• أعضاء ملتقى الشعراء الذين لا يمكنهم تسجيل الدخول او لا يمكنهم تذكر كلمة المرور الخاصة بهم يمكنهم التواصل معنا من خلال خاصية اتصل بنا الموجودة في أسفل الملتقى، وتقديم ما يثبت لاستعادة كلمة المرور.

::][مــــوعــــد مــع الـــســـــعـــادة][ :: قصه في منتهى الروعه

مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الثلاثاء..
المكان: بيت سلطان...
الوقت: الرابعه والنصف مساءا..
---------------------------------------
(منى)....

تاففت وانا ادخل البيت معصبه....هذي اول مره تسويها فيني كنه...اول مره تتخلف عن موعد... اليوم بطوله ماشفتها ونحن متواعدين الساعه 1... لانه دوامها مايبدا الا وحده ونص...
على طول دخلت الصالة..
رفعت السماعه واتصلت ببيت يدوه...
لا جواب...
سكرت واتصلت مره ثانيه...... دقيقة وسكرت السماعه..!!..غريبه محد يرد... شو مستوي؟!.
ماعرف رقم ام مايد والا بتصلبها...... نقزت من الكرسي ورحت ادور امايه... في تيلفونها مخزن رقم ام مايد..بشوفها هالكنه شو من الاعذار عندها عشان تغيب...!
الحماره...
دخلت حجرة امايه..حصلتها فاظيه... ودورتها فطول البيت..ماحصلتها لا هي ولا ميثا ولا العيال...محمد مبونه يطلع لكن الحريم وين؟
ربعت فوق لحجرة يوسف....المفروض رجع من الدوام احين... لكن هو بعد ماحصلته ..!!!
تم قلبي يدق بالخوف.... شو مستوي؟!..
نزلت تحت بسرعه ومسكت سماعه التيلفون...اتصلت برقم امايه...
بطت لين ماردت علي...
ام سلطان: مرحبا...
عقدت حياتي.... صوت امي متغير ويرتجف..
منى: امايه...
ام سلطان: هلا فديتج..
منى: امايه شفيج؟ وين انتوا؟!
ام سلطان: وين اخوج؟ رد من بوظبي؟
منى: يوسف؟ لا محد... ماكنت ادري انه فبوظبي...انتوا وين؟
ام سلطان: محد في البيت مول؟
منى: لا محد...اماااايه قوليلي...
صاحت امي... ارتفعت انفاسي ماعرفت شو اقول او شو اسوي....
وين اروح....منو اكلم عشان يخبرني شو صاير.؟
منى: امايه دخيل الله قوليلي شو مستوي؟
ام سلطان: كلنا بخير امايه لا تخافين....
منى: عيل وين انتوا وليش تصيحين.؟
ام سلطان: نحن كلنا هني في المستشفى...
تم قلبي يدق بالقو..
منى: ليش.؟...منو مريض؟ يدوه؟
ام سلطان: لا يدتج هني يالسه...
منى: امايه....قطعتي قلبي حرام عليج...
ام سلطان: والله اني خايفه عليج يابنتي...
منى: من شوووو...قوليلي لا تحاتين...
ام سلطان: بنت عمج كنه... طايحه مريضه ...
منى: كنه..!!!!...مريضه؟...شفيها امس صاحيه...
رفعت ايدي ومسكت راسي اللي بدا يدور....
ام سلطان: مادرينابها الا الظهر...
منى: كيف؟
ام سلطان: سوت حادث ويا الدريول والبشكاره وهي سايره الجامعه...
طاحت السماعه من ايدي وماسمعت باقي الكلام.....
كنه سوت حادث..!!! كنه...!!.. تجمعت الدموع في عيني بلمح البصر...
يالله يالله رديت امسك السماعه...
منى: الو...امايه...
لكن امي كانت مسكره.... مارمت ارد ادقلها... تميت في الصاله اصيح واصيح....
غلطانه انا اني ماخذت تفاصيل... بس امي ماينخذ منها لا حق ولا باطل...لازم اروح اشوف بنفسي...
بس كيف اسير المستشفى اروحي؟ مع الدريول..وانا لا عندي لا موبايل ولا شي عشان اتصل بهم واعرف مكانهم...!!!
شو اسوي.؟!..
-------------------------------------
اليوم: الثلاثاء..
المكان: شقة ناصر..
الوقت: الخامسة عصرا...
-------------------------------------
(ناصر)...

كنت يالس في الصالة اشرب شاي حليب مسوتنه سعاد...وهي يالسه عدالي...
رن تيلفوني وكان رقم البيت...
اكيد استبطوا يوسف...يمكن هو غالق تيلفونه...!!
ناصر: آآلووه...
منى: ناصر... وين انته..
ناصر: وعليج السلام..!!
استغربت من صوت منى المتغير...حتى ماسلمت عليه..مب عوايدها...
منى: نااااصر...
ناصر: شفيج؟!
منى: وين انته؟
ناصر: هني في شقتي...
منى: في الشقه؟؟ يعني ماخبروكم صح...
عقدت حياتي..
ناصر: بشو يخبرونا؟!
جهزت نفسي للاخبار الشينه...ليش هالبيت يخلى من المشاكل ؟!.. دومهم بمصايبهم...الحمد لله على كل حال...
منى: يوسف وين؟
ناصر: شبلاج جنج عيوز تتخبرين عن كل حد....شو صاير..
منى: اول قولي..
ناصر: راقد...
منى: الحمد لله انه مب عدالك...اسمع...كنه بنت عمي...سوت حادث وانا مادري شو الحال عليها...
ناصر: شووووووووووه؟ حادث؟ متى وكيف؟
منى: والله مادري عن شي...امي خبرتني وسكرت...وماريد ادقلها مره ثانيه لانه ماينخذ منها لاحق ولا باطل...بيت يدوه كله فاظي وانا هني اروحي ويا البشاكير...
ناصر: لاحول ولا قوة الا بالله...بتصلبهم احين وبطمنج...
منى: انا مب متصله عشان اطمني...
ناصر: عيل؟
منى: يوسف...يوسف بيموت ان درى ياناصر....
تذكرت يوسف... صح يوسف مابيتحمل خبر مثل هذا....
منى: دخيلك ياناصر... لا تخليه يسوق دخيلك...
ناصر: ماروم له يامنى...تعرفينه انتي...
منى: لا تخبره الا يوم تكونون في الخط...
ناصر: ماروم اخلي سيارتي هني عقب منو بيردني بوظبي.؟ وهو بعد مايروم يخلي سيارته عندي وراه دوامات...
وصلني صريخ منى ...لدرجه اني بعدت التيلفون عن اذني...
منى: هذا اللي هامنكم انتوا سياييركم.... مب هامتنكم حياتكم لا تنفدون انتوا بعد...؟!!!!...
ناصر: بس انتي لا تقعدين تصارخين علينا....
منى: طلعتووووولي الشيب... انا زايغه على يوسف...
ناصر: حالتها خطيره هي؟
منى: مااااااااااا ادري...قتلك مادري شي...
ناصر: بس خلاص باي بدقلج عقب...
سكرت عنها قبل ماتصارخ مره ثانيه... مسكينه كنه..... مسكين حال يوسف لو يدري...
حسيت بايد سعاد على ايدي..
سعاد: شو صار؟
اطالعت فيها...عينها قلقه... على اهلي اللي ماتعرفت عليهم...
ناصر: بنت عمي سوت حادث وطايحه في المستشفى.... بنت عمي اللي يحبها يوسف... واحين مادري كيف بخبره بهالخبر...!!...
سعاد: مسكييينه....!!
سكتت سعاد وهي زعلانه على الحاله.... مسكت تيلفوني مره ثانيه واتصلت بمحمد اخويه....اكيد عندهم..مابيخليهم...
محمد: مرحبا..
ناصر: هلا محمد...شحالك؟
محمد: الحمد لله...
ناصر: وين انته؟ عندهم في المستشفى؟
محمد: منو خبرك؟
ناصر: منى..
محمد: منى منو خبرها؟
ناصر: اتصلت بامايه...ليش انتوا ان شاء الله ماتبونا ندري؟
محمد: مانبا حد يدري لين مانطمن على هالبنت كيف حالتها بالضبط...
ناصر: قولي كيف صار الحادث؟
محمد: قالولي سايره الجامعه... ووياها البشكاره والدريول...الشرطي قال حسب ماخبروه انه الدريول اونه بيلف عن سياره ماشيه والاشاره حمرا في درب غلط... تجلبت السياره...كنه نطرت منها...الدريول بعده طايح ماندريبه شقايل حالته...والبشكاره ماياها غير كسر بالايد... ورضوض.. وبسبتها تاخروا لين ما خبرونا لانها البقرة ماتعرف لا الرقم ولا اسمهم الكامل ولا شي... نفعهم تيلفون الدريول بس يوم حصلوه..كان فيه ارقام البيت وجي... وبس
هزيت راسي انا باسف...في نفس الوقت رفعت نظري وشفت يوسف توه داخل الصالة..يبتسم لويوهنا... تقرب ويلس عدالي..توترت..كيف ارمس جدامه احين.؟!..مايصير انش عنهم بعد واخليه اروحه ويا سعاد...بتنازعني هي وهو بعد...
ناصر: انزين...يوم تعرف أي شي اتصلبي اوكي؟
محمد: ماعليه..يوسف عندك صح؟
ناصر: هي...
محمد: بتون رباعه؟
ناصر: اظني...خلاص برايك محمد..
محمد: الله وياك...
سكرت عن محمد والتفت ليوسف...
حاولت ابتسم...
ناصر: ارتحت بالرقاد؟
يوسف: الحمد لله ارتحت... عجيبة الشبرية بصراحه...تشفط الواحد شفط...
ناصر: انا مادانيها لينه وايد....يعيبني الطبي..
يوسف: لا الطبي يكسر ظهري...
مديت ايدي وصبيت له شاي..خله يروق شوي ...لين ما انا افكر بطريقه اخبره بها عن الحادث....
عطيته الشاي..
يوسف: سلمت... منو هذا محمد يرمسك؟
ناصر: هي..
يوسف: شو بلاه.؟
ناصر: مابلاه شي انا متصلبه..
يوسف: انزين انته قلت له يتصلبك اذا عرف شي...شو السالفه؟
قعد يوسف يشرب شاهيه وهو يطالعني وحياته معقده...يتريا مني جواب...
شو اقوله؟!
ناصر: بيني وبينه شغله بخبرك عنها عقب...
حست سعاد بتوتر الجو... يمكن ماتبغي تشوف يوسف يوم ينصدم بالخبر...عشان جي طلعت من الصالة وخلتني اروحي وياه..
تميت انا متوتر....كيف اخبره؟ ...كيف اقوله عن حادث كنه بطريقه تخليه مايتهور بالسواقه ويطير؟
مافي طريقه مناسبه....!!
حط يوسف كوبه عالطاوله وتنهد...
يوسف: شفيك؟!!...
ناصر: هاه...مافيني شي ليش؟
عقد يوسف حياته واطالعني بتشكك...
ناصر: مافيني شي...
يوسف: ناصر... انا مب ياهل واعرفك...
ناصر: خلص شاهيك انزين...
يوسف: ماباه... قول شفيك ؟ شو مستوي؟
حسيت انه يوسف من قبل حاس بالموضوع... ويمكن لا...يمكن بس كان متوتر بسبب تحويل الشغل..!!
ناصر: قول لا اله الا الله...
بهت يوسف بويهي ووقف عن كرسيه مصدوم...
ناصر: لالالالا محد مات الحمد لله كلهم بخير وسهاله لا تخاف...
يوسف: ناصر... لا تلعب باعصابي قولي...
ناصر: بس حادث بسيط..
تم يوسف ينفس بقو...صدره يرتفع وينزل بسرعه....خايف من اللي بيسمعه...
يوسف: منووه؟
ناصر: قتلك بسيط..
يوسف: انزين منوووه؟
ناصر: لاحول ولا قوة الا بالله...بنت عمك كنه...
غمض يوسف عيونه بالم... يلس عالكرسي شوي شوي لين ما استقر عليه....يفكر...
ناصر: يوسف... احين بنسير لهم... بس خلني ابدل ثيابي واييب اغراضي.... مافيها هي شي لا تخاف...دقيقه بس..
سرت عنه يوم شفته هادي....دخلت الغرفه وين سعاد موجوده...
سعاد: ايلتيلو؟؟؟
ناصر: هي...مسكين... جهزي اغراضي بسرعه لين ما اتلبس...
وبعد ماتلبست وخذت اغراضي..
ناصر: انا بروح العين اوكي سعاد... احتمال ابطي هناك...
سعاد: ماجهزت اغراضك..
ناصر: ماعليه عندي ثياب هناك في الغرفه... باي حبيبتي..
بستها وطلعت من الغرفه....يوم دخلت الصاله....دورت يوسف....ماكان موجود.... التفت للباب..حصلته مبطل...
ركظت برا الشقه....حسبي الله عبليسه....انا قلت لمنى...هذا ماروم له يوم يتخبل...!!...زين جي احين قص عليه مسوي عمره هادي وراح عني...احين وين بحصله..!!
طلبت المصعد اللي كان مشغول.....دقيقه لين وصل لي وانا اتحرقص على اعصابي....
يوم نزلت دورت سيارة يوسف وانا اعرف سلف اني مابحصلها...ركبت سيارتي بسرعه وطلعت...
اتصلت بيوسف...بس كان غالقنه....عرفت انه مابيفتحه... قمت اتصلت بالبيت...خبرت منى بتفاصيل الحادث وانا احاول اني اتجاوز السيايير اللي اقدر عليهن....
بوظبي زحمه... وين بروم اوصل له هذا بعد؟
منى: مسكينه يا كنه... يوسف بعده راقد؟
ناصر: يوسف...!!!. يوسف اونه بيترياني ...قص عليه وشرد ...احين ادوره ومب محصلنه...
منى: شووووووووه؟؟؟ ياويلي ويلاه انا منو بحاتي كنه والا ييوسف...!!!
ناصر: والله عاد انتي تعرفينه اخوج....
منى: الله يحفظه يارب...
ناصر: وانا مالي دعوى بعد؟
منى: ويحفظك... كنه مب عزيزه عليك شرات ماهي عزيزه على يوسف وانته تدري...بيطلعن ينونه...
ناصر: ان شاء الله بيوصل سالم ماعليج...
منى: ان شاء الله..انزين اسمع ناصر..دخيلك اخطف عليه وشلني وياك انا ماروم اسير ويا الدريول..
ناصر: وين تبين؟؟
منى: لا تخليني اسويها صدق واروح ويا الدريول... انا الا عشان الناس ماترمس عليه وعليكم يالسه اترياك والا ماعليه من حد ابا اشوف كنه واطمن عليها .....
ناصر: بسم الله خليتيني علوج يابوج...سكتي سكتي خلاص بخطف عليج...بس خلج جاهزه
منى: انا من يييت من الجامعه وانا بعباتي ماعقيتها...
ناصر: زين لا تعقينها... يالله خليني اركز في السواقه وادور هالخبل...
منى: برايك...لا تسرع انته بعد...
ناصر: اوكي..باي..
منى: مع السلامه...
فريت التيلفون عالسيت الثاني...وقعدت ادور يوسف...لكن ماكان له اثر..مادريبه وراي والا جدامي... الله يستر.....
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الثلاثاء..
المكان: سيارة راشد...
الوقت: السادسة وخمس دقائق مساءا..
-----------------------------------
(راشد)....

