Follow along with the video below to see how to install our site as a web app on your home screen.
ملاحظة: This feature may not be available in some browsers.
أعضاء ملتقى الشعراء الذين لا يمكنهم تسجيل الدخول او لا يمكنهم تذكر كلمة المرور الخاصة بهم يمكنهم التواصل معنا من خلال خاصية اتصل بنا الموجودة في أسفل الملتقى، وتقديم ما يثبت لاستعادة كلمة المرور.
مشاركة: ::][مــــوعــــد مــع الـــســـــعـــادة][ :: قصه في منتهى الروعه
اليوم: الاربعاء..
المكان: بيت بو راشد...
الوقت: الثامنه والربع مساءا..
--------------------------------
(راشد)....
بدلت ثيابي وتوظيت عشان صلاة العشا...ورجعت انزل تحت... في أي وقت بيون قوم عبدالله ...
كنت على وشك اني اطلع لولا ان امي اللي يالسه في الصالة هي وابويه زقرتني..
راشد: هلا امي.. آمري..
ام راشد: تعال فديتك برمسك...
ييت ويلست عدالها هي وابويه...
ام راشد: انا حصلت لك البنت الزينه...
حست بوزي متظايج من هالطاري...
راشد: امي..ما يأستي.؟؟ انا يئست... ليلى خطبناها ورفضت اون ماتبا تسكن في العين....وخطبنا شما اللي بيتهم على طرف الشارع وقالوا صغيره تبا تدرس... خطبنا حمده اللي امها تقرب لج من بعيد وطلعت محيّره لولد عمتها ونحن ماندري...بس خلاص انا شكلي مابعرس...
ام راشد: ياولدي عين خير... هذيلا ماكانن نصيبك وانا غلطت يوم ماسالت عنهن عدل...بس هذي انا سالت عنها زين واحس انهم مابيرفضونا... عرب حشام ومن اصل وانته تعرفهم اظني..وابوك يعرفهم ...وانا اروحي اعرف امهم..
عقدت حياتي..
راشد: على منو طاح الدور هالمره...؟!..
ام راشد: ابوك اروحه ذكرني بهم.. من كثر ماهم زينين... تعرفه سلطان الـ.(...)...
عقدت حياتي احاول اتذكر...لكني ماتذكرت...
راشد: منووه..؟!
تدخل ابويه في السالفه وقال لي..
بو راشد: سلطان الـ(...).. وعياله محمد وناصر ويوسف...اللي حضروا عزيمه حمد ولد خالتك يوم مترقّي...!!
راشد: هييييييييييييي...شو بلاهم؟؟
ام راشد: هم هذيلا بعد شو بلاهم...!!..
راشد: من وين تعرفينهم انتي.؟!
ام راشد: حرمه سلطان كانت دوم تتزاور ويا مريم خالتك الله يرحمها.. واحيدها كانت تيب وياها بنت صغيرونه من زمان... وتخبرت عنهم والبنت لا مخطوبه ولا محيره لحد..عندها ولد عم واحد ومالج... اسمها منى وتدرس في الجامعه سنه ثانيه يقولون... وانا احيدها البنت حليوه...
قعدت افكر بالموضوع واجلبه براسي...
عيال سلطان ماشاء الله عليهم رياييل وماعليهم قصور..عالاقل هذا اللي شفته منهم لين احين لانه معرفتي بهم سطحية...
لكن ليش لا...الواحد مايعرف وين النصيب...
راشد: انتي ظامنتهم يعني هذيلا...
ام راشد: والله ياولدي انا متفائله خير..واللي مشجعني ان ابوك متشجع بنفسه لهم ويشوفهم مناسبين...
سمعت الاذان ياذن... وشفت ابويه ينش عشان يصلي...قمت انا وياه وانا اقول لامي..
راشد: كيفج امايا سوي اللي تشوفينه مناسب...
ام راشد: على بركه الله..
طلعت مع ابويه من البيت وشلينا معانا الشله اللي موجوده برا... سهيل ومبارك وسيف..وسرنا كلنا المسيد...
لكن ما اخفي عليكم تفائلت هالمره بهالخطبه... والسبب ذكرى صغيره تعد لا تذكر يعني لكنها برزت في بالي بشكل غريب... منى هذي..اخت ناصر..
شكلها هي نفسها اللي شفتها في العين مول مع ناصر... يوم نبهته ان الشباب كانوا يتمشون جدامها...
شكلها هي نفسها اللي بتخطبها لي امي...!!..
مشاركة: ::][مــــوعــــد مــع الـــســـــعـــادة][ :: قصه في منتهى الروعه
اليوم: الاربعاء..
المكان: بيت علي بن سالم..
الوقت: التاسعه والنصف مساءا..
-------------------------------
( ناصر)....
كنا معزومين عالعشا انا وسعاد فبيت علي ... بمناسبه حمل سعاد...
هالاسبوع قلت لاهلي انه عليه زام وما اقدر اييهم... لانه بصراحه ماهنالي اخلي سعاد بروحها هالاسبوع بعد...خصوصا بعد ماعرفت انها حامل... والوحام شوي متعبنها...
قام علي واستغل هالفرصه وعزمنا عالعشا هو وحرمته...
وحاليا خلصنا عشا ويلسنا في الميلس...طبعا الحريم كانن رواحهن في البيت...
علي: ماقلت لي ناصر.... مرتاح مع سعاد..؟!..
ابتسمت..
ناصر: هي الحمد لله..مرتاح..
علي: اكيد..؟!
ظحكت.. علي من تزوجت سعاد وهو يحس نفسه هو السبب ... مع انه ماله خص لا من قريب ولا من بعيد..
ناصر: والله شو اقولك..سعاد مثالية زياده عن اللزوم بعد...
علي: شقايل يعني زياده عن اللزوم...
ناصر: يعني مريحتني عالاخر.. ولين احين مانقدت عليها شي..
علي: وليش احس انك مب راضي بهالشي..
سكت شوي..
ناصر: ما اعرف كيف اشرح لك...
علي: خذ راحتك..
ناصر: شوف..بقولك جدولها اليومي وانته احكم بنفسك... سعاد تقوم من النوم ثلاث ونص..تقعد تصلي قيام الليل لين صلاة الفجر..توعيني.. اسير انا اصلي في المسيد..وهي تصلي في البيت..ارجع احصلها مخلصه صلاة وقاعده تقرا قرأن... ارجع انا مره ثانيه وارقد لين ست ونص جي.. توعيني مره ثانيه سعاد اقوم احصل ثيابي وكل شي جاهز..اتلبس واتريق واطلع... اروح الدوام..حسب ماقالت لي هي ..انها بعد ما انا اطلع الدوام هي ترجع ترقد لها ساعتين ثلاث..عقب تنش عاد تسوي شغل البيت..لين حزة الغدا...تطبخ الغدا وعقب تدخل الحجره تتكشخ لي قبل ما ارجع من دوامي.. ويوم ارجع تستقبلني احلى استقبال..واحصل ثيابي جاهزه للسبوح.....وبعد الغدا انا ارجع ارقد..اما هي تقعد تفرش كتبها اللي يايبتنهن وياها من سوريا وكانت تدرس منهن...تدري انته ان عماد كان اييبلهن مدرسات يدرسونهن مواد جامعية لانهن مايدرسن في الجامعه لين الثانوي وبس..لانه الجامعه مختلط... المهم هي يابت كتبها وياها..ومن يعديها الظهر قعدت تدرس منهن اللي تقدر عليه..لين العصر..توعيني اصلي... بعد الصلاة اذا انا قعدت في البيت وياها ترا هي تقعد مجابلتني وماعنده شغله غيري..واذا طلعت عنها تروح مره ثانيه لشغل البيت او تشغل نفسها باي شي.. في الليل نتعشى..نسولف شوي.. والساعه 11 نحن رقود...واذا صار وسهرنا..احصلها في نص السهرة رقدت عدالي عالكرسي.. وعلى هالحال.. هذا روتينها اليومي..
علي: ههههههههههههههههههههههههههههههه وانته شو قاهرنك ياخي كل شي عندك مرتب ومنظم.. بالعكس غيرك يتمنى حرمه جذي..
ناصر: ماقلنا شي... انا مب متظايق لانها منظمه... بس خاطري احصل عليها سبب يخلينا نتظارب عالاقل...
علي: ليش عاد..؟!
ناصر: بس جي عشان نكسر الروتين...خاطري مره احصل الغدا مب جاهز..او محروق او تهم ...خاطري مره احصل كندورتي محروقه مثلا.. البيت لايث...اغراظ ظايعه.. او تنسى توعيني للدوام... شي جذي..
علي: يابوي احمد ربك على راحة البال والله انك خبل صدق..
ناصر: والله اني حامد ربي.. ومستانس وياها..بس تعرف بعد الظرايب حلوه ههههههههههه..
علي: ههههههههههههه انته مب صاحي..المهم ماقلت لي ..متى ناوي تخبر اهلك..
ناصر: هممممممممممم والله مادري ياعلي..كل مااروح لهم يفتحون لي سالفه الزواج وما اتشجع اقولهم احسها صدمه قويه عليهم..
علي: يعني بتم جذي...وهالمسكينه ساكته ولا اعترضت ولا شي..
ناصر: والله ادري...يعني شووف..سعاد مره وحده بس قلت لها تثق فيني بخصوص هالموضوع وطلبت منها ماتذكره...ومن عقبها ماسالتني شي اذا قلت لهم او لا..تترياني انا من نفسي اقول....يعني غيرها من الحريم بيزن على راسي وبيسوي صدعه...!!!
رد علي يظحك...لكن انا احس انه حياتنا ناقصنها شي فعلا... ناقصنها الظرايب اللي اشوفها بين كل زوجين وهذا امر عادي وطبيعي حسب علمي...!!..
ناقصنها الزعل والغيره...
صح نحن نظحك ونسولف وايد..نغايظ بعض وايد بس ماتوصل ابدا لدرجه الزعل دايما اشوفها بشوشه وتظحك وتاخذ الامور بسهوله...
علي: المهم انته احزم امرك وحاول تخبر اهلك... لا تصدمهم كلهم مره وحده..حاول تخبر شخص شخص كل حد بروحه عشان تكون الصدمه اقل...وخل امك وابوك اخر شي... خبّر الصغار اول..
ناصر: والله الكبار مثل الصغار صدمتهم وحده وكلهم عيونهم علي الحين يتريوني اقول لامي ابا اعرس..
علي: حط فبالك ان وقتك محدود.... ماظني تبا ولدك يفتح عالدنيا واهل ابوه مايعرفون بوجوده...!!
ناصر: صح كلامك..بس خلني احصل الشجاعه...انا والله بقولهم وماعليه لاني فخور بسعاد... بس قسم بالله اني خايف على امايه لا اييها شي... ومب محصل اسلوب معين يخفف عليها الصدمه...
علي: شوف توقع اي شي..طبيعي يزعلون عليك...يمكن يقاطعونك فتره طويله...بس الصراحه واجبه...
ناصر: انا اهلي وايد عزيزين عليه يا علي .. رغم اني اقصر فيهم دوم بس والله مالي غيرهم...
علي: كلناجذي ياناصر...الله يعينك وراك مهمة كبيره ولازم تتخطاها...
تنهدت وقلت..
ناصر: الله يستر...
فعلا الله يستر من الياي... سعاد مالها ذنب تتلعوز معاي... هذي مشكلتي انا ولازم احلها...
بس متى..؟!..
مشاركة: ::][مــــوعــــد مــع الـــســـــعـــادة][ :: قصه في منتهى الروعه
اليوم: الخميس...
المكان: في البر...
الوقت: الثانية عشره ظهرا..
------------------------------------
(شيخه)....
يلست انا ومهرة على نكوود بعيد شوي عن الجماعه...
يلست مهرة وهي ماسكه ايدها اللي كانت مكسوره..
مهرة: آآآآآآآآخ... ياويلي من هالايد اللي ماتصح...
شيخه: شفيها كانت بخير...!!..
مهرة: تبين الصدق اجبت عليها يوم طحت..وعورتني...بس لا تخبرين مبارك حرام....
شيخه: عنلااااااااااااته زاد ياكثر ماا دارين عليه...!!!...
مهرة: حرام عليج ماشافني انا اللي طلعت جدامه...
شيخه: وانتي بعد بقره..
مهرة: هههههههههههههههه راضية ياحرمه اخويه...
شيخه: ترضين لنفسج وماترضين السب لمبارك...
رفعت مهرة عينها بمعاني مختلفه افهمها عدل....
انصدمت..ماتوقعت للحظه ان مهرة.....
شيخه: مهرة...!!!.لا تقولين.!!..
ابتسمت مهرة انعم ابتسامه شفتها عليها فيوم..ورجعت تنزل عيونها...
شيخه: تحبينه..؟!!..
تنهدت مهرة..
مهرة: اظني ياشويخ...والله مادري..
شيخه: مباااااااااااااارك..؟!!..
مهرة: وشوفيها.؟!..مبارك هو الوحيد اللي تقبلته...الوحيد الي اقدر اطالع ويهه من غير خواني طبعا بدون ماتلوع جبدي منه...
شيخه: وانا اقول ليش متقبلتنه بهالسرعه... والله ماتصورت انج يامهروه بتحبين مبارك..تحسبتج تحبينه مثل اخوج..
مهرة: اول شي كنت احس جي... بس تذكرت كلامي لسهيل من زمان..بانه مافي بنت تعتبر اي ريال مثل خوها غير اخوانها فعلا... يمكن انا منغشه بشعوري...يمكن هذامب حب اخوي مثل ماكنت انا اتصور..يمكن اني احبه صدق ومب منتبهه على نفسي...
شيخه: مبارك طيوب ويستاهل.. بس بعدني احس انه اجنبي وغريب عنا...صح هو اندمج بسرعه ويانا وجي لكن مع ذلك احسه شوي غييير مختلف..
مهرة: هالاختلاف هو اللي حببني فيه... لاني ظامنه انه ماعنده الافكار البايخه اللي في بال معظم شبابنا... ومختلف عنهم... مادري..بس صرت من اشوفه احس غير..اني مستانسه وايد...
شيخه: هههههههههه الله يهنيج يامهرة...ولو اني كنت اتمناج لاخويه...
