منى: ياوييلج تكونين غبية ان ظفتيييه....

كنه: ليش؟

منى: شو دراج يمكن هذا اختبار منه اذا كنتي تظيفين شباب او لا...

كنه:..والله..!!..شو شباب بس هذا ولد عمي غير...!!

منى: نفس الشي تراه ريال...وعلاقتج فيه مب اخوية وانتي تعرفين هالشي..!!

كنه: شو اسوي عيل؟

منى: طنشيييه...مادري بصراحه ليش عطاج الايميل...غريبه يعني...بس يمكن قصده شريف...وفعلا يمكن يقصد انج اذا احتجتي مساعده في مشكله بس تراسلينه مب للسوالف يعني....!!

كنه: اتمنى يكون عطاني الايميل عشان اظيفه واكلمه لانه هو يبا يكلمني....يااااااي...

منى: ههههههههههه ياسلام عليج عيشي في الاحلام...

كنه: اكرهج...مفسدة الملذات انتي....يعني ما اظيفه...؟؟

منى: لا لا تتخبلين...

يوسف: منو هذي اللي بتتخبل..!!!..



نقزت يوم سمعت صوت يوسف عدالي...وبطلت عيوني على وسعهن...متى يا هذا...ما انتبهت له...!!!...

وسمعت صرخه كنه بعد في اذني...وهالشي خلاني ابعد السماعه شوي عن اذني..وعيوني معلقه بويه يوسف الساخر...

منى: هااا....آآآه..محد...ارمس كنوووه...

وقف يوسف جدامي وقال بتسلية...

يوسف: زين كومبيوترها الحين..!!!

منى: يقولج زين كومبيوترج الحين...!!!

كنه: هههه قوليله هي زين ومشكووور وااايد...

منى: تقولك زيين ومشكور وايد....

يوسف: شكرتني تراها في البيت....!!..

منى: انزين عافان الله تشكرك مره ثانيه...

يوسف: بيسيرون باجر ويانا المزرعه..!!!

استغربت من سؤاله... هو يدري بان نحن ماعزمنا حد...ولا فكرنا نخبر قوم يدووه بالسيره هذي..ليش يسالني.؟... يمكن يباني اقترح على كنووه بانهم يسيرون ويانا بشكل غير مباشر..؟؟... يمكن هو يباهم يسيرون ويانا...!!!..يا وناسه كنوووه لو كان هذا اللي يقصده...!!..



منى: كنووه بتسيرون ويانا باجر المزرعه..؟؟

كنه: فديييت صوته ياربي...يخبل..

منى: ههههههههه ويا هالويه اسالج انا...

كنه: هههههههههه قوليله اذا حد عزمنا بنيي..اذا محد عزمنا مابنرز بالويه...

منى: تقولك اذا حد عزمها بتي واذا محد عزمها مابترز بالويه...!!

ابتسم يوسف...وبعدها ظحك وعطاني ظهره وركب فوووق...وخلاني انا وكنه في حيره من امرنا....

كنه: شوو قال..؟

منى: هههههههههه ماقال شي..ظحك ظحكه حللللوه وروح عني فوق...

كنه: افااا...يطنز علي..؟؟

منى: شو تبينه يقولج... تعالي؟ يستحي اخوويه فديت شكله....

كنه: هههههههه الله يعينا على مستحاه هذا...تعالي صدق بتسيرون المزرعه باجر؟

منى: هيي بنسيير...شو رايج ترمسين امج ويدوووه عشان نسويها رحلة جماعية...

كنه: يارييييييت.....قولي لعمي يرمس يدوووه وهي بتعزمنا كلنا....

منى: ان شاء الله بقووووله... يالله الحين جلبي ويهج...بسير اقوله قبل مايتاخر الوقت...

كنه: اقولج..يوسف وين راح ..؟ طلع من البيت؟

منى: لا سار فوق حجرته...

كنه: اكيد بيدش النت....

ظحكت وانا عارفة حركات كنه عدل...



منى: هههههههههههه طلعي هالفكره من بالج نهائيا...

كنه: حراام خليني اجرب واظيفه....

منى: قتلج لا....خلج عاقل...ورزين...

كنه: على منووو بنقص...؟؟ هو يدري اني لا عاقل ولا رزين...

منى: ههههههههههههههه يمكن يترياج تعقلين عشان يخطبج...

كنه: والله..؟؟؟

منى: ههههههه من شوي اسمعه يسال ناصر ليش مايعرس....قاله ناصر جانك مستعيل عرس ولا تترياني...

كنه: ياريت.. شرط ياخذني انا....يااااي بموت من الوناسه قبل عرسي...

منى: والله انج خبله ...ياكثر ماتفاولين على عمرج بالموت...يالله بخليج احين....ولا تظيفينه فهمتي..

كنه: اوووكي منّـــووه...سلمي..

منى: وانتي بعد ردي السلام على هلج...فمان الله...

كنه: فمان الكريم عيوني...



سكرت عن كنه وانا اظحك على خبالها.... ورجعت للصالة وكلمت ابووويه وامي عشان يعزم قوم يدوووه..وبالمره نتغدى بالمزرعه...وبيكون ونااسه.... وماعارضني.. وفعلا اتصل بها وعزمها... ويدووه قالت له بيردون عليهم الصبح اذا بيون او لا... وبعد ماسكر ابويه عن يدووه ...اقترحت امي نخبر اختي العوده شما ...بانها تتلاقى معانا في المزرعة هي بعد.... وان شاء الله تي..بصراحه لاني متولهه عليها من زمان ماشفتها..

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

---------------------------

اليوم: الخميس..

المكان: بيت خلفان...

الوقت: العاشرة صباحا..

--------------------------

(سيف)...



مسكت اوراق الانجليزي وقلم رصاص وطلعت من حجرتي ...رحت حجرة مهرة..حصلتها فاظيه...لكني قبل ماا طلع انتبهت لشي غريب...

كومبيوتر..!!!.

والله وسوتها هالمفعووصه....الله كشخه... بقدر العب لعبة الحرب اللي عند جمال...بييبها وبركبها على كمبيوتر مهرووه... اووه ماعندي وقت الحين مستعيل...!!..

طلعت من الغرفه ادور مهرة...نزلت تحت حصلتها في الصالة يالسة عالكرسي وتطالع رسوم (زورو)..

سيف: ياعيني عالجامعية....شو هالبرامج الثقافية المفيدة اللي اطالعينها..!!!..

مهرة: جب..

تقربت منها بسياسة...

سيف: اقول مهااااري....حبيبتي انتي اختي الغاليه....

اطالعتني مهرة بنص عين وهي رافعه لي حاجب واحد باستغراب..!!!..

مهرة: سوري شكلي ماسمعتك عدل..!! تكلمني..!!

سيف: سمعي...محتاج منج مساعده...

مهرة: خير..؟؟

عطيتها اوراق الانجليزي والقلم....

سيف: استاذ الانجليزي مالنا سبال يبا يسويلنا امتحان السبت ...اون عشان يعرف مستوياتنا بالانجليزي...

المهم هالورقه متروسه كلمات اباج تحطين لي معانيهن انتي اشطر مني في الانجليزي...

مهرة: وليش ما اطلعهن روحك من الدكشنري..؟

سيف: ماعندي وقت احين بسير دبي ويا جمال وبرد في الليل...وباجر ابا ادرسهن ماريد اظيع وقتي بالمعاني...!! بليز...

مهرة: هممم....اوكي مب مشكله شرط تاخذ لي شي من دبي...

سيف: شو تبين بعد..؟؟

مهرة: حلاوة...

سيف: خلاص بييبلج... خبري ابويه اني مابرد لا عالغدا ولا العشا يمكن....باي...

طلعت من البيت ومشيت لبيت قوم جمال اللي مجابل بيتنا ... واتصلت به تيلفون عشان يطلع ونروح دبي...



حسيت بصدري ظايج...خشيت ايدي فمخباي وطلعت لي لبان وكلته...

من كلمني سهيل وانا مادخت ولا زقاره... احاول اني ابتعد..لكني مب واثق من هالشي...احس نفسي متوله عليها وابا ادوخ باي شكل....!!...



في السياره..سالني جمال...

جمال: شو اخبارهم منصور وفارس..؟؟؟ ماتحرشوا فيك لين الحين..؟؟

تنهدت بضيج وانا اتذكر هالثنينه وحركاتهم طول هالاسبوع...

سيف: لين الحين لا...بس كله احس انهم يرمسون عني ويطنزون علي...

جمال: اظن مافيك شي يخلي أي شخص يطنز عليك....

سيف: صح بس بعد وضع مب مريح يوم تحس نفسك مستهدف جذي... انا اعرف نفسي اني مابتحرش فيهم..بس هم سبلان..وانا اعرف عمري مابسكت اذا شفت منهم شي...واخاف اذا اظاربت وياهم اتلعوز في اخر سنه دراسية... انا عمري مارسبت ولا اريد ارسب احين...

جمال: لالا..شوف هم اكيد يتريوونك تعصب وتظارب...بس انته خلك هادي...وطنش أي شي تشووفه... صدق هذي اخر سنه... والادارييين اليداد اللي حطوهم السنه اللي طافت وايد حااارين خصوصا على طلبة الثانوية العامه... انا وايد تلعوزت وياهم....مول مايتفاهمون...

سيف: متى..؟؟ ذاك اليوم يوم يمسكونك انته وقوم صلوح شاردين..؟؟

جمال: ههههههههه هي...

ظحكت وانا اتذكر كيف كانت اشكالهم...في نص الدرب وقفنا عند الشيشه... نزلت انا ودخلت السوبرماركت الصغير...وخذت لي زقاره وولاعه...

ماقدرت اتحمل...

خشيتها فمخباي ودخلت الحمام...ودخلت لي شوي من الزقاره وعقب عقيتها وطلعت...

اول ماركبت السياره وتحركنا...

جمال: الله يهديك....

التفت له بسرعه..

سيف: شووو؟؟

جمال: شو اتحسبني ما اشمها فيك..!!!..

سيف: بالله عليك جمال خل النفس طيبه وخلنا نستانس...انا من يومين مادخلت يكون فعلمك...

جمال: وشو الفايده دام دخت الحين..!!..

سيف: اووووفف....

سكت ولا رديت عليه... وتم جمال مطنجر علي طول الدرب...لكن شوي شوي نسى...وخصوصا اني تعمدت اني ما ادوخ طول ما انا وياه....وان شاء الله اني بتحمل لين اخر اليوم...

------------------------------

اليوم: الخميس...

المكان: سيارة يوسف..

الوقت: العاشرة والنصف..صباحا..

--------------------------------------

(يوسف)...



تمينا انا وناصر يالسين في السياره لين مايطلعون البقية اللي في بيت عمي...

ناصر: ياهيي بلشه...هزرك العيوز بتركب ويانا..؟؟

يوسف: ههههههههه شكلك ماتباها تركب...

ناصر: بصراحه لا ...يدوووه حشره...وبتخلينا نمشي 60....

يوسف:هههههههههههههههه....

شفنا يدووه طالعه من باب البيت ومايد ماسك ايدها ويساعدها بانها تنزل الدري...ومن وراهم ام مايد..ونورة وكنه ومعاها منى... ومن وراهم عاشة ولطيفه..

نزلنا انا وناصر وسلمنا على الكل...ومن بعدها وقفنا نسولف شوي..

يوسف: هاااا يدوووه وين تبين اشوفج مطرقه صوب سيارة مايد...!!..

مايد: عيووزنا تركب ويانا لا تحاول...

يوسف: افااا...كيف ونحن حاجزين لج كرسي في الدرجه الاولى...!!!..

ام سلطان: يابويه انا مب خبله اركب وياكم انتوا مخرّش... مايد فديت روحه عاقل مابيطيربي...

التفت انا صوب ناصر المبتسم..

يوسف: شوف التفرقه في المعامله... (ورجعت اصد صوب يدووه)... يدووه انتي ساكنه عندهم ماشبعتي؟ تعالي ويانا خلينا نسولف وياج شوي..

ام سلطان: لالا اعرفكم انا عيال سلطان تبون تخبلوبي... مب على بياض ويه طالبيني...

ناصر: هههههههههههههه تتغلى علينا العيوز..هذا ويهي ان ماركبتج عالدراجه وطرت بج..

تناقعوا كلهم من الظحك وهم يتخيلون يدوووه راكبه عالدراجه...!!.. اما عيوزنا طنشتنا ومشت صوب سيارة مايد وهي تقول...

ام سلطان: بتبطي بعدك لين ماتروم علي ياولد سلطان....!!..

مايد: هههههههههههههههههه يالله خلونا نتوكل بنتاخر جي...

ام مايد: يالله...

ركبت ام مايد في سيارة ولدها بينما عيوزنا ركبت جدام عدال مايد... وتمن البنات يتشاورن وين يركبن لين ماحصلن هزبه من عند مايد...

مايد: تتشاورن بعد..!!!..يالله اداعسن في السياره....

نورة: ماشي مكاااان مايد...

مايد: انتي اول وحده بتركبين عدال امج...يالله جدامي...

مشت نورة وهي متظيجه ..حسيت ان كان خاطرها تركب معانا ..او بالاحرى مع ناصر بس ماتروم لمايد...

وركبت معاها عايشة... اما منى سحبت كنه وركظت صوب سيارتي....وانا ااراقب والبسمة على ويهي...

مايد: كنووووووووووووووه....مسودة الويه ...يالله في السياره الحين...!!

كنه: دخييييييييييييييييييييييلك....

مايد: لا...

منى: حرام مايد الله يخليك انا اباها وياي....

تحرك ناصر اللي رفض يدخل وركب جدام بينما انا تميت واقف عدال مايد...

اتريا ياخذون قرار...

ام سلطان: يالله خلصوووونا...

مايد: شوفي بناتج يدوووه .... تراهن مب متسنعات...

ام مايد: سيارتك اندعست خلهن يركبن ويا منى...!!

مايد: بيركبن في الدبّه...

يوسف: هههههههههههههههههههه حرام عليك..عنبوو هوووش..؟

مايد: توك تدري ان خواتي هووش.؟

كنه: نحن هوووش..؟؟ عيل والله ياركب هني ولا اركب في الدبه...

عصب مايد وتحرك صوب كنووه ناوي يسحبها سحاب...لكني مسكته ...

يوسف: الشيمه الشيمه ولد عمي خلاص خلها ويا منى ولطوف بتركب ويانا بعد ... خلنا نتوكل خلصوونا...

استحى منّي مايد واطالع كنه بنظرة..

مايد: ماعليه مسودة الويه... لطوف ركبي وياهن دامه شي وسع...

تنهدت انا بارتياح.... ركبن منى وكنه ولطيفه ورا..وانا وناصر جدام طبعا...وتحركنا كلنا وسرنا صوب المزرعه... اللي تاخذ لها ساعه في السيارة تقريبا....
_

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

الجزء الســــــــــــــــــــــــــــــــــادس عشر

-----------------------
اليوم: الخميس..
المكان: سيارة يوسف..
الوقت: العاشرة و اربعون دقيقة...
------------------------
(يوسف)...