خلصت شغلي مع سهيل.... وكنت قريب من بيت عمي....قررت اني ادخل اسلم.. اما بالنسبه لسهيل..فرجع للسوق...
قال ان مهرة دخلت في مخه انه يحط طقم كراسي صغير في الحجره ...وسار السوق يدور هالطقم اللي يناسب غرفته اليديده....
وقفت جدام بيت عمي ...وقفت سيارتي برا ونزلت وانا البس نظاراتي...
فتحت باب البيت ودخلت.....من دون قصد رفعت نظري وشفت بنت ....يالسه على دري البيت الامامي... حاظنه راسها بين يديها ومسندته على ركبتها....
حسيت انها منى....يلستها تدخل على انها زعلانه....
وقفت هناك وماقدرت اتحرك...لا صوبها...ولا صوب الميلس...!!
شهقت يوم هي رفعت راسها فاجه صوبي....مديت انا ايدي وفصخت نظارتي لسببين...عشان اتاكد من اللي شفته... وعشان بعد تعرفني وتميزني وماتخاف....
عقدت حياتي...شفت دموع بويهها...انا متاكد انها كانت تصيح....خوفتني...
تحركت منى وتغشت ووقفت بتعب...اما انا فتلفت حوالي...غريبه ماشي غير سياره البيت...وين باقي السيايير؟!..
مشيت صوب منى... وانا اهدي نفسي...بكلمها...!
مافيها شي..خطيبتي..!
راشد: السلام عليج..
منى: ..وعليكم السلام...
صوتها كان هادي بزياده...
راشد: شحالج منى؟
منى: بخير.. محد في البيت..!
راشد: لاحظت... شفيج منى؟!
صاحت منى...عرفت هالشي بسبب ارتجافها ولانها رفعت ايدها تغطي ويهها حتى من فوق الغشوه..!!
راشد: لا تخوفيني شفيج؟!
منى: بنت عمي سوت حادث...
راشد: شوووووه..!!.. وشحالها الحين؟
منى: مادري...
راشد: كلهم في المستشفى؟
منى: هي..توام...
راشد: وخلوج روحج....تبيني اوديج ويا البشكاره؟!
منى:....آه..لا...ناصر باييني ياخذني..
راشد: ناصر في العين؟
منى: احيين ياي من بوظبي...
راشد: زين... انا بسير عندهم اشوف شو السالفه....انتي لا اتمين واقفه برا جي دشي البيت...
منى: ان شا ء الله....
راشد: ان شاء الله انها بخير منى..لا تحاتين...
منى: والله اني زايغه محد طايع يرد عليه ويخبرني بحالتها...
راشد: لو يصير جان انا طمنتج... بس ماعليه من اوصل هناك بلح على يوسف والا ناصر يخبرونج كل شي بالتفصيل...
منى: مشكور راشد..
راشد: العفو..بس لا اتمين تصيحين اوكي...
منى: اوكي...
راشد: محتايه شي..شي فخاطرج؟ انا بسير...
منى: سلامتك...
راشد: الله يسلمج... فمان الله...
خليتها وسرت وهي مقطعه قلبي بشكلها.... يمكن هذي بنت عمها الي وايد وياها...مسكينه...
ركبت سيارتي وسرت المستشفى... وانا في الطريج اتصلت بيوسف..بس حصلته مغلق... سكرت واتصلت بمحمد وتخبرته عن مكانهم...
والحمد لله انه ماسالني كيف عرفت...والا كنت بتورط...ماروم اقوله كلمت منى بينقد علي...
وصلت المستشفى... وسلمت عليهم كلهم....
راشد: وين مايد عيل ماشوفه.... مب اخته..!!
محمد: ماقلناله...مسكين توه معرس ومسافر مانبا نخرب عليه..وان شاء الله انها بخير...
راشد: احين هي شوفيها بالضبط؟
محمد: عندهاكسر بالريل...رضوض وشموخ... وشاكين بظربه في الراس لانها نطرت برا السياره... ولين الحين فاقده الوعي...لين ماتقوم وتستجيب للي حواليها مايرومون يقولولنا شوفيها بالضبط...
راشد: يعني هي لين احين ماقامت؟
محمد: لا...
راشد: الله يشفيها مسكينه....
فكرت اتصل بتيلفون البيت واخبر منى باللي عرفته...بس عقب تراجعت...ماعرف تيلفون البيت...!!
استحي اقولهم خبروا منى...قوية الصراحه...!!
-------------------------------------
اليوم: الثلاثاء...
المكان: سيارة يوسف..
الوقت: السادسة والنصف مساءا..
------------------------------------
(يوسف)...

توني داخل العين... وحالتي العصبية والنفسيه تحت الصفر....
كله من وضحه...هي اللي دعت عليها...كله من وضحه....كنه بتمووووت والسبب دعوة وضحه...
كرهت وضحه من خاطري.... وطول الطريج وانا يا اني اسب وضحه..يا اني اتدعى لكنه بالشفا...
مديت ايدي ومسكت التيلفون .... كان مغلق..ماتذكر اني غلقته...!!
مب مهم..فتحه واتصلت بامايه....تخبرتها عن مكانهم..وسكرت...
وحمدت ربي ان مستشفى توام قريب من دخله العين من صوب بوظبي... توجهت له بسرعه...
دخلت المستشفى وانا اركظ اكثر من المشي...
سمعت بحد يزقرني...التفت... كان يابر..خال راشد...
يالله يالله تذكرته بحالتي هذي...
يوسف: هلا يابر..
توايهت معاه..
يابر: شحالك؟ عسى ماشر اشوفك في المستشفى..
يوسف:آآه..بنت عمي طايحه في المستشفى ...
يابر: افاااااااا ليش عسى ماشر..
قلت له بياس وانا شوي وبصيح..
يوسف: حادث...
يابر: لاحول ولا قوة الا بالله...وين في أي قسم...؟!
خبرته .سحبني ومشى معاي... لين ماوصلنا عندهم...كانوا كلهم متولفين...استغربت وجود راشد...حتى راشد موجود منو خبره؟!..يمكن درى بالصدفه...!!
وبعد ماسلمت عالكل باضطراب..مسكت يابر ورحت به شوي بعيد..
يوسف: يابر...هذيلا مابيقولولي الصدق...دخيلك يا يابر كلم الدكتور او انته بنفسك شوفها وخبرني بالصدق..طلبتك...
يابر: افا عليك بس...اطمن... احين باييك بروح اكلم الدكتور المشرف عليها...
راح يابر عني.... يلست انا على كرسي قريب...لكني ثواني ونشيت عنه...ماروم ايلس...
بعد فتره ..رجع لي يابر ومسكني... رحنا شوي بعيد...
يوسف: بشر... شحالها؟!
يابر: بنت عمك ناطره من السياره... عندها كسر بالريل...رضوض وشموخ بسيطه بتروح مع الزمن...لكن اللي مخوفني انها ماقامت لين احين...
حسيت بايد بارده تعصر قلبي...ليش.؟ ليش ماقامت...
يوسف: شو قصدك..؟!
يابر: الاطباء يقولون عندها ظربه بالراس... مافي نزيف او شي الحمد لله ...لكنها فاقده الوعي... ماقامت...!! مانقدر نسويلها شي لين ماتقوم بنفسها...
يوسف: مب فاهم عليك يابر....
كنت احس بالياس.... ليش ماقامت...ابا سبب...!! مافهم هالكلام كله...ابا سبب ليش ماقامت.؟!
يابر: انته قلت تبا الصدق وهذا الصدق...بنت عمك اذا ماقامت لين باجر... تراها في غيبوبه..!!

تنفست بصعوبه.... حسيت ان الاكسجين اختفى من المكان... يلست عالكرسي وراي وانا ارتجف من فوق لتحت....
غيبوبه..؟!!!... كنه في غيبوبه..!!
يابر: خلك قوي...افا عليك يايوسف..!!
يوسف: كيف يعني غيبوبه...
يابر: بعد كيف يعني غيبوبه.... !!
يوسف: متى بتنش؟!
يابر: العلم عند الله...متى ماتكون هي مستعده انها تقوم...بتقوم...يمكن بعد ساعات...ايام...اسابيع...اشهر او سنوات...محد يعرف بالضبط ليش الانسان يروح في غيبوبه...ومحد يعرف بعد ليش وكيف يرجع من الغيبوبه..!!..
يوسف: لا...الله لا يقوله ان شاء الله بتقوم....بتقوم انا ادري... كنه عنيده مابتستسلم للغيبوبه...انا اعرفها...!!
قمت اتكلم واخربط مثل المينون.... ماعرف بالضبط بشو افكر...
غيبوبه لا....لا ياربي دخيلك تشفيها...!!... خذ نص عمري بس المهم تقوم....!
الله يسامحج ياوضحه...كله منها هي...!!
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الثلاثاء..
المكان: بيت سلطان...
الوقت: السابعه مساءا..
------------------------------------
(منى)....