على طول اعتفس ويه مهرة...
مهرة: اخوج دومه يسبني وينازعني...
شيخه: هو يقول نفس الكلام عنج...
مهرة: يجذب عليج.. هو دوم يتسببلي..وبعدين شيخه انتي تعرفين فكرتي عن شباب العين خصوصا كيف ماطيقهم ولا اطيق حركاتهم وراشد يذكرني وايد بذاك السبال...
عقدت حياتي...هذي معلومه يديده..
شيخه: كيف يذكرج فيه..؟!!..
مهرة: يعني...نفس الطول نفس العرض.. نفس التسفيره.. واللحية المرتبة....يعني هو مايشبهه لكن فيه اشياء مشتركه بينهم من ناحية الشكل العام...
شيخه: وانتي حافظه شكله هاذاك..؟؟
مهرة: آآآآخ عمري مابنسااااه لو صبغ شعري الشيب...يعله مايتوفق ياربي...
سكت انا عن مهرة...وسكتت هي شوي تفكر... فجاه ابتسمت وقالت..
مهرة: فديييييته والله...
انصعقت..
شيخه: منوو تتفدين لايكون ذاك الخسف..
مهرة:لاااااااااااااااء..يخسي...اقصد مبارك ...شفتيه كيف مسك ايدي ويلسني..؟!!..بغيت اموت من المستحى...
شيخه: ههههههههههههههههههههههه والله انج خبله البنت توها مدعومه وهي متفيجه تستحي...
ظحكت مهرة بحماس...
من ناحيتي صحيح اني ما اشجعها علىهالحب... لاني احس مبارك مختلف..
لكن اذا كان حب مبارك بيخليها دايما تظحك جي...فخلها تحبه قد ماتبا...!!
الا ياحظ مبارك فيها...
-----------------------------------
مشاركة: ::][مــــوعــــد مــع الـــســـــعـــادة][ :: قصه في منتهى الروعه
الجزء الثاني والثلاثيـــــــــــــــــــــــــــــــن..
--------------------------
اليوم: الخميس..
المكان: البــــر ..
الوقت: الثانية عشره والنصف..
---------------------------
(مهرة)....
مازلت منبهرة من اعترافي الجريئ لشيخه بحبي لمبارك...اللي ما اكتشفته الا من يومين فقط.. من بعد مانازعني ابويه على تاخيري في الجامعه لين الساعه ثمان... الموجودين كانوا سيف وسهيل وعمتي امنه وعفرا..يعني كل سكان المنزل ماعدا حمد
اخويه ... ساعتها انصدمت لانه ابويه اول مره ينازعني جي... وماقدرت ارقد ليلتها...وسهرت في الصالة بعد ماتاكدت من نوم الجميع...
لكني فجاه انصدمت بمبارك يدخل علي الصاله وكان نازل من عند سيف... سيف الظاهر كسرت خاطره وايد قام وخبر مبارك بالسالفه....
وهذا االاخير يوم شافني قعد يراضيني ويذكرني شكثر ابويه يحبني واكيد كان كله نابع من خوفه علي... حسيت بالفرح يومها...اول مره حد يهتم يراضيني بهالطريقه.. ويداري مشاعري... ابتسمت لمبارك فرحانه.. هو تحسبني ابتسم له شاكره وباني خلاص رضيت... فعلا انا رضيت.. لاني نسيت سبب زعلي اصلا... وانشغل تفكيري كله بمبارك... اللي ما طول بالكلام معاي ليلتها..طلع من البيت وراح بيتهم لتاخر الوقت..
لكني فعلا من بعدها ماقدرت ارقد...وبدال ما انشغل بنزاع ابويه المحرج لي... انشغلت بعيون مبارك الخضر...!! شيخه: يابوي لا تحبينه جان بتمين تسرحين جي..!!!..
انتبهت لشيخه عدالي ..اللي نبهتني بدزه خفيفه... وابتسمت.. كنت على وشك اني ارد عليها لولا اني شفت من بعيد سهيل ياي صوبنا..وفي ايده عصا لاقطنها من تحت سمرة من السمر..
قمت قلت لشيخه بمكر.. مهرة: احين بنشوف منو بيسرح..!!... روميو ياي صوبنا ومب ناوي على خير..!!! التفتت شيخه للمكان اللي كنت انا اتطالع فيه..!!.. وقالت بصوت واطي..
شيخه: وابووويي..!!..بسم الله الرحمن الرحيم... بسم الله الرحمن الرحيم... يارب يارب دخيلك لا يطلع طبعه العصبي الحين..!!
ظحكت انا بينما سهيل وصل صوبنا ومعقد حياته...حرك عصاه بعصبية...
سهيل: شو تسون يالسات هني ومخليات خالووه تقرقع الجدور روحها..؟!!.. وفاطمه وياها ولدها االصغيروني وين تروم تساعد...؟!
شيخه: هااااه..؟!... نحن مايبنا غدا جاهز..؟!
سهيل: منو بيطبخ لج من صباح الله خير شيخه خانوم... قوووومن...!!
وحرك عصاه بعصبية يسوي عمره بيظربنا عظهورنا... تناقزنا انا وشيخه بعيد...
مهرة: بسم الله انزين انزين بنساعد... انا تراني ماعرف اطبخ..
سهيل: محد طلب منج طبخي عالاقل قطعي بصل..
مهرة: يبتوا صابون عاد عشان نتغسل؟
التفت سهيل وهو منقهر حده لشيخه.... واشر علي بايده...!
سهيل: هذي وين مفكره نفسها رايحه..؟!!!....
شيخه: شدراني...
مهرة: عيل مابقصص بصل بروح امسك خليفه الصغير وبخلي فاطمه تساعدهن...
سهيل: مافيج سنع صدق...
مهرة: والله انا مافهم شي في الطبخ...
سهيل: المهم ساعدي سوي أي شي ولا تقعدين تسولفين هني... يالله..
حرك عصاه مره ثانيه..جان نتراكظ انا وشيخه بعيد عنه...فجاه زقرني سهيل..
سهيل: شي يعورج؟!..
سهيل: مهروووه..
رديت له وقلت..
مهرة: لبيه...
سهيل: شي يعورج؟
سهيل: يعورج شي.؟!!..
سكت شوي...وابتسمت...استانس يوم حد يسال عن حالي ويهتم شوي....حتى لو كان بدفاشه على طريقه سهيل جذي..!!
مهرة: لا مايعورني شي...بس ايدي شوي اجبت عليها.. بس عادي بخير..
سهيل:أي ايد؟ المكسوره؟
مهرة: هي..
سهيل: يايبه المشد وياج؟
ويوم وصلت عند الحريم اللي متيمعات عند الجدور.. قالت لي فاطمه انها هي بروحها تبا تطبخ مع امها بس تبا حد يمسك خليفه...
مهرة: هاتييه انا بمسكه....
مديت ايدي وخذت خليفه الصغير بحظني...
حسيت بالرهبة والحنان الفظيع يوم شليته بين ايدي....
ساعتها تمنيت لو تيب عفرا ياهل عشان افرح فيه في البيت...!!...
كنت مسحووره بويه خليفه ..اتامل كل شي صغير فيه... وخدوده الحمر..وشعره اللي مثل الريش الناعم...
سمعت صوت خالتي تقول لي..
ام راشد: امايه سيري به بعيد عن الدخان فديتج..صدره مايتحمل....
مهرة: ان شاء الله...
ضميت خليفه اكثر لحضني ومشيت بعيد... وين اروح..؟!..
خالي يالس مع ريل خالتي وعندهم نسيبهم عبدالله... !!..بروح الجهه الثانيه...
خطواتي من دون ادراك قادتني للتجمع اللي مسوينه خواني..مع مبارك..وراشد...
كان راشد توه نازل عن الدراجه ومن الجهه الثانيه واقف مبارك ماسكنها ويكلم فهوود ولد فاطمه.. وعلى ويهه ابتسامه.. اما سيف واقف يتفرج..وسهيل واقف معاه..
وانا وقفت اتفرج بعيد في الظله عشان خليفه ماتيه الشمس..
ومن دون شعور قعدت اهز نفسي مع خليفه مع انه نايم ومب محتاج هز...
ابتسمت وانا اشوف مبارك يحط سفرته على جتفه باهمال..ويرفع كندورته ويركب الدراجه... ترييته يسوقها لكني اكتشفت انه يتريا فهود يركب معاه...
مسك راشد ولد اخته وركبه ورا مبارك...
تمسك فهود في مبارك بقوو.... بيني وبينكم...حسدت فهود..!!..
شغل مبارك الدراجه وطاربها بسرعه فظيعه...طارت سفرته اللي جتفه بعد ماشلها الهوا... وطاحت على بعد خطوات مني..
اطالعتها وانا معقده حياتي...ورفعت نظري للبقية..محد تحرك عشان يشلها..كيف يخلون سفرة مبارك اطيح عالتراب جي..!!..
تحركت ببطئ..ونزلت عالارض وشليتها...نفظتها عن التراب... ورفعتها وحطيتها فوق جسم خليفه الصغير..
محد انتبه لي..
ماعدا راشد... اللي اطالعني بنظرات غريبه...اقدر اسميها اشمئزاز او احتقار...
ماعطيته أي اهمية وقعدت اضحك على صريخ مبارك ....
كان يصارخ مثل الصيّع... وهو يقفز عالنكاكيد...وسيف ميت من الظحك عليه...
تراجعت ورحت للفراش اللي فارشينه للحريم.. وبالصدفه كان عدال سيارة مبارك..
وعاد انا ويا فضولي التام..فتحت باب السياره اشوفها من داخل لاني ماكد ركبتها غير مره..وكنت راكبه طبعا في السيت الوراني.....
حطيت خليفه عالكرسي وانا تميت واقفه..انتبهت لوجود جريدة..سحبتها وشليت خليفه ورديت سكرت الباب...
يلست عالفراش وخليفه في حظني... والجريده جدامي وقاعده اجلب فيها.. وسفرة مبارك عدالي عالفراش..!!
مرت نص ساعه... وشيخه كل شوي تروح وترجع لي.... وانا اجلب في هالجريده...لين زهقت منها وخليتها..
وقعدت اتامل في ويه خليفه والامس ملامحه الناعمه بصبعي بخفة...
كنت كل ما اقرب صبعي من طرف شفايفه..يحيس بوزه كانه يبا يبتسم...وهالحركه فيه خلتني اتخبّل عليه... وتميت كل شوي اسويها وهو مسكين متوذي مني يبا يرقد براحه...
فجاه حسيت بحد يطب على بعد مسافه صغيره عالفراش ويقعد...
مبارك: هاللووو...!
فز قلبي يوم شفت مبارك فجاه ..بلا سفره..ويهه احمر.. ويناهي..
وعيونه خضر كالعاده...
ابتسمت..
مهرة: اهلين.. هااه استانست.؟!
مبارك: ونااااااسه... مت من الظحك على فهود من ركب لين نزل وهو خاش ويهه فظهري ولا شاف شي وميت من الزياغ... لاوي عليه بقو..وكل ما يحس اني ركبت نكود قرصني فبطني بايده...!!
مهرة:ههههههههههههههه ... عاد انته ماخليته يستمتع طرت به مسكين..لو سقت به شوي شوي.. ولدنا مب متعود...
ظحك مبارك بشطانه...لكن يوم طاحت عينه على سفرته انتبه انها مب موجوده عنده..واختفت ابتسامته وحلت مكانها ابتسامه اصغر..ومؤدبه اكثر..
مبارك: ثانكس...
مهرة: على.؟!..
مبارك: لانج يودتي سفرتي.. (ومد ايده وخذها)... اقول.. متاكده انه ماشي يعورج..
ابتسمت..
مهرة: هي متاكده لا تحاتي..
مبارك: ظهرج...رقبتج...ايدج..أي شي متاكده؟؟!!..
مهرة: اظني ابوك الدكتور مب انته لو شي عورني بطير عنده...لا تحاتي..
ابتسم مبارك.. ومد ايده وسحب الجريده وقعد يجلب فيها... ويتاملها بتركيز وهو معقد حياته..والجدية واضحه على ملامحه...
كان شكله جنان...
لكني من داخلي حسيت فعلا انه مب حاس بوجودي عداله...نساني تماما... معقول؟!
خربت علينا الجو شيخه...يت محتشره..
شيخه: هااااه بو الشباب اشوفك متفيزر هني عند الحريم..؟!!
رفع مبارك راسه متفاجئ.. ورفع حواجبه بعد فوق وتلفت حواليه يدور هالحريم اللي تطريهن شيخه..!!
مبارك: what?
شيخه: شو وات ماوات بعد روح عند الريايل..
مبارك: ليش؟...وشوفيها ان قعدت هني؟
شيخه: هذا مكان حريم...وهناك مكان الرياييل..
مبارك: انزين بس محد غريب..
شيخه: وابوي عليك منقوود تقعد مع مهرة رواحكم جي .!!
عقد مبارك حياته معصب..
مبارك: شو تخرفين انتي..؟!!..ليش شو فيها..
شيخه: مابيلس اشرح لك انا..يالله شل شلوعك وروح عند الرياييل كمل قرايه...لا ايي سهيل احين بعصاه..
هز مبارك راسه بظيجه..ولم الجريده وقام..واجه شيخه وقال لها فويهها..
مبارك: old fashion…! ( يعني موضة قديمه)..
خلاها وراح عند قوم خالي...وخلا سفرته للمره الثانيه ... وايد ينساها الظاهر بعده ماتعود على اهمية وجودها.. ابتسمت شيخه بمكر ويلست عدالي..اما انا فاطالعتها بعصبية وانا امد ايدي واسحب سفرته عدالي...
مهرة: سباله جان خليتيه يالس..!!
شيخه: اسفه... شفت عصبية سهيل مره ومافيني اشوفها ثاني مره بليز...
ظحكت على تفكير شيخه المنحصر بسهيل....
كله تفكر بسهيل وردة فعله تجاه امور ماله خص فيها.... سهيل سهيل سهيل...!!!
ياترا ان خطبني مبارك بتم انا بعد افكر بنفس الطريقه..؟!!!!...
مشاركة: ::][مــــوعــــد مــع الـــســـــعـــادة][ :: قصه في منتهى الروعه
اليوم: الخميس..
