مواقفكم أيام الدراسة ..

[أشلاء روح]

سلام

شخباركم ..شخبار الدراسة معاكم ..انشاء الله تمااام

السالفة وما فيها

كل طالب / طالبة ...

يجي يذكر لنا موقف من مواقفه الطريفة أو المحرجة أو الاجراميييية !! ....

أو موقف غرييب صاار

يعني باختصار موااقف دراسية ..

خلنا نشوف ابداعااتكم ..

حتى المتخرجين ارجعوا شوي لأيام زماان وطلعوا الفضاايح

لي عودة ​

 

[أميرة الأحزان]

رد: مواقفكم أيام الدراسة ..

الاااااااااااي

مي تو لو عودة لسرد قصص كانت ولا زالت..

شكراً ع الموضوع الشي

 

[المجرمة]

رد: مواقفكم أيام الدراسة ..

هلا خيو

مشكورة خيتو على الموضوع الحلو


آنا أتذكر لما كنت في أول ثانوي كان عندنا حصة فراغ وعندنا معلمة احتياط ومانتبهت إلا ووحدة من الربع تاكل متاي .. قامت أخذت منها المتاي وقطتة في الزبالة وهاوشتها .. وقامت الحلوة تصيح والكل كان يحاول يهديها بس كان ذابحة عمرها من الصياح .. ولما كملت الحصة قالت انها ماكانت تصيح لأن المعلمة هاوشتها .. كانت تصيح على المتاي اللي قطتة المعلمة هههههههههههههههههه تتذكرين أموووووورة هالموقف صج شي .. الله يرحم أيام أول

 

[ريحانة البحرين]

رد: مواقفكم أيام الدراسة ..

هههههههههههههههههههههههههههههههه
هههههههههههههههههههههههههههه
تصيح على المتاي ههههههههههههههههههههه
مسكينة .. لوكنت وياكم في الصف وعرفتان هذا السبب جان فطست عليها من الضحك
خخخخخخ

اني صار لي موقف ماانساه لاني انظلمت
اذكر ايام الابتدائي كانوا جايبين ستاير للصف
وكنا قبل مانطلع الفرصة نطل من الدريشة او ساعات اول مانوصل
الصف قبل لاتدخل المعلمة ..
عاد مرة كنت واقفة ويا وحدة من الصف الا تقول لي شوفي الستارة فيها روبية
ههههههههههههههه طرف الستارة كان فيه شي من داخل مدور صدق مثل الروبية
تقريبا نفس الحجم >> خبركم الفضول الطفولي ومايسوي
.. الظاهر البنت دقت في راسها تعرف شنو
داخل الستارة >> كانت مشاغبة
في يوم دخلنا الصف الا الستارة مقصوصة في الطرف واكتشفته المعلمة
وسالتنا من اللي قصت الستارة الكل انكر.. لكن البنت اللي كانت وياي اتهمتني
والله يعلم اني كنت مظلومة .. كنت اهدأ وحدة في الصف
حولوني على المديرة اذكر كانت مديرة جديدة لبنانية كانت شيطانة
اخذت المسطرة الخشبية الكبيرة وضربتني على ايدي ضربا مبرحا هههههههه
لكن بعد اسبوع تقريبا الظاهر اكتشفوا الفاعلة الحقيقية .. لان المديرة صادفتني
اول مادخلت المدرسة وجت تكلمني بهدوء وتبدي اعجابها بشنطتي خخخخخ
وتحاول تتحايل علي .. لكن الله يسامحها لاني ماقدرت اسامحها ولليوم يحز في نفسي
انها صدقت علي مع اني هادئة كلش وبعيدة عن المشاكل..

يسلموووو خيتو المجرمة ولي عودة لذكر مواقف اخرى

تحياتي

 

[أميرة الأحزان]

رد: مواقفكم أيام الدراسة ..

ههههههههههههههههه
المجرمة..
احد ينسى هالموقف..