طلعت من حجرة امايه وانا البس شيلتي... سكرت الليت ورديت اقعد برا... اذن المغرب...وناصر بعده ماوصل...!! وينه.!!
تذكرت باحراج راشد وهو يقولي دشي داخل البيت.... ماسمعت كلامه... دخلت بس لين ماهو طلع من البيت عقب رديت اطلع واقعد عالدري...
لين احين مب مستوعبه اني وقفت له وكلمته.... ماعرف هالشي صح او غلط...!!..يوم تطلع كنه من حالتها ونطمن عليها يمكن يرد لي عقلي واعرف انا بالضبط شو سويت...!!!
يلست عالدري ...مع اني احس راسي داير من الاحداث اللي صابتني اليوم... بس لازم اروح اطمن على كنه... لازم...
رفعت راسي وانا اسمع سياره تدخل..ويوم ميزتها انها سياره ناصر وقفت وركظت...ركبت السياره على عجل...
ترييته يتحرك بس ماتحرك... التفت له..حصلته يطالعني باستغراب...
ناصر: وايهي انزين..!!
حركت ايدي بعصبية....
منى: متــــــفــــــــيّـــــــــج....!!!
ناصر: مابتحرك الا يوم توايهين...!
قربت اصيح... تقربت منه ووايهته...
منى: يالله تحرك..
ناصر: بعد وحده...
منى: اوهوووووووووو...
ناصر: هههههههههههههههه خلاص خلاص..حشى محد يسولف وياكم..
حرك ناصر سيارته وطلع من البيت...
منى: انته مب حاس اللي نحن حاسين فيه...
ناصر: بنت عمي..كيف يعني مب حاس باللي انتوا حاسين فيه...!!
منى: مب غالية عندك شرا ماهيه غاليه عندنا....
ناصر: غالية عندي...في النهاية بنت عمي...وبتصير ان شاء الله حرمه اخويه... لكن صح مب نفس درجة الغلاة...لا تحاتين ان شاء الله انها بخير...
منى: ان شاااااء الله...
سكت عنه وهو يسوق...
منى: شفت يوسف؟
ناصر: لا ماحصلته...وغالق تيلفونه...
منى: ياربييييييييييه....
ناصر: اذا بتمين لي جنج عيوز بردج البيت...
منى: لالا خلاص ...بسكت...
وبعد شوي تذكرت راشد...قال انه بيسيرلهم...ياويلي اخاف يحرجه حد بالسؤال ويقولهم عرفت من عند منى..!! بيذبحوني..!!
منى: آآآه ناصر..ابا اقولك شي بس ماتعصب...!
ناصر: بعصب...
منى: عاد ناصر..
ناصر: قولي قولي...
منى: هممم..انا كنت يالسه عالدري اترياك...يوم دخل راشد...
عظيت على شفايفي زايغه من ردة فعله... التفت لي ناصر بسرعه وهو معقد حياته...
ناصر: شو يايبنه..؟!
منى: مادري...
ناصر: وشو صار؟
منى: انا ..تغشيت عنه...
ناصر: بس؟
منى: محد كان في البيت بغيت اقوله انه محد في البيت.....
ناصر: كلمتييييييه..!!! عنبو هالويه لج.... يخلونج في البيت اروحج تقومين جي تسوين..!!!
منى: ماكفرت انا كنت متغشيه والله اني واقفه عنه بعيد ومادار بينا كلام يغضب ربنا....
ناصر: انزين وعقب؟
منى: سالني شوفيج تصيحين وجي...قتله بنت عمي مسويه حادث وكلهم في المستشفى....قال انه بيسير يشوفهم....يمكن نحصله هناك...انا اخبرك بس عشان ماتحرجه جدامهم بالاسئله وتقوله من وين عرفت وجي... لا تساله اوكي...
ناصر: مالت عليج...ان عدتيها ياويلج تسمعين..!!...هذي خطبه بس مب ملجه عشان تكلمينه...
زعلت في نفسي...لكني استاهل النزاع شحقه اكلمه انا بعد..!! بس شو اسوي؟ فظيحه اشرد..!!!!
منى: ان شاء الله...
تم ناصر ساكت عني كانه مزاعلني...لين ماوصلنا المستشفى...
وبعد اتصال اجراه ناصر..عرف ان كنه نقلوها غرفه لانه حالتها مستقره وماتحتاج للعناية المركزه...
رحنا لهم...هناك شفت ناس وايد...ماميزت غير الحريم..
رحت عند امي سيده...
منى: اماايه..شحالها كنه؟!
ام سلطان: بخير بنتي بخير...الله يشفيها ...
منى: ابا اشوفها...
ام سلطان: احين امها وخالتها عندها بالغرفه تريي لين يظهرن وبندخل انا وانتي...
منى: اوكي...وين الباقي...؟
ام سلطان: يدتج تعبت ووداها محمد البيت ويا نوره والبنات الصغار.. ماله لزمه يقعدن هني الا مسويات زحمه...
منى: يعني هي بخير؟
ام سلطان: مكسوره ريلها...بس لين احين فاقده الوعي يقولون..ماقامت...
هديت نفسي...فقدان الوعي هذا مب زين.....لكني بتريا لين ادخل واشوف بنفسي...
منى: يوسف ياكم؟ شفتوه..؟
هزت امي راسها باسف...
ام سلطان: اخوج اكووه يالس هناك اروحه ومايبا يرمس حد...سيري شوفيه..!
اطمن قلبي يوم انه يوسف موجود وبخير...التفت للمكان اللي اشارت لي اياه امي...
منى: هذاك الي يالس هناك؟
ام سلطان: هي...
خليت امي ورحت صوبه...حسيت باحراج وانا امشي بين الرياييل... لكني عشان يوسف بروح...مسكين..
يلست عداله ومسكت ايده وهو مب حاس فيني....
التفت لي...
يوسف: منو...منى؟!
منى: هي انا منى....
يوسف: منو يابج؟
منى: ناصر...اطمن يوسف... ان شاء كنه بتكون بخير...
اطمنه وانا اروحي مب مطمنه...!!..
يوسف: منى... كنه يمكن تدخل في غيبوبه....غيبوبه يا منى....!!
شهقت..
منى: ليييييش؟
يوسف: عندها ظربه بالراس غير الكسر والرضوض... انا تخبرت يابر خليته هو يسير يسال ويقولي الصدق... قال لي انهم خايفين من ظربه الراس...مافي نزيف او شي... لكنها ماقامت لين احين المفروض تقوم...!!
منى: انزين يمكن...يمكن تعبانه بس وبترتاح لين باجر...
هز يوسف راسه متشائم...
يوسف: يابر قال اذا ماقامت لين باجر تراها في غيبوبه.... ومحد يعرف متى بتطلع منها.. منى... في ناس يكملون سنوات وهم في غيبوبه....!!
كان يوسف يائس وايد.... يالله يالله ماسك نفسه....
منى: منوو يابر هذا؟!!...
يوسف: خال راشد...قتلج تراني....
تذكرت راشد فجاه...
منى: راشد هني؟
يوسف: هي...واقف هناك...
ما التفت..لكني ادركت اني مريت من صوبهم...اكيد شافني....
منى: شفتها انته؟!
يوسف: لا... ماشفتها...
منى: بتشوفها ان شاء الله...اطمن يوسف...خلك قوي...
يوسف: الله كريم... امي تزقرج منى...
التفت لامي الل يكانت تاشر لي عشان ادخل معاها...
يوسف: بتدخلين؟
منى: هي بدخل..تبا شي؟
يوسف: ..... طمنيني... كلميها منى يمكن تسمعج وتقوم...هي تعزج وايد...
منى: ان شاء الله ....
قمت من الكرسي وسرت عند امي... عند الباب..سلمت على ام مايد..وهي تصيح...واسيتها شوي وعقبها دخلت مع امي...
عقيت غشاتي.... انملت عيني دموع على طول...لين متى الواحد يتظاهر بالقوه....!!!
كنه الحيويه...النشيطه...طايحه مثل الخلقة على هالشبرية.. ريلها مجبسه ومرفوعه فوق شوي...
عندها شوية جروح بالويه ملزقينها لها.... لافين لها راسها بشاش ابيض....
المغذي ..والابر..والاجهزه..!!!...
تقربت منها وانا ارتجف...انفجرت بالصياح ولويت عليها وهي راقده...
وامي ماسكتني من كتوفي وتحاول تبعدني عنها وهي تواسيني...
وبعد ماخلصت النوبه....بست كنه على يبهتها... تاملت ملامح ويهها....توحي بالهدوء والسكينه...
في عالم مايدري عنه غير ربنا... ياترى هي راقده..!! والا فعلا في غيبوبه..!!!!
منى: كنه..!!... كنه قومي دخيلج...!
تكررت محاولاتي لكن بدون جدوى... ويوم شفت محاولاتي ماتنفع...يئست...ورديت اصيح مره ثانيه...!!
مالومها ام مايد يوم طلعت من غرفة كنه وهي تصيح...اكيد هي حاولت قبلي...

بعد ساعات في البيت... دخلت غرفة يوسف وانا شاله صحن بايدي... كانت فيه سندويشات ليوسف...اللي ماذاق شي ابدا....
كان مصر انه يقعد في المستشفى لكني من طلعت من عند كنه...ادركت انه قعدته بلا فايده.... كنه مابتقوم احين... عندي احساس بهالشي.... عشان جي حلفت عليه يرجعني البيت.... عن يبدون الناس يتكلمون عليه بانه وايد مشتط بسبب حادث كنه... صحيح ولد عمها....لكن خواني ما اهتموا ذاك الزود يوم اطمنوا عليها راحوا...واصلا كانوا طبيعيين يتكلمون عادي ...لكن يوسف منهار..اكيد بيلاحظون عليه... بيقولون بينهم شي.. وانا هالكلام لا يرضيني على يوسف ولا كنه بعد...

دخلت غرفته حصلته يالس على شبريته....وماد ريوله جدام ومتلحف... مع انه كان مبند المكيف...!!!..
من متى يوسف يقعد في حجرته بلا مكيف..!!!
منى: شفيك بردان.؟!..
يوسف: هي....
منى: بس الجو حر...
يوسف: بردان... ماياج خبر او شي؟
منى: لا يوسف... لين باجر ماظني كنه تقوم...
يوسف: ان شاء الله تقوم....بتقوم...!
يلست عداله عالشبرية...
منى: انته ماتعشيت...يبت لك سندويشات...
يوسف: ماشتهي...
منى: بتاكل...
يوسف: مابا منى...
منى: عشان خاطري....عشان خاطر كنه انزين...!!
تافف يوسف... ورفض الاكل... شكيت انه مريض... مديت ايدي وحطيته على يبهته...وشهقت...
منى: ايييييه انته محموم... ليش ماتقول...
غمض يوسف عينه بتعب...
يوسف: خليني ارقد منى...
منى: لا...بتاكل هالسندويشات...عشان اعطيك بنادول..وعقب بترقد...
يوسف: عطيني بنادول احين وشلي السندويشات ماباهن...
منى: مابتاكل بندول وبطنك خالي...يالله كل لا ازقر لك امايه تحشرك احين انته تعرفها...
يوسف: مابا انزين...ماباكل شي لا سندويش ولا بنادول...طلعي برا وخليني ارقد...
واثباتا على كلامه انسدح وغطى راسه باللحاف...
سحبت عنه اللحاف وعصب...
منى: لا تطلعلي الشيب عاد... قوم ابا اكلمك شويه...
يوسف: شوووه..؟
منى: كنه مابتقدر اداوم... شو اسوي؟ اخذ عذر من المستشفى واعطيهم اياه؟ عشان مايحسبولها غيابات..!!
يوسف: لا... اصلا مابتروم اداوم بريل مكسوره...
ظهر الاسف على ويه يوسف على حالة كنه..وكيف بتاثر على حياتها...وحياته..
منى: عيل شو اسوي؟
يوسف: وقفي لها هالكورس...خليها ترتاح من هالحادث شوي...
منى: اوقف.؟!!... بس جي بتتاخر كورس كامل... كنه مسجله خمس مساقات حرام...
يوسف: شو تبينها تسوي يعني تتبهدل من مبنى لمبنى وهي تسحب ريلها.؟!
منى: اذا وقفت كنه انا بعد بوقف...
يوسف: سوي اللي تبينه...
رفع يوسف يديه وقعد يهوس على راسه...كسر خاطري..
منى: عشان خاطري كل عشاك عشان اعطيك بنادول وترقد... والله بزقر لك امايه ماعليه منك...
يوسف: وانا ماعليه لا منج ولا منها...
منى: شو تقول انته..!!!
يوسف: منى ...دخيل الله ...والله مالي بارض خليني اروحي ... مافيني شده اشلج وافرج برا..عظامي متكسره...والا بسويها ولا علي...
منى: بخلي السندويشات هني يمكن تنش يوعان...
يوسف: شليهن ريحتهن تلوع بجبدي....
منى: مافيهن ريحه...!!!
يوسف: انا اشم فيهن ريحه شليهن...
منى: اوففففففف معاند في عمرك انته....برايك امرض ولا تصح...
يوسف: احسن بعد ...
شليت صحن السندويش وطلعت....انا مب زعلانه منه....مالومه...مريض وزعلان على حالة كنه... لازم نتحمل مزاجه لين ماكنه تصح...!!
رجعت حجرتي وانا افكر... اوقف مع كنه.؟؟..والا اكمل دراستي واعين خير..!!!...
مادري والله شو اسوي..!!
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاربعاء..
المكان: بيت خلفان..
الوقت: الخامسة عصرا..
-----------------------------------
(مبارك)...