حسيت بقهر خفيف وانا اسمع كنه ومنى يتهامسن من الصبح... طبعا مافهمت شي من كلامهن..وهذا اللي قهرني.. احس انهن يرمسن عني... والا انا خقاق وواثق من نفسي زيادة عن اللزوم؟؟!!!...
بس شكلهن جي يرمسن عني... وما ارتحت... حسيت اني متوتر...
وعشان ما اسمعهن...مديت ايدي ودخلت شريط ميحد في المسجل... عالاقل يغطي على اصواتهن شوي...!
مادريت الا وناصر ماد ايده ومطلع الشريط...بدون أي حرف...وببروود...!!
يوسف: ماعيبك؟ ليش طلعته؟
ناصر: الاغاني حرام...
ابتسمت ... صدق ان الله يهدي من يشاء...!... خليت المسجل مبند ولا شغلنا شي... واصوات كنه ومنى الهامسة تزعجني اكثر واكثر....!!..
فجاه صرخت عليهن حتى ناصر فز من مكانه مستغرب...
يوسف: تراكن صرعتني بهالمصاصر..!!.. لمن ثاميَـتـكن..!!!...
التفت لي ثلاث ازواج من العيون... ناصر ومنى وكنه..اما لطيفه اللي كانت قاعده وراي ماشفتها بصراحه...!!!..
قالت لي منى باستغراب...
منى: نحن نتصاصر عشان مانزعجكم...!!
رديت اصارخ..
يوسف: تزعجني زوود جذي...
كنه: يعني تبانا نرمس بصوت عالي.؟!!!..
قصرت حسّي شوي عشان....عشان...... مادري عشان شو...يمكن لاني مابغيت كنه تاخذ مني موقف..!!!!...
يوسف: ياريت...!!..ارمسن بصوت عالي احسن...يمكن نسولف وياكن نحن..
كنه: هههه...انزين عقب لا تتشكى عاد ترا بروحك طلبت...!!
يوسف: مابتشكى..
صد صوبي ناصر ورمس بصوت واطي..
ناصر: شو تبا برمسات البنات انته..!!
قلت له بصوت واطي بعد...
يوسف: صدعني والله من كثر مايتصاصرن...
صدت كنه صوب منى وقالت لها بصوت عالي...عالي بشكل متعمد عشان يزعج..!
كنه: احيــــــن شـــوووو قلــــتـــــي منــــى..!!... امــــــر عليـــــــج اول يـــــوم جـــــــامعــــة والا نتـــــلاقـــــــى هنــــــــاك..؟!!!!!!...
رصصت عيني وانا اراقب الدرب جدامي...قلنا عالي بس مب جذي عاد ياكنوه..!!.. صدق هالانسانه مب صاحية..!!...
من طرف عيني لاحظت ناصر يلتفت بكبره ويطالع كنه بغلاسه وعلى شفايفه شبه ابتسامه سخرية... مستغرب ومستنكر صريخ كنه هذا... بينما منى صارخت مثل ربيعتها...
منى: واللـــــــه مــــــــــادري يــــــــااااااا كنـــــــــووووووه....احســـــــــن تمـــــررريــــــــن علــــــي انتــــــــي بـــــس بــــــشــــــاور امـــــــايــــــــة اول...!!
ظحك ناصر وقال لي..
ناصر: شوف المعاند فيك..!!...زين جذي بننزل من السياره ونحن فاقدين حاسية السمع....
هزيت انا راسي وقلت...
يوسف: ماينلام مايد يوم قال عنكن هووووش... جذي اطـّـــربن عيل؟؟!!!
تمن منى وكنه يظحكن... بينما انا اللي قريته في كمبيوتر كنووه كل شوي يرجع لبالي بالحاح..!!... كيف كنوه تتصرف جي جدام شخص تحبه..!!..ماتستحي؟ ماتنحرج يعني..!!... غريب..!!
فجاه قال ناصر بظيج..
ناصر: يوووووووووووووه ....ان تميت تمشي وراهم هذيلا مابنوصل الا العصر ترانا....اخطف عنهم...
يوسف: مب عيب.؟؟ يدوه في السياره...
ناصر: وابوي عليك انا انزل خلني اسوق براويك كيف....!!
ابتسمت وزدت السرعه وتخطينا سياره مايد..يوم وصلنا عدالهم ارتبشن البنات اللي ورا وقامن يسون باي باي للسياره الثانيه بهبل....!!!...

وبعد فتره وصلنا مزرعه ابوي الخاصه... او بالاحرى مزرعه يدي الله يرحمه بس ابويه عدل فيها وايد وهو ورثها من عقبه بما ان عمي متوفي بعد...الله يرحم موتانا...قولوا امين..!!

طبعا وصلنا نحن قبل قوم يدووه... وشكلهم مابيوصلون الا بعد نص ساعه جذي... نزلنا من السياره... البنات دخلن بيت الاستراحه اما انا وناصر نزلنا الاغراض اللي موصي عليهن ابوي في المطبخ البسيط جدا اللي مسوتنه امي....
بينما نحن نمشي سايرين صوب النخل وين كانوا واقفين ابويه وامي والمزارع...
قالي ناصر..
ناصر: اقول يوسف... شووو نفسيتك احين احسن؟؟
تنهدت بتعب.. ما اريد اتذكر وضحه...ماريد...
يوسف: الحمد لله على كل حال...!!
وقف ناصر وصد صوبي ...تعابير عينه مب معروفه بسبب النظاره الشمسية..لكن التجهم كان باين على ملامحه..
ناصر: شوف ..بكلمك بصراحه...مهما كان حبك لها صدقي ..بس بدايتكم اصلا غلط... والا بشو فكرت انته يوم حبيت لك بنت من النت؟ بالله عليك..!!...تتعرف اووكي تسولف وتظحك بس تتعلق بها صدق لا...
يوسف: ناصر.. انا احاول انسى وانته ياي تحط الملح عالجرح..!!..انسى اللي عرفته لاني انا ابا انساه بعد...
مشيت عنه وانا معقد حياتي ولحقني ناصر بعد شوي...مشينا بصمت... مادريت به الا وهو حاط ايده على جتفي بشكل كأنه يبا يقربني منه بحب...كانه يبا يلوي عليه...ظحكت...وحطيت ايدي على ظهره بتعاطف بعد...

ناصر صاير عاطفي من اسبوع...شي فييه..بس هذا تغيير للاحسن...!!.. احس انه رجع ناصر اللي نعرفه قبل مايستقر في بوظبي... وقبل مايسافر مايد للخارج...



-----------------------------
اليوم: الخميس..
المكان: في صالة بيت خلفان..
الوقت: الحادية عشره صباحا..
----------------------------
(مهرة)...

فتحت الدكشنري وانا ادور معاني الكلمات اللي ما اعرفها عشان اترجم اوراق سيف...كانت عمتي يالسه تحط ملابسها الجدام في اكياس يابتهم الخدامه..عشان تتصدق بهم عالفقراء..
عمتي رغم قساوتها وياي....لها جانب طيب...!..
مهرة: عموووه...وين ابويه؟
آمنه: ابوج من الصبح ناشر مزرعته...
مهرة: وسهيل؟
آمنه: راااقد... هااا..ولد حلال..اكوه ياج...قومي هاتي لاخوج شي ياكله...
دخل سهيل وهو لابس بجامه بيج (كندوره مب قميص وبنطلون لا تفهمون غلط).... ابتسمت يوم شفته يحج راسه وميفن...
سهيل: السلام عليكم...
ردينا عليه السلام وهو يلس عالارض عدال الكرسي اللي انا يالسه عليه... اما انا بدون قصد قعدت ادقق النظر في شعره...
مهرة: شوبت ياخوويه فيك شعر ابيض فراسك...
سهيل: شويبه تراني...
آمنه: هذا وراثي... كلنا تبيض روسنا ونحن صغار...تباني اسويلك حنا؟
سهيل: ههههههههههههه حشى عليه مابا لا حنا ولا شي...
مهرة: شو تباني اييبلك ريوق...؟
سهيل: نسكافيه بس ..مافيني اكل شي احين توني ناش..
آمنه: ادريبك انا بتاجل الريوق لين الغدا...
سهيل: برايني انزين...
قمت انا اسوي لسهيل النسكافي.. ورجعت بعد دقايق...وشفت عمتي تجهز للطلعه...وسمعت سهيل يسالها..
سهيل: وين بتسيرين عمووه احين الضحى؟
آمنه: بسير مشوار بسيط وبرد...
خذت عمووه اكياسها وطلعت... بينما انا عطيت سهيل الكوب ويلست عداله..
سهيل: وين سايره عمتج؟
مهرة: اظني سايره تتصدق عالفقرا ...
سهيل: وليش ماتخبر انزين...
مهرة: هههه عشان ماتضيع الاجر...
فتحت الدكشنري ورجعت اترجم...
سهيل: شوو هااا؟ من احين عطوكم واجبات.؟
مهرة: لا...هذي اوراق سيف يباني اترجم له الكلمات حق استاذ الانجليزي...
سكت سهيل وانا احس بنظراته منصبّه علي... وبعد فتره سالني..
سهيل: متى بتراجعين المستشفى عشان ايدج؟
مهرة: الاثنين هذا... بتوديني..؟
سهيل: مادري...خير لين الاثنين...هي بعدها تعورج؟
مهرة: شو تتوقع سهيل؟ هذا كسر حتى لو كان خفيف لكنه يعورني.. وانا ماكملت اسبوع من منكسره ايدي...
سكت عني سهيل....وتم يطالع جدامه وهو يشرب وسرحاااااان....وصار دوري انا اتامل فيه واصب نظراتي على ويهه...!!..
مهرة: سهيل...
سهيل: همم..؟!!..
مهرة: شحقه ماتعرس..!!
فجاه انتابت سهيل موجه سعال يوم شرق بالنسكافيه...كل هذا متفاجئ من سؤالي؟؟..ليش؟!
مهرة: حلال حلال...!!...شفيك؟
تم سهيل يتحنحن ...وعقب قالي..
سهيل: شو ياب هالفكره لبالج؟
مهرة: همممم..وليش مافكر فيها...؟ عمرك 24 اظن...تشتغل ومعتمد على نفسك من فتره طويله.... صار لازم تعرس...
ابتسمت سهيل...
سهيل: محصله لي عروس انتي؟
قلت له فجاه اول شخص خطر فبالي...
مهرة: شيخه...
التفت لي سهيل وعلى ملامحه تعبير غريب...
سهيل: شيخه..!!..شمعنى؟
مهرة: بنت خالتك...واقرب لك في السن وانته تعرفها زين... وليش لا؟؟...البنت حلوه وراعية بيت ومن اصل..
سهيل: شيخه تشوفني مثل اخوها لا اكثر...
مهرة: احسن لها تعتبرك مثل اخوها الا في حالة صار العكس..ساعتها تجلب تفكيرها فيك بما يتوافق مع الظروف... لا تصدق خريط البنات يوم يقولن لاي شخص انا اشوفك مثل اخوي... هذي بس حجة للرفض...
سهيل: لا والله..؟؟..ومن وين يبتي هالافكار كلها انتي...؟!
استغربت..وفكرت...
فعلا من وين يبت هالافكار..!!.
مهرة: مادري...بس احس هذا هو المنطق.... البنت ماعندها اخوان غير اخوانها من ابوها وامها..واخوانها بالرضاعه.... غيرهم لا...كلهم تتغير علاقتها فيهم مع تغير الظروف...
سهيل: يعني تبيني اجرب واخطب شيخه.. اذا قالت اوكي تراها موافقه واذا قالت انا اشوفك مثل اخوي معناته رافضه..!!
مهرة:...........هي ليش لا...انته كبير احين وصار لازم تستقر...
ابتسم سهيل...
سهيل:..مابا...بس مشكوره عالنصيحه.... ماريد اعرس...جذي افك لي...
نش سهيل عني وراح حجرته فوق....
بينما انا ابتسمت لمحاولاتي الفاشله وكملت ترجمه لسيف

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الخميس..
المكان: في المزرعه...
الوقت: الحادية عشره والنصف صباحا..
--------------------------------
(ناصر)....

التفت وانا اسمع سياره داخله... مايد ووصل من شوي..منو ياينا بعد؟...
ترييت لين السياره دخلت ويوم دققت النظر اكتشفت انها اختي شما مع ريلها جاسم..وولدها بطي... اللي اول مانزل السياره وشافني ياني طااااااااااااير...
بطي: خااااااالي نصووووووووووووور....
ظحكت انا ومديت ايدي له بينما هو ينقز فحظني ويلوي علي....ويبوسني بقو على خدي وانا اضحك عليه...
ناصر: نصووور فعينك يالهرم.... اعععع شو ها ماكل حلاوه؟ حلجك مليّـــز...
بطي: انته وييين انا من سنين ماشفتك....!!!
نقعت من الظحك...
ناصر: وين من سنين يوم انته اروحك عمرك اربع سنين..!!!..
كنت شالنه وانا امشي صوب شما وجاسم...
ناصر: مرحبتيييييييييين الساع...
جاسم وشما: السلام عليكم...
ناصر: وعليكم السلام والرحمه...حي الله من يانا...
توايهت مع جاسم وشما....
شما: ياربي فديت هالويه انا وينك انته من زمان ماتنشاف...
ناصر: اتحسبج تتفدين ولدج...ماتستحين ريال شكبري تتفديني جي؟
شما: هههههههههه... شحقه ما اتفداك بالله؟ اخوويه ومربتنك ويا امي...
ناصر: اخاف بعدين حرمتي تغار منج...
بطلت شما عيونها.. بينما جاسم كان يسلم على يوسف اللي لحقني..
شما: عزّمت؟؟؟؟
اختفت الضحكه عن ويهي وقلت لشما بتهديد...
ناصر: ان فتحتي السالفه جدام امايه وابويه ياويلج...بفررر ولدج في المسبح..
سلمت شما على يوسف...وبعدها قال..
يوسف: على طاري المسبح...ابويه يقول تارسينه حقنا...خلنا نتسبح قبل الصلاة والغدا...لانه عقب الغدا مب زين ندخل الحوض...
ناصر: ماعندي مانع...
وبعد فتره وعقب ماخلصت السلامات...تجمعنا انا وجاسم ويوسف ومايد ..وبطي الصغير..ورحنا لبيت الاستراحه عشان نغير ثيابنا...كان يوسف اول واحد طلع من بيت الاستراحه وهو لابس شورت والفوطه عجتفه...وبعد ثواني رجع وويهه معتفس...
ناصر: شفيك؟
يوسف: البنات يالسات في الحوض...
ناصر: يتسبحن؟؟؟؟؟
يوسف: لا..بس مودنات ريولهن ويالسات حواليه...
ناصر: اوهووووو جان رغتهن؟؟
يوسف: جذي تباني اطلع جدام بنات عمك؟؟؟
اطالعت انا يوسف من فوق لتحت...وظحكت..
ناصر: ههههههه شوفيها....!!...سكسي يا اخي...
ظحك يوسف منحرج ودخل الحمام ولبس روب صوفي ويوم تاكد انه متستر كامل طلع....
لو انا...
مابلبس... بصراحه عادي عندي...
شو عليه ريال ... اما يوسف يستحي مسكين...!!!..
التفت لمايد وجاسم اسولف وياهم شوي...وبعد دقيقه...رجع يوسف...
يوسف: الدرب سالك لا يوجد متطفلين على بعد النظر..
ظحكت انا مع البقية وطلعنا..ودخلنا الحوض...عشان ننتعش شوي قبل الصلاة والغدا..


--------------------------------
اليوم: الخميس...
المكان: في مطبخ المزرعه..
الوقت: الواحدة ظهرا...
----------------------------------
(منى)...

ظحكت للمره الخامسة على شكل كنه... كنت قاعده معاها في المطبخ نقطع السلطه للغدا...وهي من شافت يوسف وهو مب لابس غير شورت اعتفس ويهها...بالعاده تضحك يوم تشوفه وتتخبل عليه بس هالمره صخّــت مووووووووووول...خصوصا ان ريولها اللي كانن في المسبح كانن طالعات شوي....
باختصار...
البنت منحرجه ومب طايقه تكلم حد من ساعتها...
منى: يابنتي هونيها وتهون ترا بينتبهون عليج...
كنه: سكتي عني...فظيحتي بلا قياس اليوم...
منى: ههههههههههه ماظني انتبهلج ياكنووه هو بروحه مفتضح ومتفشل...
كنه: اقولج طاحت عينه فعيني تقوليلي ماشافج؟
منى: فعيينج الحلوه...مب في ريولج المعصقلة...!!
كنه: خليها على الله اليوم توه في اوله والله يستر من اللي ياي...
منى: المفروض تستانسين...غريبه ردت فعلج الصراحه...
سكتت عني منى واحمر ويهها مره ثانيه....كملنا تقطيع وبعد ماخلصنا تبلناها وتغسلنا وطلعنا من المطبخ...
كنه: تعالي بنسير سيارة مايد...ابا اييب كاميرة الفيديو...
منى: ههههههههههه اعرف منو تبين تصورين... عشان تسحبين من الكاميرا صور كالعاده؟
كنه: هي عيل شوو...ههههههههههههاي...لو يدري باللي اسويه جان غسل شراعي.. بس الحمد لله مب باين عليه انه شاف ملفاتي...
منى: لو شافهن احسن عشان يحس على دمه....
كنه: لا...ماريده يعرف انا...اتمنى هو يحبني قبل...واتم العوزه واخر شي بقوله لووووووووول...
منى: انتي بكبرج فلم هندي ....
كنه: ههههههههه خليني اعيش في الاحلام...

وصلنا سياره مايد وفتشنا..لكن ماحصلنا الكاميرا...
كنه: عثره...لا يكون نسوووها..؟؟
منى: يمكن حد شلها...نسير نطالعها في الاستراحه...
مشينا للاستراحه لكن مادخلناها لان شفنا ابويه وامي ويدووه وام مايد فارشين عدالها ويسولفون رباعه بصوت عالي.. وشما اختي يالسه مع نوره على جنب يسولفون...ويوسف شال الكاميرا ويظحك ومركزنها على ابويه ويدووه وهم يتياحدوووون...
تقربت انا من يوسف اما كنوه تمت واقفه مكانها..
منى: وين ناصر ومايد وجاسم؟
يوسف: ناصر ومايد ساروا يوصلون جاسم السياره لانه بيروح وبيرد عقب...
منى: انزين يوسف..نبا الكاميرا..
يوسف: منو يباها...
كنه: انا اباها...
فجاه شفت يوسف يلتفت بالكاميرا ويركزها على كنه وهو مبتسم....
يوسف: منو انتي؟
كنه: انا...الشيخه كنه بنت حمد...