هههههههههههههههههههههه
ويلي ريحانة مسكينة.. مظلووومة

ههههههههههههههه



انزين بما ان اليوم صادني موقف.. يعني نيو جديد وطري حده.. بذكره الحين

الله يسلمكم ياطويلين العمر.. بنات صفنا العزيزات يجمعون بيزات كل يوم.. حق نطلع يوم من الأيام طلعة عدلة وعلى مستوى.. المهم.. اني البنك.. البيزات عندي.. كل يوم احمل بوك احط فيه البيزات وارجع البيت احطهم في حصالة..
الزبدة:
اليوم جمعنا اكثر شي تقريباً 11 دينار وشي.. يعني من البنات طبعاً..
كان عندنا الحصة الخامسة رياضة.. وزغردة كانت مابتلعب أمس طايحة على خشمها عطيتها البوك وقمت ألعب سلة..
تالي قعدنا نسولف في الصالة هرار يعني.. طق الجرس تأخرنا عن حصة العرب.. ووقفتنا المعلمة " المتأخرات.." وعادي يعني
جان تذكر زغردة البوك.. تسوي لي عندش البوق.. قلت ليها لا..
سألنا البنات اللي كانوا ويانا.. محد يدري..
عادي اني ام دمعة.. سيدة قمت اصيح.. قلت للمعلمة بروح اجوفه.. وبالغصب رضت
رحت الصالة مافي شي..
سألت معلمات الرياضة قالوا مايدروون..
رجعت طول حصة العرب اصيح.. خبركم أمانة ومسؤولية .. شي كبير.. ووين اودي وجهي من البنات

طق جرس حصة العرب.. إلتموا علي البنات.. سكتي يابت الحلال دفعة بلاء.. وكلنا عادي راضيين.. مو مشكلة بالطقاق البوك بس سكتي انتين
عاد في هالوقت طلعت زغردة ويه وحدة راحوا يدورونه.. في الصالة.. وراحوا حق المشرفات.. ومشرفة القسم..
يعني صارت فووضة..


الشي الفن.. الظريف
طلعت التيــلة وحدة من البنات خاشتنه..

ويلي عفستني بهدلتني والله

هي تجارمت قالت لي سوري
ويعني
كذا كذا

خخخخخخخخخخخخ

 

[المجرمة]

رد: مواقفكم أيام الدراسة ..

هههههههههههههههههه

بل أم التيل للحين ماجازت عن هالسوالف؟؟

خسارة ليش ماقلتين ليي جان أجي أتطنز من زمان ماتطنزت عليش خخخخخ


ماتشوفين شر زغردة .. عاد على الخشم هاهاهاهاهاهاهاها موقف تحفة فاتني خسارة

 

[المجرمة]

رد: مواقفكم أيام الدراسة ..

أني الصراحة يوم الأحد صادني موقف مع معلمة الدين ماراح أنساه طول حياتي

اني كل مرة عندنا اختبار أبدع في الغش إبداع لاصار ولا استوى ولا أحد صادني طول السنة .. الصراحة توني متعلمة الغش السنة .. المهم يوم الأحد كان عندنا اختبار دين 101 ومعلمتنا نفسها اللي تدرسنا درستني الكورس اللي راح وكنت الوحيدة اللي أتجأ وأغش منها وأقول للبنات محد راح يصيدني غيرها .. كنت مخليا البرشومة على الارض في مذكرتي والغلاف شفاف والكتاب فوقها والله يعلم اني في ذاك اليوم كنت ناوية أغش بس ماغشيت ( يوم اللي ماغشيت انصدت شوف الحظ) الظاهر اني حركت الكتاب اللي فوق الورقة وبينت الورقة وجت المعلمة وشالت الكتاب والمذكرة وكل شي وخلت عندي الورقة أختبر قلت يمكن شالتهم بس جذي .. ولا أسمعها تقول : ضمنا الصفر .. ديك الحزة ضحكت على روحي ضحك .. وكمل الاختبار وجت الفسحة الثانية ورحت لبها بكلمها أول شي خفت ادخل بعدين جت معلمتنا مالت اللعام ( معلمة أمورة وزغردة حاليا) والحمد لله علاقتي وياها واجد طيبة وقلت ليها ان المعلمة صادتني حاطة ورقة وفوقها الكتاب ولا كنت بغش أصلا .. قامت دخلتني للمعلمة وقامت تدافع عني شوي باعتباري طالبة مثالية بالنسبة ليهم ثنتينهم .. احم احم..