دخلت بيت خالتي المرحومه وانا مستانس... اليوم يوم ميلادي... دخلت الواحد والعشرين...ابتسمت وانا اتذكر امي الله يرحمها... ماكانت تفوت يوم ميلاد واحد...لازم تسويلي كيك وتعزم بنات خالاتي وخالاتي...ابتسمت اكثر وانا اتذكر شلة البنات الشقر والحمر اللي عمري ما اعتبرتهن من اهلي...
لكن الواقع يفرض علي اني اعترف فيهن... فعلا هن بنات خالاتي..رغم انهن كافرات..!!!
حتى هن ما اعتبرني واحد من اهلهن...ماعندهم ذاك الزود من الاعتبار لامور الاهل..!!
فرق...بين هني...وهناك..!! ماحسيت ان عندي عايله فعلا الا يوم ييت هني...!!
دخلت الميلس...شفت سيف يلعب بلاي ستيشن...ومهرة يالسه عنده وتفصفص في شهادته ..!!
مبارك: السلام عليكم...
ردوا علي السلام... مهرة قامت ويلست عالكرسي شوي بعيد وهي تعدل حجابها...
مهرة: شووو هذا..!!... 75 في التاريخ.!!! ليييييييش..!!!
سيف: اوهوووووووووووووو اذيتيني....قتلج مب محسوبات...
مهرة : بتيب نفس العلامه في الامتحانات النهائية...!! ويمكن اخس..هذا نص الكتاب مارمت له كيف كل الكتاب..!!!
مبارك: شوي شوي عليه مهرة...
مهرة: شو شوي شوي هذي علامات هذي...!!
مبارك: طبيه عنج بيدرس عدل في النهائي اوعدج بييب علامات زينه....
مهرة: والله ماظني... دامه مجابل هالبلاي ستيشن... الحمد لله انه ماعنده سياره والا مول مابنشوفه في البيت...
سيف: ابويه واعدني بسياره يوم اتخرج...
مهرة: اذا نجحت...
سيف: ليش تفاولين علي.!!!..
مهرة: اباك تشد حيلك شوي مابيطيح نصك..
مبارك: صدقها...
سيف: اطلع برا بيتنا...
مبارك: ههههههههههههههههههههه... اسمع عاد فكونا من سوالف الدراسه... انا مستانس اليوم...
مهرة: ان شاء الله دوم...بس اكيد فيه سبب...
مبارك: اليوم يوم ميلادي....
مهرة: والله..؟!!.. كل عام وانته بخيييييييير...
مبارك: وانتي بخير...
شفت الفرحه على ويه مهرة.... اما سيف ظحك بسخرية...
مبارك: where is my birthday cake?
مهرة: ماقلت لنا والا بنسوي....
سيف: هههههههههه كيك..؟!!... بوي نحن ماعندنا هالسوالف...بنسوي لك قرص جان تبا... وبناخذ لك صلب من الشيره وبنحرق لك طرفه...وبنركزه في نص القرص...عقب انفخ جان تبا...!!
مهرة: هههههههههههههههههههههههههه...حرام عليك.. يقص عليك نسوي كيك ليش مانسوي..
مبارك: خلينا القرص لك يالهرم...زطي ياناس....
سيف: ايواااا لحظه سكتوا...تيلفووووووون.... (طلع تيلفونه من مخباه ورد عليه)...آلووه... مرحبا...
تلفت لنا وهو معقد حياته ويسمع...
سيف: هي انا سيف.....هيييييييه اهليييييييين...لحظه شوي...
قام سيف وطلع برا الميلس... استغربت حركته..!!
مبارك: منو يكلم؟!
مهرة: شدراني... حياة هالولد غريبه ومخوفتني...
مبارك: لا تحاتينه وايد سيف ريال الحين....وكل ريال لازم يتعرض لمواقف تقوي من شخصيته وتخليه اثبت....
مهرة: يعني؟
مبارك: يعني خليه يخوض تجاربه ويتعلم منها... بدون هالتجارب مابتكون عنده خبره بالحياة... ولا قناعة باي شي...
مهرة: من وين يبت هالكلام؟
مبارك: من عند ابويه... امي الله يرحمها كانت تخاف عليه حتى اني اطلع العب ويا الاولاد برا... دومها ميلستني في البيت. وتزقر الاولاد يلعبون ويايه داخل البيت..ابويه يوم يشوفني يقولي روح العب برا..وانا اطير مااجذب خبر... امي كانت تحتشر لانه يكسر كلمتها... لكنه قالها مايصير تردين عن الولد كل شي... هذا ولد وبيكون ريال مابيطلع بنت ... لازم يشوف الحياة بنفسه ويتعلم منها....
مهرة: فديت خالي والله ....سنفور مفكر...
مبارك: هههههههههههههههه.... انا بربي عيالي نفس الشي ان شاء الله...
رفعت مهرة نظرها لي وهي تبتسم.... عقب قالت..
مهرة: هذا اول يوم ميلاد لك في الامارات....
مبارك: صح...
مهرة: فيه فرق؟
مبارك: شاسع...
مهرة: كيف..وشو احلى..
مبارك: تساليني؟... انا من ييت هني وانا حاس فعلا بقيمه العايله والاهل.... هناك ماكنت اشوف خالاتي او الاهل بشكل عام غير في المناسبات...بس...بعد مب كل المناسبات..الكرسمس وهالسوالف ماكنا نسير... بس الاعراس...اعياد ميلاد..هالسوالف... احيانا يتيمعون بلا سبب...يقعدون يشووون وحد يتسبح في الحوض وحد يلعب تنس... بس باختصار ما كنت احس انهم اهلي...معارف..بس...
مهرة: وهني؟
مبارك: هني انا عضو في مجموعه... وعضو مهم.. احس لي قيمه ... حد انتمي له... عندي ابو... عمام وخوال...عندي خاله...بنات خاله...عندي خوان وايد ...واخت...
وابتسمت لها.... ابتسمت هي بعد....
مهرة: منو بنات الخاله ومنو الاخت.؟؟
مبارك: يبالها سؤال؟
ظحكت مهرة مستانسه....كنت اقصدها هي طبعا بالاخت.... وشيخه وفاطمه ببنات الخاله...لاني مب قريب منهم ذاك الزود بحيث يكونن خواتي..مب مثل مهرة...
مهرة: هالاخت اظني مطلعتلك الشيب من كثر ماتتظارب وياك...!!
عقدت حياتي مستغرب..
مبارك: لا انا وانتي ما نتظارب...!!..
اطالعتني مهرة شوي...عقب اختفت ابتسامتها...
مهرة: كيف؟!!
مبارك: شفيج...؟
مهرة: كنت تقصدني انا بالاخت؟!
مبارك: هي... عيل شيخه بالله...شيخه ما تحبني ذاك الزود..!
طاحت الشهادة بين يدين مهرة للارض... وهي اطالعني وعلامات الدهشة على ويهها....
تميت انا اطالعها ومشاعر غريبه تجتاحني.... شفيها مهرة؟ ليش اطالعني جي؟ ليش انصدمت؟!...
مبارك: مهرة..!!... انتي تعتبريني اخوج بعد ...صح؟!..
هزت مهرة راسها بالنفي...وعلامات الالم والجرح على ويهها.... انصدمت...!!
ارتفعت انفاسي ودقات قلبي..ماعرفت شو اقول....
مهرة ماتعتبرني اخوها....!!... مش مثل ماانا تصورت..!!
مبارك: مهرة انا...
قاطعتني وهي تهز راسها بقو وتقوم من الكرسي...
مهرة: انسى...بليز...
داست على شهادة سيف... من دون ماتحس... شهادة كانت تترياها بفارغ الصبر..والحين...!!!. مشت بسرعه برا الميلس...وتميت انا اروحي...!!
يارب..ساعدني...كيف اتصرف..!!! علاقتي بمهرة احين بتخترب....
هاجمتني ذكريات عن مهرة وعني.... ذكريات واشارات كان ممكن افهمها بشكل ثاني لكني اخترت اني افهمها بشكل اخوي....!!
ليش ما انتبهت من قبل جان ماحطيتها وحطيت نفسي بهالموقف المحرج...!!
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الاربعاء...
المكان: بيت خلفان..
الوقت: السادسة الا ربع...مساءا..
----------------------------------------
(سيف)....

سكرت عن اللي متصل وانا افكر... كان هذا حسين...الملحن... انتبه لغيابي عن الحفلات فتره طويله ..خذ رقمي من واحد من الشباب...
استغربت اهتمامه الكبير فيني وبصوتي...
خبرته بانه ابويه درى الموضوع وعصب وجي... ظحك...
قال لي: كلهم جي فالبدايه...!!!
شو يقصد.!...يعني عقب بيتقبل الموضوع..!!... بيستوي عادي عنده..!!
طلب مني اروح الخمس الياي لدبي... بيلاقيني وبيوديني استيديو يجرب صوتي على وحده من الاغاني الوطنية اللي يبون ينزلونها...!!!...
قلت له بشوف بفكر وبرد عليه خبر....
لكن هذي يبالها تفكير؟ الريال عطاني الفرصه لين عندي..ارفض؟!.. عشان شو؟؟ عشان مجتمع ممكن يرفضني بعدها..!!
شو ابا فيهم انزين..!!.. مب محتاج منهم شي انا....!!..
لكن ابويه..!!!.. اووفففف شو هالحال..!!
نزلت من سيارة مبارك اللي كنت يالس فيها ارمس براحه..ورديت ادخل الميلس..
حصلت مبارك يالس باكتئاب يتامل شهادتي...
سيف: يا هالشهاااااده اللي كل حد يتمنظر فيها..!!.. لو عاطنكم صورتي ما بتتاملونها جي...!!
رفع مبارك راسه واطالعني ببرود...فر الشهادة عالارض..
مبارك: منو متصلك؟!...
سيف: مابتقول لحد؟
ييت ويلست عداله...
مبارك: قول..
سيف: حسين الملحن تذكره...
مبارك: شو يبابك؟
كان مبارك معقد حياته ومب راضنه الوضع..لكني انا كنت متحمس بالتالي طنشت...
سيف: ما تتخيل... يباني اغني في اغنية وطنية بيخرجونها... مجمع مجموعه شباب يباهم يغنونها...شرح لي الفكره ويباني اكون واحد منهم... قال لي تعال الخميس الياي لدبي..بيلاقيني وبيوديني الاستيديو...!!
ماتاثر مبارك بالفكره..
بالعكس عقد حياته اكثر..
مبارك: وانته شو قتله؟!
سيف: قتله بفكر...
مبارك: اتصلبه احين وقول له دور غيري انا ماقدر...
سيف: ليييييييش؟ انا عايبتني الفكره...
مبارك: ادري انها عايبتنك ..بس شكلك نسيت انته منوه ومنو اهلك...
سيف: اوهووو شو عليه منهم...هذيلا يحاتون عمارهم ولا اهتموا برغباتي انا...انانييين...
مبارك: انته اللي اناني... بتشوه سمعة اهلك كلهم بس عشان ترضي غرورك ....
سيف: مبارك.... انا خاطري بالغنا...احب اغني...
مبارك: لو ترتل قرآن وايد احسن لك واحسن لنا....
كانت كلمته في الصميم.... ارتل قرآن..!!!...
سيف: ماعرف ارتل...
مبارك: بتتعلم مثل ماتعلمت الغنا...استغفر الله ماشي وجه مقارنه لكن اقولك شي يفيدك وينفع آخرتك....
سيف: اوووه انته بعد لحقتهم مبارك...!!!...
مبارك: ياويلك ان سرت يا سيف.... انا من عرفتك وانا داس امورك الخاصه لكن هالمره صدق بتخليني اخبرهم عليك...
سيف: عليه منهم يعني انا...!!!!
مبارك: غصبن عن خشمك عليك منهم هذيلا اهلك ولهم فضل عليك...
سيف: بس عشاني اصغر واحد في العايله الكل بيتحكم بي..!! هذي حياتي انا كيفي...!!
اطالعني مبارك مقهور...
مبارك: اوكي كيفك.... بسير انا...
حسيته زعل... بغيت اراضيه...والطف الجو شوي..
سيف: تعال ماعطيناك هدية يوم ميلادك....
قال مبارك وهو ساير برا الميلس...
مبارك: استلمت الهدية وصدمتني..ماريد صدمات ثانية....باي..