المكان: صالة بيت سلطان..
الوقت: الثانية عشره والنصف ظهرا..
------------------------------------
(منى)...
اول مانزلت للصالة شفت ابويه ويوسف ومحمد يطلعون منها لبرا البيت....
التفت لامي وقلت..
منى: وين سايرين؟!
ام محمد: ..........
التفت لامي مستغربه...شفتها سرحانه وهي تمسح بايدها على شيلتها السودا اللي طرفها جدام امي بحركة لا ارادية...
منى: اماااايه..!!!..
ام محمد: هاااه..شو فيج؟!..
منى: اقولج وين سايرين؟
ام محمد: منوو هم؟!
منى: قوم ابويه..
ام محمد: سايرين المسيد يصلون بعد وين سايرين...!!
تنهدت امي وقعدت مره ثانيه تمسح بايدها على شيلتها....كانها تنظفها من الخيوط الصغيره اللي لاصقة فيها..!!!.
يلست عدالها وانا معقده حياتي..
منى: امايه فديت روحج بلاج..؟!..
ام محمد: ماشي..
منى: بلى فيج شي...تفكرين وايد.. شو مستوي..
ام محمد: والله يابنتي افكر في اخوج هذا اللي شيبلي راسي...
ابتسمت..
منى: ناصر..؟!
ام محمد: منو غيره الله يهديه ياربي...
منى: تراه قالج عليه زام ومايروم ايي هالاسبوع...!! لا تحاتينه احين ريال هو عنبووو..
ام محمد: بس هذا هو السبب... الولد مب طبيعي ...
منى: بسم الله عليه اخويه شفيه..!! ليش تقولين عنه جي..
ام محمد: ماكد مر عليه فحياتي ريال رافض الزواج مثل اخوج...
منى: امي ماله خاطر عالعرس احينه مافيها شي عادي..عنبو وايدين يعرسون يوم يوصلون الثلاثين..
ام محمد: لا..انا عيالي ايوزهم في سن مناسب.. حق شو مايبا يعرس عشان يلعب... لا تحطين فبالج اني ماعرف حركات الشباب هالايام...انا ماريد لولدي الغلط والسمعه الشينه بين الناس... خله يلحق اخوه ويعرس ويستقر ويرتاح من هاللعب...
اتظايقت بصراحه من كلام امي عن ناصر.... صحيح انه نحن كلنا نحس انه ناصر طايش بس ماحبيت فكره انه يرتكب الغلط...ولا حبيت امي تاخذ هالفكره بعد..
منى: امايه لا تقولين جي عن ناصر...!
ام محمد: الواحد يقول الحق... انا هالولد مول مب عايبتني تصريفاته.. واللي حارق قلبي انه فبوظبي لا نعرف شو يسوي هناك ومرابع منو وشووو يصير عليه..
منى: امايه ترمسين عنه جنه ياهل بو عشر سنوات.. مب ريال عمره 25 سنه...!!!..
ام محمد: حتى لو... انا مابرتاح الا يوم اشوفه متزوج ومستقر.... ولا يفكر اني بمشي على شووره وبترياه لين ماهو يقرر ويقولي خطبيلي...
سكت شوي..امي كلامها مايطمن والظاهر انها تبا تبدا بالمشاكل... ومع ناصر...اللي ابدا مايرضخ لراي حد واللي في راسه بيسويه...!!!..
الله يستر..
قلت لها بخوف..
منى: امي شو قصدج؟ على شو ناويه..
ام محمد: بعد على شو ناويه..؟!... بروح اخطب له ...
شهقت.
منى: امايه.. من دون شوووره.!!!
ام محمد: هي نعم...بنغصبه عالعرس لكنه عقب بيشكرني...
منى: امايه دخيلج... ناصر غير عن محمد تراه... انتي دلعتيه وايد واحين ماقام يسوي شور لحد...
ام محمد: هذي غلطتي... لكني بخطب له وبخليه يلتزم غصبن عنه وعقب بيتقبل كل شي...
منى: اماايه..ليش ظنج ناصر مايبا يعرس؟
ام محمد: عشان يلعب بعد عشان شو...!!
منى: لا يا امايه...ناصر رافض الزواج لانه يعرف انكم بتيوزونه نوره وهو مايبغيها...
ام محمد: وشوووو له مايبغيها..!!.. اصل وجمال وادب واخلاق وراعية بيت وملتزمه..وفوق هذا بنت عمه وشارتنه... شو يبغي اكثر..؟!! نوره بتحطه بعيووونها... انا بروحي احس ياناس انها شارتنه وغالي عندها حرام نفرط بالبنت...!!
منى: ممكن انه نوره تبغيه...بس هو ماله خاطر عليها امايه شقايل بتغصبينه..!!
حركت ايدها امي معصبه...
ام محمد: اخوج بطران... مادري منو يبا يلقط لي وحده من هالظايعات اللي يكلمهن في التيلفون...
منى: امايه لا تحطين فذمتج يمكن ناصر مب راعي هالسوالف...
ام محمد: عيل يعرس ويستقر ويسمع شور اهله مثل باقي الشباب...
منى: خطبيله انزين وحده غير نوره وانا اضمن لج انه بيوافق..
ام محمد: وشحقه اروح بعيد دام البنت جدام عيوني...وانتوا شو عرفكم بالمعنى والواجب... البنت يتيمه وماشفنا منها عيب ... شحقه نفرط فيها دامها اقرب البنات واخيرهن...!!
منى: امايه نوره ماعرفتيها زين مثل مانحن عارفينها..اطباعها لا تعيبنا ولا تعيب ناصر... والا مابيفرط فيها هو بعد..!!!
ام محمد: ياما حريم تغيرن على ايد رياييلهن... بعد العرس بيسنعها مثل مايبغي ويشتهي...!!
منى: امايه هو يبا ياخذ البنت من بيت اهلها مربايه ومسنعه على مايبا... مب ياخذها يربيها فبيته..!!
عصبت علي امي هالمره صدق..
ام محمد: اسميج من بنت ...قومي عني... عيل والله ما اخطب لناصر غير نوره... وبشوفه شو بيسوي..!
منى: اماااااايه لا تحلفين...
ام محمد: خلاص انا حلفت... بخطب له نوره وفي اقرب فرصه... واذا هو ريال صدق مابيخالف شور اهله... عنبووها سنه...!!..
قامت عني امي وراحت حجرتها...الظاهر عشان تصلي وتهدي اعصابها... اما انا فبصراحه تميت ارتجف..
من الخوف..
خايفه من الحين من ردة فعل ناصر عالموضوع..!!..
ومتلومه لاني نرفزت امي وخليتها تحلف من دون قصد مني... احين انا السبب في عناد امي بناصر..!!
الله يعينك ياخويه...
ومن دون تفكير..سحبت التيلفون ورحت للصالة الصغيره المخصصه للضيوف... واتصلت على رقم ناصر..
مغلق..!!
اكيد يصلي...
ترييت عشر دقايق..ورجعت اتصل...بعد مغلق..!!
متى بتخلص الصلاة...!!
ترييت بعدني ربع ساعه عشان اضمن انه الصلاة خلصت فبوظبي...
واتصلت..
والحمد لله حصلته مفتوح هالمره...
ناصر: آآآآلووه...!!
منى: مرحبا ناااصر... السلام عليك.!!
ناصر: وعليج السلااااام هلا منّوووه...شحالج؟!
منى: بخير ناصر..انته شحالك؟!
ناصر: الحمد لله...شحالها امايه وابويه وخوانج كلهم..!!
منى: كلهم بخير وسهاله...آآآه.. كنت في المسيد تصلي.؟!
ناصر: هيي...خير شو مستوي..
منى: همم... ابغي اقولك شي مهم... اذا حد وياك الافضل انك تقوله يروح واتم بروحك..
ناصر: ............ لحظة..
سكت..وسمعت ناصر يتكلم مع شخص... وبعدها رد وكلمني..
ناصر: خير منى..شو صاير شغلتي بالي..؟!
منى: اماايه ياناصر...
قال لي بنبره خوف..
ناصر: شفيها امايه..!!
منى: امايه معصبه عليك...
سكت شوي ناصر وبعدها قال..
ناصر: علي انا؟..شو السبب..!!!
منى: عشان عرسك..!!
طال سكوت ناصر هالمره اكثر واكثر..
بعدها قال بنبره تردد..نبره غريبه...مرتبكه..
ناصر: كيف...كيف..!!.آآه..لا ياربي...
استغربت..
منى: شفيك..؟!..شو اللي كيف كيف... معصبه لانك رافض الزواج قامت وحلفت تخطب لك بروحها ومن دون شورك..!!
ناصر: شوووووووه.؟!!. يعني مااا..!!.. اوووف عيدي عيدي من اول تشوشت...والا اقولج لحظة شوي...
بعدت السماعه عن اذني واطالعت فيها مستغربه....
ردة فعل ناصر غريبه جدا جدا... الظاهر انه عنده صداع ومفتر راسه ..!!
والا بالله شو اللي في كلامي يخليه يتشوش ومايفهم..!!
عيني قامت تحرقني...اليوم مالبست النظاره في الشمس مع اني لازم البسها وهذي نصيحة الدكتور..
وفوق هذا المهب اللي هبّت علينا فجاه طيرت علينا الرمل... فجيت سفرتي وتلثمت بها..وتوجهت لسيارة ابويه.. بطلت الباب ودورت داخلها على نظارتي..
لبستها وتوجهت عند قوم ابويه وخالي..
راشد: يابويه وين بترومون تتغدون فهالمهب...
بو راشد: والله انا اشوف انه مابنروم نتغدى بعد... تبونا نغير البقعه؟
يابر: السيح واحد والمهب وحده ...مابنروم نتغدى الاكل بينترس رمل..
عبدالله: اسميها اختربت السيره... شو يعني نرد البيت نتغدى؟
بو راشد: لا مابنرد البيت...ليش مانسير مزرعه خلفان..
راشد: فكره والله... لين مانوصل هناك يبالنا ساعه اذا بتسيرون خلونا نقوم الحين..
بو راشد: مابنروم نقعد هني والمهب مابتهدا... خبرهم خلهم يلمون اغراضهم وبنروح..
خليتهم وسرت عند قوم امايه وفاطمه وشويخ...
راشد: امااايه..
ام راشد: لبيه..
راشد: لبيتي حاية...ابويه يقولكم لموا اغراضكم وشلوا غداكم بنسير مزرعه خالي خلفان...بنتغدى هناك...
ام راشد: ليش؟
فاطمه: صدقه امايه مابنروم نتغدى هني..!! المهب عمتنا...
ام راشد: متى تبون اتغدون انتوا العصر؟؟؟
راشد: نتغدى العصر عالاقل بنتهنى بالاكل ..مب هني بنندفن رمل..
ام راشد: خلاص اللي تشوفونه..
راشد: هاتي الجدر ماترومن له انا بشله... شويخ سيري بطلي دبة سيارة ابويه..
شيخه: اوكي..
ام راشد: هااا عاد عن ينجب عنك..
راشد: عنبوو يا امايه..!! يالله يالله انتوا خلصوا... وين مهروه ماتساعدكم؟
فاطمه: خلها ماسكه خلووف ويالسه في سيارة مبارك عن المهب...
حست بوزي بظيج...يا هالمبارك اللي مب رايمه تبتعد عنه..اذا مالصقت فيه هو تلصق بغرض من اغراضه..
يا سفرته يا سيارته... !!.. اوففف
شليت الجدر وحطيته في دبة السياره... ومن ورا نظارتي شفت مهرة يالسه في سيارة مبارك ..بعيد عن المهب ومستانسه ومرتاحه..ونحن نكرف...!!
يمعت الشباب عشان يشلون الاغراض الثقيلة عن الحريم... مبارك وسيف تكفلوا بالدراجه يحملونها.. وحشروا مهرة اللي كانت قاعده داخلها... قامت ونزلت عنها وركبت في سيارة سهيل...
وبعد ماخلصنا تحميل كل الاغراض اللي نزلناهن...
سهيل: وين ساير راشد؟
راشد: بسير سيارة ابويه..
سهيل: لا تعال تعال اركب ويانا...
راشد: لا..مهرة عندك..
سهيل: بنفرها ورا..مليت ياخي في الطريج يوم ياييين ...ماعرف اسولف ويا مهروه..
راشد: بتظايج اختك..
سهيل: عندها خليفه ولاهيه وياه..
راشد: بيشلونه عنها...
سهيل: لا سمعتها تقول لفاطمه تخلي خليفه وياها لين المزرعه...
راشد: همممممممم..اوكي..
مشيت ويا سهيل للسياره...
سهيل: مهرووه ركبي ورا راشد بايي ويانا...
رفعت مهرة نظرها لي منقهره..
مهرة: برايكم عيل بركب عند قوم خالي...
راشد: شو يركبج عند قوم خالج ركبي ورا مابناكلج..
قهرتني صدق...شو فيني انا يرب ماتتحمل القرب مني؟!..
حتى في سيارة وحده ماتبا تركب وياي؟ ماصدقت تحصل سبب عشان تربع تركب عند مبارك...
سخيفه..!!!
سهيل: مهرووه ماشي سيره ويا قوم خالي..ركبي ويانا مثل ماييتي ويانا...
نزلت مهرة وفي ايدها خليفه...دارت عالسياره وركبت ورا سهيل...وركبت انا جدام وتحركنا...
في نص الدرب.. سيارة خالي ورانا دقت لنا هرن عشان نوقف...
وقف سهيل ونزل دريشته..ومن صوبه وقفت سياره خالي ونزل مبارك دريشته...كان بلا سفره ولابس نظارات..
سهيل: هاااااااه..؟!..
مبارك: بتخبركم سفرتي عندكم؟؟؟
كتمت غيظي من سخافة السؤال... موقفنا عشان يسال عن سفرته..!!..
سهيل: سفرتك؟ مادري والله...!!
سمعت مهرة تظحك..التفت ورا حصلتها تفتح دريشتها...وتفر على مبارك سفرته وهي مبتسمه...
مسكها وضحك هو بعد...
مبارك: ثانكس ماي سكريتري..!!.. يالله توكلوا..سوري عطلناكم...
سهيل: لا عادي...
سكر سهيل دريشته وقال وهو معقد حياته..