عاد أني كلش مافتكرت في الصفر اللي قالت بتحطة ليي وكان كل همي ان هالمعلمة ماتاخذ عني فكرة مو أوكي .. بس كانت حدها معصبة وقالت كنت أتوقعها من الكل بس منش لا ماتوقعتها وهذا اللي بيخليتي أحط الصفر وقلبي يعورني يمكن لو بنية ثانية جان تهون بس انت لا .. ومن قالت هالكلام دبحت عمري من الصياح وصق الجرس وقالت ليي روحي الصف .. وكانت المعلمة الثانية بتروح البيت بس لما طلعت وقفت أكلمها قالت ليي خليها الحين تهدأ وبعدين بكلمها لأني لو كنت مكانها وشفت هالشي منش ماراح أسامحش النتين بالذات ( مساكين ماخذين عني فكرة اني حدي هادئة) بعدين قالت ليي روحي الصف وردت دخلت ليها الحجرة تكلمها .. واليوم كانت عندنا بس ماتجرأت اني أكلمها ههههه مجرمة صح؟؟

مسامحة أدري اني كتبت قصة حياتي بس ماعليه يالله .. الله كريم

لنا عودة وجرائم جديدة

 

[أشلاء روح]

رد: مواقفكم أيام الدراسة ..

المجرمة .. عاد ما تصيح الا على متاي .. يا دافع البلا

عاد صفر ولا تهتمين .. لو أني مكانج .. أموت من الصياح اني اليوم نص درجة ولوعت جبد معلمة الكيم عليها

ريحانة
طلعتين تحبين الاكتشاف ..

أميرة
زين منهم حصلوه عند وحدة .. لا تنذبحين من الصياح .. البكاء مضر بالصحة

 

[أميرة الأحزان]

رد: مواقفكم أيام الدراسة ..

هااي..

شحوالكم..

المجرمة..
أويلي.. والله معلمتنا خوش وحدة ها..

أشلاء..
لا البكاء مفيد.. يغسل العيوون
خخخ

 

[المجرمة]

رد: مواقفكم أيام الدراسة ..

هلا أمورة

هي صدق خوش وحدة بس ساعات عليها حركات تنرفز اللي مايتنرفز خخخخخ

 

[ريحانة البحرين]

رد: مواقفكم أيام الدراسة ..

هههههههههه

قوة بنات

على عمري اميرة صدق موقف قووووي
زغردة الجراح سلامات خية ماتشوفين شرر

المجرمة >>احلى اجرام ههههه

بقوليكم موقف ثاني

مرة كنت اقدم امتحان عربي
عاد اني احب أألف من عندي وازيد خصوصا في الشرح
والتعبير بس مرة دخلت اقدم امتحان انصدمت احس مخي مشير
مو راضي يطلع وياي الكلام .. واللي زاد الطين بلة ان مخليني في اول كرسي
عند الباب وهات يا تشتيت انتباه ..
عاد قبل لا يخلص الوقت بشوي جت في بالي جم كلمة وكتبتهم وبعض الاجابات
تأليف اشكره >>ماله خص بالسؤال هههههههههه
وماطلعت الا راسي مفتر ههههههههه
انزين طلعت رحت عند الباب كان الفترة الاخيرة كنت انتظر ا لباص
الا اشوف الفراشة "هندية " تأشر علي "تعالي "
انزهقت .. اختبلت اللي تبون
اقول ويش صاير تدرون ويش فكرت ههههههههههه

فكرت صححوا الامتحان والمعلمة اكتشفت اني مألفة الاجابات وقالت ليها تناديني
>>>مو مني من الخوف والله
المهم كان الفراشة في الطابق الثالث رحت بسرعة مالقيتها
قلت اكيد في غرفة المدرسات ياويلي ..
وصدق ماشفتها الا طالعة من الغرفة .. اقول ليها خير كنتين تأشرين علي

تتوقعون وش قالت لي >>>























تقول لي لااااا كنت أأشر على الحارس>>> واقف برا غرفته وصاير وراي

ههههههههههههههههههههههه مت على روحي من الضحك خخخخخ

يالله نبي نشوف بقية المواقف

لي عودة لاضافة المزيد

تحياتي

 

[إشراقة الأمل]

رد: مواقفكم أيام الدراسة ..