عقدت حياتي مستغرب...شو يقصد؟!... انا يعني صدمته بالخبر؟... والا يقصد علاماتي؟!...
اوهووو امرهم غريب هالعايله...!!..
-----------------------------------
اليوم: الاربعاء...
المكان: غرفة مهرة...
الوقت: السادسة والنصف مساءا..
-----------------------------------
(مهرة).....

رفعت راسي من المخده وانا امش دموعي واطالع لولو بقهر...
كان خاطري اظربها... تذكرني بمبارك...مبارك اللي جرحني....
كانت لولو تناوي عدال راسي كانها حاسه اني زعلانه ومتظايقه.... رديت اصيح واصيح...
ليش انا حظي جي في الدنيا...!!
الانسان الوحيد اللي حبيته طلع يعتبرني اخته...!! ليش..؟!...
انا شو ناقصني عن البنات... ليش ما انحب..؟!.. مب حلوه كفاية..؟!... شخصيتي ما تجذب؟!..
رجعت اكره الرياييل اكثر من قبل.... لكن يوم وصلت عند مبارك ماقدرت اني اكرهه... كنت احس بالجرح وبس... الجرح العميق...!!
سمعت دق عالباب... تنفست بقو عشان اهدي اعصابي... مشيت دموعي بسرعه...
وقمت ابطل الباب....
كان سهيل...
سهيل: شو تسوين؟!
ابتسمت..او حاولت ابتسم..وحسيت انها طلعت ابتسامه جامده..!
مهرة: ماشي...
سهيل: بياذن المغرب بعد شوي.. صلي ..تلبسي ..وانزلي...بوديج تفصلين فستانج..
مهرة: اليوم؟!
ماكان لي نفس اروح....
سهيل: انا مفضي لج هاليوم احين ماتبين بعد؟!!...
مهرة: لالا بسير بسير... خلاص بصلي وبنزل...
سار سهيل عني ..ورديت انا اسكر الباب...رحت الحمام وتمسحت..وصليت..
بعد الصلاة حسيت ان نفسي هدت شوي... رغم اني متالمه في داخلي.....
اوكي...مبارك يبا اخت...!!.. بكون له اخت...وبنشوف...
رجعت الدمعه تهدد بالنزول لكني مسحتها بسرعه... يوم بدت الحياة تضحك لي..وحسيت ان لها قيمه... تقوم تسكر فويهي مره ثانيه...!!...
تذكرت كيف اني فرحت يوم ذكر مبارك العيال...على طول تخيلت اني امهم...وهو ريلي... الفكره نفسها عطتني امل وتفاؤل وسعاده ما تنوصف...!! لكنه حرمني من هالحلم بكل قسوه....مابكون انا امهم...!!..
مابكون ام ابدا...!!.. لاني مابتزوج ابدا....
لفيت السيادة مالت الصلاة ولبست عباتي وشيلتي... حطيت الموديل اللي ابغيه في الكيس مع قطعة الفستان... شليت الكيس وشنطة الايد وطلعت...
كان سهيل واقف عدال سيارته ويكلم سيف..
سيف: وين بتسيرووووووون..؟!!!..
سهيل: بوديها تفصل فستانها...
سيف: وين؟
مهرة: العين مول...
سهيل: نعم؟!...ماقلتيلي انه بنسير العين مول..!
مهرة: شيخه تقول هناك شي مصممين لاباس فيهم...
سهيل: هيه..بالغلا واليلا...!!..
مهرة: يالله مستخسر فيني فستان عرسك..!!.. ابويه بيدفع...
سهيل: خلصيني ركبي السياره...

في العين مول وبعد مافصلت فستاني طلعنا من المحل ونحن متظيجين من الزحمه...
مهرة: سهيل..
سهيل: هااااااه..!!
قالها بطريقه جنه يعرف اني بطلب منه شي...
مهرة: طوف خلنا نشتري نعااااااااااال....
سهيل: ليش؟
مهرة: نعال حق فستاني..عقب محد بيوديني... وانته تعرف هالشي...
سهيل: مهرة مافينا...تاخر الوقت...
مهرة: مب وايد..الفلبينيه اخرتني وهي تاخذ مقاسات ...شو اسويبها...
سهيل: ماعليه يالله...ابتليت بج شو اسوي بعد..!!
مهرة: يالله حرام عليك انا اختك... باجر عن عرست وسرت عنكم بتفتقدوني في البيت...
سهيل: ههههههههههههههه... جلبيها فلم هندي بعد...
مهرة: بعدين في البيت...خلنا احين نشتري نعال...
وخذت اقل من ساعه بشوي لين ماحصلت نعال مناسب للفستان...خذناه ورجعنا البيت...
سهيل: راويتج انا الكراسي اللي خذتهن؟
مهرة: لا...
سهيل: صح انتي كنتي في الجامعه..تعالي الحجره وبراويج...
ابتسمت وتبعت سهيل... فرحه سهيل بزواجه تغطي على أي الم احس فيه...مسكين..
شكله مستانس لانه بيستقر مع الانسانه اللي يحبها...
الله يوفقه هو وشيخه..
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

بعد عشرة ايام من الاحداث السابقه...
----------------------------------
اليوم: السبت...
المكان: في المستشفى...
الوقت: الخامسة عصرا..
----------------------------------
( يوسف)....

دخلت المستشفى وانا متوتر كالعاده.... ان شاء الله اليوم اسمع خبر...أي خبر...
توني مصلي العصر ومترجي رب العالمين يشفيها...
عشر ايام وهي في غيبوبه... ماقامت لين احين...وانا احس اني مسؤول ... مب انا اللي استفزيت وضحه بالغيره لين ماخليتها تدعي على كنه بالموت..!!!.
يارب...يارب تكون قامت اليوم...ماعندي الجراه اتصل واسال...
حسب معرفتي....منى عندها... منى اللي ماطاعت تكمل دراستها من دون وجود كنه...وقفت لكنه..ولها بعد...
وتحججت بانها تبا تجهز نفسها للعرس..
منى خلتني اتعجب من ربعتهن.... لهالدرجه قوية العلاقه بينهن..!!.. وتعجبت بعد من قوة منى في هالموقف.. كل ماتشوفني تشجعني... انا متاثر اكثر منها... لكن هذا مايعني انها ماتنزف من داخل..!!
منى عمرها ماتفارقت عن كنه من الصغر... اكيد ان حالتها صعبه..!!..وتتظاهر بالقوة...
وصلت غرفة كنه... ووقفت عند الباب...
ادعيت لاخر لحظة....تكون كنه قامت....!! دقيت الباب...
منى: تفضل...
يوسف: انا يوسف منى...تعالي...
بعد ثواني طلعت منى من الغرفه وهي اطالعني بفضول..
منى: هلا يوسف...
يوسف: ....بشري..!
منى: تحلى بالصبر يوسف....
تنهدت بقهر...
يوسف: ماقامت؟؟!
منى: لين احين لا...
يوسف: بتقوم ان شاء الله... منو عندج داخل؟
منى: محد...ام مايد سايره ويا نوره دبي ..نوره تبا تتشرى حق عرسها... البنات في البيت مع يدوه... وامايه قالت بسير عنج شوي وبرد عندها شوية اشغال..من شوي سايره..
نزلت نظري وشفت مشط صغير في ايدها..
يوسف: شو ها؟
منى: كنت اسحي شعر كنه... ماتحب تكون ملعوزه...!!
اطالعتها باعجاب...
يوسف: ماشاء الله عليج يامنى قوية...
منى: لازم الواحد يقوي قلبه في هالمواقف... كنه ان شاء الله بتقوم... انا متاكده انها بتقوم قريب...
يوسف: انا بعد متاكد...بس يا منى الايام تمر واملي يضعف يوم عن يوم...
منى: انا على عكسك..يوم عن يوم يقوى الامل عندي....
وقفت مب عارف شو اقول...
بعد ثواني حسيت بمنى ماسكه ايدي...وتشد عليها...
منى: كلهم دخلوا يشوفون كنه..الا انته... حتى ناصر دخل يشوفها بعد ما لبسناها شيله...
يوسف: ماقدر اشوفها منى....
منى: ليش يوسف...شوفها يمكن ترتاح...
يوسف: ماقدر اشوفها وهي جذي.... احسن لي ماشوفها... لين ماتقوم ان شاء الله بالسلامه...عقب بشوفها..
منى: يمكن تطول على هالحال...كم بتتريا؟!
يوسف: العمر كله...
منى: شوفها يوسف... (عقب ابتسمت بمرح) يمكن هي تترياك تشوفها عقب بتقرر تقوم..؟! اعرفها حركات كنوه...!!
يوسف: ههههه... ماظني منى...
فجاه سمعت صوت امايه...
ام سلطان: ها فديتك انته هني...
يوسف: هلا امايه... شياكم خليتوا منى اروحها هني...
ام سلطان: سرت اشتري غريضات للبيت المطبخ يصفر... وانته شو تسوي هني؟
توترت...
يوسف: آآه... ييت اطمن على كنه جان قامت والا لا...
ام سلطان: ان شاء الله بتقوم لا تحاتي...
خلتني امي ودخلت الغرفه...وقلبي دخل معاها..
منى: انته بتقعد هني...
يوسف: مادري.يمكن اسير..
منى: زين ..برايك..
دخلت منى مع امي...وسكرت الباب وراها...
كنت بسير..بس ماقدرت احرك ريولي.. حصلت كرسي قريب ..تميت يالس عليه... مادري ليش.!




اليوم: السبت..
المكان: في المستشفى...
الوقت: الخامسة والنصف عصرا..
---------------------------------------
( منى)....