مازال يوسف مركز الكاميرا عليها وانا اراقب بمزيج من الاهتمام والاستغراب والفرح...
يوسف: اسفين طويلة العمر خذنا الكاميرا قبلج....
كنه: خوز الكاميرا عني..
يوسف: مابا...
ابتسمت كنه وتغشت بشيلتها غياض...وحسيت انها قافطه من حركته ومب عارفه كيف تتصرف...
منى: عيب عليك..
يوسف: جب انتي..
كنه: يالله عاد ابا الكاميرا...
يوسف: شو تبينها انزين انا بصور لج...
كنه: انا ابااااها انا ابا اصور شي معين...
يوسف: شو بتصورين انزين..؟
كنه: خوز الكاميرا...
يوسف: مابا....شو بتصورين؟
كنه: مابقول...
يوسف: انا؟؟...

حسيت ان قلبي يفقد دقة من دقاته...فمابالكم عيل بكنه؟؟؟..تمت ساكته ثواني وحمدت ربي انها متغشيه وملامح ويهها ماتنشاف....
كنه: خلاص عفتها...خلها لك...
صدت عنه كنه ودخلت للاستراحه...بينما يوسف ظحك وسكر الكاميرا وعطاني اياها..
يوسف: زعاله بنت عمج...سيري عطيها...
مسكت الكاميرا ورحت لكنه بدون ماقول ولا حرف...
بصراحه الحين شكيت...شو قصده يوسف؟ معقوله طلعت عفوية؟؟؟... كل شي جايز والله يستر بس مايكون يعرف..!!...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

-------------------------------------------
اليوم: الخميس...
المكان: المزرعه...
الوقت: الواحدة وعشر دقائق ظهرا..
---------------------------------------------
(يوسف)......

لازم انتبه ... !... لساني بدا يزل... ثنتيناهن..كنه ومنى... احس انهن شكن فيني... لازم اتصرف طبيعي... لكن المشكله... اني ما اذكر كيف كنت اتعامل وياها قبل... كنت اعدها مثل خواتها مافي شي مميز...بس احين ..ماعرف...
صرت انتبه باهتمام اذا انذكر اسم كنه... واذا كانت موجوده انتبه لحركاتي وكلامي...واتم الا اراقبها...
ماعرف ارجع مثل قبل....مب بعد اللي عرفته...!!.. ماقدر...مع اني ابا...بس مابقدر انا اعرف نفسي...

فجاه خطرت فبالي وضحه... انتبهت اني ..مافكرت فيها طول اليوم...الا توني...حسيت بالقرف من نفسي...
انا ما نسيتها...لكني التهيت بغيرها بكل صراحه.. مثل ما هي الحين ملتهية بغيري على ما اظن...!!
تذكرت كيف كانت بداية علاقتي بها....
وكيف اكتشفت بان كمبيوترها اللي دخلت عليه بقصد شريف كان فيه هكر ثاني غيري...
وكيف تميت ساعه احاول اطلعه من كمبيوترها وانظف من وراه اللي خربه....في النهاية نجحت..
وكانت بداية علاقتي بها في ذاك اليوم...
وتمينا نتلاقى كل يوم واسوي لها تشيييك على كمبيوترها وتنظيف دوري للباتش اللي كان يعيد نسخ نفسه بنفسه وماينفع فيه الحذف..!!!..
وبداية مثل هذي...ولدت الثقة في نفسها من ناحيتي... مثل ماكانت تسميني "المنقذ"...
آآآآخ ياوضحه.... شو هالفراغ اللي احس فيه من بعدج؟.... حسيت اني رغم كل الالم اللي احس فيه...اباها تتوفق وتعيش مرتاحه ومتهنية....وان شاء الله اني بتخطى هالشي انا بعد...

عطشان...
نشيت من مكاني وسرت المطبخ وفتحت الثلاجه ...صبيت لي عصير رمان في كوب وطلعت من المطبخ...ويوم طلعت..رفعت نظري وانتبهت لكنه هي ومنى فاتحات دريشه الاستراحه ويصورن....يصورني انا...!!!!...
ابتسمت ..عشان جي كانت تبا الكاميرا؟؟؟...ماعليه انزين انا اراويج....
سويت عمري ما اشوفهن ومشيت لين ماوصلت الاستراحه... ودخلت من الباب الخلفي ... ودخلت عليهن فجاه وهن يظحكن ويسولفن...وكنه شاله الكاميرا....
يوم شافني تفاجئن واختفت الظحكه عن ويوههن....
وقفت شوي مكاني اطالعهن بنظره تهديد وشك....واستمتعت وانا اشوف الارتباك عليهن...مشيت شوي شوي صوب كنه اللي كانت تتراجع كل ما اتقرب....ومادريتبها الا وهي حاظنه الكاميرا ولافه عني وتركظ...
جان اهزبها..
يوسف: تعاااااااااااااالي...تعالي هني وين ماكنتي واقفه.....!!
وقفت كنه متوتره وماتحركت بس كانت اطالعني بعين زايغه....
مديت ايدي وسحبت الكاميرا عنها..وحطيت عصيري عالطاوله... وقعدت اطالع كنه شو مصوره في الشاشه الصغيره...
رفعت حواجبي وانا اطالع الفلم.... طبعا مايحتاج اقولكم عن شوو كانت اغلب لقطات كنه اللي مصورتنها...
اما كنه ومنى كانن ساكتات وكان على رؤوسهن الطير...
بعد ماخلص الفلم رفعت عيني لكنه اللي كانت اطالع الارض باحساس بالذنب...
يوسف: امسحه.؟؟ اسجل فوقه؟
كنه:..............كيفك...
قعدت افكر شو اقولها وكيف ارد عليها...!!..تبون الصدق كسرت خاطري....!!..
رجعت لها الكاميرا واحس ان منى تراقبنا بشكل...
يوسف: سماح هالمره....بس تراني ماحب حد يصورني...
خذت الكاميرا عني ومازالت اطالع الارض....
اضفت لها بلهجة مزح..
يوسف: بعدين اذا بغيتي تشوفيني ماعليج الا تتصلين وبيي بيتكم....بس تصوير لا...
رفعت نظرها لي....
كنه: ياااااااااااااااالله يالخقاق....وايد شايف نفسك....!!
يوسف: هههههههه .... منّـــوووه شوفيها بنت عمج ان صورتني ياويلج انتي مب هي...انا بسير...
كنه: ماعندي سالفه جان بصورك بعدني مره ثانيه.....!!
ظحكت عليها وهي تحاول تغبي اهتمامها....
خذت عصيري وخليتهن وطلعت عنهن برااا وقعدت مع الجماعه بعد مارجعوا ناصر ومايد....


---------------------------------------
اليوم: الخميس...
المكان: في المزرعه..
الوقت: الواحده وخمس وعشرون دقيقه ظهرا...
---------------------------------------
(ناصر)....

مكتوب عليه اني ما انسى..... الله كاتب لي اني اواجه اشين اعمالي دايما عشان ما انسى....!!..
والا منو كان يتصور... اني بلاقي ابو البنت اللي تحرشت فيها يوم سايرين الصلاة..؟؟؟...
ماتتصورون صدمتي يوم شفته...وكيف رحب بي بمحبه واحترام...
لو يدري... بس لو يدري شو سويت بيلعن خيري...شو بيلعن خيري الا بيدفني وانا حي...
صدقوني اني كنت ارتجف يوم اسلم عليه....وما ارتحت الا يوم راح مزرعته اللي هي عدال مزرعتنا...
ياهي مصيبه...
كانوا الكل قاعدين يسولفون ويظحكون... وكنت منتبه لنظرات نورة.... لكن اللي في قلبي شاغلني عن كل شي...
مسكينه...كانت ايدها مكسوره...وبنية جسمها ضعيفه..مايندرا كم سنها شكلها صغيره وانا سويت فيها جذي.؟؟
الله يلعن الخمر...واللي علمني عالخمر...
تذكرت ويهها...وملامحها الناعمه...!!.. صح عيبتني...لكني تمنيت اني ماشوفها مره ثانيه.... مابعرف وين اودي ويهي منها..وشو بقول وكيف بفسسر...!!..
لكن ان شاء الله ماتجمعني الصدف بها...ابدا ابدا....
والله يستر على عباده...والله صار بيني وبينها محد بيدري عنه ان شاء الله....
بس ماظني ننساه لا انا ولا هي....مستحيل..
فجاه حسيت بحد يدزني شوي شوي..التفت حصلت مايد يطالعني بفضول..
مايد: بلاك؟
ناصر: ماشي...مافيني شي..
مايد: امبلى شي شاغل بالك...
ناصر: لا ماشي تفاهات بس...
سكت عني مايد شوي لكنه تم يطالعني بتفحص...عقب قالي..
مايد: لا يكون عشان سافرت عنكم فتره طويله تغيرت علاقتنا..قبل تخبرني كل شي احين ماتقول...
ناصر: افا عليك...لو عندي شي بقوله لك بس ماعندي...
مايد: اكيد..؟؟
ناصر: هي اكيد...(والتفت لامايه اقولها)...يامي..ترانا يواعا...مب ناويين تغدونا والا شوو..؟
ام محمد: افااا عليك احين بقولهم يحطووونه....
نورة: خلي عنج خالتي انا بقوم اقولهم...
قامت نوره وسارت المطبخ اما انا فما قعدت اطالعها لاني اولا ما اريد..وثانيا اخوها يالس عدالي ومابيحب هالحركه مني....
وبعد ماتغدينا وشربنا الشاهي الاحمر... طلعنا الدرجات وقعدنا نلعب بهن براا المزرعه مب داخل...وانا كنت مركب بطي ولد شما وراي وهو مستاااااااااااااااااااااااانس....

بصراحه..
ماعدا شوفت خلفان ابو البنت هذيج... كل السيره كانت حلوه وممتعه....



------------------------------------------
اليوم: الخميس..
المكان: بيت بو راشد..
الوقت: الثامنة والنصف مساءا..
-------------------------------------------
(سهيل)....

دخلت بيت خالوووه ووقفت عدال الباب وتظايقت يوم ماشفت سياره راشد....
وين سار هذا بعد...قايله اني بمر عليه وين ذلف..!!!!...
دخلت الميلس ولا حصلت حد وكل شي مبند...طلعت ودخلت البيت ..تحنحنت وهودت ولا حد رد...عوذ بالله وينهم؟؟...
وقفت مستغرب افكر في الصاله بروحي...فجاه نطت فحلجي شيخه وشكلها زايغه ومتلعوزه...
يوم شافتني فرحت وتقربت مني بسرعه وبشكل متهور خلتني انا اتراجع عنها...
شيخه: سهيييييييييييل...الحمد لله انك هني...
سهيل: شوبلاكم شويخ...وين اهل البيت...؟
شيخه: فاطمه تعبانه وعندها امي...نبا نوديها المستشفى...يالله شغل سيارتك انا بلبس عباتي وبخبرهم..
سهيل: اوكي..
راحت عني شيخه بسرعه وهي تركض اما انا تميت واقف متوتر...
تذكرت امي المرحومه يوم تعبت بولاده سيف.... الدب كان وضعه مب وضع ولاده وتعبها....
تحركت بسرعه ودخلت سيارتي الرنج داخل البيت..شوي واشوف خالتي طالعه وماسكه فاطمه اللي مدوخه وشيخه ماسكتنها من الجهة الثانيه...
سهيل: سلامات سلامات يافاطمه ماتشوفين شر...
قالت لي فاطمه بصوت هامس..
فاطمه: الله يسلمك...
ام راشد: شحالك ابويه؟ سامحنا عاد بنعبل عليك بس لا بو راشد ولا راشد في البيت..
سهيل: افا عليج خالتي انا من اهل البيت تراني الا ولدج... وفاطمه شرات اختي...وبتقوم بالسلامه ان شاء الله لاتخافون عليها...
شيخه: ان شاء الله... يالله امايه ركبيها..
وبعد ماساعدوا فاطمه عالركوب ورا ...
شيخه: ركبي جدام انا بركب وياها..
ام راشد: لا والله انا بركب عدال بنتي...ركبي انتي جدام...
ركبت خالتي ورا عدال فاطمه..وانا وشيخه تبادلنا نظرات متوتره..لكن ونظرا لان الوضع يحتاج السرعه ركبنا وتحركت انا بالسياره للمستشفى...
طول الدرب وانا متوتر واتنافض يوم اسمع صوت فاطمه.... ومتوتر اكثر من قرب شيخه مني اللي كانت لافه بكبرها صوب امها واختها ورا... تقريبا..كانت لاصقه فيني بدون ماتدري...
ماتتصوروون كيف كان شعوري ساعتها متضارب...ومتشوش...
وين راشد؟؟...
ليش غايب عن البيت..!!..
كنت افكر اتصلبه واساله بس ماكنت متفيج له الحين...كملت سواقتي للمستشفى اللي كان اخر الدنيا ويوم وصلنا دخلناها الطواري وعلى طوول حطوهاعلى كرسي وشلووها لطابق الولاده وانا وشيخه وراهم...
دخلت العيوز مع بنتها للغرفة بينما شيخه ماخلوووها تدخل...
راقبت ملامح ويهها وهي تتراجع في الممر ولاحظت انكسار خاطرها وخوفها...
تقربت منها شوي..
سهيل: لا تخافين عليها مب اول مره تربي...
شيخه: هالمره اشوفها تعبانه اكثر عن المره اللي طافت...
سهيل: الله بيسهل عليها ان شاء الله.... عند منوو خليتوا ولدها؟
شيخه: عند البشكاره...
يلست شيخه عالكرسي وعينها عالارض... وانا ماعرفت وين اسير او شوو اسوي.. فكرت اروح...بس لا..اخليهم رواحهم؟؟.. بقعد وياهم وبخبر راشد خله ايي...
بس مادقيت...تميت اطالع شيخه...
سهيل: شيخه..اييبلج شي؟
شيخه: لا...مشكور..
سهيل: ماي..عصير..!!..
هزت راسها بالنفي بصمت....
كسرت خاطري..
سهيل: لا تخافين عليها قتلج.. انا بتصل براشد احين وبخبره..
رفعت شيخه راسها فجاه اطالعني...
شيخه: راشد في دبي...
سهيل: في دبي؟؟؟؟ شو يسوي في دبي؟؟...متصله انا العصر وقال بيكون موجود في البيت ماخبرني...
شيخه: آآ... اظني عبدالله ريل فاطمه سوا حادث ولين احين مانعرف شو طبيعه هالحادث اذا هو حادث بسيط او لا ..وهالخبر هو اللي خلى فاطمه تتعب ويتقرب موعد الولاده جي....الله يستر...
سهيل: لاحول ولا قوة الا بالله....
مسكت تيلفوني بسرعه واتصلت براشد...وخذت منه العلوم كلها...وخبرته عن اخته...ويوم سكرت قالت لي شيخه اللي كانت عيونها تراقبني باهتمام كبير..
شيخه: هااااااا...شو قالك؟
سهيل: بسيطه ياشويخ عبدالله مافيه شي غير ظربه بسيطه فراسه وضمدوها له والحين يايين هو وراشد هني ماباقي شي عن يوصلووون...مافيه شر ان شاء الله...
شيخه: الحمممممممدلله... عيل فاطمه يبا حد يخبرها حليلها...
قامت شيخه ودخلت راسها للغرفه وطلعت لها النيرس وطلبت منها تزقر امها...وفعلا طلعت خالتي وخبرناها باللي صار...وفرحت وايد...
ودخلت الحجره مره ثانيه تبشر فاطمه..يمكن يخف عليها شوي اللي هي فيه...
رجعت شيخه وقعدت عالكرسي وهي حاطه ريل عريل وتهز ريلها بتوتر....!!
قعدت اراقبها وهي غافله عني...تذكرت كلام مهرة اليوم الصبح.... معقوله شيخه ماتعدني مثل اخوها؟ واذا كانت فعلا مب معتبرتني اخوها شو موقفي انا من هذا..؟؟
انزين واذا كانت فعلا تعدني مثل اخوها شو اسوي؟.... كيف بعرف اصلا...
اسالها.؟؟؟
اذا ماسالتها مابعرف...واذا سالتها ورفضتني مابروم اجابلها مره ثانيه...
اوفففففففففف شو هالوهقه....!!!!
اصلا الوقت مب مناسب...
بس هذي اول مره اقعد وياها رواحنا بدون محد يسمعنا....
ياترا بتتكرر هالفرصه مره ثانيه والا..!!
تميت ساكت وهالافكار ادور وادور في راسي...لين مر من الوقت ثلث ساعه ونحن ساكتين...اخر شي قلت لها بدون تفكير.. وانا عيني عالارض..
سهيل: شيخه...انا ابا اسالج شي مهم بالنسبه لي.... هممم...انا ابا اعرف انا شو بالنسبه لج...لاني ابا اخطبج...بس اذا انتي كنتي تعديني مثل اخوج سكتي عني ولا تردين...اما اذا كنتي متقبله هالشي سوي اي شي..لو حتى تتحنحنين اي اشاره المهم اعرف انج متقبله وانا ماريد احرجج بس محتاج اني اعرف...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

واخيرا طلعت...ماعرف ردة فعل شيخه شو هي لاني مازلت اطالع الارض باهتمام...وطال سكوت شيخه ثواني...اعتبرهم انا شهور...
كنت متوتر حدي... لكن فجاه سمعت صوتها الهادي يقول..
شيخه: راشد يا...
رفعت راسي بسرعه وقمت اشوف راشد وعبدالله يايين بسرعه صوبنا...وصديت صوب شيخه اطالعها بس حصلتها منزلة راسها للارض....
حسيت قلبي يغووور ويتفتت.... سكتت...ماردت علي شيخه...معناته انا مثل اخوها...
ابتسمت بالم...يالله...اعرف احسن من اني اتم محتار وحاط امل..