السلام عليكم

مواقف جميله .. ضحكت معها كثيرا
وتعرفنا من خلالها ايضا على بعض صفات العضوات
وخصوصا اموووووره على عمري ليش لصياح جذي عاد
بس من حقج لو كنت مكانج اسوي مثلج واكثر بعد

وريحانه مواقف ولا اجمل هههه لا تحسدي عليها صراحة


اممم لدي مواقف كثيره لايام الدراسة التي كانت ولازالت

لأذكر لكم احداها الآن ..

في مره من المرات وفي المرحلة الاعدادية .. كان عندنا فراغ وطبعا جت معلمة احتياط
واحنا خوب جهزنا نفسنا للشرده من قبل لا تدخل المعلمه ..
دخلت المعلمة ورحنا نستأذن منها اني ويايي بنات ثنتين او ثلاث
قلنا لها عندنا اختبار رياضيات في اليوم الثاني وعندنا اسأله بنروح للمعلمه
توضحهم لينا حملنا الكتب وطلعنا .. وفي الدرب .. شفنا على الجدار المفتوح
شيء صغير حلييوو .. عاد احنا نحب هالسوالف ... " الاااااااااااي عصفور صغيير مسكين "
ورحنا نتحجج فيه واذا بي اصررررررررررررررررررررررخ بصوت عالي واني اركض

تدرون ليش





لان اللي شفناه وتحججنا فيه يا زعم عصفور صغيير طلع خفاش وطبعا ما يشوف
في النهار قام يطير وجى فوقي واني خوافه درجة اولى ..
قعدت اصارخ واراكض .. لكن بعدين قلنا هذي كله من
هروبنا ههههه فردينا الصف بعد هذه المغامره اللي
ما انساها طول عمري ....


تحياتي،،

 

[حنين الشوق]

رد: مواقفكم أيام الدراسة ..

هعااااااااات ويلي نكت عليكم

اني وحده هادئة ماعندي هالسوالف

بس ان شاء الله مره ثانية اقول اليكم مواقفنا الهبلة

 

[أميرة الأحزان]

رد: مواقفكم أيام الدراسة ..

ريحانة..
هههههههههههههههههههههههههههههههه

ويلي.. اتخيلش ضايعة.. ماتدرين بالدنيا
ويلي وييلي
هههههههههههههههه



اشراقة
خفاش مرة وحدة..
يمه يمــــــه..



في موقف صار حقي من لما كنت أول ثانوي.. ولا انساه في حياتي

هذا كنت اني ويه بنية هاااااااادئة عدل مثلي في المكتبة.. عاد كان علينا عقب محاسبة..
تأخرنا شوي عن الحصة.. يمكن 5 دقايق.. شغل يعني مو لعبة..
المهم..
رحنا الصف دخلنا متزوبقين.. خبركم أول ثانوي.. وتونا جدد..
قامت المعلمة تزف تزف فينا.. واحنا منزلين راسنا.. متبهدلين.. ولا اللي وياي منخشة وراي.. يعني في وجهي..
انزين قالت لينا قعدوا.. وآخر مرة تكررونها.. اقدر اطلعكم تجيبون ورقة.. بس بمشيها..
لحد الآن الوضع عادي.. كلش عادي.. صدق خايفين.. بس غريبة إني ماصحت.. مجودة الصيحة حدي..

7
7
7
7
وش اللي صار

هههه
هههههههههههه
هههههههههههه


مرة وحدة اسمع صوت رجّال ورا.. طالعت ورايي إلا رجّال قاعد.. موجه
اهني لااااااااااااااا.. خلااص..
ذبحت عمري من الصياح من جفته..
اقول طول الوقت مشرشحتنه قدام رجال..
وش هالفشيلة...


هههههه

لكن صدق مآسااااااااااااااااااااااااااااااااااااااااااة

..