دخلت وانا قلبي متقطع على يوسف... مسكين.... وايد متاثر...
رحت واحتليت مكاني عدال كنه وكملت سحاي شعرها وعدلته...رفعت ايدي اطالع الساعه.... باقي نص ساعه عن موعد تشييك الدكتور عليها..!!..خلني البسها الشيله...
خذت شيلتها ولبستها...
ام سلطان: محد ياج فغيابي؟
منى: بس يوسف...
ام سلطان: الله يهديها ام مايد هذا وقت بعد تسير دبي فيه..!!
منى: مب منها يا امايه...من نوره اللي لا تعرف لا حشمه ولا اعتبار للمشاعر...
ام سلطان: الله يهديها...
منى: عيل اختها طايحه في المستشفى... مايندرا تعيش والا تموت...تصح والا اتم مريضه..وهي تحاتي عرسها وجهازها...!!.. وانتي كنتي تبين تبلين ناصر بها...
ام سلطان: هي والله انج صادقه...انا ماصدقت الا يوم شفتها بعيني مب حافله اختها وحالتها... الحمد لله انه الله فك ناصر منها... حشى يابوج مادري كيف الناس جي غدوا..!!
منى: مب كل الناس امايه..!!... مايد ماخبرتوه لين احين؟!
ام سلطان: يبونه يستانس بعرسه .. باقي اسبوع وبيرجع ويوم بيي بيخبرونه...
هزيت راسي بقهر بعد مالبست كنه الشيله ويلست...
منى: والله انه بيعصب عليكم... انتي تعرفينه مايد مايرضى على خواته بشي..وهو المسؤول عنهن... بيلعن خيركم يوم استوى كل هذا ولا قلتوله...
ام سلطان: مالنا خص نحن مابندخل.. امه ويدته وعمه وخواته كلهن قالن لا تخبرونه...وخلوه يستانس بعرسه...
منى: الله يستر...
بعد دقايق يا الدكتور..فحص كنه... وقال انه حالتها مستقره... والمساله مساله وقت لين ماتقوم... ورد طلع...
قهرني... صحيح مابيده شي يسويه لكن بعد قهرني... يابروده اعصابه مب مهتم....
بعد ربع ساعه من طلعه الدكتور... لاحظت ان كنه قامت تتحرك...
منى: امايه....امايه كنه تتحرك...
ام سلطان: يمكن مثل كل مره...
منى: امايه لا... كنه هالمره غير....!!
قامت امي من كرسيها ووقفت عدال كنه من الصوب الثاني... فعلا كانت حركة كنه هالمره مختلفه ومستمره... بحركه سريعه مني هوست على زر اللي المفروض انه يزقر النيرس...
ويوم دخلت..
منى: نيرس... كنه تتحرك...شكلها بتقوم...
ربعت النيرس وزقرت الدكتور... اول مادخل فتحت كنه عيونها..صرخت انا بفرح... كنه فتحت عيونها...!!!
يا الدكتور بسرعه وقعد يفحصها وهي اطالعه باستغراب شديد ...
الدكتور: بشو تحسين؟...تسمعيني؟.. (وحرك ايده جدام ويهها)... تشوفيني؟!...
عقدت كنه حياتها ..
كنه: هي...
ابتسمت انا بفرح... وماقدرت امسك نفسي اندفعت لكنه ولويت عليها..
منى: فديتج والله كنه الحمد لله عالسلامه حبيبتي...مابغيتي تقومين...
ابتعدت عن كنه وعطيت الفرصه لامي تسلم عليها... ويوم ابتعدنا عنها... اطالعتنا كنه بعيون مستغربه ومدهوشه.. ويه ويه...بتفحص كامل... حتى الدكتور...
اخر شي هزت راسها بحيره وقالت...
كنه:...... منو انتوا؟!...

كلمتين...بس وقعهن وقع الصاعقة علي..... منو انتوا؟... كنه تسالني انا وامي؟ منو نحن.!!
منى: كنه..!!!..
كنه: انا..؟!...
رجعت تعقد حياتها تفكر بحيره وهي ماسكه راسها...
انهرت انا عالكرسي....

كنه ماتذكر منو نحن...!!... ماتذكر...!
-----------------------------------------


نهايه الجزء الــ 36
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

الجزء السابع والثلاثين..
----------------------------
اليوم: السبت..
المكان: مستشفى توام..
الوقت: السادسة والربع مساءا..
----------------------------
(يوسف)....

كنت على وشك اني اروح....لكني يلست زايغ مكاني يوم شفت الدكتور والنيرس ساير راد عالغرفه...!!
شي صار عندهم داخل وانا مب متجرأ اقوم واشوف شو مستوي...ريولي ماتشلني...!
بالتالي يلست اتريا هني برا... ان طلع الدكتور بزقره وبساله...
بس تم قلبي يدق من الخوف... والتوتر...
ترييت وترييت...لين عشر دقايق..انفتح الباب مره ثانيه... طلعت منه امي تصيح...ومنى مصدومه..!!
قمت من الكرسي بدون ماحس...
يوسف: شو صار..؟!..
سالتهم وانا ماباهم يجاوبوني...خفت... لا يكون...لا يكون كنه ماتت..؟!.. لالا لا سمح الله... ليش يصيحوون..؟!
يلست امي عالكرسي اللي توني قمت عنه... اما منى...تساندت عالايدار وعيونها اطالع الفراغ....
خليت امي ورحت لمنى..
يوسف: منى.؟!..شو مستوي؟!..شفيها؟!
اطالعتني منى باستغراب..
منى: انته مارحت..
يوسف: مارمت اسير... عقب شفت الدكتور يدخل عندكم ...شصاير شفيكم؟!..شفيها كنه؟!
اطالعت منى ويهي بحيره...
منى: كنه قامت...!
ابتسمت...
يوسف: والله..؟!..الحمد لله...(تبدلت ابتسامتي لضحكه فرح) ..عيل امي تصيح من الفرحه؟!.. كلمتيها...بشو تحس؟ بخير؟!..
كنت باكل ويه منى بعيوني من كثر اللهفة.... حسيت بفرحه خيالية... كنه قامت...قامت من الغيبوبه...!.. قلت لكم عنيده...!
منى: يوسف....كنه ما.... ما...
وسكتت مارامت تكمل كلامها... عيونها امتزرت دموع فجائية...
اما انا اختفت الابتسامه عن ويهي....كنه قامت بس فيها شي...!!..
يوسف: ما شوو؟؟...شفيها؟!
منى: ما تذكر شي....كنه ماتذكر شي...ناسيه حتى اسمها...ماتذكر أي شي...
كردة فعل فورية..ظحكت وانا ابتعد عن منى...
يوسف: تمزحين صح؟!...ايه عاد ..عن المصاخه...!!
سكتت منى عني وقعدت تصيح وهي تهز راسها...
وانا اتاملها...واتامل امايه..!!... كيف يعني كنه ماتذكر شي..؟!..مستحيل...مستحيل..!

مشيت تجاه الباب لكن منى مسكت ايدي...
منى: وين رايح...؟!
يوسف: بروح اشوفها...
منى: الدكتور راغنا يبا يفحصها اول...
قلت لها وانا اخشع ايدي عنها...
يوسف: فجيني...!
فتحت الباب...ودخلت...
كان الدكتور واقف ومعاه النيرس...يفحصون كنه.... وقفت مكاني عند الباب اطالعها.... ولهت عليها...!..
التفتت لي عيونها اطالعني باندهاش...
الدكتور: لو سمحت اخي بنفحص المريضه..ممكن تنتظر في الخارج؟!
طنشته...تقدمت من كنه ببطئ وهي اطالعني بعد باندهاش.. عقدت حياتها ...امتزجت الدهشة بحيره...
ماصدقت انها ماتذكرني...ماصدقت...!!
يوسف: كنه..!!
كنه: منو انته؟!..
تحركت كنه في يلستها بانزعاج من وجودي المربك...اما انا وقفت مكاني مصدوم...
منو انته؟!....انا تسالني هالسؤال؟
يوسف: كنه... ماتعرفيني؟!...
حسيت انها تلعب معانا لعبه...ولعبه مب حلوه....ابدا...
اطالعتني لدقيقه ثانيه...وعقب مدت ايدها ومسكت راسها..
كنه: ويهك مالوف....

بس؟؟!!!... مالوف؟!

يوسف: حاولي اكثر...
تدخل الدكتور وقال..
الدكتور: انته زوجها او شي؟
وانا كاني ماسمعته..لكن كنه سمعته..صدت صوبه وقالت بسرعه..
كنه: لا...
ابتسمت انا...
يوسف: شدراج؟!...
كنه: مادري... مادري...
قطعت قلبي... تنساني مره وحده؟!...انا..يوسف؟!!... عظيت على شفايفي بقهر...وهي لاحظت اني مقهور...
والدكتور والنيرس يطالعونا بتعجب واضح...
تنهدت كنه وقالت..
كنه: شوووه..؟!..منو انته... ماذكرك..انا ما ذكر شي...
مسكت راسي انا بغيظ...
يوسف: مابنخلص نحن...!!.. من مشكله لمشكله..!!...متى بنرتاح يعني هاااه..!!!
يمكن شكلي اليائس اثر في نفسها.... لدرجه انها بدت تصيح..
كنه: منو انته.؟!.
سالتني كانها تترجاني اجاوب...من بين دموعها... اطالعتني بنظره يائسه هي بعد..
يوسف: مابجاوبج على هالشي...بروحج بتعرفين منو انا....
الدكتور: لو سمحت انته تعبت المريضه ممكن تتفضل تطلع..!!
نزلت كنه راسها وسلطت انظارها على حظنها... تذرف الدموع بصمت...
اما انا...بعد نظره اخيره طلعت من الغرفه وانا ميت قهر....
اطالعتني منى بفضول...
التفت لها انا وقلت..
يوسف: نستني..!!.
منى: نستنا كلنا يا يوسف... انا بروحي مب مصدقه...
رفعت انا ايدي وقعدت افرك ويهي بتعب... تنهدت...
يوسف: مؤقت... كنه قاعده تستهبل لا اكثر... شوي وبترجع لها ذاكرتها وبنظحك كلنا على هالسالفه..!!
منى: ظنك.؟!
يوسف: انا متاكد... بس خلها ترجع بيتها وهناك بتتذكر كل شي...
منى: اتمنى والله...
يوسف: خبرتوا امها؟!
شهقت منى..
منى: ويييه صدق...امايه ماقلنا لام مايد ....
ام سلطان: مافيني شده اكلمهم غامضتني هالبنت اللي ماعينت خير مسكينه...مسكي التيلفون انتي اتصليبهم...
خذت منى التيلفون من امايه...
يوسف: لا تقوليلهم انها فقدت الذاكره..قوليلهم نشت وبس خليهم يردون بسهم من الهوامه...!
منى: ليش ماتكلمهم انته.؟!
يوسف: ماريد اكلمهم كلميهم انتي....
اتصلت منى بام مايد..وانا اتصلت بابويه ابشره لانه شال همها من طاحت...
وانا قهري يفوق التصور اكثر من الزعل على حالتها....
انا تنساني.؟!..انا..!!..اوكي لو كنت مب عزيز لهالدرجه لكن منى.؟!..تنسى حتى منى..!!
ماعليه ياكنه....
يا انا يا فقدان الذاكره مالج هذا....!!!
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه


اليوم: السبت..
المكان: بيت خلفان..
الوقت: السابعه مساءا..
------------------------------------
(مبارك)..

طلعت من بيتنا وانا ظايج.... ابا اسير بيت خالي خلفان... بس...مهرة كل ما ادخل البيت شردت عني... حسستني باني غير مرحب فيني في البيت...!!..
ياربي شو اسوي..!!.... كيف ارجع علاقتي معاها مثل قبل..!!
احين صارلنا اكثر عن اسبوع ونحن على هالحال..!!..
معقوله كانت تحبني؟!... لين احين مب مصدق هالشي..!!..
انا ماكنت مفتكر بالحب والعلاقات الغرامية...لانه كانت عندي علاقات عائلية ابنيها بالاول..بعدين لاحقين على هالسوالف...
لكن مهرة من اللي عرفته عنها...بانها بريئه وشفافه... كان المفروض انتبه...!
بس يمكن عقلي الباطن اختار انه يتجاهل هالامور عشان تكون علاقتي معاها من طرفي علاقه اخوية تريحني...!!
ماكنت ابغي تعقيدات...اما بالنسبه للمحبه فهي تستاهل اللي احسن مني ...
كيف افهمها هالكلام..!!...
مابكون مقنع....لاني اساسا...تفتحت عيوني عليها... شويه بس...لكني مازلت اشوفها مثل اختي...!!
ما اتخيل نفسي احبها...!!...
ابتسمت وانا اسوق سيارتي واتخيل... لو كنا انا ومهرة عايشين قصة حب... كانت حياتنا بتكون حلوه... مافي شي يمنعني من شوفتها ...!! والسوالف معاها..!! لكن هالقصة الحب هذي مابتصير...
مهما كان...
ابوها واخوانها مابيرضون انها تتزوج واحد امه اجنبية..!!!... مايعرف عدل كيف الحياة في الخليج والمجتمع الخليجي...!!
متعود عالاجانب... صح هم يحبوني....لكن الحب غير وانهم يناسبوني غير..!!
ليش مافكرت بهالشي قبل ماتحبني؟!...لالا..اكيد انه طيش شباب ومراهقه... مب عارفه بالضبط بشو تحس تجاهي عشان جي فسرته بانه حب....لكن اكيد هو حب اخوي اكيد..