سهيل: مهروه؟ ليش عندج سفرة مبارك؟!..
مهرة: كم مره يفرها وايودها له ويوم اعطيه اياها مره ثانيه.. يرد ينساها... دوم ينساها.. واحصل نفسي مغصوبة اني ايودها له...
سكت سهيل شكله ماعطى الموضوع اهمية زايده..
اما انا بصراحه مابلعت التبرير...!!..
في المزرعه..خالي خلفان اللي عطيناه خبر من قبل انه بنييه كان يتريانا... نزلنا اغراضنا وحطينا الغدا في المطبخ.. وسلمنا مسؤوليته للحريم...
الحريم طبعا من دون مهرة... اللي مشت بخليفه وراحت يلست عالمريحانه ... حسيت للحظه انها حاطه نفسها في فقاعه وماتدري عن هوا دارنا....
وعلى طاري الهوا...الجو هني هادي وحلو.. فرشولنا فراش خارج الاستراحه الصغيره في الظلة ويلسنا عليها ونحن ميتين يوع...
وبعد ماتغدينا.. اذن العصر..
قال لنا خالي خلفان بانه في مسيد بسيط مسوينه قريب من هني... توضينا ورحنا..
ونحن في الدرب سحبني ابويه من ايدي وقال لي في اذني..
بو راشد: تشوف هالمزرعه الي عدل مزرعه خلفان..!
راشد: هي بلاها..؟!..
بو راشد: تعرف منو راعيها؟!.
راشد: لا والله ماعرف ...
بو راشد: مالت سلطان الـ(....)... ..
التفت له متفاجئ ومستغرب...
راشد: اللي تبون تخطبون لي بنته؟!!..
بو راشد: هي نعم...
راشد: سبحان الله ياصغر الدنيا...
التفت ابويه لخالي خلفان وقال..
بو راشد: اقول بو حمد... سلطان موجود اليوم فمزرعته؟!..
خلفان: هي نعم يا عقب الغدا...عالساعه 3 جي... واحيده مشغول ويا العمال..
بو راشد: جي شو يسووون؟!..
خلفان: مادريبه اون يبا يسوي حوض سباحه للصغار... اللي عندهم مال الكبار يخافون الصغاريه يغرقون فيه..
بو راشد: ظنك بنلاقيه في المسيد..؟!
خلفان: معلوووم بو محمد مايفوت فرض..
بو راشد: ياحيه..
التفت لي ابويه بنظره لها معنى....
انا عن نفسي ارتبكت..وبحركة لا ارادية التفت لكندورتي اشوفها وصخة والا نظيفه...والحمد لله كانت نظيفه...
احتمال يكون هذا الريال عم المستقبل....
محد يدري...!!
مشاركة: ::][مــــوعــــد مــع الـــســـــعـــادة][ :: قصه في منتهى الروعه
بعد اربع ايام من الاحداث السابقة...
---------------------------------
اليوم : الثلاثاء...
المكان: صالة بيت سلطان...
الوقت: الثامنه مساءا..
--------------------------------
( يوسف)...
دخلت من بعد امي البيت... تونا يايين من بيت يدووه... كالعاده..ماشفت كنه...
كنت انا منزعج ومشغول بافكاري وما انتبهت لانزعاج امي بعد...
كنت مفكر ان امي سايره زياره بس..مب لغرض معين...
لكن من دخلنا البيت اكتشفت العكس...
يلست امي عالكرسي متظايجه ..كنت انا على وشك اني اروح حجرتي..لكني سمعت منى تسال امي بلهفة وتوتر..
منى: ها امايه.. شو صار وياج؟
عقدت حياتي وتراجعت... شو بعد شو صار؟!!.. ليش شو المفروض يصير؟!!..
تراجعت ويلست في كرسي منفرد..
رفعت امي ايدها فوق مقهوره وهي تقول..
ام محمد: حسبي الله على بليس هالولد....ظيع البنت من ايدنا حسبي الله ونعم الوكيل..!!
بطلت انا عيوني...التفت لمنى وحصلت ابتسامه بدت ترتسم على شفايفها...
يوسف: امايه شو صاير؟
ام محمد: شو بعد شو صاير؟.. اخوك ماغيره مشيبلي راسي... تم ياجل وياجل في سالفه العرس...ويوم قررت اني اخطب له بدون شوره..ماواحيت افج حلجي بكلمه لام مايد الا وهي تقولي هالخبر..!!
يوسف: هدي اعصابج امايه..!!..أي خبر؟!..
ام محمد: نوره خطبها احمد ولد خالتها...!!
انصدمت...ماتوقعت للحظة ان نوره بتوافق على شخص ثاني غير ناصر..!!..معقوله يئست من المحاولة؟!..
يوسف: شوووو؟!... نوره انخطبت؟...متى؟!..
ام محمد: شو دراني متى...قريب شكله الا هاليومين...
منى: امايه بدال ما اتمين معصبة جي ادعي بالتوفيج للبنت...
ام محمد: الله يوفقها ان شاء الله لكني مقهوره من اخوج... لو هو مب معاند جان الحين نوره فبيتنا وام عياله لكن هو الله يهديه ياربي...
يوسف: امايه..تبين الصدق محد منا يبا نوره تكون حرمه ناصر...ماتناسبه وهو مايبغيها...!!
ام محمد: عاد الحين طارت البنت ومافي فايده نرمس في هالسالفه... والا انتوا شو تعرفون اصلا بهالامور...!!
يوسف: خلاص هدي اعصابج اكيد نصيبه في بنت ثانيه...!!... وان شاء الله بتكون احسن عن نوره بمية مره...!!
سكتت شوي امي وقالت...
ام محمد: دام ماتبون نوره خلنا نخطب له كنه عيل..!!
حسيت كانه حد ظربني بوكس على معدتي بقو...
كنه... تتزوج ناصر.؟!!...
رفعت نظري لامي برعب..
منى: لااااااا ...امي شفيج ... كنه مب لناصر...
ام محمد: ليش؟ تراها بنت عمه ... حالها حال نوره...
كنت بعترض..بقول أي شي... لكن الالم كان اكبر من قدرتي عالكلام....
طول عمرها امي تفضل ناصر علينا كلنا.... امي مستعده ادوس على قلبي وتيوز كنه لناصر بس عشان تشوف ناصر مستقر ومستانس...
اما انا فليش تهتم...
بس كنه.... كنه لي... لي انا مب لناصر..!!...
زادتني هالفكره جمود...واذا كنت مب قادر اتكلم قبل احين فعلا ماقدرت لا اتحرك ولا اتنفس..!!!
منى: امي... لا تخلين العصبية تعميج...ناسية انج شاورتي يوسف بخصوص كنه..!!
التفتت لي امي اطالعني..
ام محمد: تراه رفض...
عقدت حياتي مقهور..فعلا ساعتها اعترضت لكني مارفضت... وفوق هذا بالاخير رضخت وقلت لها تسوي اللي تبغيه... ليش ما اعتبرت اني وافقت؟؟.. والا هي تحرف الكلام باللي يمشي مع مزاجها وخططها.!!..
منى: يوسف ؟؟ رفضت كنه؟!!...
اطالعتني منى صدمه... كنت بقولها لا... لكن امي قاطعتني..
ام محمد: تراه تم متردد في السالفه الا انا غصبته عقب... ويوسف ماعليه لين احين ماتخرج هو.. بياخذ عايشه يوم تتخرج من الثانوية..هذي اخر سنه لعايشه... ولين ماتتخرج كده هو تخرج من الجامعه واشتغل واعتمد على نفسه....
غمضت عيوني بالم... لهالدرجه وصلت القساوة عند امي... تيوز فلان بفلانه وعلان بعلانه من دون ماتسال او تحاتي مشاعرنا؟!...
منى: يوسف... ارمس قول شي شفيك ساكت...
تنهدت...حسيت الهوا يعورني وهو يدخل بارد لصدري...
قمت من الكرسي وانااقول لها بهدوء...
يوسف: ماتفرق يامنى قلت والا ماقلت... اللي تباه امج بتسويه...! المهم عندها ان ناصر يستانس ويستقر...
خليتهم وطلعت من البيت...ركبت سيارتي وتميت ادور بها في الشوارع...
شو هالحظ اللي علي.... من اتعلق بانسانه ياخذها شخص ثاني عني...
هذي للمره الثانيه اسكت... كنه بطير من ايدي...
وانا ابا كنه لي... ماتحمل فكره ان ناصر ياخذها عني...
ما اتحمل فكره ان أي شخص يتقرب من كنه اساسا....
بدون حاسية مسكت تيلفوني واتصلت على رقم بيت يدووه...
سمعت صوت لطيفه اللي في الاعدادي ترد علي...
سكت..ومارديت...
لطيفة: آلوووه..منووو عاد؟!!..
وبعد سكت... ماكنت ابغي اسمع صوتها هي...
شوي وسمعت صوت كنه من بعيد...
كنه: منووو لطوف؟
لطيفه: مااااادري مايردون...
كنه: هاتي اشوف..سيري عند يدوه تباج تهمزينها..... آلووه...!!
قز قلبي من مكانه يوم سمعت صوتها....!! وينج ياكنه ماتدرين باللي تخطط له امي.... !!..
كيف بقولج باللي يصير..؟!..كيف بتصرف..!!.
وقفت سيارتي في باركن وتميت ساكت...
وكنه بعد تمت ساكته...
بعدها قالت لي..
كنه: تكلم عاد لا اتم ساكت...!!
تنهدت انا وسكت...
كنه: يوسف...رقمك طالع في الكاشف والا ناسي؟!.. اعرف انك انته متصل ارمس...!!
قلت لها بصوت اعلى بشوي من الهمس.... واضح فيه الالم...
يوسف: ماقدر..
كنه:.......... يوسف شفيك..؟!..
يوسف: بموت...
سمعتها تشهق بخوف...
كنه: بسم الله..ليش تقول جي...؟!..
تنهدت مره ثانيه وسكت...شو بقولها يعني..
كنه: يوسف لا تخوفني...!!!!...
يوسف: امي تبا تخطبج لناصر كنوه...!!
كنه:.............
يوسف: بسوي اللي اقدر عليه عشان امنعها... واذا طلع الموضوع من ايدي...بس اباج تعرفين اني بذلت جهدي عشان تكونين لي... وماتحطين بخاطرج عليه... سمحيلي...
سكرت قبل مايكثر الكلام بيني وبينها.... اغلقت تيلفوني لاني ماريد حد يتصلبي ولا اريد حد يكلمني..
حركت سيارتي وطلعت من العين... توجهت لبوظبي..
لازم اكلم ناصر شخصيا واشرح له كل شي....
مشاركة: ::][مــــوعــــد مــع الـــســـــعـــادة][ :: قصه في منتهى الروعه
اليوم: الثلاثاء...
المكان: سيارة مبارك..
الوقت: التاسعه مساءا..
-----------------------------------
(مبارك)...
قعدت اجلب الصور بايدي وانا ابتسم... اللقطات اللي مصورتنها مهرة تظحك... خصوصا الصور اللي فيها انا وسيف..كلهن على غفله... واشكالنا غلط...
تركزت نظراتي على صورة معينه... فيها مهرة وسيف حاط ايده حوالي كتوفها..ويظحكون نفس الظحكه.. ونفس التعبير الاهبل...ومن وراهم كان يالس سهيل في الصالة يلعب بتيلفونه ومايدري انه طالع بالصوره..
ابتسمت .... هالصورة جديرة باني احتفظ فيها...
فتحت السدة وحطيتها داخل...اما البقية لميتهم بالظرف مالهم ونزلت من السياره...دخلت الميلس وانا اتصل على رقم البيت...
مهرة: آآلوووه...!..
مبارك:.. هلا..مهرووه تعالي الميلس بعطيج شي...
مهرة: منو مبارك؟؟
مبارك: لا ريلج... هي مبارك بعد شو... تعالي صدق وين سيف؟
مهرة: طلع ويا جمال...
مبارك: حد عندج في الصالة؟ اذا محد بدخل البيت...
مهرة: لا حد ..عمووه وعفرا ... وابويه يالس ويا حمد وسهيل...
مبارك: شعندهم متيمعين؟؟
مهرة: قاعدين يقنعونه عشان يشل النخل ورا البيت ويبني فيه قسم يديد حق سهيل.. ترا ماشي مكان له عقب العرس..
مبارك: اهااا..اوكي تعالي الميلس بسرعه...
مهرة: اووكيك...باي..
مبارك: باي..
سكرت التيلفون ..وقمت اشغل التلفزيون...ورديت اقعد مكاني..
انتبهت لمهرة يوم دخلت الميلس مع ابتسامه مؤدبة وخجولة مرسومه على ويهها..
مبارك: مرحبا الساع بمهرة بنت خلفان... قربي...
ابتسمت مهرة اكثر..
مهرة: قرييييب...شحالك؟
مبارك: بخيييير... (وعقدت حياتي يوم شفتها بعدها حاطه المشد على ايدها من يوم الحادث)... مهرووه... بعدها ايدج تعورج؟؟
مهرة: لاا..
مبارك: والله انج جذابه... ليش ماتقولين انها تعورج وايد بنوديج المستشفى..!!
مهرة: ماريد انا بخير مافيني شي.... وبعدين مافيني يربطون لي ايدي مره ثانيه ماصدقت افتك منها...
تنهدت...ورجع لي اللوم مره ثانيه...
مبارك: im so sorry..
مهرة: don’t be.. .... المهم شو يايبلي ولد خالي العزيز...
مديت ايدي ومسكت الظرف...
مبارك: يايبلج الصور الهبلة اللي مصورتنها...
مهرة: اللــــــه...حمضت الافلام..!!..
مبارك: لا..ملّحت الافلام....ههههههههاي...
خنفست مهرة وقالت...
مهرة: لا تستخف دمك... المهم مشكوووور وايد ..بروح اشوفهن..
رفعت حواجبي متفاجئ..
مبارك: شوفيهن هني شحقه تروحين داخل يعني؟!..
مهرة: منقوود...
مبارك: شو سالفتكم انتوا والمنقود ليش كل شي على حظي يستوي منقود يعني..؟!!..
مهرة: هههههههههههههههه لو حد غير موجود ماعليه بس جي.!!..رواحنا..!!.. منقود..!!..