 

[اليوم الآخر]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

والله طويله

شكرا لك على هذه القصه الجميله

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

العفو حبيبتي و مشكورة على المتابعة

و البقية تأتي

 

[قوت القلوب]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

انا لله وانا اليه راجعون

لا حول ولا قوة الا بالله العلي العظيم

مشكورة اختي على هذه القصة المؤثرة

يسلمووووووووا




قوت القلوب

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

شكرا قوت القلوب

ضيفة جديدة في احداث القصة

فاتمنى منك التواصل الدائم

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

الجزء الســـــــــــــــــــــــــــابع عشر


-------------------------

اليوم: الخميس...

المكان: في المستشفى..

الوقت: التاسعه مساءا..

--------------------------

(سهيل)....



وقفت اتريا وصول راشد وعبدالله صوبنا وانا قلبي مب متحمل اللي عرفته توني....

عالاقل قبل ما اسال كان عندي امل... بس الحين خلاص...مالي حق افكر فيها او احبها... تصنعت ابتسامه لراشد وعبدالله وسلمنا عليهم...

سهيل: الحمد لله عالسلامه ياعبدالله...ماتستاهل والله..

عبدالله: الله يسلمك ياربي.. هااا بشروني عن فطيم.؟

شيخه: من نص ساعه مدخلينها داخل...بعدهم شوي.

قال عبدالله بملامح قلق...

عبدالله: تعبانه.؟؟

ابتسمت شيخه تحاول تخفف عليه...وانا اراقب وقلبي يحترق...

شيخه: شويه..لا تخاف عليها ان شاء الله بتقوم بالسلامه... بخبر امايه انكم وصلتوا...

تحركت شيخه وانا مازلت اراقبها...فجاه طاحت عيني بعينها...مادري شو اللي شافته فملامح ويهي..!!..

لكن الي شافته خلى ويهها يحمر وتتوتر...

دخلت شيخه الغرفه اما انا فما قدرت اقعد اكثر... استسمحت منهم وانسحبت وقلت لهم اني بييهم عقب اطمن... او بتصل...

طلعت من المستشفى وسحبت الهوا لصدري...عل وعسى اهدى شوي...رفعت ايدي ليبهتي وفركتها بتوتر...

الوقت ماكان مناسب...

اناغبي....ماكان مناسب ابدا...

ركبت سيارتي وحركتها..وبدون حاسية مني توجهت للسينما... وحضرت حيالله فلم ولا اندمجت فيه بعد ولا فهمت شي منه...بس كنت مسكر تيلفوني ..ماريد اشوف حد احين ولا اريد اكلم حد...ابا اتم بروحي...

يمكن شيخه ماكانت تعني السكوت...!!..

يمكن احرجتها وماحصلت فرصه تتكلم بسبب وصول راشد ونسيبه..!!

يمكن ويمكن....

بس كيف بتاكد...مستحيل اسالها مره ثانيه مالي ويه الا جان هي رمستني بالسالفه بروحها...

ومااعتقد ان أي بنت لها الجرأة تتكلم بموضوع مثل هذا...!!..

عقدت حياتي...لا تحط امل ياسهيل...لا تبني امل من اول ويديد...

طلعت من الفلم وكانت الساعه حوالي الـ11 ونص تقريبا...

فتحت تيلفوني واتصلت براشد....وارتحت شوي يوم اطمنت على فاطمه اللي يابت ولد ثاني وماسمووه لين الحين...وهي بخير وماعليها شر...

رجعت البيت وصادف وصولي مع وصول سيف مع جمال اللي مادري وين كانوا مرتغدين...

سلمت على جمال وترييته يسير بيتهم... ودخلنا انا وسيف البيت...

سهيل: وين كنت.؟

سيف: كنا في دبي وتونا واصلين...

سهيل: شو تسوون في دبي.؟؟

التفت لي سيف بنظره استفهام..

سيف: ليش تسالني.؟؟...انا ريال مب ياهل تسالوني وين كنت وشو سويت...!!

سكت واطالعت سيف ببرود ... كان مجرد سؤال مب تحقيق..ليش ياخذ هالموقف الدفاعي ..!!!... حطيت ايدي على صدره ابعده عن طريجي وقلت له ببرود..

سهيل: وريحة الزقاره بعدها فيك...

بعدته عن طريجي ودخلت البيت وحسيته يمشي من وراي وهو ساكت...ركبت فوق ولاحظت ليت حجرة مهرة مازال مبطل...دقيت الباب ودخلت وحصلتها يالسه عالكمبيوتر اليديد...

سهيل: شو تسوين.؟

مهرة: العب..

تقربت منها وشفتها تلعب ورقه...!!...

سهيل: بنت خالتج ربت اليوم...

رفعت نظرها لي متفاجاه...

مهرة: والله..؟؟؟...فاطمه؟...شو يااابت؟

سهيل: يابت ولد...وماسمووه لين الحين...

مهرة: وهي شو حالها بخير..

سهيل: هي بخير...المهم بسج من اللعب ورقدي..

مهرة: اوكي...

خليتها وطلعت من حجرتها ودخلت حجرتي....تسبحت بماي بارد وطولت هالمره بالسبوح لاني كنت اسرح واااايد...افكر بشيخه.... وملامح الخجل الاخيره اللي طلعت على ويهها...!!!...



--------------------------

اليوم: الجمعه....

المكان: بيت سلطان..

الوقت: الواحدة ظهرا..

--------------------------

(يوسف)...



دخلت البيت معاي ناصر ومحمد وابويه...راجعين من صلاة الجمعه....وشفنا امي طالعه من حجرتها ...

اول ماشافتني بركب حجرتي قالت لي..

ام محمد: ابويه يوسف...ازقر لي منى بالله عليك...منزربه فوق من اصبحت مادري شو تسوي...

يوسف: ان شاء الله..

ركبت فوق ومريت على حجرة منى اللي كان بابها مفتوح..وسمعتها تتكركر...دخلت الحجره ووايقت عليها وعلامه استفهام على ويهي...

حصلتها يالسه عالكمبيوتر واطقطق...

يوسف: شو تسوين.؟؟...

منى: اكلم ربعي...

يوسف: نزلي امي تباج...

منى: الحين..؟

حسيت بدافع مفاجئ وبفكره خبيثه يخليني اطلعها من الحجره احين..

يوسف: هي الحين الحين تباج سيريلها...

منى: اوكي..

طقطت منى شوي وانا سويت عمري بروح حجرتي ويوم شفتها تركظ وتنزل الطابق التحتي..ركظت انا للكمبيوتر مالها...

ورفعت المحادثات اشوف منو تكلم... فعلا كلهن بنات...وحده منهن اكتشفت انها كنه... ماكان عندي وقت اقرا شو كاتبات لكني سحبت قلم من مكتب منى ونقلت ايميلها على ورقه وخشيتها فمخباي...رجعت كل شي مكانه وطلعت من الحجره ودخلت حجرتي... حطيت الورقه في المكتب لين ما اشوف كيف بتصرف معاها عقب...

بصراحه مادري ليش خذته...بس حسيت اني بحتاجه...

شغلت كمبيوتري والشامل...

ويوم شيكت ايميلي تلقيت مفاجاه ....

كانت رساله من وضحه فيها ثلاث سطور....ثلاث سطور..لكنها زلزلت كل خلية فيني..

كانت تقولي بانه مشاكل صارت بين عمامها عسب الخطبه وموعد العرس ..واحتمال الخطبه تنفج... كانت تطلب مني اتدعى بانها تتحرر من هالالتزام عشان نرجع لبعض...!!!!...



نرجع لبعض.؟... الحين عاد...!!..



قلبي كان يدق بالقو وبفرح.... لكن عقلي رافض الفكره... وصارت بينهم حرب شرسه...

فاز فيها العقل...

انا عودت نفسي على خساره وضحه...كيف ارجع مره ثانيه..؟؟... اذا رجعنا مره ثانيه لبعض هالقصة بتكرر مرتين وثلاث وانا ما اتحمل اكثر صدمات...

لا... رغم اني اتمنى من كل قلبي نرجع لورا اسبوعين بس.... لكن ناصر معاه حق ...البدايه غلط...والحب هذا بكبره غلط...

اسمحيلي ياوضحه.... لكن ان شاء الله ماتنفج خطبتج... اذا كان هذا نصيبج... لانه نصيبج مب معاي...



تميت مسنتر عالشاشه اطالع فيها بدون ما اطالعها فعلا....افكر بحياة وضحه المضطربه والمتوتره الحين...

وتذكرت كيف انها تحب تعيش بروتين غير عن الناس...ماتحب شي يتغير عليها...اذا كانت مبسوطه من وضع تحبه يستمر على طول...بدون ملل...!!..اكيد انها مب مرتاحه حاليا...وعايشه بترقب وقلق...

حسيت بحد يدخل حجرتي ..رفعت نظري وكانت منى...

منى: يوسف تعال تغدى...

يوسف: اوكي...

طلعت منى من حجرتي وراحت لحجرتها اما انا فخليت الكمبيوتر شغال عشان ارجع له بعد الغدا..ونزلت تحت...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الجمعه...

المكان: سيارة ناصر...

الوقت: الخامسة عصرا...

-----------------------

(ناصر)....



كلت حبة باندوول وشربت ماي...عل وعسى يخف الصداع اللي سببه الحلم اللي حلمته...او بالاحرى الكابوس...

شليت شنطتي ونزلت تحت اسلم على امايه واروح بوظبي...



وانا في الخط...هزيت راسي والذكرى تهاجمني من اول ويديد....ماكفى الحلم..!!..

كان حلمي عباره عن استرجاع للموقف... لكن الاصوات كانت اعلى... والحركات كانت اعنف... وصوتها وهي تقولي "الله يخليك..ابوس ايدك"... يتكرر صداه في عقلي بقوو...

مسكت السكان بقو لين مابيضن صبوعي.... يوم عن يووم يزيد تفكيري وهوسي بهالبنت... احس اني لازم اشوفها... لازم اكلمها... بس هالشي مستحيل...

لكني اعرف فقراره نفسي باني مابقدر اتخطى هالازمه الا اذا شرحت لها كل شي واستسمحت منها....بس كيف.؟؟..



مستحيل... مستحيل...المفروض مافكر في هالشي اصلا.... لانه مافي ولا طريقه.. اقدر فيها اكلمها بدون حضور اهلها بدون ما افضح نفسي... وافضحها هي وياي ...

بعدين مافي مجال تسامحني...واذا كانت ماخبرت حد من قبل بتخبر الحين بعد ازدياد جرأتي...

ياربي شو اسوي...ابا انسى...ساعدني..

ابا شي يشغل حياتي...

شي يشغل بالي.... يشغل اوقاتي... عرس لا تفكرون...مب معرس الا يوم تعرس نوره النحسه...يارب ارزقها بريال يفكني منها وخلها تعرس سرعه...

رجعت افكاري للمره الالف للبنت....

على طاري الزواج... خوفي ان البنت تعقدت من اللي سويته فيها وبترفض أي شخص اييها...اخافها تتحسب الرياييل واحد وتحلف ماتعرس...!!..

آآآآآخ ياربي انا شو سوييييت...!!!..

وصلت بوظبي بعد المغرب بشوي ... فتحت الدرايش في شقتي عشان تتهوى شوي... وبدلت ثيابي ولبست لبس الرياضه واتصلت بعبدالعزيز على طول...

وصادف ان الريال بعده مارجع من خورفكان هو واهله...بالتالي ركضت بروحي اليوم... ومازال ويه البنت عالق فبالي... لا ...انا مابقدر اتحمل اكثر...لازم اشوفها لازم...

لازم اشوف لي حل ...

بعد ساعه الا عشر دقايق رجعت لسيارتي ووقفت مكاني وانا اشوف حد واقف عدالها..يوم تقربت ميزته...

حميد..!!!..

ابتسمت وتقربت منه...

ناصر: مرحباااااااااا الساع....مفاجاه بصراحه...

ابتسم لي حميد وسلمت عليه...

حميد: شفت سيارتك واقفه ...اتصلت بك مغلق...قلت بترياك عدالها بسلم عليك...شحالك؟

ناصر: والله الحمد لله ...ماشي الحال...سيارتك وين؟

حميد: وقفتها هناك...ليش؟

ناصر: بنتعشى رباعه...الحقني الشقه...

حميد: ماعندي مانع...

ركبت سيارتي وخطفت عالمطعم اللبناني وطلبت مشاوي ومحاشي وكوكتيل وخذتهم وياي الشقه...

دخلنا انا وحميد اللي كان متعود على شقتي ويعتبرها بيته الثاني على قولته...

عطيته كيسه العشا..وقلت له..

ناصر: اندوك رتب العشا وانا بتسبح خمس دقايق بس..

حميد: بشكار ابوك انا...

ناصر: هههههههههههه محشوم... يالله عالمطبخ اشوف..

ظحك حميد وراح المطبخ وانا دخلت الحمام وتسبحت عالسريع...لبست ثيابي وطلعت لحميد اللي كان يالس في الصالة والعشا جدامه عالارض...

يلست عداله وانا ابتسم..

ناصر: هااااااه...شو لعلووووم...؟ واخبارهم الربع...

حميد: مثل ماتحيدهم...والله العلوم عندك...

ناصر: ماعندي انا علوم... عندي جغرافيا جان تبا...

حميد: هههههههه..لا صدق...صدق اللي سمعناه من عبدالله؟..

ناصر: حسب اللي قالكم اياه عبدالله...

حميد: يقول انك بتودر الشله خلاص....

ناصر: لا...غلط... السالفه ومافيها ياخوي اني قررت التزم خلاص واتوب... وقلت لعبدالله اذا ما ابتعدتوا عن هالشغلات البطاله وياي بضطر اني انا ابتعد عنكم عشان ابتعد عن هالملذات وما ارجع لذاك الدرب... والا بالله عليك حد يبغي يخسر ربعه.؟؟...

سكت عني حميد....بعدها قال لي ببطء..

حميد: اهنيك بصراحه... وتبا الصدق انا من زمان احس بتانيب الضمير من هالشغلات اللي نسويها...كنت افكر اني ابتعد بس ماكانت عندي شجاعه كافيه...كنت ابا حد يشجعني...

فرحت...

من خاطري فرحت... توبتي انا شجعت شخص ثاني عالهداية بعد..!!.. اجرها كبير عن رب العالمين...

ناصر: والله حميد..؟؟... فرحتني...صدقني بتحس براحه مابعدها راحه...

حميد: انا متاكد من هالشي...كنت اتريا الفرصه بس.. بس عندي سؤال اجاوبني بصراحه؟

ناصر: اكيد..

حميد: لكل توبه مفاجأة سبب....شو اللي خلاك اتوب فجاه.؟..وشو هاي الظربه على راسك.؟؟..

سكت..وتوترت..ماعرفت اقوله او لا...بس انا اثق في حميد ..وفي نفس الوقت احس نفسي ابا اتكلم مع حد بخصوصها...هاي البنت اللي شاغله بالي ليل نهار...كانها تنتقم مني عاللي سويته فيها....

ناصر: لازم.؟

حميد: اذا كنت تثق فيني كفايه...احب اعرف...

ناصر: توعدني ماتخبر حد..

حميد: وعد شرف...

ناصر: هممم... حميد...انا...غلطت..تحرشت في بنت...!

كان على ويه حميد الجمود ومب متاثر باللي قلته...يترياني اكمل ...ويو ماكملت سالني وهو يرفع كتوفه..

حميد: شو يعني؟ مب اول مره...!!



فهمني غلط..!!!..