 

[إشراقة الأمل]

رد: مواقفكم أيام الدراسة ..

السلام عليكم

ههههههههههههه
اميره ... على سالفة الموجه ذكرتيني
بسوالف البنات ايام الاعدادي بعد
مره جت المعلمه " تدريب " خبرتنا بجي
موجه ولازم نبيض الوجه .. البنات ويش سوا

رشوا عطر على الكرسي من النوع اللي يترك اثر ,,
على قولتهم علشان يصير اثر في ثوبه وما يفكر مره
ثانيه يحضر مدارس بنات >> افكار هباله ههه

لي عودة ....


تحياتي،،

 

[المجرمة]

رد: مواقفكم أيام الدراسة ..

هههههههههههههههههه

أمورة موقف لاتحسدين عليه بس كسرتين خاطري ذاك اليوم


لي عودة

 

[المجرمة]

رد: مواقفكم أيام الدراسة ..

سلام

أذكر لما كنت في ثالث اعدادي كنت شاردة من الحصة مع بنية وكانت المعلمة احتياط بس وحدة من البنات الله لايبارك فيها عطتها اسماءنا .. وأحنا كنا نفتر وشوي ولا المشرفة بكبرها طالعة تدورنا ( كان على أيام ستار أكاديمي .. بشار الشطي ومحمد عطي) وكانت صورهم في يد صديقتي وقاعدة تكلم المشرفة وتأشر لها بالأوراق اللي في يدها قامت المشرفة أخذت الصور وقالت بتستدعي أولياء أمورنا .. ذاك الأسبوع كان أسبةع المشاكل .. لأن هالسالفة صارت يوم الأحد والأثنين تهاوشنا مع بنية من ثاني قاعدة تتفلسف علينا وودونا للمشرفة وقالت خلاص لازم نستدعي أولياء أموركم بس ماستدعتهم ويوم الثلثاء في حصة الرياضيات مارضيت أدخل الحصة إلا بالغصب ونادتني المشرفة بسبب سالفة البنية اللي تهاوشت وياها ويوم رجعت البنات سألوني المشرفة وشتبي ؟؟ توني بقول ليهم ولا أشوف أقلام تتطاير في الصف فوق الرووس ولا المعلمة قاطة قلم علي علشان أسكت .. وقالت لازم أوديش للمشرفة وكتبت أسماء المجموعة كلها وودتنا للمشرفة وقالت المشرفة خلاص طفح الكيل بالذات هالثنتين ( أني وصديقتي ) مع ان احنا كنا 6 وحدات بس استعدو أولياء أمورنا ثنتينا بس .. ويوم رجعت البيت ولا من زمان اتصلو في الوالد .. لايفوتكم الوالد شبك السوالف كلها في بعض .. معلمة الريض تصير لينا .. يقول ليي وش تدرسش زهرة؟ قلتليه ريض قال ماتدرسش ستار أكاديمي ديك الحزة ماقدرت أجود روحي قمت أضحك من قلب ..
يوم الأربعا من الصبح الوالد شرفنا في المدرسة وماخلو شكوى ماقالوها ( بصراحة كنت حدي مشاغبة في ثالث اعدادي) ونشرو غسيلي ناصع البياض .. ومسكين الوالد مساعد مدير على ذيك الأيام يعني صدق فشلة مساعد مدير وينادونه بنتة مشاغبة هههههههههههه .. بنت عمي تقول مسكين عمي تعود يروح المدرسة كل يوم جنة رايح البرادة ... بس الحين عقلت (شوي)

 

[أشلاء روح]

رد: مواقفكم أيام الدراسة ..

أقول صبايا .. بقوم أنام الحين شكلي بزكم باجر

ما قريت شكتبتون

لي عودة غداً للقراءة ..

 

[ريحانة البحرين]

رد: مواقفكم أيام الدراسة ..

ههههههههههههههههههههههههههه

المجرمة خفاش مرة وحدة اتخيل شكلش وانتين تراكضين ههههههههههه
اميرة على عمري صدق فشلللللة هالمعلمة ماعندها ذوووق
المجرمة مرة ثانية هههههههههههههههههههه عجبتني جملة الوالد تعود يروح المدرسة كانه رايح برادة هههههههههههه

تذكرت موقف صار لي ايام الاعدادي ..