التفت عن مهرة واطالعت التلفزيون وانا حايس بوزي... مب عاجبني هالمنطق...
لو كنت افكر بمهرة تفكير الريال بالحرمه جان انا اروحي قلت لها دخلي داخل البيت وابتعدي عني... لكن انا اعتبر مهرة مثل اختي....
انا رديت من الغربة متعطش للاهل للخوات والاخوان... طول عمري عشت وحيد رغم علمي بانه عندي اهل... وبما ان شيخه ماتستلطفني ذاك الزود...اعتبر مهرة اختي الوحيده هي وسيف...مثل اخواني واعزز... واكثر شخصين ارتاح معاهم هني...
مهرة: شو زعلت..؟!..
مبارك: لا مازعلت بس مب مقتنع بالمنطق هذا...المهم سمعي... تعشيتوا؟
مهرة: هييي تعشوا الرياييل...ماتعشيت؟؟
مبارك: لا والله وميت من يووووووعي...
مهرة: ماعاش اليوع ياولد خالي... بس ليش ماتعشيت ويا خالي فديته.؟!..
مبارك: خالج خون فيني ..عازمنه واحد من ربعة الجدام.. وانا سرت اييب الصور ونسيت عمري...قلت بتعشى وياكم بس جدمتوا العشا انتوا اليوم...
مهرة: ماعليه مايهمك... بسير اشوف لك في المطبخ عشا...
مبارك: مشكووووره يابنت عمتي...
ابتسمت مهرة وشلت صورها وراحت...وتميت انا اروحي...
وبعد عشر دقايق دخلت مهرة بصينية صغيرة... يلست انا عالارض وهي حطت الصينية جدامي...
مبارك: ياسلااااااااااااام كل هذا لي...
مهرة: هههههههههه هني وعافيه...
مبارك: يعافيج... تعالي تعشي وياي عاد...
مهرة: طالع.!! شو اقولك انا..؟!..بعدين انا متعشيه وخلاص..
مبارك: اوهووووو عاد مهروووه والله مايهنيلي اكل اروحي بعاف العيشه... عالاقل يلسي لا تخليني اروحي لين مااخلص عشا...
تلفتت مهرة متردده... تقعد او لا...
مبارك: يلسي اقووولج...
مهرة: انزين..بس شويه...
مبارك: طول عمرج بخيله...
يلست مهرة عالارض في مكان قريب ..مكان اقدر اشوفها فيه بسهوله...بديت انا اتعشى وبدت مهرة تفتح الظرف وتشوف الصور اللي مصورتنها...
وكل ماتجلب صوره تبتسم...وكل ماتبتسم ابتسم انا وياها لا ارادي... هالبنت ناعمة وايد... ليت امي حية عشان تشوفها..جان حبتها..!!...
سرحت وانا اتذكر امي... سنه مرت على وفاتها...مشتاقلها وايد... خاطري اكلمها عن كل شي صار وياي..صحيح اني اقرب لابويه من امي...لكن في امور ما اقدر اتكلم فيها الا مع امي... خصوصا سوالف البنات.. ومشاكلي معاهن ايام المدارس... تعودت منها التفهم والاستعداد للاستماع الدايم.. اما ابويه اقدر اسولف وياه واضحك...دايما كانت روحه مازالت شابه..وهو اصلا مب كبير ذاك الزود... كان يعتبرني ربيعه اكثر الاوقات...اما بخصوص المشاكل..ما اكلم ابوي الا في المشاكل الجايده...!!..
التفت لمهرة مره ثانيه بعد ما اصدرت ظحكه.. ابتسمت لها وهي تراويني الصوره اللي كنت فيها زاغد سيف.. وهي تظحك عليها مستانسه...
ياترى كيف عاشت كل هالسنين بدون امها..!! انا سنه واحس نفسي مشتاق لامي بشكل فظيع .....اكيد عمتها عوضتها...بس حسب كلام سيف عن افراد العايله... العمة مب زود مفتكره فيهم...
ولاحظت بعد... ان مهرة مب زود مقربه من عمتي ميره...حيرتني..منو لعب دور الام في حياة هالبنت..!!.. تذكرت كلام سيف... مهرة ماكان طول عمرها جي... حسب كلام سيف...رجعتي انا و ابويه لحياتهم غيرتها وخلتها تظحك اكثر..اجتماعية اكثر.. تسولف اكثر.....اما هي من قبل كانت شوي منغلقه على نفسها...خصوصا اول مادخلت الجامعه...ياترى ليش؟!..
مهرة: مبارك...فيه صورة ناقصة...!!
بطلت عيوني مستغرب...ثلاث افلام وكل فلم حوالي 30 صوره وماشاء الله عليها تذكر انه فيه صورة ناقصه..!!
مبارك: يمكن احترقت...
وبما اني ما اعرف اجذب...جاوبتني مهرة بوقاحه...
مهرة: او انسرقت....
رفعت عيني لها وهي اطالعني بمكر... ابتسمت...مسكت تيلفوني وفريته عليها...
مبارك: اتصلي بالشرطه...
مسكت مهرة تيلفوني...
مهرة: مابتصل...بفتش...
زغت... التيلفون مليان صور عائلية... من فرحتي فيهم من اشوف لقطة حلوه صورتها... ووايد من الصور تخص مهرة... وكلها على غفله وماتدري عنهن...!!..
مبارك: ياويلج....هاتي.. مررره ماصدقتي انتي...هاااااااااتي...!!
تقربت منها وسحبت التيلفون من ايدها... غصبن عني..صار فيه تلامس بالايادي... تلامس بسيط ماحسيت به لكنه ترك اثر على مهرة...انصبغ ويهها بالحمار...!!..
حطيت التيلفون عدالي وانا مب عارف بشو افكر او احس... ليش مهرة استحت..؟!!... وليش ماتستحي..هذي بنت وخجوله وانا داخل حياتها يديد...طبيعي بتستحي...!!.. نزلت عيني وكملت عشاي...
لكن من طرف عيني شفت مهرة تلم الصور...
مهرة: خلاص بسك قعدنا وياك شوي..صار لازم ادخل...
بيني وبينكم... قلت احسن تروح...مافيني اسوي لها مشاكل. او اهلها ينقدون عليها بسببي..
مبارك: برايج سيري...مشكوووره عالعشا...
مهرة: العفوو... فيه العافيه...ومشكور انته عالصور..
مبارك: العفوو...
خلتني مهرة وطلعت من الميلس... وتميت انا اروحي اكمل عشاي... وافكر باشياء مختلفه...
واكثر شي فكرت فيه ...براءة مهرة وعفويتها...!!...
يئست من محاولاتي اني اساعد سعاد...وهي مب طايعه تخليني اصك شي...اون انا بخرب...!!.. بالتالي طلعت من المطبخ فاقد الامل في المساعده...
رحت الصالة وتوجهت للمكتبه...مسكت الفلم اللي استاجرته وطلعته من غلافه وحطيته في الفيديو.. وخليته يعيد من اول...
سمعت تيلفوني يصيح...دورته عالسريع وين فارنه... ومسكته... "يوسف"...
استغربت.. اول مره يتصل هالحزه..!!..
فكرت اروح اقول لسعاد ما تتكلم لين مااخلص...بس رديت تذكرت ان سعاد مشغوله بالمطبخ تغسل صحون العشا ومابتطلع الحين...
ناصر: مرحبا...
يوسف: هلا ناصر..شو رااقد.؟!..
ناصر: لالا بس ماسمعت التيلفون.. شحالك يوسف؟
يوسف: الحمد لله شحالك انته.؟!
ناصر: بخير ..بخير وسهاله...علوم الاهل.؟!..
يوسف: كلهم بخير ..اقولك..انته في شقتك؟!
ناصر: هي نعم..آمر.؟!
يوسف: ابا اشوفك ظروري.. وانا احين فبوظبي بس اباك ادليني وين البناية..
بغيت اغص...
يوسف ياي هني... هني الشقة..!!.. الله يستر الله يستر..
يوسف: الووه..
ناصر: هاااه... انته وين احين؟
يوسف: اقولك فبوظبي...
ناصر: وين بالضبط؟!..
يوسف: في شارع الـجوازات..
ناصر: اقول ترياني عند الـ(...)... وانا بييك.. لانك مابدلها شوي تظيع..اوكي؟
يوسف: لا تبطي علي..
ناصر: مابتاخر..يالله فمان الله...
يوسف: فمان الكريم..
سكرت عن يوسف وقلبي يدق دق...شو بسوي....!!.. أي حجة بستخدمها عشان ماادخله الشقة..!!
ماشي فايده يمكن يقرر يبات بعد ...!!!..لازم اتصرف وبسرعه..
خذت مفاتيحي ورحت للمطبخ...
ناصر: سعاااد...
سعاد: عيووونا...
ابتسمت بارتباك... يارايقه انتي...!!
ناصر: تسلم عيونج.. اقول سعاد..اخويه متصلبي ويبا اييني الشقة..وهو مايدري لين احين اني معرس... اباج تشلين الصور واي اثر ممكن انه يشك فيه من الصالة...اوكي؟ لين عالاقل اخبره...
تمت سعاد ساكته تستوعب اللي قلته...
سعاد: رح تئيلوو؟!!..
ناصر: لابد اني اقوله ...ماتعرفينه هذا انتي ذكي وبينتبه على جو البيت...وباني مب بروحي ساكن فيه...
سعاد: طيب..ولا يهمك..
ناصر: واباج يوم ارجع تندسين في الحجرة وتصكين على عمرج لين ما انا ازقرج...اوكي؟
سعاد: طيب..
قالتها سعاد بتسامح...وايد عليها متحمله حركاتي البايخه...
حطيت ايدي على خدها بتودد..
ناصر: سوري حبيبي بس مضطر.. يالله بروح..
سعاد: الله معك حبيبي...!..
خليتها وطلعت من المطبخ ومن الشقة...
ركبت سيارتي ورحت ليوسف... مريت عدال سيارته ولا انتبه..وبعد التدقيق..حصلته ماسك السكان ومسند راسه عليه بتعب.. او ياس....عقدت حياتي متوجس...
انا من ربشتي ماسالت اخويه شفيه يايني هالوقت لين بوظبي...!!!... شو هالانانية اللي فيني..!!..
دقيت هرن... فز يوسف..وانتبه لي.. نزل من سيارته عشان يواهني..ونزلت انا بعد وتوايهنا..
ناصر: خير يوسف بلاك روعتني تراك..؟!..
يوسف: تبانا نرمس في الشارع..!!..خلنا نسير شقتك وهناك يصير خير...
ناصر: اللي تشوفه...
ركبت سيارتي وانا متوتر...
رحت لشقتي ويوسف وراي... فتحت الشقة وانا مطمن من انه سعاد اندست في الحجرة لاني اتصلت بها وخبرتها اني واصل..قبل ما انزل من السياره...
دخل يوسف الشقة وحسيت انه مب عاطي اهمية للشقة بانه يتفرج عليها... بس اول ماشاف انه على يمينه فيه صالة..دخلها مستعيل ويلس عالكرسي يتنهد وهو معقد حياته...
استغربت..حالة يوسف صعبه واكيد الموضوع جايد... والا أي انسان طبيعي يدخل مكان لاول مره شي طبيعي انه يدور بعينه عالمكان بفضول..!!!..
سكرت الباب ودخلت انا بعد الصالة ويلست عداله...
ناصر: يوسف..الاهل كلهم بخير؟!
هز يوسف راسه بالموافقه...
ناصر: شفيك ياريال روعتني تراك..ارمس..!!
تراجع يوسف وتساند على ظهر الكرسي بتعب واضح...
يوسف: تعرف ان امي سارت تخطب لك اليوم.؟!...
عقدت حياتي..
ناصر: احلف..؟!!..
يوسف: وتدري ان نوره طلعت مخطوبه وخاطبنها احمد..!!!..
تنفست بارتياح بعد ماكنت حابس انفاسي...الحمد لله اللي ابغيه صار والخطة نجحت..
ناصر: الحمد لله...
اطالعني يوسف بنظرة ماقدر اسميها الا بالنارية...اطالعني بقهر وغضب واضح....
قال لي بعصبية...
يوسف: وتدري ان امك الغاليه قررت تخطب لك كنه بدال نوره..؟!!!...
انصدمت من كلام يوسف وتميت ساكت فاج حلجي... ياربي انا من وين بييبها والا من وين..؟!... احين طلعت لنا كنه...!!.. وبعدين وياها امي..!!.. لين متى هالحاله يعني.!!..
رن تيلفون يوسف في هاللحظة ورد عليه بعصبية..
يوسف: هاااااه.؟!... شو تبين.؟!.. مافيني شي.... ليش؟... مافيني شي قلت لج... اوفف عند ناصر... هي فبوظبي... ماعرف منّوووه خليني فحالي.... لا تقوليلها شي ليش من متى يهمها هي اصلا وين رحت ومن وين يييت والا اذا مت والا بعدني حي... خلاص....خلاص قلت لج... باي..
هديت اعصابي عشان اعرف اتعامل مع مزاج يوسف الصعب... اول مره اشوفه جي... حتى يوم تفارق عن حبيبته اللي في النت ماكانت حالته جي ....معصب ومقهوور من الكل...!!!...
ناصر: هد اعصابك يوسف...ليش تكلم منى جي وهي زايغه عليك...!!
يوسف: ................
سكت عنه..ادري انه يوسف ماتهون عليه منى ينازعها... على قد مايظارب وياها يحبها وايد...واكيد انه حالته هي السبب في انه تخليه يتعامل معاها بهالطريقه.... وادري انه بيتلوم عقب يوم يهدا ...
ناصر: تعشيت..؟!.
تندمت على هالكلمه اول ماقلتها ...لانه يوسف اطالعني بنظره معصبة ثانيه...وقام من مكانه وهو يفاتن...
يوسف: منو يفكر بالاكل انته بعد ناصر...سمعت اللي قلت لك اياه؟؟... امايه تبغي تخطب لك كنه...!!
ناصر: بس انا ماريد كنه...
يوسف: انا اللي ابا كنه مب انته...!!...
ناصر: ادري...