ناصر: لا حميد مب مغازل... تحرشت فيها..والبنت هذي..بنت عرب.. معارف ابويه...واخوها العود ربيع اخويه محمد... تحرشت فيها يعني مسكتها وقربتها مني وكشفت غشوتها...وزين اني انتبهت لنفسي والا الله اعلم شو بيصير...!!!..



بطل حميد عيونه يطالعني برعب...

حميد: لا...لا ناصر شو سويت الله ياخذ بليسك...شو ياك عليها ..ليش جي سويت..؟؟

هزيت راسي متوتر انا بعد..

ناصر: كنت مظارب ويا ابويه وطلعت من البيت معصب وفي الطريج شربت خمر...وتخيل انته الباقي..

حميد: حسبي الله على بليسك...واهلها وين عنك؟؟

ناصر: كانت بروحها في البيت وقربت بي في الميلس وجدمت لي الفواله.... آآآخ ياحميد.... لو تشوفها.. كانت ايدها مكسوره... وبنية جسمها ضعيفة وصغيره...شكلها جي في المدرسه...ماعندها ابدا خبره..والا كيف ادخلني وهي اروحها في البيت..!!!..وانا شوف شو سويت فيها...



سكت عني حميد وهو يهز راسه باسف ويحاول يتخيل الموقف...



ناصر: ترجتني البنت اني اخليها وماسويبها شي...وصوتها الحمد لله وصل لعقلي في الوقت المناسب وفجيتها... ويوم طلعت من بيتهم سرت البر بدون ماحس.. وكسرت غرشه الخمر عالشارع...ويوم كنت برجع للطريج انجلبت بي السياره وصار لي اللي تشوفه في راسي...



رفع حميد نظره لي متفاجئ من هالخبر اليديد...

حميد: انجلبت بك السياره بعد..؟

ناصر: ماياني شي انا بخير..

حميد: الحمد لله عالسلامه ..

ناصر: الله يسلمك...شفت كيف ياحميد...الله مايضرب بعصا... وعقب كل هذا ماتباني اتوب..!!!

رجع حميد يهز راسه باسف...

حميد: والله اني مب قادر اتخيل اللي سويته...وماصار شي عقبها؟

هزيت راسي بالنفي...

ناصر: انا ساكت وهي الظاهر ساكته... واللي معور قلبي ياحميد اني بعدها بيومين جي اضطريت اروح بيتهم انا ويوسف اخويه مره ثانيه وتغدينا هناك..وتعرفت على خوانها وابوها... ناس حشام والله وشوف انا شو سويت... وامس بالذات مصلي ويا ابوها الظهر... والاسبوع اللي طاف تلاقيت ويا اخوها وولد خالتها في العين مول...يعني شوف وين ماسير احصلهم جدامي يعني مافي مجال انسى او حتى اني اتناسى...



حميد: وشو بتسوي احين..؟؟

سكت عنه شوي وعقب قلت باندفاع...

ناصر: ابا اشوفها...

حميد: شوووووووووووووه..؟؟؟..تخبلت انته...

ناصر: هي تخبلت... حميد مب قادر اشلها عن بالي ليل نهار صورتها تلاحقني...احس اني لازم اشوفها..

حميد: شو تبابها تشوفها شو بتقولها..؟؟

ناصر: مادري..

حميد: ناصر..شو انته تحبها والا شي..؟؟

تفاجات من كلمته....شو ياب هذا في هذا...

ناصر: احبها..؟؟؟...متى بواحي احبها ان شاء الله...؟؟..مايخصه الحب في هذا كله...

حميد: عيل شو تبابها تشوفها .؟؟؟

ناصر: قتلك مادري... اصلا مافي مجال اشوفها ولا افكر اني اروح بيتهم مره ثانيه ابدا... هي مجرد رغبه...

حميد: فرضا شفتها وكانت بروحها...شو بتسوي...

فكرت شوي..

ناصر: بشرح لها وضعي وبستسمح منها ولو اني اعرف انها مابتسامحني...

حميد: ناصر..بقولك شي...دامك غلطت عالبنت... ليش ماتصلح غلطك وتخطبها..؟؟

ناصر: تتحسبني مافكرت بهالشي؟..فكرت...بس اهلي مابيطيعون دام بنت عمي مازالت تترياني...وبعدين البنت مابترضى فيني... مش بعد اللي سويته فيها...خلها على الله انته بس...

حميد: الله يعينك...بصراحه مشكله...

ناصر: يعين الجميع...تعال نتعشى عن يبرد العشا...

قمنا انا وحميد وتعشينا وقعدنا نسولف لين 11 في الليل وبعدها استاذن مني وراح...ورحت انا انام...واحلم كوابيس من اول ويديد....

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الجمعه..

المكان: غرفة شيخه...

الوقت: الثانية عشره مساءا..

------------------------------

(شيخه)...



انسدحت على شبريتي والابتسامه مرسومه على ويهي... اشياء وايد صارت من امس لليوم
...

واهمها كلام سهيل.... مادري شو اللي قلبه فوق حدر جي وخلاه يقولي هالكلام وبهالطريقه هذي..!!!..

مب مصدقه انه يبا يخطبني....

مب لاني مب متخيله نفسي كزوجه لسهيل لا بالعكس تخيلت وكذا مره بعد...بس الطريقه اللي قال فيها كلامه حيرتني لانه مب من هالنوع... وماتوقعت انه يبا يعرس ابدا عشان جي شليت من بالي فكره اني اكون لسهيل ويكون لي....

احلام المراهقة اللي كنت احلم بها خلاص اختفت ... كله شليته من بالي بسبب امتناعه هو عن مجرد التفكير بالزواج... ولاني مابغيت انصدم..ماقمت افكر بالعرس انا بعد...

يوم قال كلامه ذاك...انصدمت وبلعت لساني... ماعرفت شو ارد عليه... اصلا ماقدرت افكر لاني انتبهت لراشد وعبدالله...

لكن معقوله يسالني هالسؤال....واضح جدا اني ما اعتبره اخوي... رغم المغايظ والسوالف بس بعد..كيف ماحس..!!!..تفكيري بسهيل مب اخوي ابدا ابدا....

تنهدت وانا افكر فيه يوم زار فاطمه اليوم...كيف طنشني وماالتفت صوبي ابد... اكيد اعتبر سكوتي رفض...بس كيف يتوقع مني افكر برد وانا اشوف اخوي ياي صوبي..؟؟؟؟... اكيد بنجلط وببلع لساني....!!.

اوهووو ياهي سالفه عويصه...برااايه اكيد بيرمس في الموضوع مره ثانيه...او بحاول اوصل له اللي صار بشكل او ثاني...مسكين سهيل..اكيد انصدم...

انجلبت على يمبي وانا اتذكر شي ثاني مضحك...لكني كنت كاتمه ظحكتي لاني ماريد اضحك على ذاك الخسف وعلى حركاته...

الخسف اللي اتكلم عنه كان عمر...اخو عبدالله...اللي يوم سمع خبر ولادة فاطمه يا على جناح السرعه هو واخته ليلى...وصادف اني كنت موجوده..طبعا تميت متغشيه ومتلعوزه ويالسه اخر الغرفه...

وحظرته سلاماته ماتخلص وسوالفه بلا قياس مع حرمه اخوووه... وشفته كذا مره صد صوبي ويتصاصر هو وفطيم علي...بغيت ساعتها انش واروغه من الغرفه...

الحمد لله ان حس على دمه وطلع برا مع قوم راشد...

تذكرت سؤال ليلى الضاحك يوم تقولي لين وين احين شعرج..؟؟

بغيت اروغها ورا اخوها هذي بعد شو يعني يايه تطنز..؟؟.. بس الحمد لله اني افحمتها يوم قتلها شعري لين وين اما هي اكتشفت انها قصت شعرها لين الارداف...يعني شعري انا اطول ياسلاااااااام...

رجعت افكاري بشكل لا ارادي لسهيل.... احاول احلل مشاعري صوبه مب عارفه...

بس انا متاكده انها مب اخويه...

ورقدت وانا مازلت افكر فيه....

-----------------------------------

اليوم: السبت...

المكان: بيت خلفان

الوقت: السابعه والنصف صباحا..

----------------------------------

(مهرة)...



يلست في غرفة الطعام وانا لابسه عباتي وجاهزة.... عمتي المحبة اعلنت انها مافيها توصلني اليوم..وسهيل روح من قبل وشل سيف معاه..وابوي مازال راقد..ماتم عندي غير حمد...

مهرة: يالله عااااد حمد بتاخر والله...

حمد: صبري خلينا نكمل ريوقنا...

مهرة: انته كل يوم ماتتريق شمعنى اليوم...انزين تريق بس بسرعه بليييييييز...

لبسني حمد وتم يتريق وانا اتحرقص مكاني...لين اخيرا خلص وقام يتغسل...ركبت السياره معاه وتوجهنا للجامعه...

نزلت ودخلت الجامعه وانا اضم الدفتر الصغير ..ماكان عندي وقت لين ماتبدا محاضرتي الاولى... طلعت جدولي وقريت اسم المبنى... وتذكرت مكان المبنى هذا يوم رحت استكشف ذاك اليوم...

لكني يوم وصلت له افتر راسي من الصفوف المتشابهه..لكني في النهاية عرفت كلاسي وين ودخلت بتوتر...

ويلست على كرسي فاظي...وبعد دقيقه قعدت عدالي بنت ما اعرفها... وبعد دقيقه ثانيه دخل ريال...او بالاحرى دكتور لابس بدله وله شنب..اووففف...يالله هذا كلاس من اربع كلاسات...ان شاء الله بقية الكلاسات حريم يدرسني..

بدا الدكتور يعرف عن نفسه وعن قوانينه وكيف طريقه تدريسه ووزع علينا اوراق... وقبل مايخلص وقت المحاضره بشوي طلعنا...ميت اغراضي واوراقي وطلعت من الكلاس...

ماعرفت وين ارووح.. فكرت اروح اتريق...

ومشيت بطريجي لين ماوصلت الكافتيريا... كان شوي زحمه وشلل البنات نفسهن في كل صوب...فجاه سمعت حد زقرني..يوم تلفت حصلت عليا وحمده يالسات على زاويه وياشرن لي....

فرحت..سرت صوبهن واناشاقه الحلج..

مهرة: اهليييييييييين انتوا هنيي..

حمده: هي نعم..قربي..شحاااااااااالج؟

مهرة: بخييير شحالكم انتوا..

يلست وياهن وقعدنا نسووولف..

عليا: احين الساعه عشر بنظهر رباعه من هني..عندنا محاضره عربي اظن كلنا مع بعض...

مهرة: هي كلنا رباعه في محاضرة العربي...

حمده: احسن شي عشان ما ارقد...

عليا: هههههههههه يمكن يطلع الاستاذ يظحك ودمه خفيف..

مهرة: ان شاء الله تطلع حرمه..

حمده: لااااااااااااااا دخيلج ماريد حريم..

مهرة: ليش عاد..؟؟

عليا: لاعت جبوودنا من الحريم في المدارس خلونا نغير...

مهرة: بصراحه انا اتمناهن كلهن حريم...

عليا: هههههه مهرة مب مستعدة للتغيير...

مهرة: برتاح اكثر معاهن ...

حمده: بس يقوولون الاساتذه الرياييل يشرحون احسن ومتفهمين اكثر...

عليا: قومن نتريق قومن ماشي وقت...

قمنا نشتري ريوق ورجعنا نتريق... وبعد ماتريقنا وسولفنا سرنا محاضرة العربي اللي كانت فمبنى قريب وبااااااااااااااارد وهالشي عيبني وايد فيه...

لكن اللي شفته في الكلاس ماريح نفسي...البنات الموجودات اغلبهن بناطلين ومب متحجبات...!!!..وشكلهن جي اطباعهن مب مثل اطباعنا...

نحن طنشنا الموضوع وقعدنا مع بعض تقريبا اخر شي...

وصدمتي الثانيه كانت ان الدكتور طلع ريال ومصري.. تم عندي كلاسين وان شاء الله يطلعن حريم... !!!

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

------------------------------

اليوم: السبت..

المكان: غرفة المستشفى...

الوقت: الخامسة والنصف مساءا..

------------------------------

(راشد)....



انصدمت يوم فتحت باب الحجره وحصلت عيون مهرة مجابلتني...اللي على طول نزلتها عني للارض كاني باكلها...!!!...

كانت يالسه عدال شيخه وحاطه فهد ولد فاطمه على ريولها...

راشد: السلام عليكم...

ردوا كلهم علي السلام..

سلمت على عمة مهرة امنه وسالتها عن حالها وطنشت مهرة ولاحتى صديت صوبها...

سرت صوب فاطمه وقعدت اسولف وياها شوي...اللي صاصرتني اول ماوصلت صوبها..

فاطمه: مافيك معنى..شحقه ماتسلم على بنت خالتك.؟

راشد: لاني مابا...

فاطمه: شو مسوتبك..؟..

راشد:هالبنت كله تتحسبني باكلها احسن لي ما احتك فيها نهائيا..

بطلت فاطمه عينها مستغربه من كلامي...

فاطمه: شو هالرمسات هاي راشد انته اكبر من جذي..

راشد: ولاني اكبر من جذي مابحط عقلي بعقل ياهل..مافي داعي اسلم عليها...المهم انتي شحالج اليوم.؟

فاطمه: الحمد لله بخير..

راشد: بتطلعين باجر؟

فاطمه: ان شاء الله باجر الصبح بنطلع...

راشد: ماقررتوا تسموونه الولد.؟

ابتسمت فاطمه بحنان ...

فاطمه: بتشاور بعدني ويا عبدالله...عمر محتشر يبانا نسميه عليه...

راشد: ان سميتيه عليه لاانا اخوج ولاتعرفيني...

فاطمه: هههههههههههههههههه ليش؟

راشد: بس.. عنبو كله بتسمين عيالج من صوبهم سمي حد علينا نحن بعد...

فاطمه: ههههههههه بنتفاهم بعدين...

راشد: خلاص انا بخليكم احين بسير...تامرينا بشي؟

فاطمه: سلامت راسك..الله يحفظك...

راشد: الله يسلمج..فمان الله..

صديت عنها وياي بطلع من الغرفه لكن سمعت حد يزاعج باسمي...التفت حصلته فهوود رافع ايده صوبي ويناقز في ثبان مهرة...

فهد: خالي راشد ...خالي راشد...

وقفت عند الباب اطالعه..

راشد: شو تبا..؟

فهد: بسير وياك ..

راشد: مافيني عليك...

فهد: والله والله والله...

راشد: شوف الهرم بعد يعرف يحلف...!!!!..

شيخه: ههههههههههاي تعال شله انزين...

راشد: وهو مايروم يمشي..؟؟

شيخه: مسكييين منفدعه ريله اليوم الصبح مايروم ياجب عليها....

حست بوزي انا.. وتقربت من فهد او بالاحرى من مهرة... ومديت ايدي وخذته...وهو مستااااااااااانس..يوم رفعت عيني طاحت بعين مهرة...

وانصدمت صدمة حياتي يوم ابتسمت لي...

تميت اطالعها مستغرب ...مادري ابتسمت لي انا والا كانت تبتسم لفهوود اللي راسه عدال راسي ..!!!..

تميت واقف جي اطالع ومستغرب حتى مارديت لها الابتسامه...

شييخه: بلاك راشد واقف جي...

راشد: ابا اتاكد من اللي شفته حلم والا علم..؟!!..

كنت ارمس وعيني على مهرة وهي منزله عيونها تحت...

شيخه: وشو شفت...

راشد: طويلة العمر الشيخه مهرة بنت خلفان تدري...!..

ابتسمت مهرة وعينها مازالت عالارض...

شو اقولكم....

بغيت اعطيها طرااااق لانها بابتسامه وحده قدرت تذوب كل الثلج اللي كان فصدري بسبب عمايلها...!!!...

ابتسمت انا بعد وصديت عنها عن اضعف واكنسل الطلعه وادقها سوالف وياهم... التفت لفاطمه وقلت..

راشد: بشل فهد ويايه وبرده عقب...

فاطمه: انتبه عليه..

راشد: ولا يهمج... فمان الله...

طلعت من الغرفة ...لكن كان من المستحيل عقلي يطلع منها...!!...

-------------------------------

اليوم: السبت...

المكان: غرفة يوسف..

الوقت: السادسه مساءا..

---------------------------------

(يوسف)...



كنت فاتح الماسنجر وحاط الورقه اللي فيها ايميل كنه جدامي...

وافكر...

اظيف والا ما اظيف..!!...

خاطري اكلمها من دون ماتدري انه انا.... بس اخافها ماتكلم حد ماتعرفه..وهذا شي زين بس خاطري يكون استثناء في حالتي هاي بس..!!!...

شو اسوي شو الحل..؟؟

رن التيلفون..وطلع لي رقم غريب...

يوسف: آآلوووه..؟!..

منى: مرحبااا يووووسف...

عقدت حياتي..واطالعت الساعه في ايدي...