عقدت حياتي وانا ادرك اني قاعد اطمن نفسي مره ثانيه..!!!
بصراحه ماعرف بشو افكر..!
وقفت جدام بيت قوم سيف وانا متردد بالدخله...
اخر شي تاففت ودخلت وانا مب مهتم بشي....
وكانها كانت تترياني... مهرة كانت في الحوش..يالسه عدال ياسمينه...وتقطع منها ياسمين...
اطالعتني بنظره غريبه عقب طنشتني وردت لشغلها...
تقربت منها...حاولت ابتسم...
مبارك: السلام عليج..
مهرة: وعليك السلام...
لاحظت برودها بالكلام..حتى ماصدت صوبي...
مبارك: شحالج مهرة..
مهرة: بخير...شحالك انته؟
مبارك: زين... همم..وين سيف؟
مهرة: يدرس...
مبارك: الله يهدي...عنده امتحان..؟
مهرة: هي...
مبارك: لمنو تقطعين ياسمين؟!
مهرة: حق خالي..
مبارك: ابويه عندكم...؟
مهرة: يالس ويا ابويه داخل البيت....
مبارك: انزين ليش تكلميني من طرف خشمج..!!
مهرة: مادريت ان عندي لسانين...واحد في طرف خشمي وواحد داخل حلجي...!!
مبارك: تنكتين؟!
مهرة: اطنز..
عقدت حياتي معصب....!!..قلت لها بحدّه...
مبارك: مهرة...كلميني عدل عاد...
صدت صوبي واطالعتني ببرود..
مهرة: باي حق تتامر؟؟!!
استغربت من طريقتها بالكلام...هذي مب مهرة... هذي اقرب ما تكون شيخه بس من دون ابتسامه..!!!..
مبارك: باي حق؟؟!!.. مهرة انتي من صار بينا ذاك الموقف وانتي..
قاطعتني وهي توقف من قعدتها وفي ايديها الياسمين...
مهرة: أي موقف؟!
مبارك: يوم كنا في الميلس.. فيوم ميلادي..!
مهرة: ماذكر انه صار شي له اهمية...
مبارك: عن لاستهبال..!!
مهرة: انا ما استهبل... انا من اقرر اني انسى موقف...كلمه...او...شخص... بكلمه وحده ... تلقاني نسيته..!!
مبارك: افهم من كلامج انج نسيتي الموقف... وصرنا اوكي الحين؟!
مهرة: نسيت المشاعر... واللي ترتب عليها من مواقف...
انصدمت وقعدت اطالعها باستغراب... انا شو سويت بالبنت..!!.. بدال مهرة البشوشه البريئه الحلوه...خليتها انسانه ساخره وحاقده..!!..
مبارك: مهرة...انا اسف اذا كنت غلطت فحقج...بس دخيلج لا تعاقبيني وتعاقبين نفسج بهالطريقه...لا تتغيرين... ترا ما تليق بج هالشخصية...
مهرة: ماشوف لكلامك داعي لاني طبيعية جدا.... ونحن كنا ومازلنا وبنتم اوكي...خوان... صح؟!...عن اذنك..ادخل البيت محد فيه ترا عموه سارت الجمعية...
بهالكلام البارد..اقرب للثلج...راحت وخلتني واقف مكاني....
لاباس... اذا كانت مرتاحه جي برايها..انا حاولت كم مره اني ابرر لها موقفي واخفف عليها الصدمه...
لكن مافي شي يخفف على أي بنت رفض الرجل لها...وانا رفضت حب مهرة... ماكنت ادري ياناس..
ماكنت ادري..!!
وهي كانت من البراءة والعفوية بحيث اني ما انتبهت ..كانت طبيعية جدا تعاملني مثل سيف..!!..
وعلى طاري سيف..! خلني اروح اشوفه...
دخلت البيت...سلمت على خالي خلفان واستأذنت منه ورحت فوق..
في غرفة سيف اللي كان يدرس...
سيف: عنبووو من متى ماشفتك وماييت الا يوم انا علي امتحان.؟!
ابتسمت...كنت بقوله اختك ماخلت لي مجال ازوركم ...بس فظيحه...
مبارك: مابطول وياك...ابا اعرف سرت والا ماسرت دبي الخميس اللي طاف..
حاس سيف بوزه ...
سيف: مارمت اسير...
مبارك: ليش؟!
سيف: بس..
مبارك: اكيد فيه سبب..هالتجربه كانت حلم بالنسبه لك...
سيف: صح...بس حلم يتحقق على قهر ابويه واهلي.....!!.. بس تبا الصدق.. حلمت امايه...(قالها بتعاسه)... بس شوفتها في الحلم عطتني شعور غريب.... كاني ماكنت فوعيي الفتره اللي طافت باني سويت كل هذا من وراهم... حلم واحد لامايه خلاني اقرر ابتعد عن الغنا لاني حسيتها مب راضيه عني... لكن مادري ليش الاحلام تتكرر وتتكرر...كل يوم احلمها يا مبارك مادري ليش..!!
تعاطفت معاه بصراحه...
يلست عالشبريه عداله وحطيت ايدي على كتوفه بمواساه..
مبارك: احلام حلوه والا كوابيس؟
سيف: اقرب للذكريات منها للاحلام.... هي صح..ذكريات ظبابية...
مبارك: كد سرت تصلي على قبرها من توفت؟
سيف: لاا... ماعندي الجراه اروح...
مبارك: خلنا نسير رباعه...
قام سيف عني ومشى بتوتر في الغرفه..
سيف: ماعندي الجراه مبارك اعرف نفسي انا.... انا الدفن ماسرت ادفنها وياهم.. اصلا كنت صغير بس هم كانوا بيشلوني بس انا ماطعت اسير...!
مبارك: شو بيصير يعني؟
سيف: بنهار....
ابتسمت..
مبارك: بتصيح يعني؟
سيف: اقل شي اسويه هذا...
مبارك: مافيها شي...
سيف: شو تقول انته... ريال وبلحيتي احين تباني اصيح...!!
مبارك: مافيها شي سيف... الكبت مرض...ماقولك انا تم على اقل شي صيح مثل البنيات....بس انا اشوفك شال فقلبك حزن مب قادر اطلعه...يمكن اذا صحت ترتاح...نفسيتك حتى بترتاح...
سيف: والله مادري...
مبارك: بنشوفلنا يوم مناسب وبنروح اوكي..
سيف: اللي تشوفه..
قالها لي بشكل خلاني اشك انه ماقالها الا عشان اسكر الموضوع....
سيف: انته ليش لين احين بطالي..؟!.. حسب علمي بتدرس في جامعة الامارات كورس ثاني...!!
هزيت انا راسي بالرفض...
مبارك: انا سالت... يمكن اسجل في الجامعة الامريكية... او... بقولك شي بس ماتقول لحد.؟!..
سيف: شو...قول مابقول لحد...
مبارك: افكر...افكر ارجع لندن...
سيف: شوووووووووووووووووه..!!! ترجع لندن.؟!..ليييييييييييييش؟!!
مبارك: سيف.. الدراسه هني ما تناسبني... ابويه بيتم مستقر هني بين اهله... انا بروح هناك ادرس وبرجع في الاجازات...
سيف: لالالالا شو مينون انته؟ الجامعات وايد في الامارات وانته اختار اللي تبغيها وادرس فيها سيرة لندن ماشي...
مبارك: ههههههههههههه بعدني انا افكر في السالفه.... وان شاء الله باخذ قرار قبل الصيف...عشان بعدها ارتب اموري..يا اسجل هني يا اسجل في لندن...

وبعد شوية سوالف مع سيف على شوية ظرايب...خليته يدرس ونزلت تحت عند قوم ابويه...
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه




بعد يومين من الاحداث السابقه..
----------------------------------------------
اليوم: الثلاثاء...
المكان: بيت ام سلطان..
الوقت: الخامسة عصرا...
----------------------------------------------
(كنه)....