يوسف: عيل تصرف...!! لا اتم ساكت عنها جي... انته هني فبوظبي وماتدري هي شو تخطط هناك...امك من تحط شي فبالها على طول تنفذه وماتسوي شور لحد ... اليوم مسكتني وقالت لي وصلني بيت يدتك وسرت بها وانا مادري انها سايره بتخطب نوره..مادريت الا يوم رديت البيت وياها وكانت معصبه لانها اكتشفت ان نوره مخطوبه...قامت وفكرت بكنه...وانا بتيوزني عويش...
ناصر: مابيصير شي من هالكلام انته بس اهدا واقعد....
حرك يوسف ايده بعصبية..
يوسف: ماريد اقعد...
ناصر: يوسف...!!!..
التفت لي يوسف ويديه على خواصره..وعلى ملامحه الظيج التام...
ناصر: اقعد...
تافف يوسف وقعد ...
ناصر: انته قلت لامي انك تبغيها...
يوسف: مب ذاك اليوم مشاورتني جدامك بخصوص كنه.؟!..
ناصر: هي..
يوسف: مب انا اعترضت في البدايه عقب وافقت..؟!...
ناصر: صح..
يوسف: احين قالت لمنى اون انا اصلا رافض كنه... وانها هي غصبتني عليها عشان جي انا سكت.. على كيفها تحرف الكلام عشان بس تنفذ اللي في بالها...كل اللي يهمها هو انك تتزوج وتستقر.. اما ولدها اللي هو انا مايهمها اذا حرمته من الانسانه اللي يبغيها تكون زوجته... عادي بتيوزني حتى من البشكاره...
ظحكت على كلام يوسف الانفعالي... بالعكس يوسف وايد غالي عند امي ..بس هو يحس انها ماتحبه ذاك الزود..لانها دايما بالها مشغول فيني... اما يوسف الله راضي عليه وهي مطمنه عليه...لانه مب طايش مثلي...
يوسف: تضحك بعد..؟!!!..
ناصر: عين من الله خير... بنحط لك عشا وبتعشى... وبترقد الليله هني...وباجر ان شاء الله برد وياك العين وبنرمس امي وابويه في السالفه ... جي مب عكيفها هي تزوج وتخطب بدون ماتشاور ..الدنيا مب فوظه...
مشاركة: ::][مــــوعــــد مــع الـــســـــعـــادة][ :: قصه في منتهى الروعه
عقد يوسف حواجبه وقال...
يوسف: بنحط..؟!...
تسرطت انا متوتر... يا وقت الاعتراف...اذا كان بيبات عندي فاكيد انه بيلاحظ وجود حرمه في البيت...ومب حلوه انه ينصدم فيها..خلني اخبره...يوسف ثقة...ويعتمد عليه...
ناصر: هي... انا مب ساكن اروحي في البيت...
عقد يوسف حياته مب فاهم....
ناصر: مالومك لانك ماانتبهت... بسبب حالتك الحين...لكن مب ملاحظ ان البيت معدل زيادة عن اللزوم بالنسبة لعزابي.؟!!..
عقد يوسف حواجبه اكثر وقام يتلفت حواليه...بدهشة تامه...
وانا على اعصابي..
مساله وقت بس وبيفهم يوسف كل شي من نفسه...يوسف ذكي بما فيه الكفاية عشان يعرف...
وفعلا..بعد دقيقه...قام من مكانه والدهشه مسيطرة عليه... رفع سبابته بويهي وقال لي بتهديد..
يوسف: لا تقولي..!!
قمت انا بعد وواجهته ...
ناصر: الله يبارك فيك...
قال لي بتهديد..
يوسف: نـــاصـــــر...!!!.. دخيلك لا تقولي...
ناصر: هذا اللي صار يايوسف.. تزوجت.. صارلي اكثر من شهر احين متزوج...
ارتفعت انفاس يوسف وهو يتامل بويهي بمشاعر ممزوجه....
يوسف: اكثر من شهر...بس...بس انته كنت في ســوريــ....لا...لا لالالالا ناصر لا تقولي انك خذت سورية..!!!..
من زود صدمه يوسف رفع ايدينه وغطا بهن ويهه... كانه يبا يمنع نفسه انه يشوف الحقيقة...!..
ناصر: هي نعم خذت سورية لكنها ماتقل باي شي عن بنات البلاد..ويمكن احسن عن بعضهن بوايد....
مادريت الا ببكس سنع على غزي طيّر ويهي الصوب الثاني.. ومامرت ثانيه الا ويوسف ماسكني من ثيابي ويدقبي عالايدار وراي بقو...
يوسف: كيف قدرت...كيف قدرت تسوي جي كيف...؟!!..
مسكت ايديه ابا ابعدهن عني بس مادري من وين طلعت هالقوة فيوسف مره وحده...مسكين ما الومه تراكمت عليه المشاكل وماقام يعرف كيف يتصرف....
ناصر: هد اعصابك يوسف...
رد يقولي مره ثانيه...
يوسف: كيف قدرت...كيف قدرت تسوي جي باهلك ناصر كيف..!! تبا تذبح امايه علينا انته... ليش جي سويت ليش.؟!..
ناصر: هذي حياتي وانا حر فيها...
يوسف: شو حياتك وانته حررر...يابوي نحن ماعندنا حياتي ماحياتي... شو تبا تسوي بامي انته... وين تبا ابويه يودي ويهه من الناس..!!.. كيف مافكرت فينا وبسمعتنا كيف تسوي جي كيف؟!!...
مع كل سؤال كان يوسف يدق بي عالايدار...
كنت اقدر ادزه عني بكل سهوله لكني مابغيت اظارب وياه... خله ينفس عن غضبه يمكن يهدا بشكل اسرع...
ناصر: يوسف... قلت لك هد اعصابك وخلني افهمك كل شي...
تم فتره ماسكني على هالحال يطالع ويهي ووده يذبحني ويفتك مني... لكني شوي شوي قدرت ابعد ايده عني... طلبت منه انه يقعد بس مارد علي وتم يطالعني بنظرات شيطانية...!!
بالتالي يلست انا... وخبرته بكل اسبابي وكل شي دفعني للزواج من سعاد... وطمنته من سمعة سعاد الشريفه واني ماتعرفت عليها عن طريق حرام او شي... خبرته بانه اصرار امايه على تزويجي من نوره هو اللي خلاني اتزوج من دون علمهم...
وبعد ماخلصت كان يوسف قرر انه يقعد..ويحط راسه بين ايديه بياس...
يوسف: ماصدق انك سويت اللي سويته ماصدق...
ناصر: هذا نصيبي من الدنيا وخذته يايوسف ... لا تكبر المسائل..
يوسف: لا اكبر المسائل؟؟ الظاهر بعدك مب عارف انته شو سويت فينا..!! حوالي شهرين وانته معرس..ولا قلت...ليش ماقلت ..؟ ليش ماخبرت حد...
ناصر: مايتني الجراه صراحه اخبر قوم امايه..
يوسف: طبعا مابتيك الجراه...مسود ويهك...
قهرتني كلمه يوسف...مهما كان انا اخوه اللي اكبر عنه...
ناصر: بس عاد...!!!... يكون فعلمك انا فخور بزواجي من سعاد... واعتبر ان حظي من السما... وبكون فخور اكثر بعد بالياهل اللي بتيبه..!!
التفت لي يوسف بصدمه..
يوسف: حامل بعد..؟!
ناصر: الحمد لله الله عطانا...
سكت يوسف عني وتم يتامل فويهي...
يوسف: شو من الحياة عشت ياناصر..؟!!..
ناصر: امور وايده صارت وياي محد يعلم بها غير ربي... المهم..تبا تشوفها؟
ابتسم يوسف بسخرية...
يوسف: ليش لا...صدمة ورا صدمة اليوم...!!
ناصر: خلك مؤدب عاد وياها.. دقايق بزقرها...
تنفست الصعداء على قولتهم بعد ماطلعت من الصالة... هذا يوسف وموقفه جذي صعب...شقايل البقية؟ الله يستر...!!..
دخلت غرفتي حصلت سعاد يالسه عالشبرية مرتبكه....
سعاد: شو صار.؟!..
ناصر: خبرته..انصدم طبعا هذا شي طبيعي.. بس مصيره بيتقبل الموضوع..تعالي سلمي عليه...
سعاد: واللهي خايفي..!!
ناصر: لا تخافين يوسف حبوب...لبسي شيلتج البيظا وبدلي ملابسج لبسي شي ثاني استر...وتعالي الصالة اوكي..
سعاد: مابدي ادخل لحالي خلك معي.
ناصر: اوكي يالله بدلي بسرعه..
بعد مابدلت سعاد وخلصت طلعت معاي للصالة...طول والوقت وهي متشبصه بايدي بقو...خايفه موت من المواجهه بينها وبين يوسف..
دخلنا الصاله ..حصلت يوسف واقف عند الدريشه ومعطينا ظهره...
ناصر: يوسف...
التفت يوسف لي ولسعاد..تركزت انظاره عليها وعقد حياته مره ثانيه...
ناصر: هذي سعاد حرمتي... سعاد هذا يوسف اخويه اللي اصغر مني..
رفضت سعاد انها ترفع عينها لكن يوسف ماخوز عينه عن سعاد.. كانه يبا يشوف شو اللي خلاني افضل سعاد على أي بنت ثانيه..!!!..
عقدت حياتي له اباه يقول أي شي يخوز التوتر...وزين انه انتبه لي..
يوسف: آآه...مرحبا سعاد.. شحالج؟
سعاد: الحمديلا...كيفك انته.؟!..
يوسف: لاباس...مبروك عالزواج ولو انها متاخره ...
سعاد: يبارك فيك يارب...
كل هذا وسعاد مازالت متمسكه فيني وعينها للارض...
ناصر: سعاد ماعليج امر حطي ليوسف عشا مب متعشي..
سعاد: تكرم عينك..
يوسف: لالا سعاد لا اتعبين نفسج انا ماشتهي العشا اصلا...وشكلي برد العين الحين...
ناصر: وين وين وين.؟؟ انته تعبان وماتروم عالسواقه وبعدين الوقت متاخر..بات عندنا اليوم..
يوسف: لا مايصير..
ناصر: بلا يصير..بتتعشى..وبترقد عندنا... باجر انا باخذ اجازه يوم وبروح وياك العين وبنحل المشكله ذيج..!!
تنهد يوسف..
يوسف: ماعليه ببات بس مابا عشا صدق...
سعاد: بعملك ساندويش خفيف مع عصير طيب؟!..
يوسف: ..... مابردج ياسعاد..مشكوره...
سعاد: العفوو هاد الواجب...عن ازنكون...!!
حسيت ان سعاد ماصدقت تحصل سبب عشان تنسحب..وفعلا انسحبت وراحت للمطبخ تسوي سندويش ليوسف.. يترس به بطنه عالاقل..
وبعد ماتعشى يوسف .. خذته للغرفة اللي ما اثثناها لين احين... انا قلت بخليها صالة صغيره لنا والصالة الحالية بخليها ميلس لاستقبال الظيوف... اما سعاد قالت لا...بنخليها غرفة للبيبي..والغرفه الثانيه غرفة غسيل..!!..
ولين الحين ما اثثنا غرفة البيبي هذي بشي مناسب... وكانت فاظيه تماما....
حطينا ليوسف فراش سميك مثل الشبرية المنخفظة مع لحاف وكل شي...وبصراحه حسدته على هالرقده لاني احيانا اشتهي الرقده عالارض...
المهم خليناه يرتاح...
ونحن دخلنا حجرتنا نرقد بعد...هذا اذا قدرنا نرقد من اللي صار معانا اليوم...!!!..
والا انا يبون يخطبون لي كنه...!!..والله مصخره صدق...!!
مشاركة: ::][مــــوعــــد مــع الـــســـــعـــادة][ :: قصه في منتهى الروعه
اليوم: الاربعاء..
المكان: بيت بو راشد..
الوقت: الثانية عشرة ظهرا..
--------------------------------
(شيخه)...
ترييت امايه لين ماتخلص من كلامها في التيلفون مع عمة سهيل... وبعد ماسكرت وهي مبتسمه...
شيخه: امايه انتوا خلاص عزمتوا...؟!!..
ام راشد: باذن الله... انا متفائله.. واخوج بعد احسه متفائل.. وابوج متشجع..والبنت ماعليها كلام وهالمره تخبرت عنها وايد.... لا مخطوبه ولا محيره لحد..وماعندها ولد عم يزاحمنا عليها..عندها ولد عم واحد ومالج... عمرها عشرين سنه وتدرس في الجامعه.. انا اشوفها مناسبه وايد...
شيخه: همممم..حلوه عاااااد..؟!!..لا تبلشون اخويه بشينه..!!...
ام راشد: وابوي عليج انا....انا احيدها البنت حليوة يوم صغيره مادريبها عاد يوم كبرت...
شيخه: همممم..ليش ماتخلون مهرة تشوفها في الجامعه اذا حلوه قبل ماتخطبون..
ام راشد: انتي احين لا تقعدين تسوين لناحركات بنات بايخه...مب لازم تشوفها بنت خالتج.. انا احيد البنت حلوه... واهلها كلهم حلوين شحقه بتطلع هي شينه...
شيخه: هههههه مثل ما انا طلعت شينه بينكم كلكم حلوين...
اطالعتني امي بنص عين..
ام راشد: يام المكر واليور انتي...تبين الا حد يمدحج...!!..
شيخه: هي امايه من زمان ما مدحتيني..!!
ام راشد: مب محتايه مدح احين عندج ريل يمدح فيج..!..
كان الغرض انها تسكتني..ونجحت... حسيت بحراره بويهي من طاري سهيل...
لكني تمالكت نفسي ورديت ادخل بالموضوع اللي هامني احين..
شيخه: انزين ومتى بتسيرون تخطبونها وتشوفونها..؟!..
ام راشد: بالجمعه ان شاء الله بسير انا وآمنه بيتهم...بنشوف البنت اذا قدرنا وبالمره بنخطب ان شا ءالله...
شيخه: بس عاد لازم تعطونهم خبر انكم بتزورونهم..؟!...
ام راشد: اكيد بنتصل بهم..
شيخه: امايه اسير وياكم..؟!!.
ام راشد: قري محلج... بتينا اختج اليوم وبتخاوينا يوم الجمعه صوبهم..