يوسف: وين انتي..؟؟

منى: في الجامعه..

يوسف: منى..لين الحين.؟؟...الساعه ست..!!.

منى: ادري..

يوسف: وانتي من ثمان سايره الجامعه حشى شو تسوين هالكثر..؟؟؟

منى: دوامي يخلص اربع وقعدت اتريا كنووه دوامها يخلص خمس..ويلسنا ساعه واحين نبا ني...!!!

يوسف: تبون توون..؟؟؟ انتي وكنوه؟رباعه والا كل وحده اروحها..؟؟

منى: رباعه...

يوسف: وانا دريولكم..؟؟.

منى: ههههههههاي محشوم بس ماحصلنا حد اييبنا...امايه شاله الدريول .. ويدوووه نفس الشي.. ومايد ساير دبي... واحين دقينالك نشوف بتيبنا والا لا..



سكت.. كنت مبدل ثيابي ومتعايز اطلع من البيت...

يوسف: خلاص اوكي...بييكن احين..

منى: مشكوور فديت روحك...يالله باي..

يوسف: باي..



سكرت الكمبيوتر وبدلت ثيابي ....وتعطرت...وتكشخت..وانا مادري عشان شو كل هذا..لكني مابغيت اوقف وافكر... شليت نظاراتي الشمسيه وبقية اغراضي وطلعت..



يوم وصلت الجامعه ووقفت في المواقف...ماطولت وانا واقف اتريا الا ومنى وكنه طالعات متغشيات... توترت واعتدلت في قعدتي.. والتفت للسيت الوراني اشوفه مرتب او لا..؟؟

ماكان مرتب...بس ماكان عندي وقت ارتبه بعد...

ركبت منى عدالي وكنه وراها...وسلمن ورديت عليهن السلام..

تحركت بالسياره وطلعت من الجامعه وفجاه انتبهت لنفسي باني ماسلمت على كنه ولا هي سلمت...

صديت صوبها شوي ورجعت اطالع الشارع وانا ابتسم..

يوسف: شووو بنت العم منتطبه علينا..؟!!...

كنه: هي..

يوسف: صبري بدورلج درام بوقف عداله..

منى: هههههههههههههههههههههههه...

كنه: بعد تصب الزيت عالنار..ماعليه جان ما سحبت صوره لك من الكاميرا ونشرتها في الانترنيت..

يوسف: هههههههههههههههههه... شحقه زعلانه انزين.؟

كنه: ليش تفشلني وتنازعني...!!..

يوسف: وانتي شحقه تصوريني...

كنه: كيفي..

يوسف: وانا بعد كيفي...

كنه: اوكي بمسح الشريط..

يوسف: هههههههه كيفج بس انا ماروم امسح هزبتي لج...

منى: اييييه شو بلاك على بنت عمي...؟!

يوسف: مب بنت عمي انا بعد..!!.. لا ادشين في النص..

كنه: لا والله كيفها ادش في النص..!!

يوسف: عيل انتي جبانه...

شهقت كنه وحسيت انها شوي وبتنقز علي بتكفخني...

منى: حووووووووه تايم اوت..شو هذا يوسف بلاك..؟

يوسف: مافيني شي اسولف عادي..

منى: حشى اول مره اشوفك تسولف جي...اقول..ابا حلاوة اخطف عالدكااااااااااااااان..

يوسف: لاااااااااااء... ماشي حلاوه....

كنه: لا تتبيخل على اختك...!!

يوسف: جب انتي لا ادورين في النص بين خوان...

منى: برااايها ادور في النص..

يوسف: ييييييييييييييه متعاونات علي اليوم....بوقف هني وبنزلكن ترا..والا جب..

سكتن منى وكنه كانهن صدقن تهديدي..بس من قال كنه تسكت..؟؟؟

كنه: بتخبرك هذي شووو بالضبط سيااره والا مكتب والا كبت للثياب..!!!..والا شو بالضبط..؟!

يوسف: حمدي ربج اني بوصلج...لا تطنزين...

كنه: والله صدق ماتروم توقفها وتقول للخدامه تنظفها...؟

يوسف: ماحب حد يحط ايده على سيارتي...

كنه: عيل نظفها ارووحك ليش جي...

يوسف: كنووه لمي ثمج...

كنه: ههههههههههههههاي ماروم... اعع موصخ سيارتك لو دريت انها جي ماركبتها...

يوسف: مسودة الويه..قسم بالله انا اعرف دواج وين بتشوفين..

كنه: هههههههههه بشوووف...كوني شاهده منى اخوج يهددني...

منى: وانا اشهد...

يوسف: سمندييييغا انتي... هي تاذن وانتي تصلين سيده...

تمن منى وكنه يتظاحكن....وطول الدرب ونحن على هالحال...

بصراحه السوالف وياها ولو انها احيانا تقهرني كانت لها طعم ثاني...وطول ما انا في السياره لين ماوصلناها وردينا بيتنا وهي بعدها فبالي ولا فكرت فشي ثاني غيرها...

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: السبت..
المكان: سيارة ناصر..
الوقت: الحادية عشره والنصف مساءا..
----------------------
(ناصر)...

طالعت ساعتي في ايدي... وهزيت راسي.. بوصل متاخر للعين...
لكن المهم اني اكون الصبح هناك... حطيت شنطتي في السياره وتحركت... محد يدري في البيت اني بيي... جذي احسن..بسلم من التحقيق...لكن لابد من راحة بالي لاني ماقدر اعيش جذي..ماقدر..
بتخبل ان تميت افكر فيها بهالطريقه...لازم اسوي شي ...
ولهالسبب خذت اجازه ليوم واحد...مادري عاد شو بسوي يوم بوصل هناك...!!..لكن بفكر بشي...
لازم اشوفها...
مثل مايقولون.... المجرم دايما يدفعه دافع غريب بانه يرجع لموقع الجريمه...!!...
انا بروح..وبشوف شو يطلع معاي...!!..
ابتسمت يوم تذكرت كلمه حميد امس... "احبها؟!"... كيف اقدر احبها بالله..؟ مادري كيف طلع بهالاستنتاج..!!
انا اسمها ماعرفه... ماعرف كم عمرها... ماعرف اذا مخطوبه والا لا...
ياربي ليش مجتمعنا صعب جذي..!!..
عند الاجانب عادي الواحد يوم يبا يرمس وحده يسير لها ويكلمها بدون مقدمات...
نحن عندنا يحطون مية الف حاجز وحاجز بينك وبين البنت اللي تبغي ترمسها..!!...
سكت...انا شو قاعد اقول .؟؟..
هذي حشمه للبنت مب تعصب...!!.. قمت اخوور كله بسبب اني ابا اشوفها..!!..
حالتي صعبه..
لازم مافكر بالموضوع هذا لين مااوصل العين بالسلامه...
مديت ايدي وحطيت شريط ديني عطاني اياه عبدالعزيز من فتره...وزدت من سرعتي عشان اوصل العين باسرع وقت...خط بوظبي ممل...

يوم وصلت..وقفت سيارتي وخذت شنطتي ونزلت بهدوء... كان البيت هادي ومظلم..الساعه وحده وربع تقريبا...
ييت بفتح باب البيت وانصدمت ..حصلته مقفول... تذكرت اذا انا عندي مفتاح للبيت او لا....وفعلا دورته في سلسلة مفاتيحي ...ولا حصلته...
ياهي بلشه..!!
مسكت تيلفوني واتصلت بيوسف... ان شاء الله بس مايكون راقد...!!
يوسف: آآلوووه...
ناصر: هلا يوووسف...
يوسف:........ناصر.؟؟...باجر باجر اتصل صدق متفيج..
ناصر: هههههه اصبر ويا هالويه.... انزل بطل لي الباب انا تحت..
يوسف:...شوو؟
ناصر: مثل ماسمعت يالله بسرعه...باي
وسكرت فويهه...والا ناوي يقعدني برا جني شحات وايد..؟!!..
وبعد دقيقه انفتح الباب...ويوسف بوزار وفانيله ومرصص عيونه...شكله كان راقد...
يوسف: خيير.؟ شو صاير شفيك ..؟؟
دخلت البيت وسكرت الباب وراي وخليت يوسف يقفله..
ناصر: مافيني شي...مشكور روح كمل رقادك..
يوسف: روعتني ايييه ..بلاك.؟؟؟
ناصر: عندي شغل باجر الصبح في العين عشان جي ترخصت ويييت...مافيها شي..
ركبت الدري ويوسف يركب معاي..
يوسف: شو شغله..؟
ناصر: قايلك انا تحقيق الحريم هذا ودره...
ابتسم يوسف وفرك عيونه..وعقب قال..
يوسف: تصبح على خير..بكمل رقادي..
ابتسمت انا بعد وانا اراقبه يمشي لحجرته..
ناصر: وانته من اهله...
دخلت حجرتي وسكرت الباب وراي...فريت شنطتي عالارض وبدلت ثيابي ...
ضبطت منبه الموبايل على صلاة الفجر... ورقدت...من بعد ظرابه مع افكاري وهواجسي..!

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاحد
المكان: غرفة مهرة..
الوقت: السابعه صباحا..
------------------------
(مهرة)...

واخييرا حصلتك..!!!...
مسكت النقاب ورفعته جدام ويهي عشان اتاكد من انه خالي من العيوب وينلبس...!!..
قررت البس نقابي يوم اكتشفت امس وبخيبة امل فظيعه ان كل اساتذتي رياييل... وكلهم شباب تقريبا..تحت الاربعين..ماعدا استاذ الانجليزي الايرلندي...كان شويبه مسكين...
اما استاذ الكمبيوتر فصراحه شي فظيع... من اولها قام يتلصق في البنات...او انا اللي كنت احس جي.؟؟..
لانه محد اعترض غيري ...!!.
وبصراحه بصراحه يعني...كان راعي حركات...
فقررت اني اتنقب واغطي ويهي اللي يحترق من حد يطالع فيني من هالاساتذه...والله يعيني لين باقي الكورس..
وغير الاساتذه.. بنات كلاس الانجليزي كانن تحف...كل وحده شكل...ومزعجاااااااااااااات.... وانا وحيده وبروحي..وماحصلت بنت سنعه اقعد عدالها كلهن مايشجعن...!!..
الظاهر ان الحياة الجامعية ماتناسبني...لكني بصبر لين اتعود والله يعيني...
حطيت نقابي في الشنطه وشليت دفتري الاصفر المتوسط الحجم ..اللي كنت اشخبط فييه من دخلت الجامعه... وشنطتي..وطلعت من الغرفه ونزلت تحت...
سهيل وسيف كانوا على وشك انهم يطلعوون ..اطالعني سهيل بنظره بارده..
سهيل: نوصلج.؟
مهرة: توها سبع..وبعدني ماتريقت...
سهيل: برايج عيل...
طلعوا سهيل وسيف من البيت وانا دخلت غرفة الطعام عند ابويه وعمتي وحمد اخوي...
مهرة: السلام عليكم..
ردوا علي السلام بينما انا وايهت ابويه وحبيته على راسه.. استانست يوم شفته يعدل المخده اللي عداله دليل انه يباني اقعد عداله...وماجذبت خبر..يلست ...
حمد: اصبلج جاهي.؟؟..
بطلت عيوني مستغربه..شو السالفه...؟؟؟.. سهيل يعرض علي يوصلني...وابويه يسويلي مكان عداله..وحمد يصب لي جاهي..!!..ناقص بس عمتي توصلني اليوم وبيستوي يوم حظي...
مهرة: هي نص الكوب لو ماعليك امر...
صب لي حمد جاهي وعطاني اياه ونش...
حمد: يالله بتوكل انا بعد...تامرونا بشي..
الكل: سلامتك..
حمد: الله يسلمكم..فمان الله...
طلع حمد من غرفة الطعام..وانا يلست اتريق...وابويه يقرا الجريده..
مهرة: ابوويه..ابا فلوس خلصن فلوسي...
حط ابويه الجريدة عالارض وخش ايده فمخباه يطلع بوكه..وعطاني فلوس...وعقبها قلت اكمل دلع..شو وراي...
مهرة: منو بيوصلني الجامعه...عمووه..؟!!..
اطالعتني عمتي وسكتت...وردت تتريق..
مهرة: بتوصليني.؟؟..
آمنه: منو غيري يعني بيوصلج...
سكت وانا احس اني ثقيله عليها كالعاده...الله يعينها عمتي علي...احس انها تترياني بس اعرس....وانا من عقب اللي صارلي كيف بقدر اعرس.؟؟ مابقدر ..ولا اريد ولا افكر فيه اصلا..
الساعه سبع ونص..طلعنا انا وعمتي وركبنا السياره...ساعتها طلعت نقابي ولبسته وعمتي اطالعني بفضول..
آمنه: من متى اتنقبين مهروووه..؟
مهرة: من اليووم....كل اللي يدرسوني رياييل ماداني اجابل بويهي..
سكتت عني عمتي...وحسيت انها استحسنت تصرفي هذا... بينما عمتي تحرك السياره طلعت الغشوه وحطيتها على راسي فوق النقاب عشان اطلع بشكل مرتب..
----------------------------
اليوم: الاحد..
المكان: سيارة ناصر..
الوقت: السابعه والنصف صباحا..
-----------------------------
(ناصر)...

حركت سيارتي وتبعت سيارة الاودي وقلبي تقريبا اشوف دقاته القوية من ورا الكندوره...
اساسا انا مارمت ارقد عدل...ومن بعد صلاة الفجر برزت لمخي فكره مادري من وين يتني....لكني مارمت ارد ارقد بسبب حماسي...
ومن يت الساعه ست ونص..وانا واقف في هالمكان اترياها تطلع من البيت....!!
اكيد لازم تروح مكان.... مدرسه..كلية...أي مكان...وماخاب ظني... عرفت انها هي المنقبه اللي طالعه من البيت من هيئة جسمها وطولها...مستحيل اخربط فيها... وتذكرت بخجل اني تاملتها كفاية يوم شفتها اول مره..!!!
واحين بشوف وين بتسير....وقلبي مب قادر اهدي دقاته باي طريقه...حتى انفاسي تسارعت وانا مادري هل اللي اسويه صح او غلط...!!!..
تميت اتبع السياره لين ماصار الطريج اللي يروحون له مالوف....!!..وماصدقت...
الجامعه..؟!!!!!!....
ياربي كيف كنت احسبها في ثالث اعدادي او اول ثانوي او ثاني....لكن جامعه..!!.. مايندرى أي سنه جامعية بعد..!!..
دخلت سيارة الاودي اللي كانت تسوقها حرمه للجامعه من الباب الامامي..وحمدت ربي انه مب من الباب الخلفي لاني مابقدر ادخل من البوابه الخلفية لانه ماعندي تصريح...!!
استغربت من الحرمه..!!
البنت قالت امها متوفيه ....عيل منو هذي.؟؟؟...
وقفت الاودي جدام البوابه ووقفت انا عدال الرصيف ونزلت الدريشه عشان اشوف عدل...
شفت البنت تنزل من السياره وادور حواليها وتوقف صوب الحرمه اللي تسوق تكلمها شوي..وهي تهز راسها كل شوي بالايجاب...
ريجي نشف...ماصدق اني قاعد اشوفها...ماصدق...
تميت اراقب بعين مثل الصقر...تحركت سياره الاودي وراحت.. والبنت لفت ومشت شوي صوب البوابه...لكنها شوي ووقفت...

وببطء شديد..رجعت تلف وتطالع صوبي..!!..

وقف قلبي...ماقدرت اتنفس...ولا حسيت باي حركه فجسمي... كاني جثة هامدة...
عرفتني..
البنت عرفتني...مانست شكلي...!!!!.
شفت الدفتر الاصفر الصغير يطيح من ايد البنت عالارض...وماتحركت عشان تشله...وقفت اطالعني كانها تشوف الشيطان جدامها...!!..
مادريت بعمري الا وانا طالع من السياره وواقف في الشارع وبيني وبينها حوالي عشر خطوات...
تراجعت البنت بخوف ولفت بسرعه واندفعت داخل الجامعه...وتسكر الباب بيني وبينها...
ماعرفت كيف افسر شعوري ساعتها...
رفعت ايدي وفركت ويهي وعيوني..عشان اصحصح شوي... رجعت افتح عيوني عشان اتاكد من اللي شفته...
البنت مب موجوده...محد....معقووله كان يتراوالي..؟؟؟...
لفت نظري الدفتر الاصفر اللي مازال عالارض...!!..لا....مايتراوالي...كانت هني...وشافتني...وخافت مني وشردت..
تقدمت بخطوات بطيئه للدفتر وخذته من الارض...التفت وحصلت الحارس يطالعني بعين تساؤل...
بيسويلي مشكله هذا اذا تميت واقف هني...
تراجعت لسيارتي وخذت الدفتر معاي...
ركبت السياره وطرت بها بعيد عن الجامعه....
وانا لين الحين مب مصدق اللي صار معاي...ولا اظن اني بصدق فيوم....
لكن هالدفتر بيتم عندي يثبت لي صحّة هالموقف....بانه فعلا صار ..