لما طق جرس الهدة طلعنا من الف بسرعة اني ووياي بنت جيرانا
المهم شوي الا تقول يوووو نسيت عبايتي في الصف
انزين قالت لي انتظريني وعطتني شنطتها اجودها وراحت ركيض الصف تاخذ عبايتها
اني ضليت انتظر وانتظر اختلت المدرسة واني واقفة مكاني
خايفة امشي عنها .. وفي نفس الوقت افكر ليش اتاخرت >>هبل عدل
صدق كانت ايام الهبالة المهم ضليت مكاني لحد مااختلت المدرسة
وتالي قلت بروح اطل برا يمكن طلعت واني ماشفتها .. طلعت انصدمت الباصات كلهم مشوا
يعني ويه >>واقفة متجمدة
ولايفوتكم بعد كان عندي امل ان هي بتجي ووقف شوي انتظرها برا المدرسة
قلت يمكن ويا معلمة من المعلمات او المشرفة
يوم مانفع الانتظار وشفت المدرسات طلعوا قلت مالي الا امشي
تصوروا في عز الحر وعندي شنطتين حاملتنهم على اكتافي
والمدرسة على بعد منطقتين من ديرتنا
ماوصلت الا اني هلكااانة لا وبعد القهر .. من وصلت قريب البيت الا اشوف بنت جيرانا
تتمشى ويا اختي راجعين من البرادة وتتعلج وتضحك
سيدة صحت لاني كنت حاسة بالخوف .. وتعذرت لي تقول هي طلعت من الباب الثاني
ههههههههههههه والله اياام

بانتظاركم من جديد

تحياتي

 

[المجرمة]

رد: مواقفكم أيام الدراسة ..

سلام ..

رجعت لكم بذكرى حلوة تقريبا من اللعام

اللعام على نهاية الكورس كان عندنا دين وكنا مكملين المقرر وقبل لاتدخل المعلمة كنت بشرد
من الصف وطلعت شوي ولا المعلمة في وجهي وقالت ليي رجعي (هي تدري عني أحب أفتر في
المدرسة) قلت ليها باخذ لفة وأني جاية قالت : اي مو لأني مجنونة علشان أخليش تطلعين ..
المهم ماخلتني أفتر ورجعتني غصب وقبل لا تدخل الصف قعدت عند الباب برة ومارضيت أدخل
الصف قالت إذا مادخلتين بدخل وصك الباب ورايي ومافي دخلة عقبي دخلت غصبا عني .. بس
طول الحصة وأني أقول ليها ابي أروح للمشرفة مارضت ولا الممرضة ولا الحمام .. بس بعدين
صدق قامت خاصرتي تألمني وماقدرت أتحمل وقلت ليها أبي أروح للممرضة ضرروري قالت
مافي يعني مافي .. لما اغمي عليي .. في ذيك اللحظة قامت البطلة زغردة مع بنية من الصف
جابو الويل جير من عند الممرضة وهم مستانسين على عمرهم ويركضون ومسوين البلاوي
في الممر .. ونزلتني زغردة على الويل جير للمرضة .. بس تمت معلمة الدين ماتكلمني .. وأني
حدي كلوز وياها وهي صدق تحبني وتقول اني (كنت) من طالباتها المثاليات وهالموقف ماراح
تنساه ليي .. والمجرمة وقايلين ليها هالكلام وتصب الدموع سيالة .. والبنات في الصف قاعدين
يدعون ان المعلمة تسامحني مو علشان شي علشان يوم الأحد عندنا حفلة ويبون أجيب ليهم
حلاوة أني كلة أسويها ليهم (الناس في معمعة والعروس تبي رجل) ورجعت الصف وقلت ليهم
ان خلاص الموضوع اوكي وقالت المعلمة خلاص روحي الصف وحصل خير ولاشفت الا الكل
مستانس على حلاوة يوم الأحد .. صدق ذاك اليوم كان من أصعب الأيام عليي

مسامحة على الإطالة

لي عودة