شيخه: شمعنا فاطمه يعني..؟!..
ام راشد: اختج حرمه معرسه انتي بعدج بنت...
شيخه: يعني لازم اعرس اول وعقب اقدر اشارك في هالزيارات الرسمية,.!!.
ام راشد: هي نعم...
وبعد ثلاث ساعات...
كنت يالسه اتغدا وياهم وكنت يالسه عدال راشد... تقربت منه وقلت له..
شيخه: شعليك بيخطبون لك يوم الجمعه..
غص راشد بلقمته وتم يتحنحن..
ام راشد: حلال حلال...شو قلتيله حسبي الله عبليسج من بنت..!!.
شيخه: ماقلت له شي هو وايد حساس ولدج...
ام راشد: سكتي عنه خليه يتغدا....!!..
قعدت اظحك على ويه راشد المنعفس... وكملت غداي..
تقرب مني راشد وقال لي..
راشد: ماقالت لج شي عنها..؟!
شيخه: نفس المعلومات اللي قالتها لك...
راشد: بتسيرين وياهم انتي؟
شيخه: ماخلتني... ابا اتاكد اذا حلوه البنت والا شينه..والا وسط..
ابتسم راشد..
راشد: مب مهم الجمال كثر الشخصية... اباج تسيرين تعرفينها عن قرب كيف تسولف وكيف تتصرف...
شيخه: اقنع امك وانا حاضره...
بو راشد: بس عاد من هالمصاصر عيب عليكم...
شيخه: تصاصر انته وعيوزك بعد لا تهتمون فينا...
ام راشد: شيخووووه !!!..مسودة الويه ماتستحين..!!..
تدخل راشد وقال لامي..
راشد: صدق بتسيرين صوب العرب بالجمعه..؟!
ام راشد: ان شاء الله فديتك ..بسير انا وآمنه وفاطمه اختك...وان شاء الله خير..
راشد: شللي شيخه وياج امايه...اباها تسولف ويا البنت وتعرفها عن قرب..
بو راشد: لا... البنات مايسيرن في هالزيارات عيب...
برطمت انا...وراشد حاس بوزه...
ام راشد: اختك تحاتي الجمال ... انا بقولك اذا حلوه او لا مب لازم راي شويخ..!!
راشد: والله اذا على الجمال خوانها كلهم حلوين ...مابتطلع زد هي من بينهم شينه..!!
قلت لهم مره ثانيه...
شيخه: عادي انا طلعت شينه من بينكم...
التفت لي راشد مستغرب..
راشد: حرام عليج شويخ انتي وايد حلوه...
ظحكت انا مستانسه...
ام راشد: بس ارتحتي؟ ماعليك منها هي من اصبحت تعيد هالكلام علي.. خاطرها تسمع مدحه وسمعتها احين منك...
راشد: ههههههه عنلاتج يالمستقطعه...
شيخه: من حقي... والله حليلي مب عاطيني ويه في البيت... بتعرفون قيمتي يوم اروح عنكم...
بو راشد: شوو ياكم على بنتي....؟!...
ام راشد: بنتك مبزنها وايد تراك...
بو راشد: برايها اخر العنقود هاي...
شيخه: وختامه مسك صح ابويه..؟!
بو راشد: صحين بنت خليفه.... بس ماشي سيرة ويا امج هذي مشاوير حريم مب بنات...
شيخه: ابووووويااااه...
بو راشد: لا.. خلاص عاد..
سكت عن الموضوع ...مستحيل يخلووني اسير وياهم..
التفت لراشد وقلت..
شيخه: مافي امل تعرف اذا حلوه او لا....امي بتغشك..
راشد: ههههههههههههههههه..
ام راشد: عنلاتج من بنت شقا حاطة دوبج من دوبي دوم...كلي وانتي ساكته...
شيخه: وين اكل وانتي حايزه الروب كله..!!!
عطتني امي طاسه الروب بالخيار بعصبية...
ام راشد: اندوج كلي... بس فكيني من صدعتج...
تميت انا وراشد وابويه نظحك على امي وهي تتحرطم علي...
يعيبني اغايظ امايه.... وبشتاق للحظاتنا هذي بعد ما اعرس... بس اكيد اني مابقطع اهلي كل يوم بيييهم...!.
من امس وانا ملازمه امي مثل ظلها.... اخافها تسويها وتتصل بقوم يدووه وتخطب كنه لناصر تلفونيا..وتحطنا بالامر الواقع....
انا كنت مستعده امنعها باي طريقه... لانه اللي تسويه غلط...
وبيني وبينكم... احيانا ماتعجبني تصرفات امي... احسها متسلطه ...!! .. وماتحط أي وزن لرغبات عيالها...
في النهاية هذي حياتهم مب حياتها هي...!!
المهم اني ماخزنت عنها من امس... الا وقت الرقاد... حتى اني نشيت من وقت اليوم لاني اعرف امي اغلب شغلها تقظيه الصبح ونحن رقود...
لا من شاف ولا من درى...!
لكني شفت امي متوتره وحاطه بخاطرها.. بسبب موقف يوسف منها... ويوم قلت لها امس انه ماينلام لانه زعل.. قالت انا امه..جذي يرد علي ويعطيني ظهره وانا اكلمه..؟!...
هذا اكثر شي زعل امي في السالفه.... لانه يوسف طلع من طوره ورد علينا بذاك الرد قبل مايطلع من البيت...
وامس..انا كنت حاسه ان امي خايفه عليه ...لكنها كانت تكابر ..وماطلبت مني اتصل فيه غير مره وحده....
ويوم قلت لها انه عند ناصر فبوظبي ويمكن يبات هناك..اطمنت شوي ونامت بعدها....!!..
منى: امايه اصبلج قهوة.؟!..
ام محمد: لا مابغي قهوة...!!..
منى: انزين ليش معصبه عاد خلاص هدّي...
ام محمد: انا مادري شو قصرت به عليكم... ليش عيالي مايسمعون شوري..على ما اشاورهم بشي قالولي لا مانبا... !!
منى: ماقصرتي الله يطول بعمرج يامايا..بس مساله زواج ناصر من كنه غير وارده وفاجئتينا بها...
ام محمد: ليش يعني..؟!!.
ماعرفت شو اقول لامي... ماقدر اشوه سمعه كنه واقول ان كنه تحب يوسف...وماقدر افشي اسرار يوسف واقول لامي بانه يوسف بدا يتعلق بكنه فعلا....
منى: مادري هالشي حاطينه من زمان في بالنا ان كنه ليوسف...!!..كيف فيوم وليله تغيرين هالفكره...!!..
ام محمد: انزين يوم اخوج يوسف مايبا كنه شو المانع...
منى: ويمكن يباها انتي حتى ماخذتي شوره مسكين...!!.. بعدين مب شرط يعني ناصر ياخذ وحده من بنات عمه ...هو من قبل مايبغيهن ..يبا وحده من برا العايله بس انتي اللي رافضه...!!
ام محمد: والله انا مابغي الناس ترمس علينا وعلى ولدي...!!.. ماباهم يقولون فضل الغريبه على بنت عمه اليتيمه..!!..
منى: امايه الناس شلوا هالفكره من بالهم هالزمن... الناس تغيروا..الا انتوا بس ميبسين روسكم...
كانت امي بترد عليه لولا انها سمعت صوت سيارة...
ام محمد: قومي وايجي شوفي منو ياي..؟!..
قمت من مكاني وسرت للدريشه...
صديت لامي وقلت..
منى: هذا ناصر ويوسف يايين من بوظبي الظاهر..!!
تنهدت امي بارتياح...لكنها تمت قاعده مكانها تتظاهر بالبرود...
اما انا فتميت واقفة مكاني اتريا خواني يدخلون... وانااشم المشادات الكلامية يايه بالطريج وياهم...!!
دخل ناصر قبل يوسف...وكان مبتسم.. كانه مايبا مشاكل..
اما يوسف فدخل عابس الويه...
ناصر: السلام عليكم...
تقربت انا ووايهت ناصر.. وبعدها راح ووايه امايه... اما يوسف بعد مادخل وسلم بالكلام راح صوب الدري..
ناصر: يوسف..!!..ماسلمت على امك..!!!..
وقف يوسف وتنهد...الظاهر بعده زعلان على امي...
تراجع ومشى صوب امايه بتكاسل... حب امي على راسها..وامي تمت جامده وزعلانه...
شاف يوسف ان امي ما تجاوبت... رفع كتوفه بياس وهو يطالع ناصر كانه يقوله :" انا سويت اللي علي"..
وبعدها تراجع وراح...
ناصر: انزين اقعد ويانا..!!..
يوسف: اوفف..انا من امس مابدلت ثيابي ولا تسبحت ابا اروح ارتاح شوي... عن اذنكم...
راح يوسف.. وتمت امي قاعده..وانا وناصر بعدنا وقوف...اطالعت ناصر..كان يبتسم ابتسامه غريبه ويحاول يمسكها...
تميت انا اطالعه بتعجب.. ويوم رفع نظره وشافني... حط ايده على قلبه وقال لي بصوت واطي
ناصر: مشكله هذا..!!..
وظحك... وماقدرت الا اني اظحك معاه على يوسف اللي الظاهر انه فعلا مغروم...
يلس ناصر عدال امايه.. وحط ايده حوالي كتوفها وهو يظحك عليها...
ناصر: هاااااه ام محمد...شحالج..؟!..
اطالعته امي بنص عين يوم لاحظت نبرة صوته الخبيثه....وناصر مازال مبتسم ابتسامه وسيعه..
ام محمد: قم عني...!!
ناصر: هههههههههه...شو مسويه امايه من ورايه اعترفي...!!
ام محمد: شو بعد سويت .؟ ماسويت شي...
ناصر: هههه والله..!!..طلعي لسانج بشوف اذا فيه نقطه سودا..!!
نقعت انا من الظحك... على اسلوب ناصر الغريب....
يوم كنا صغار ...امي كانت تطلب منا نطلع لساننا عشان تشوف اذا فيه نقطه سودا او لا..اذا فيه نقطه سودا معناته نحن نجذب...!!..
اسلوب عيايز...
ام محمد: عنلاتك... والله اني ماسويت شي..بغيت اسوي لكن مارمت اسوي كله من تحت راسك...!!
ناصر: ههههههههههههه... والا طلعت نوره مخطوبه..!!..شفتي..؟!..هذا عشان تعرفين يوم تتصرفين باموري من دون علمي شو يصير..!!!..
ام محمد: موول لا تعرس انزين ناصر؟؟ خلاص انا غسلت ايدي منك...
ناصر: شقااااايل قالوا بتخطبيلي كنوووه..!!
ام محمد: ماببلي بنات الناس فيك...! انته مب صاحي...
ناصر: صدق؟!.. عيل مافي داعي نرمس في الموضوع الحمد لله غيرتي رايج من نفسج...
ام محمد: ماصدقت عاد انته.!!..لا تخليني اعاند فيك واخطب لك كنه صدق ..ساعتها بشوفك كيف تقدر تتفجج وتعاند...
اختفت ابتسامه ناصر وحلت مكانها الجدية التامه..
ناصر: امايه.. هوسج بعرسي خلاج تنسين ولد الثاني... يوسف خاطره في كنه...حطيتوها فباله من متى.. وشاورتيه فيها ووافق... وحط آماله وخططه كله على اساس انه كنه بتكون زوجته مب وحده غيرها... واحين تسحبين منه كل هالامور بس عشان تيوزيني انا؟!!...
ام محمد: انا مانسيته...وبعدين هو ماقالي انه يبغيها..
ناصر: وين بيروم يقول ليش انتي شاورتيه اصلا..!!.. بروحج تخططين وتخطبين وتيوزين ونحن المعاريس اخر من يعلم..!!..
ام محمد: شو تباني اسويبكم يعني من اقولكم شي عاندتوني فيه ماتقولون عيالي...!!.
ناصر: امايه..شو رايج تخطبين كنه بس ليوسف..ترا مافيها شي ان عرس يوسف قبلي.. اذا هو مستعد للعرس والالتزام انا مب مستعد بعدني...
ام محمد: ماصارت هذي ولا بتصير...
ناصر: ليش عاد...
ام محمد: بس جذي..
ناصر: انزين شحالج انتي؟ شو اخبارج..؟!..شو اخبار الرجيم كم كيلو زدتي؟!..اووه اقصد نقصتي..!!
ظحكت امي فجاه بشكل غير متوقع على حركات ناصر... وظحكت انا وياها...
سبحان الله كيف ناصر وابويه هم الوحيدين اللي يقدرون يخمدون مزاج امي العصبي..!!..
ناصر: انزين ترا يوسف حاط بخاطره وايد عليج..مع انه المفروض مايحط بخاطره بس عاد تراه زعلان..
ام محمد: انا اللي زعلانه عليه... عيل يرد عليه برد شرا السم ..ويعطيني ظهره وانا اكلمه..!!..
تدخلت انا ادافع عن يوسف..
منى: امايه يمكن ماسمعج..
ام محمد: لله سمعني..
ناصر: بالنسبة لحالته يوم وصلني الشقة وهذا بعد ماهدى.. اظن انه ماسمعج صدق يوم طلع من عندكم لانه صدق كان مفوووووول... تشوفين هالعلامه الحمرا هني؟!..
واشر ناصر على فكه العلوي.. كانت فيه علامه حمرا خفيفه.... تقربنا انا وامي نطالع فيها بتعجب..
ام محمد: وابويه ياولدي شو اللي ظاربنك..؟!..
ابتسم ناصر وقال..
ناصر: يوسف.. هههههههه عطاني بكس وكسر ظهري وهو يدقبي عالايدار..!!
شهقت امايه...وانا استغربت واستبعدت هالتصرف من يوسف...يوسف عمره ماتصرف بهمجية... متميز بمخه العملي والديناميكي... مايستخدم العنف الا جان السالفه فعلا جايده..
ياسلااااااااااام...لهالدرجه يوسف انقهر من قرار امايه ؟!!..لهالدرجه كنه فخاطره ويبغيها؟!..يمكن حبها صدق مثل ماهي تحبه..!!
ابتسمت..
ول عليج ياكنه...ببشرها بهالشي اليوم..! اكيد بتموت وناسه..