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

--------------------------------
اليوم: الاحد..
المكان: بيت سلطان..
الوقت: الثامنه الا عشر دقائق..
--------------------------------
(يوسف)...

شليت شنطة اللاب توب وطلعت من حجرتي بسرعه... بتاخر عالمحاظره... وخالد بيلعن خيري..مع انه موصني ايي قبل الكلاس بربع ساعه..!!..
وانا نازل الدري حصلت ناصر يركبه بسرعه..وفي ايده شي اصفر..
يوسف: صباح الخير..
رفع ناصر راسه بسرعه كانه مب حاس فيني من قبل...
ناصر: صباح النور..
يوسف: وين كنت من الصبح..وشو هذا فايديك..؟؟

وكان دفتر.. رفعه ناصر وظربني على جتفي بالدفتر..
ناصر: ودّر هالمحاسب ودره... شكلي بعرس بس عشان افتك من حسابك لي...
ظحكت على ملامحه ونزلت بسرعه لانه ماعندي وقت..بينما ناصر كمل طريجه لحجرته وسكر الباب وراه..
والله انه غريب هالانسان...اموره متخربطه من فتره...امس ياي نص الليل...واليوم طالع من الفجر والحين راد..!!
طنشته وركبت سيارتي وتحركت بسرعه صوب الجامعه...
يوم دخلت محاضرتي كنت متاخر خمس دقايق..لكن الدكتور اللي اول مره اشوفه فحياتي بدا المحاضره..ولا افتكر بانه اول يوم دوام بالنسبه لمحاضرات الاحد..!!!..
سلمت ودخلت وحطيت لابتوبي عالطاوله بينما خالد يالس عدالي...كنت مب شايفنه من يومين ..قمت ووايهته..
جان احصل لي هزبه من الدكتور من اولها...
سكتنا...وبعد شوي سالني خالد بصوت واطي..
خالد: شحقه متاخر.؟
يوسف: راقد متاخر..وناش متاخر.. وجب عن يهزبني هذا ماريد اخلي انطباع مب زين من اولها..
ظحك خالد بصوت واطي..
خالد: والله وكورس التخرج يعلم الادب في المحاضرات...!!..
يوسف: هي عيل شو..
سكتنا لين بقية المحاضرة...ويوم خلص الدكتور وطلع وطلعوا الطلاب..
تمينا انا وخالد يالسين نلعب بالكمبيوترات...
فجاه قالي خالد..
خالد: اقول يوسف.. واحد من مصر طرشلي مواقع يهود يبانا نسكرهن...اطرشهن لك؟
يوسف: وانته مارمتلهن.؟
خالد: ماتفيجت اصلا...بطرشهن لك عالايميل وشوفهن..تدري انه في شلة هاكرز ثانيه طلعت في الجامعه غيرنا.؟؟..ويعرفون كل مواقعنا اللي ندخلها...وامس بالذات سكروا موقع سعيد وحطوا عليه تواقيعهم...
يوسف: موقع سعيد مب زود حماية عليه...وبعدين منو هذيلا مبتدئين؟
خالد: ماعرفهم...بس شكلهم جي يبون يتحدووونا...
حست بوزي..
يوسف: بس نحن مانضر حد بالعكس هاكرز مفيدين...
خالد: هذيلا عكسنا..يبون يسون لعمارهم شهره...ويخوفون العالم...
يوسف: اوهووووووووو نحن على كورس تخرج وهذيلا طالعين لنا الحين..!! منو بيتفيج لهم...!!
هز خالد راسه وسكت...
من شكلنا هالقروووب المختصين بالهاك وهندسة الكمبيوترات والبرامج والانظمه ونحن محد يجرأ يتصدى لنا..
حتى الجامعه نفسها وبمواقعها تستفيد منا احيانا... ونحن قصدنا من هذا كله شريف... يعني هاك حسن مب هاك سيئ...
وسمعتنا طيبة في الجامعه ووايدين يلجؤون لنا عشان نساعدهم....!!..والحين طلعت هالمشكله على كورس التخرج... شكلهم هالمجموعه يبون ياخذون مكانا لكن طريجهم غلط... هذيلا يخربون مايصلحون...!!
طنشت الموضوع وفتحت ايميلي اشيكه...
حصلت رساله ثانيه من وضحه...بطلت عيوني على وسعهن...شو السالفه..؟؟!!.. سكرت الايميل بسرعه لاني ماقدرت اشيكه بوجود خالد عدالي...
وسكرت الكمبيوتر بعدها وحطيته في الشنطه...
يوسف: يالله خالد نسير المحاضرة الثانيه..
اطالع خالد ساعته مستغرب..
خالد: بعده ربع ساعه....
يوسف: بنقعد في الكلااااس... يالله خلص...
خالد: اوكي لحظة شوي...
خلص خالد شغله عالكومبيوتر وسكره ...
عقبها طلعنا من الكلاس وتوجهنا لكلاسنا الثاني...
---------------------------------------
اليوم: الاحد..
المكان: في قاعه من قاعات الجامعه..
الوقت: التاسعه والنصف صباحا..
--------------------------------------
(مهرة)...

مشيت دموعي للمره الالف بالكلينكس...لكني هالمره باصرار باني مابصيح خلاص...
لكن كل ما اتذكر الخوف اللي صابني يوم شفته دموعي تنزل...ماصدق انه تبعني لين الجامعه..!!.
هذا شو يبا مني...ليش يلاحقني...ليش مايخليني انسى..!!!...
حاولت اوقف من الكرسي...ريولي ماتشلني من كثر الارتجاف... زين بس ما اغمى علي في الشارع...
الله يستر شو كان بيصير..!!..
قويت نفسي وقمت..لبست نقابي وعدلت الغشوه فوقها...وبخطوات بطيئه فتحت باب القاعه اللي كانت فاظيه يوم دخلت لها الصبح وطنشت محاضرة الرياضيات.
لاني بكل تاكيد ماكنت بقدر اني احضرها...
بعد ماطلعت من القاعه وقفت عند الثلاجه وخذت لي غرشه ماي...راسي داير..واشك اني بطيح اليوم...المساله مساله وقت..!!!...
رحت للمكتبه واشتريت لي دفتر ثاني بدل الدفتر اللي طاح عني في الشارع...
طلعت من المكتبه وانا معقده حياتي...مايندرا الريال شل الدفتر او لا...ماذكر شو كاتبه في الدفتر...مشخبطه فيه وااايد...الله يستر بس...
تذكرت بانه عندي محاضره عربي بعد شوي... غمضت عيني وماكان لي خاطر احضر...كيف بجابل عليا وحمده..!! كيف بسولف وياهن طبيعي..!!..اكيد بيحسن علي..
توجهت بدون حاسية للكابينات...
طلعت بطاقتي ..واتصلت بشيخه...

ارتحت يوم ردت علي الخدامه...
الخدامه: هالوو..؟!
مهرة: الوو...وين شيخه.؟
الخدامه: ويت اسكند..
سكت وانا اتريا شيخه تي عالخط...وبعد دقايق...
شيخه: آلووووه..؟
مهرة: شيخه..انا مهرة..
من ارتباكي نسيت حتى اني اسلم بادب عالبنت..!!..شيخه كانت ملجأي الوحيد الي افكر الجأ له الحين..
لانها الوحيده الي تعرف بسالفه الحادث اللي صارلي...
شيخه: مهرة.!!..هلا والله..من وين تتصلين من الجامعه.؟
مهرة: هي..
شيخه: شو بلاج مهرة صوتج مب طبيعي...
مهرة: شيخه...ياويلي ياشيخه ياويلي...
شيخه:...........ليش مهرة شفيج.؟ شوصار..؟
مهرة: شيخه...ذاك الريال لحقني لين الجامعه...شفته اليوم لحقني...
شيخه: شوووووووووه..؟؟؟ منوو.؟..ماغيره اللي في العين مول.؟
مهرة: هي شيخه هوووو انا متاكده..
شيخه: خيبه تخيبه شووو صاااار ؟ شو سوا.؟
مهرة: مادري..ماسوا شي..لحقني لين الجامعه شفته جدام الباب...وكان نازل وبايي صوبي بس انتبهت وشردت عنه...
شيخه: خيبه..!! هذا شوو ؟ حيواااااااان.؟؟.. جدام الناس جي فووظى السالفه عنده..؟؟
مهرة: شيخه شو اسوي والله اني ماروم احضر محاظراتي ولا اروم اطلع من الجامعه بعد اتروع اخافه بعده براااا...
شيخة: .........مهرة.. استهدي بالله...روحي الحمام وغسلي ويهج وتنشطي..وحظري محاضراتج وانسي هالسالفه هذي..ادري صعب بس ان شاء الله بنتكلم يوم بترجعين من الجامعه...
مهرة: في التيلفون في البيت ماقدر اتكلم..الا جان اشوفج ...
شيخه: بشوووف بخلي راشد اييبني ان شاء الله بس انتي يوم تردين البيت اتصلي بي... وخلي حد من خوانج اييبج من الجامعه اذا شاف ريال مستحيل يتقرب صوبج...
سكت..ماكان ودي اسكر عنها... بس معاها حق...الكلام بالتيلفون ماينفع...
مهرة: ...اوكي شيخه...بتصلبج يوم برد...بس والله اني زايغه..
شيخه: لا تخافين انتي في الجامعه احين ومستحيل يوصلج ...هدي بالج ..
مهرة: ان شاء الله..بحاول...خلاص شيخه بخليج عيل..
شيخه: اوكي غناتي...الله يحفظج..

سكرت عن شيخه وانا احس بشوية راحه... ورجعت ادعي على هالريال بانه مايتوفق ابد ابد.... مب ساد اللي سواه فيني وخلاني اتعقد ياي يكمل علي بعده..!!!...حسبي الله ونعم الوكيل..

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاحد
المكان: غرفة ناصر..
الوقت: التاسعه والنصف صباحا..
-------------------------------
(ناصر)....

طلعت من الحمام وانا انشف شعري عالسريع وعيني على الشبرية وين ماكان محطوط الدفتر الصغير الاصفر...!
من يبته وانا اتجاهل وجوده...خايف من اللي بقراه من معلومات داخل الدفتر...مع انه في احتمال يكون الدفتر فاظي تماما ويكون خوفي عالفاظي..!!
تنهدت بتعب وقررت اني انهي هالمساله...
قفلت باب الحجره وانسدحت عالشبرية عدال الدفتر ومسكته ... وجلبته بين ايدي...وفتحته...
اول شي شفته في اول صفحه هو " بسم الله الرحمن الرحيم"...
غمضت عيني وانااحس بشعور غريب...باني ماسك شي شخصي للبنت اللي بغيت اهدم حياتها بسبب استهتاري..!!!..
شعوري غريب ولا ينوصف...!!..بس حسيت بالحزن الفظيع...
رجعت افتح عيني وانا اكمل قرايه...
مهرة خلفان الـ .....
الرقم الجامعي: *********
ومن بعده مكتوب جدول المواد والاوقات..والاماكن ان ما اسئت الفهم...
كل هذا ماهمني...
مهرة..!!..هذا اسمها..!..مهرة...
يااا الله... صارت شخص صدقي الحين وله اسم...
مهرة...
قعدت اردد اسمها في الدقائق اللي تـــلـــت... مادري ليش...بس كل ماانطقه ياثر تاثير عجيب على نفسي...!!..
تمالكت نفسي ودققت بالمواد الموجوده...
ان ما خانتني الذاكره...هذي مساقات المستجدين..اللي توهم داخلين الجامعه...
معناته البنت اول سنه لها في الجامعه....
تقديريا عمرها...همممممم....19 سنه...
ست سنوات بيني وبينها.... يالله يالووومي فيج يا..يامهرة...
جلبت الصفحات ..فيه منها رسومات لورود وعصافير.. وفيه رسومات مثل الرسوم المتحركه...
البنت بريئة... جلبت الدفتر وتصفحت اخر صفحاته... كانت اغلبها شعر...مب قصايد كامله...لكن مقتطفات...
وفي صفحات كانت كاتبه شويه معلومات وارقام شكله من واحد من المحاضرات..
خلال لحظات صار هالدفتر اغلى ممتلكاتي...بحافظ عليه باحسن صووره...
سكرت وقربته من ويهي اشمه... كانت فيه ريحه عطر خفيييييييييف...
اكيد عطرها..
رجعته عالشبرية وانسدحت عداله افكر...لين ماغلبني الرقاد ورقدت....!
----------------------------
اليوم: الاحد...
المكان: ميلس بيت خلفان..
الوقت: السابعه والنصف مساءا..
------------------------------
(سهيل)....

وقفت وانا اسمع صوت سيارة...اكيد هذا راشد ..قايل لي انه بايي...
طلعت من الميلس ووقفت في الحوش مصدوم....
شويخ..!!!..شو يايبنها؟... ياني راشد وتوايهت وياه..اما شيخه التفتت لي من بعيد...مااجرأت اني اطالع فويهها وايد ولا اني اسلم عليها بعد ماتذكرت رفضها لي..!!!...
صعبة على اي ريال...
لكن صوتها وصلني من بعيد...
شيخه: شحالك سهيل..!!..
تحنحنت عشان اصفي صوتي اللي حسيت به اختفى فجاه...
سهيل: بخير الحمد لله...شحالج انتي شيخه.؟
شيخه: الحمد لله...
طلعت في هاللحظة مهرة من البيت وهي ترحب بشيخه..وسلمت عليها ..بينما نحن انا وراشد وقفنا لاني كنت متاكد بان مهرة بتسلم على راشد..يعني هذا من الادب وشي طبيعي انها تسلم عليه صح؟..
لكن تخيلوا ...مهرة سحبت شيخه داخل البيت وسوتلنا ان وراشد اكبر طااااااااااااف...

حسيت بالدخان يطلع من خلايا جسم راشد من الغيظ...التفت لي وقال..
راشد: شوف اختك.؟..اقص ايدي من هني اذا كانت صاحية...!!
دخل الميلس وهو متنرفز ويلس عالكرسي...دخلت انا وراه وانا اضحك...
سهيل: يااااهل طبها عنك...
راشد: لا مب ياهل حشى...صدق صدق سهيل انتوا قايلين لها شي عني.؟؟
عقدت انا حياتي..
سهيل: شو بنقولها يعني..؟ وليش..؟
حرك راشد ايده بعصبية...
راشد: مااطيقني ماطيق لاتشوفني ولا تكلمني ولا حتى تسلم.. الود ودها ماعندها ولد خاله..
سهيل: لا حرام عليك ...تستحي يمكن منك...مب متعوده هي عليك او انها تخالط رياييل حتى لو كانوا يقربون لها... اليوم تخبرني عموووه انها تنقبت في الجامعه بس عشان اساتذتها كلهم رياييل..!!..
راشد: عووذ بالله جي مابناكلها...
سهيل: تستحي اقولك..مهرة مب اجتماعية زود يمكن تنقصها اللباقه في التصرفات ..عشان جي تبين لك انها دفشه شوي..
سكت راشد شوي وهو يصرف النظر عن هالموضوع...وبعدها قالي ..
راشد: ذاك اليوم يوم سرت دبي عشان عبدالله ..قالي عمر انه شاف سيف فواحد من الفنادق....ووياه شله...
عقدت انا حياتي من هالخبر...واستنكرته في نفس الوقت...
سهيل: وعمر شو كان يسوي في الفندق...؟!!..
راشد: يقول كان عنده اجتماع عمل هناك...
سهيل: والمعنى؟
راشد: المعنى انك انتبه لهالولد شوي...اشوفه شعره بينه وبين الضياع...
تنهدت انا بظيج...كله انا كله انا....من وين تينا هالمصايب..!!
سهيل: من وين بييبها انا والا من وين...!!.. اروحي اللي فيني كافيني...
راشد: ليش شوفيك زود بعد..؟؟
تذكرت شيخه مره ثانيه اللي يالسه داخل البيت.....ببرود...وبراحه بال...اكيد مب مفتكره باللي سوته فيني...والاثر اللي خلاه رفضها لي في نفسي...
سهيل: هممممم مافيني شي...المهم يالله قم جان تبانا نلحق عالشباب..
راشد: يالله..
قمنا انا وراشد ركبنا سيارته وطلعنا من البيت...
----------------------------
اليوم: الاحد..
المكان: غرفة مهرة..
الوقت: الثامنه مساءا..
----------------------------
(شيخه)....