ام محمد: حسبي الله عبليسه شوووو ياه عليك يظربك جي..؟!..
ناصر: من كثر ماقهرتيه... تحاتيني انا وناسيتنه هو...مارام يفج غيظه فيج ياني لين بوظبي يفج غيظه فيني...
ام محمد: لا حول ولا قوة الا بالله العلي العظيم...والله مادريت به انه يبغي كنه لهالدرجه...
ناصر: احين دريتي..يوزيهم وافتكي..
ام محمد: من عقبك..
ناصر: اغسلي ايدج مني انا مابعرس...
ام محمد: اسميك بتعرس...
ناصر: اقول امايه وين ابويه؟!..
ظحكت يوم غير ناصر الموضوع مره ثانيه...واللي يظحكني اكثر ان امي دايما اطيح بالفخ ...
ام محمد: ابوك سار مزرعته مشغول بالعمال...
ناصر: جي شو بتسووون؟!..
ام محمد: عيالنا يوم يسيرون المزرعه مايرومون يتسبحون في الحوض العود... قلنا بنسوي لهم حوظ صغير..
ناصر: اهااااا زين تسوووون... منّــوووه...روحي هاتي شماس من عند امها...متوله عليها..
منى: وين ميثا محد اليوم سارت بيت يدوووه..وشلت عيالها وياها...
عقد ناصر حياته وقال..
ناصر: محمد وين؟!
منى: سار دبي ويا ربعه...
ناصر: متفيّـــــــــج...
تم ناصر يسولف ويانا وماطلع من البيت الا بعد المغرب...!!..
اما بخصوص يوسف.. راحت له امي وقعدت معاه ربع ساعه تقريبا... ومن بعدها نزلت هي تكمل سوالف... ونزل يوسف بعدها وويهه احمر شوي...مافيه أي مظهر من مظاهر العصبية... لكن بعد مب منفتح الملامح كالمعتاد... مر علينا بدون كلام وبدون مايطالع فويوهنا... فتح الباب الخارجي وطلع بسيارته..!
مشاركة: ::][مــــوعــــد مــع الـــســـــعـــادة][ :: قصه في منتهى الروعه
اليوم: الخميس...
المكان: بيت خلفان..
الوقت: العاشرة صباحا..
----------------------------------
(سيف)...
نزلت عالدري بسرعه وانا اعقم معاقم كندورتي... لكن من عيلتي ماقدرت عالمعاقم الفوقانية... الكندورة عربية ومعاقمها صعبة ..!!.
سيف: صباح الخير عمووه...
آمنه: هلا سيف صباح النور...وين ساير؟
سيف: دبي.. مبارك يا؟
آمنه: جني سمعت سياره بس مادري منو فيها..يمكن هو ودخل الميلس..
سيف: زين..يالله فمان الله... مابرد تراني الا مسا...
آمنه: الله يحفظك..
طلعت برا البيت... شفت سيارة مبارك..وهو قاعد فيها... فاتح دريشته.. وفارش جريدة " الخليج تايمز" عالسكان ويالس يقرا فيها وهو يتعلج...
كنت على وشك اني اروح صوبه يوم شفت مهرة طالعه من المطبخ.. في ايدها صحن سندويش.. وفي الايد الثانيه عصير..!!..
وسارت به صوب مبارك اللي شله عنها بابتسامه...سرت صوبهم وانا معقد حياتي...
سيف: شمعنى يعني لمبارك..!!
مبارك: لو سمحت صف طابور... هذي طلبيتي انا...
سيف: يالزطي...!!!.. ثنتين بتاكل؟!
مبارك: يوعان...
مهرة: ولد خالك دلوع..احين بسويلك غيرهن... شو ها ليش مب متعقم..؟!
سيف: مارمتلهن مافيني ظفور..
مهرة: هات..
رفعت راسي ووقفت معتدل ومهرة تعقم لي المعاقم...بالنسبه لي انا متعود... دايما مهرة تعقم لي المعاقم الصعبه حتى يوم كنت صغير..كانت تهتم بلبسي وكل شي... لكن مبارك الظاهر مب متعود على هالمظاهر..
وايج لي مستغرب...وعلى ويهه ابتسامه ...
مبارك: ياللــــــه ياللـــــــــه يالدلع... مانروووم ياخي...!!
سيف: جب..
مهرة: لا تتحرك...!!
مبارك: هذا اختك تبزيك جي... عيل يوم تعرس حرمتك شو بتسوي؟!!..
سيف: ههههههههههههه..
مهرة: ان تحركت ثاني مره مابتعرس ولا حد بيدلعك لاني بذبحك...!! .. اوقف عدل....ارفع راسك...!!
مبارك: ذلّــــــــت ابــــــوك على هالعقم...
تنهدت مهرة..وفجت كندورتي.. لفت وراها وبحركة سريعه خذت صحن السندويشات من ايد مبارك وحطته في ايدي..
مبارك: ايييه ايييه... ريوقي..!!..
مهرة: ادب لك عشان تسكت....!!
ورجعت تعقم لي المعاقم وانا اضحك على شكل مبارك الشيطان...كان يفكر احين كيف بيشل الصحن من ايدي..!!..
لكن بعد ماخلصت مهرة من المعاقم... اطالعت انا في السندويشات في الصحن ... وبعد دقيقه سلمتهن لمبارك...
مبارك: هههههههههاي عاش الولاء...
سيف: مب عشان خاطرك والله..بس ماحب البيض..
مهرة: اوووه صح !!...بسويلك شي ثاني لحظه..
سيف: لا تبطين وسندويشه وحده تسدني...بعدين ابا عصير منغا مب برتقال...
مهرة: اوووكي..
راحت مهرة والتفت انا لمبارك اللي كان يطالعني بابتسامه...
مبارك: دوم ادلعك جي؟!..
ابتسمت...
سيف: هيه.. تحسبني بعدني صغير..
هز مبارك راسه شوي..
مبارك: ليتني مكانك...!!..
على طول طارت ابتسامتي..وحلت مكانها تقطيبه..!!..شو يقصد مبارك بهالكلام..!!..ليش يبا يكون مكاني.؟!..
انتبه مبارك لملامح ويهي وتوتر..
مبارك: oh .,. no no no…!!...اقصد ليت عندي اخت ادلعني شراتك..!!
عقدت حياتي اكثر..
سيف: تبا اخت شراتي..؟!!!.. ياخي شفيك.؟!...
مبارك: لالالاء... اقصد ياريت عندي اخت ادلعني مثل ما ادلعك اختك ...!!
سيف: اهاااااا...
عقد مبارك حياته وقال..
مبارك: اركب السياره...
درت عالسياره وركبت عداله وانا اقوله بحماس...
سيف: تدري...حفلة اليوم يقولون بيحظرونها شخصيات معروفه..!!
مبارك: هممم..سيف.. اهلك اذا دروا بالسالفه مابيعدونها على خير..
سيف: شو عرفهم هذيلا عقليتهم قديمه... احين الناس اطوروا...
مبارك: هذا اللي انته تبا تصدقه عشان تسوي اللي تبغيه..
سيف: انزين حرام اسوي اللي ابغيه... انا احب الغنا....
مبارك: بس مجتمعك مايحب الغنا....
سيف: صار مجتمعك انته بعد مبارك..!
مبارك: صح... بس انا عقليتي مختلفه وتربيتي مختلفه.. والمجتمع اللي عشت فيه 20 سنه مختلف 180 درجة عن هالمجتمع...
هزيت راسي باسف..
سيف: ليتني تربيت مثلك..!!
مبارك: والله انك غبي..انا اللي حاسدنك على تربيتك ومجتمعك... والله انكم عايشين بنعمه... هناك محد له خص فحد..ماتحس انك مهم عند حد...
سيف: انزين حلاته هذا احسن شي...
مبارك: مب صاحي انته... المهم اسكت اختك يت..!!
سكت لين ماوصلت مهرة عند دريشة مبارك ومدت لي صحن في سندويش لي...
سيف: مشكووره...
مهرة: مب الا مشكوره هاتلي شي من هناك..
سيف: هههههههههه من عيوني بييبلج....
مهرة: عن لخبال... مبارك خل بالك من خويه...
مبارك: عشان جي انا ساير وياه..
مهرة: ههههههه يالله ...الله يحفظكم...
خلتنا مهرة ورجعت تدخل البيت...اما نحن فطلعنا من البيت... وخطفنا على جمال..وشليناه ويانا مثل مامتفقين من قبل...!
المسا.. وفي الحفله... كنت انا رابع واحد يغني.. وكنت من شوي مخلص فقرتي.. وربعي يالسين عدالي بالاضافه لمبارك... حسيت بلمسه على كتفي..التفت حصلت ريال غريب ياشر لي ..يطلب مني اني اتبعه..!!..
التفت مبارك معاي مستغرب..
مبارك: شو؟!
سيف: مادري.. احين برد..
مبارك: ايي وياك؟!
سيف: لالا..احين بيي...
نشيت من مكاني وتبعت الريال... كان المكان ظلمه وازعاج.. وماتبينت ملامحه عدل..
الريال: تعال معاي..
سيف: خير؟!..
الريال: كل خير ان شاء الله انته بس تعال... المكان هني ازعاج...
طلعنا برا ..وكان المكان شوي هدوء..
تاملت في ويه الريال ولا عرفته...
ابتسمت بتوتر.. شكله شخصية.. ومب صغير في السن..!!..شو يبغي فيني.؟!..
الريال: معاك حسين الـ (....)...
مد لي حسين ايده وسلمت عليه...
سيف: سيف الـ(......)....
حسين: ادري..تخبرت عنك..واعرف انك من العين..؟!..
سيف: هي نعم..
حسين: انا اصلا من دبي...شكلك ما عرفتني...
سيف: لا والله اسمحلي ماعرفتك...
حسين: انا ملحّن...
تنفست بقو...ملحن..!! حسيت من قبل انه ضليع بهالامور...
سكت وماقلت شي...
حسين: ليش سكت؟!..
سيف: هههههههههه ماعرف شو اقولك... اول مره اتلاقى مع ملحن..
خش حسين ايده فمخباه وطلع باكيت زقاره...حط وحده فحلجه وولعها...وانا اراقب الزقاره اكثر مما اراقبه هو...
اشتقت للتدخين...
مد لي حسيت الباكيت وقال..
حسين: ادوخ.؟!..
تسرطت...وعقدت ايديني جدام صدري..عل وعسى اقدر امنعها من انها تمتد وتاخذ صلب زقاره..!!
سيف: آآآه..كنت ادوخ...وودرتها..
حسين: احسن لك...عادة سيئة.... وبتظر صوتك... بيظيق صدرك ومابيتم عندك نفس طويل مثل اللي تتمتع فيه الحين ما شاء الله...
سيف: شكرا..
حسين: لا صدق...على فكره انا ماكلمت حد من الشباب هني غيرك... صوتك الوحيد اللي دخل مزاجي....صحيح بحاجة لشوية تهذيب لكن لك صوت مميز وحلو...
استانست....الا قولوا مت من الوناسه...
سيف: تسلم من ذووقك...
سحب حسين نفس من الزقاره ونفخها...تجمع الدخان علينا... مادري كيف حسيت الدخان يعطي لمحة شريرة لهالحسين اللي واقف جدامي...يطالعني بعيون مرصصه...!! كانه يعرف شي انا ماعرفه...!!
حسين: كم عمرك؟!..
سيف: 18 سنه...
رفع حسين حواجبه..
حسين: ثانوية عامه..!
سيف: هي نعم..
حسين: شد حيلك...لا تشغل نفسك بالغنا وتلتهي عن الدراسه...تخرج اول بمعدل يرفع الراس.. وبعدها اذا قررت تتخذ الغنا مهنة... اتصل بي..!
ابتسم لي حسين ومد لي بطاقه صغيره...
خذت البطاقه منه بايد متوتره...
سيف: مافهمت...يعني انته بتساعدني؟!.
حسين: ماسمعت اللي قلته؟!.. لك صوت مميز ونادر... واذا كنت جاد في سالفة الغنا... اقدر اقدمك للناس المناسبين...واوقف معاك لين ماتثبت اقدامك عالساحه الفنية...!! وانا متاكد انك بتنجح..
سيف: قصدك استوي مطرب..؟!..والناس تعرفني؟؟...واسجل شرايط وغيره؟!..
قال حسين ببرود... كانه يتكلم بهالموضوع كل يوم...
حسين: ليش لا...؟!.. غيرك مب احسن عنك... وصوتك احلى عن وايد اصوات موجوده عالساحه...!!.
قلت له ببلاهه مب مصدق هالعرض المغري اللي انعرض علي...
سيف: من صدقك انته..؟!..
عقد حسين حياته ورفع ايده يشوف ساعته..
حسين: تاخرت... عندي شغل الحينه مضطر اروح..وانته فكر بكلامي... واحتفظ بالبطاقه لا تظيعها... ترا مب سهل توصل لارقامي اذا ظيعت البطاقه...
سيف: ولا يهمك بحافظ عليها...وو..مشكور وايد عالعرض... ماتقصر..
هز حسين راسه مره ثانيه ونفخ مجموعه دخان ثانيه انتشرت في الجو...
حسين: العفو... بس حافظ على صوتك.. لا تشده وايد... ودامك ودرت الزقاره خلك بعيد عنها... يالله بالتوفيق..
سيف: الله يحفظك..
تميت واقف مكاني اطالعه..مع ابتسامه فرح على ويهي..وماسك البطاقه كانها كنز...
ومثل ماتوقعت...سيارته كانت فخمه....
رجعت ادخل القاعه...ويلست عدال مبارك...ومازلت ابتسم...
مبارك: شو يبا منك؟!..
سيف: مسكين يبا توقيعي...
مبارك: هههههههههههههاي لا صدق..
سيف: بقولك عقب..خلني ساكت اريح صوتي لين يخلص منصور غنا...
مبارك: بعدك بتغني وراه؟
سيف: هي..بعدني غنيتين انا...!!
مبارك: يابوي ياني الرقاد خلنا نرد البيت..
سيف: جي تو الناس...اقعد اقعد..
وتمينا يالسين هناك لين 11 في الليل..وعقبها صار لازم نرجع البيت...
بس هالمره عاد كنت ميت من وناستي بسبب اللي صار...