راقبت باسف وغيظ ملامح مهرة وهي تشرح لي الموقف اللي مرت فيه اليوم كامل...
حياتها غريبه بنت خالتي هذي....
شيخه: حسبي الله عليه شو يبابج شحقه يلحقج...ماكفاااه اللي سواه...مايخاف هذا..؟!..
هزت مهرة راسها بحسره...
مهرة: انا مابسير الجامعه باجر...
شيخه: لا اتخبلين...
مهرة: والله مابسير...اتروع..والله اتروع...
شيخه: لا تخلينه ياثر على حياتج يامهرة...تلقينه هو عايش حياته ولا مفتكر ولا متاثر مثلج... وانتي مستعده تخربين كل شي على عمرج بسبب هالشي...
مهرة: شو اتحسبينه سهل عليه اللي صار...
شيخه: ياعمري ادري انه مب سهل....بالعكس انتي قوية لانج متحمله تشلين كل هالشي بروحج..لو انا مكانج بنهار وكل العايله بتدريبي ...بس بعدني اباج تكونين اقوى من جذي وتطردينه من بالج..ركزي في دراستج واستمتعي بحياتج وحمدي ربج بانه ماصار ظرر صدقي فيج...
مهرة: انتي شو تقولين..؟!!... كد حد لمسج او تقريبا حظنج غصبن عنج من دون اخوج او ابوج؟.. كد حد قالج حبيبتي وكشف عن ويهج وشعرج..؟؟؟...وتبيني ما اتاثر.؟!
سكت عنها...معاها حق...
هالحركه مب سهلة على اي بنت يهمها شرفها وسمعتها..لكن مع ذلك ماباها تسمح لهالشي بانه ياثر عليها...
شيخه: اوكي لا اداومين باجر بس اللي بعده لازم اداومين...
صدت مهرة بويهها لجانب ثاني كانها رافضه هالشي...لكنها بالرغم من هذا قالت..
مهرة: يصير خير لين ورا باجر...
حسيتها متظايقه وايد من وضعها ومن اللي صابها...فحبيت اغير الموضوع..
شيخه: تعالي صدق..مبرووووك عالكمبيوووتر...
ابتسمت مهرة..
مهرة: الله يبارك فيج...كل ما اشوفه اتذكر استاذ الكمبيوتر اللي يتلصق في البنات واعافه...
شيخه: مهرة...كم مره بقولج الرياييل مب واحد...لا تتعقدين من الكل بسبب شخص خبيث..
مهرة: ماعفت الرياييل انا...
شيخه: لا والله..؟..عيل شحقه ماسلمتي على راشد..؟
فجاه شهقت مهرة..
مهرة: ...نسيت والله....تراني قمت اشوفه وايد عشان جي احس ماله داعي السلام...وييه يالفشله..
شيخه: ههههههه ماعليه..بس بصراحه استغربت يوم ابتسمتيله امس.. حتى هو استغرب شفتي ويهه كيف صار.؟
احمر ويه مهرة وقالت..
مهرة: اسميج انتي....انا ابتسمت مب له..انا كنت اضحك عليه..شكله يضحك وهو شال فهوود..
شيخه: ههههههههه حراااام عليج وهو يتحسبج تبتسمين له هوو...
مهرة: وشحقه اتبسم له بالله...مني والدرب...!!!
شيخه: الابتسامه صدقه...يوم اقولج انتي متعقده صرتي لا تقوليلي لا...
سكتت مهره وهي مبرطمه شوي واطالع الارض...
شيخه: اييه...شوفيج..!!!..
قالت لي بصوت هادي..
مهرة: شيخه..!!..ظنج ليش لحقني..!!!...
استغربت من سؤالها..
شيخه: هممم مادري...
مهرة: تبين الصدق..(والتفتت لي اطالع فعيوني كانها تذكرت شوي توها بس)... ماكانت على ويهه نفس النظره اللي شفتها من قبل...هذي النظرة مختلفه..
شيخه: كيف يعني.؟
مهرة: هذيج النظرة خبيثه..خوفتني..نظرة لعاااابه واستهتارية...هذي غير..
شيخه: كيف غير اشرحيلي...
قالت مهرة وهي تحرك ايدها تحاول تشرح شي صعب عليها شرحه....!!
مهرة: كانه...كانه جي...يعني مادري كيف....كانه يترجاني بنظرته..!!!..
سكت عنها وعلى ويهي علامه استفهام...احاول اتخيل نظرة الترجي هذي...صعب اركبها عالصوره اللي تخيلتها له وهو يتحرش فمهرة...!!!..
شو القصد من ورا هالنظره ياترى...!!!.

 

[الشوق]

مشاركة: ::][مــــوعــــد مــع الـــســـــعـــادة][ :: قصه في منتهى الروعه

الجزء التاســــــــــــــع عشر



-----------------------------

اليوم: الاحد...

المكان: بيت خلفان..

الوقت: التاسعه والنصف مساءا..

-------------------------------

(مهرة)...



بست شيخه على خدها وكنت شوي وبلوي عليها ماريدها تروح عني...بس الوقت تاخر وزين منها انها يتني اساسا...

مسكت ايدها وابتسمت لها فويهها..

مهرة: خلينا نشوووفج ..ومشكووره وايد انج يييتيني... ماتتصورين شكثر ساعدني هالشي..!

ابتسمت شيخه..

شيخه: افا عليج مهروووه نحن في الخدمه...ههههههه بس ترا وحده بوحده انا هالمره ييتج ثاني مره لازم انتي تييني..

مهرة: من عيوني ان شاء الله مابقصر متى ماقدر..

شيخه: يالله حبيبتي مع السلامه...

مهرة: سلمي على خالتي وفاطمه...الله يحفظج..

طلعت مع شيخه للحوش وشفت سهيل متساند على سيارة راشد وراشد واقف جدامه يسولفون رباعه بصوت واطي..

بدون قصد مني لاحظت تجاهل راشد لي اللي رفض حتى انه يلتفت صوبي..وكان معقد حياته...حسيت باللوم شوي...

لايكون زعلان لاني ماسلمت عليه...؟؟!!!..

مهرة: راشد...!!

التفت لي راشد مستغرب...وسهيل بعد......الشي اللي خلاني اتوتر..اخاف احصل هزبه والا نظرة معصبه من سهيل..بس كلهم كانوا مستغربين زقرتي ويبون يعرفون شو عندي...!!.

مهرة: اسمحلي نسيت اسلم عليك المغرب...مب قصدي شي..بس الايام متشابهه عندي وتحسبت نفسي شفتك اليوم من قبل لاني شفتك امس..

سهيل وشيخه ابتسموا...بس راشد تم يطالعني كانه سرحان ...وتعقيد حواجبه اختفى...

توترت..رفعت ايدي اعدل حجابي.. اللي ماكان يحتاج لتعديل بس بغيت اسوي شي وماقعد جامده جي...

وراشد ماتحرك الا يوم ظربه سهيل على بطنه بخفه...

ورجع عقد حياته مره ثانيه...

راشد: لا عادي مهرة لا تهتمين...(والتفت لشيخه).. روحنا.؟؟..

شيخه: يالله...

صد راشد صوبي وبعدها التفت لسهيل..

راشد: يالله تخلفنا العافية عليكم....فمان الله..

ابتعد سهيل عن السياره...

سهيل: الله يحفظكم..فمان الكريم..

ابتعدت سياره راشد وطلعت من بيتنا...رجعت انا دخلت البيت وقعدت عدال عفرا اللي كانت يالسه مع عمتي...

دخل سهيل وراي وقال...

سهيل: وين سيف.؟؟

آمنه: اخوك بعده مارد من برا...مرتغد...

التفت سهيل لي انا وقال..

سهيل: ماكنتي اترجمين له كلمات يوم الخميس حق امتحانه؟..شو سوا في الامتحان.؟؟

رفعت كتوفي بحيره...

مهرة: مادري ماسالته...اصلا ماشفته يدرس وايد يوم الجمعه...

نزل سهيل عيونه وهو يفكر شوي عقب رجع طلع من البيت...

حسيت ان سهيل يبا سيف في سالفه مهمة...خفت..شو مسوي سيف بعد..!..شو بلاه هالولد يسود ويه كل يوم...!!!..اففف..

التفت لعفرا وانا اسمعها تقولي..

عفرا: هااا مهرة... علومها الجامعه...مريم اختي اتخبر عنج تقول وين تقعد ابا اشوفها...

ابتسمت..

مهرة: الجامعه زينه... بس كنت اتمنى حريم يدرسني طلعوا كلهم رياييل... اما القعده فانا ماقعد فمكان معين...الظهر اتم برووحي محد عندي...

عفرا: هي تبا تشووفج..قالت لي هاتيلي جدولها وانا بمر عليها وبشووفها..

مهرة: كيف بتعرفني..؟!..

عفرا: هههههههههههه هذي مريوووووم مايغلبها شي...

ابتسمت... لكن ابتسامتي اختفت فجاه...



تذكرت جدولي المكتوب في دفتري الاصفر اللي فقدته...واللي شله الريال على ما اظن...حسيت بقلبي يغووص حزن على حالي....

منو كان يتصور باني بطيح فمشكله مثل هذي...!!..

تمالكت نفسي وعدلت ملامح ويهي وابتسمت غصبن عني..

مهرة: بكتب لج جدولي باجر ان شاء الله..

عفرا: كتبيه اليوم عشان تتلاقن باجر بدل ماتقعدين بروحج الظهر..

قلت بسرعه وبتهور...

مهرة: باجر مابسير الجامعه...

فجاه التفتت لي عمتي مستغربه..

آمنه: ليش مابتسيرين.؟؟

ارتفعت انفاسي وانا ماعرف شو اقولها....فجاه تذكرت شي نسيته تماما....الحمد لله ربي يحبني يوم ذكرني بهالشي..

مهرة: عندي باجر مراجعه في المستشفى عشان ايدي...

وتنهدت بارتياح يوم شفت التقبل على ملامح ويه عمتي وعفرا... انا فعلا عندي مراجعه باجر ونسيت السالفه تماما...

وفرحت يوم حصلت لي عذر مقنع اني ماروح....

----------------------------

اليوم: الاحد..

المكان: غرفة يوسف..

الوقت: الحادية عشره مساءا..

-----------------------------

(يوسف)..



راقبت وقلبي يحترق وضحه وهي تطلع اوف لاين....حسيت فعلا انها النهاية... وانها اخر مره اشوفها او اسمع عنها....

تراجعت عالكرسي وتساندت...وعيني على المحادثه اللي مازالت مفتوحه جدامي..بينما العالم كلها يكلموني ويطرشولي مسجات وانا حتى مافتحت مسجاتهم ولا رديت عليها...

كيف ارد عليهم وانا عندي وضحه..!!

كيف اعطيهم اهتمامي في وقت كنت فيه اذبح حبنا واي امل لنا رباعه بايدي...وبنفسي...!!!...

ماكنت اتصور فيوم باني انا اللي بنهي كل شي... انا الي كنت ميت عليها... ومازلت ميت فيها... انا اللي كانت عيوني تتحارق وشوي وبتنزل دموع من تيب وضحه مجرد فكرة الفراق بينا...!!..انا...!!..

مليت صدري بالهوا عشان اهدي نفسي المضطربه شوي...لكن هيهااات...!!..

عقلي في هاللحظة كان يتخيل وضحه المنهارة...شو بتسوي بعد ماطلعت اوف لاين.؟.. اكيد بتسكر الكمبيوتر وبتطيح على شبريتها وبتصيح لين ماتهلك عمرها...!!..

انا اعرفها... هذي وضحه..حياتي...اعرفها اكثر من نفسي...واكثر من نفسها...!

مديت ايدي ومسكت الماوس ..ورجعت المحادثه من اول مادخلت وضحه...!!.. كنت قاسي وايد عليها...وكانت هي..متساهلة وايد معاي...مع اني اعرف في قرارة نفسي بانه وضحه اللي صار كان غصبن عليها...وبانها فعلا فرحت لفكره ان الخطبة ممكن تنفج وبانها بترجع لي...!!..لكن انا ماقدرت اتقبل فكره اني اعاني من كل هالظروف مره ثانيه اذا انخطبت من اول ويديد...او اذا رجعت الخطبه مره ثانيه بعد ماتنفج..!!

هذيلا اهل...ولازم بيحلون مشاكلهم...مابيخلون العالم ترمس عليهم...



قريت المحادثه ببطء...وانا اتفكر بكل كلمه طلعت منها...

كيف كانت تترجاني اتفهم...كيف كانت تشرح لي بتوتر وبتفصيل كل اللي صار وياها بخصوص خطبتها....

كيف طلبت مني اصدقها..وهي عمرها ماطلبت هالشي مني لانها تعرف اني اصدقها فكل شي.. لكنها حست فيني باني مب الاولي..مب يوسف اللي حبته واخلصت له..!.

انصدمت وضحه يوم قلت لها اللي عندي...وباني ابا انهي كل شي ... كل اللي بينا....

كيف سكتت...وكيف طولت لين ماردت علي...حوالي عشر دقايق اكلمها وماترد علي...

وبعدها جاوبتني بـ "كيف يطاوعك قلبك؟"...

تجمعن الدموع فعيني وانا اقرا جملتها مره ثانيه... كيف حسيت بانكسارها الحين..بينما من شوي يوم قالتها ماحسيت فيها وكنت معصب ورديت عليها بعصبية..!!..

فعلا كيف يطاوعني قلبي انهي كل احلامنا رباعه..!!..

كملت قرايتي للمحادثة..

وصلت للجزء اللي كانت تذكرني فيه بكل مواقفنا...

ذكرتني بكل خططنا... كيف كنا نخطط لعرسنا بثقة... كيف كنت اخطط اني اتعرف على خوانها..واني ارابعهم بس عشانها هي..وكيف بخبر اهلي عنها...وكيف بخطبها....وين بنعرس..وشو بنسوي... ووين بنروح بعد العرس وكيف بنتعامل مع بعض...

ذكرتني بعيالنا...

كيف كنا نخطط كم بنيب من العيال....شو بنسميهم....!! واي مدارس بندخلهم...

في هاللحظة الدموع المتجمعه فعيني نزلت فعلا....

كم الواحد بيتحمل..!!...كم.؟..

هذا حب ثلاث سنين يظيع فجاه جذي..؟!...كيف بقدر اتحمل وكم بكااااابر...!

مهما يقولون بدايتي معاها غلط...مهما يقولون حب الانترنيت ماينفع .... مهما كانوا يفكرون باني كنت العب...

مايهمني....!

ولا يهمهاا...

احاسيسنا كانت صادقه وفعلا كنا نحب بعض....

والا كيف كنا نحس ببعض...كيف يوم امرض هي ماتروم ترقد...وكيف اظيج انا بعد يوم احس بظيجتها...؟!..

وليش صاحت وضحه يوم انا حرمنت بمساق...هي صاحت بينما انا كنت اضحك بعدم اهتمام بوضعي...لكن هي اهتمت مني...!!

كيف اني خططت بكل تهور باني اشوفها يوم خبرتني برحلتها لدبي مع التقنية..!!..وكيف طنشت كل محاظراتي ورحت دبي...بدون هي ماتدري بهالخطط...

لكني ماتوفقت ولا شفتهم ...!!..

اشياء وايد تستحق الذكر بيني وبينها....لاني احبها..وهي تحبني....لكن النصيب مارحمنا...!

وصار لازم ننتهي مثل مابدينا...

خزنت المحادثه هذي لاني كنت احتاجها عندي...خزنتها في ايميلي..وسكرت بعدها الكمبيوتر...

رحت الحمام وغسلت ويهي..

شي طبيعي اني مابقدر ارقد..مسكت سويجي وطلعت من الغرفه... يوم انا نازل تلاقيت مع ناصر يركب الدبي هو ومنى ...

اطالعني ناصر... وعقد حياته...

شووه..؟..ويهي يبين عليه مصابي.؟؟...

ناصر: وين ساير؟؟.

يوسف: بطلع..

ناصر: وين.؟

يوسف: احين انته اللي تحاااسبني شوف...

التفت ناصر لمنى...وقالها..

ناصر: يالله..روحي حجرتج وانخمدي يالله...

كان يهزبها بلا داعي وانا اروحي استغربت منه..

اطالعته منى وهي مبطله عينها..

منى: بسم الله انزييييييييييييييييين...

وراحت منى حجرتها وناصر يظحك عليها..

نزلت انا الدري ونزل هو معاي...

ناصر: يوسف شفيك.؟

التفت له اطالعه وانا عارف انه بيفهم علي...

يوسف: صدري ظايج وابا اطلع اشم هوا...

فعلا حسيت انه فهم.. نزل ناصر عيونه للارض ورجع رفعهن.. وسحب مني سويجي وقال..

ناصر: انا بعد صدري ظايج...بظهر وياك وانا اللي بسوق...

نزل تحت ناصر قبلي وانا تبعته وانا احس بشوية ظيج...كنت ابا اطلع بروحي...مافيني اسولف ويا حد..

واذا كان ناوي يسولف بروووغه وماعليه منه...