مديت ايدي مع ابتسامه مهذبة للحرمة اللي هي امي... مسكت ايدي وساعدتني اني انزل من السياره... وانا قلبي يدق مثل الطبل.... ومتوتره حدي... اماكن اول مره اشوفها...ناس اول مره اشوفهم....ظروف غريبه جدا تمر علي ولازم اني اتعامل معاها....
ماخبي عليكم..حسيت بالقهر...ليش صار وياي جذي..؟!.. اغلى شي عند الانسان انه يكون فرد من عايلة كبيرة مثل العايله اللي عندي...اقوم انساهم جذي مره وحده..!!!...
انا من قمت وانا مب قادره انام... اتامل في ويه امي اللي كانت تنام معاي في الغرفه...
صورتها انطبعت بسهولة في ذاكرتي...
نزلت من السياره وعطوني العكاز اللي استند عليه بسبب ريلي المكسوره...
ام مايد: تعالي فديتج...شوي شوي... نوره مسكيها من ذاك الصوب..
كنه: انا بخير...اروم امشي..
ام مايد: لا فديتج اخافج اطيحين...
بمساعدة امي..ونوره اللي هي ..اختي... ركبت الدري بسهولة...دخلنا البيت.... بيت كاني شفته في حلم من الاحلام....!!..
استوعبت عيوني كل شي اشوفه....
اول مادخلت البيت..شفت عايشة ولطيفه...اللي هن خواتي الصغار... تقربن مني وسلمن علي...
الكل كان متوتر لاني ما اذكرهم...انا كنت متوتره اكثر لكن احاول اكون طبيعية قد ما اقدر...
20 سنه اختفت من ذاكرتي؟!...شي مب معقول..!!
في الصالة كانت يالسه يدتي... اول ماشفتها ابتسمت ابتسامه صادقه... عجبني شكل هاليده..وحسيت من داخلي..باني كنت احبها وايد...
سلمت عليها هي بعد...
ام سلطان: فديت روحج ياغناتي ماتستاهلين اللي ياج... تعالي يلسي عدالي..
نورة: يدووه كنه ماتروم تقعد عالارض عشان ريلها...
كنه: لا بيلس وبمدها جدامي..
ام سلطان: لا الغاليه انا بيلس فوق عشانج...
عايشه: اوهوووووو ههههههههه هذي اول مره تصير...!!..
ام مايد: كنه غاليه عند يدتها وايد...
يلست فوق عالكرسي وعدالي يدتي حاظنتني... وكل شوي تبوس راسي...مكان الظربه...راسي اللي مازال محتفظ بالضمادة...
وبعد ماقعدوا كلهم..
نورة: امايه...دام كنه صارت في البيت وبخير...اظني صار لازم نقول لمايد...
التفت انا لامي بعين متسائله....
كنه: منو..منو مايد؟!...
ابتسمت امي بحنان...
ام مايد: مايد اخوج العود فديتج...
كنه: اهااا...همم اصغر او اكبر من ميثا؟
تذكرت بضبابية صورة اختي العوده ميثا اللي هي معرسه وماخذه ولد عمي العود..!!
ام مايد: لا اصغر عن ميثا..واكبر عن نوره...
كنه: وينه؟
ام مايد: توه معرس ومسافر ويا حرمته....مادري والله نخبره او لا ماباقي شي عن يرجعون حرام نقطع عليه..!!
نورة: لا تقولين اني ماقلت لج...تعرفينه هو بيحرج وايد...
ام مايد: عاد نحن ماقلناله من قبل شو فرقت يومين ثلاثه وبيرجع...
كنه: بس عندي اخو واحد؟!..
ام مايد: هي فديتج..واعليي ماتذكر شي موليه..!
وردت عيون امي تدمع مره ثانيه....
ماعرفت شو اقول عشان اواسيها...انا بروحي احس بالاسف على نفسي...
نورة: يالله يا امايه لا تجلبينها مناحه..يومين بالكثير وبتتذكر كل شي...
التفت لنوره ولاحظت لا مبالاتها بالكلام عني....مادري اذا انا متفائله مثلها...يومين مدة قصيره عشان اتذكر فيهم كل شي...!!
ام سلطان: بسكم هذره...ودوا البنت فوق غرفتها خلوها ترتاح شوي...
كنه: لا انا هني بخير خلوني يالسه... بعدين بروح فوق..
ماكنت ابا افارقهم....
كنت مصره احفظ شكل كل واحد منهم...كنت اتمعن في ويوههم بتركيز....
في هاللحظه دخلت لطيفه اختي من برا وهي متحجبه...
قالت بلهفة..
لطيفه: امااايه..ولد خالووه هني..!!
على طول انا تحجبت...عقدت حياتي.. منو بعد هذا...
من طرف عيني لاحظت نوره تقوم... وقالت بدلع..
نورة: منوووه؟ احمد؟!..
لطيفه: لا مب احمد...خليفه..!
ام مايد: فديته ...خليه يقرب محد غريب...
طلعت لطيفه تزقره..وردت نوره قعدت وهي حايسه بوزها...ابتسمت انا يوم شفتها...حسب ماخبروني... ولد خالتي الكبير خاطب نوره...وقريب عرسها...
ام سلطان: خليفه ياكم انزين في المستشفى؟ من طاحت كنه انا ماشفته..
ام مايد: ولا انا والله ياعمتي...بس خليه يدخل بشوف شو عنده من الاعذار..!!!
بعد دقيقه..دخلت لطيفه ووراها ..شاب...استحيت حتى اني اطالع فويهه...كلهم قاموا يوم دخل ..كنت بقوم وياهم لكن يدوه اشرت لي باني ماقوم عشان ريلي...
تميت يالسه وقافطه...
خليفه: السسسلام عليكم...
الكل: وعليكم السلام والرحمه...
تقرب خليفه وسلم على امي... وعلى يدتي من بعيد...
خليفه: شحاااالكم....عساكم بخيير؟!
ام مايد: بخير وسهاله من صوووبك؟
خليفه: الحمد لله بنعمه..بس مصدوووم...
ام مايد: عسى ماشر...
خليفه: عنبووو يا خالوووه.. كنه تسوي حادث ولا ترفعون السماعه تخبروني..!!!...
ام مايد: والله يا ولدي انته في الدار والمفروض خواتك وخوانك وامك يخبرونك...
خليفه: لا الله هب في الدار...الصبح واصل المطار ييت وانخمدت...ويوم قمت ان امايه تخبرني قالت بتطلعون من المستشفى اليوم...
ام مايد: كنت مسافر؟؟!!..فدييييييتك والله مادرينابك الغالي... نتحسبك الا في الدار ونحن متشرهين عليك امبونا...
خليفه: افا عليج ياخالووه تحيديني اقصر...المهم تستحقون سلامتها...
ام مايد: الله يسلمك فديتك...
رفعت نظري وانا اختلس النظر لخليفه هذا....اول مارفعت عيني شفته حايس راسه يوايج علي من ورا امي... نزلت عيني سيده وويهي محمر...
خليفه: كنه...شحالج؟ تستحقين السلامه..
كنه: الله يسلمك...
سكت خليفه شوي...عقب قال بلهجة استغراب...
خليفه: بلاها؟!...
رفعت نظري شفته يسال امي...وهو معقد حياته...
ام مايد: فديتك ترا كنه...مول ماتذكر شي من عقب الحادث...
عقد حياته زياده وبانت الصدمه على ويهه...
خليفه: شووووووووه..!!... كيف يعني ماتذكر شي.؟!
نورة: يعني ماتذكر شي...ماتعرفك هي احين ..ماتشوفها مستحيه..!!
انقهرت بطريقتهم بالكلام عني كاني مب موجوده معاهم....
اما خليفه فتم يطالع فويهي كانه يبا يشوف اذا فعلا انا ماذكر او انهم يجذبون عليه...
خليفه:.كنوووه... صدق ماتذكريني؟!...
هزيت راسي بالنفي بتردد...
خليفه: والله ماصدق...شوفيها نست..!!
ام مايد: تراها كانت في غيبوبه عشر ايام...وكانت ظربه على راسها اظني هي خلتها تفقد الذاكره...
خليفه: والحين شووووه؟!...بتخلونها جي؟!
نورة: مافي شي نقدر نسويه...مع الوقت ان شاء الله بتستعيد الذاكره....
خليفه: لا حول ولا قوة الا بالله العلي العظيم...!... صدمه الصراحه... ماروم اصدق...
تظايقت... حسيت اني صرت عاله عليهم دام اني ما اذكرهم..
مسكت عكازي...التفت لعايشه اختي... مابغيت اطلب من نوره لانها قهرتني بلا مبالاتها وهي تتكلم عن حالتي...كانه هالحاله تصير كل يوم..!!!...
كنه: عايشه..لو سمحتي ممكن تساعديني اروح غرفتي.؟!..
عايشه: اكييد...
خليفه: لا يكون بس ظايقج وجودي كنه...اسف والله ماكنت ادري بحالتج عدل...
كنه: لا عادي بس انا تعبانه شوي...البيت بيتك ... لا ازعجتني ولا شي...
حسيت من ويه خليفه انه متلوم ومتفشل... تمسكت في ايد عايشه ومشيت معاها لخارج الصاله.. ومن هناك للدرج... حصلت صعوبه كبيره في اني اركبه... خيبه جاني بتم جي بهالحاله لين ماتصح ريلي؟!!... الله يعيني...!!
يوم وصلنا فوق...
عايشه: تقدرين تخمنين أي وحده غرفتج؟!..
تلفت بين الغرف.... هزيت راسي بالنفي...ماقدر اذكر ...ليش يضغطون علي...ماقدر اتذكر..
عايشه: مب مشكله...تعالي...
مشيت معاها لين ماوصلنا لباب غرفتي...دخلتها...ودارت عيني على كل شي في الغرفه بفضول ....
هذي هي غرفتي..ملجئي... اكيد اني قضيت وقت وايد فيها.... كيف ماقدر اذكرها..!!..
يلست عالشبريه بتعب..وبديت اعق عباتي والشيله...ساعدتني عايشه ماقصرت..وبعد ماخلصت واستقريت انا على الفراش بامان..
عايشه: محتاجه شي..يوعانه ..عطشانه..أي شي...
كنه: لا..مشكوره عايشه...
عايشه: العفووو..عيل بخليج وبرجع لج عند صلاة المغرب عشان اساعدج تجهزين للصلاة..اوكي؟
كنه: اووكي..ماتقصرين..
عايشه: افا عليج...انتي اختي...يالله ارتاحي..
ابتسمت لي عايشه وطلعت وسكرت الباب وراها...
ياحليلها عايشه طيبه.... شكلها كانت تحبني وعلاقتي فيها زينه...
انسدحت عالمخدات...وانا اتذكر كل اللحظات اللي مرت علي من فتحت عيني...
تساءلت... ليش ماحصلت حد من خواتي او امي اول مافتحت عيوني؟!..ليش حصلت بنت عمي وحرمه عمي عندي؟!...
وين كانوا اهلي عني يوم انا طايحه بالمستشفى.؟!...
ليش ماكانوا حوالي مثل ماهو مفترض..!!..
حليلهن حرمه عمي وبنتها.... اول من انصدم باني ماذكر شي... صدمة منى بنت عمي كانت كبيره...ابتسمت يوم تذكرت كيف لوت علي بفرح كبير...!!..مسكينه...
اختفت ابتسامتي يوم تذكرت ذاك الريال....ذاك الريال اللي دخل علي...ورفض انه يقولي اسمه او يذكرني به...
يالله كيف حسيت انه مالوف...شايفتنه من قبل... منو كان... مب من خواني..ماعندي غير واحد ومسافر...عيل منو هذا؟.. يمكن من عيال خالتي؟... ماشفت غير اثنينه من عيال خالتي..احمد..وخليفه...باقي واحد ماشفته يمكن يكون هو.؟!...
تذكرت الكلام اللي قاله...والقهر اللي كان يطفح من ويهه... ليش كل هذا؟ ليش كل هالقهر والغيظ باني نسيته..!!.. منو يكون هو في حياتي...!!..ليش قال لي متى بنرتاح؟!..
شكله المقهور اثر في نفسي لدرجه اني صحت وانا زعلانه على حالتي وعلى الحاله اللي وصلت اهلي وناسي لها...
اوووففف..ياني صداع وانا افكر بكل هالامور...
تنهدت بتعب...واستسلمت للنوم...
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

بعد يومين اخرين...
------------------------------------
اليوم: الخميس..
المكان: غرفة شيخه...
الوقت: التاسعة مساءا..
-----------------------------------
(شيخه)....

تنهدت بتوتر وانا اطالع صورتي في المنظرة... توها المزينه خلصت من تزييني وراحت....
مهرة: ماشاء الله عليج جناااااااااااااان شويخ... بسم الله عليج من العين اخاف حد يحسدج اليوم...
فاطمه: هههههه هذا اونه قلنالها سويلها بسيط عشان تخلي المكياج الثقيل للعرس...شكلها المزينه تحمست وايد...!!..
ابتسمت انا لهن.... اليوم ملجتي على سهيل...!!... ياربي بموت من الخوف...
انا ليش وافقت على تجديم موعد الملجه لاسبوعين قبل العرس بدل اسبوع..!!.. صدق خبله...!!!.. بس من حنّه سهيل وافقت...
يلست مهرة عدالي بينما فاطمه طلعت بعد ماقالت انها بتروح عند المعازيم....
مهرة: خايفه؟!..
شيخه: وايد... سهيل مابيدخل صح...
مهرة: ههههههههههه لا ماخلووه...
شيخه: احسن... مب مستعده بعدني...
مهرة: لا تخافين...انتي وسهيل ...متفاهمين...وانا اشوف انكم تحبون بعض ومرتاحين لبعض... لا تخافين من انكم احتمال ما تتفقون... يعني انتي تعرفين سهيل اكثر عني حتى...مع انه اخويه..
شيخه: الحمار اصلا ماكان يقعد فالبيت كفايه عشان تعرفونه عدل..
مهرة: طالع..!! تسبين ريلج في يوم الملجه؟! هههههههه...عالعموم ماينلام يوم انه مايقعد فبيتنا...شايفله شوفه ثانيه فبيت الخاله...!
شيخه: ههههههههههههههه طفسه.... عقبالج انتي ومبارك ان شاء الله..
فجاه اختفت ابتسامه مهرة...وحلت مكانها التعاسه....
شيخه: شفيج.؟!
مهرة: ماشي...
شيخه: بلى فيج شي..شفيه مبارك شو صار بينكم؟!
مهرة: مبارك يعتبرني اخته...ومن يومها وانا مطلعتنه من بالي...
شيخه: شووووووه؟؟... اخته؟ مالت عليه ليش هو محصل؟؟!!!..
مهرة: هذا اللي صار...
شيخه: كيف عرفتي؟ لا يكون قلتيله؟
مهرة: لا بس هو اروحه رمس..قال اني مثل اخته...بعد مب مثل...انا اخته فعلا...
شيخه: ياسلام عليه...ماااالت...خليه يولي نصيبج بيكون احسن منه بمليون مره...
مهرة: لا يا شيخه....ماريد اعرس ..
شيخه: ردييينا يا مهرة...لا تاخذين هالموقف بليز...
مهرة: ليش انا شو محصله من الرياييل غير سوء المعامله ..؟!..فقدتهم كلهم ماريد اعرس...
شيخه: ماعليه انزين بشوف شغلج عقب العرس ان شاء الله....بكون عندج في البيت ومتفرغه لج...
مهرة: هههههههههههههههههههههههههههه والله هذا شي بيسعدني اكثر مما تتصورين... اترياج..
شيخه: مابطول ان شاء الله....
مهرة: قال لي سهيل انكم بتسافرون بعد العرس...
تفاجئت...ماكنت ادري بقراره هذا...
شيخه: والله؟..ويييييين...
مهرة: ماقال وين...مخلنها مفاجئه اون.... يعني بعدج بتطولين لين ماتين بيتنا...
قطعت كلامنا امايه اللي يت تشوفني...
ام راشد: ماشاء الله تبارك الله ...منو هالغاويه هذي...
شيخه: امبوني غاويه انا فديتج...
ام راشد: ههههههههه حشى امبونج شينه..صدق ان المكياج يسوي العجب...
شيخه: اماااايااااااه....
قلت لها بعتاب....
شيخه: لا تحبطيني عاد....
ام راشد: ههههههههه لا فديتج والله انج غاويه حتى بدون هالصبغ....
ابتسمت...
شيخه: الحلوه عيونج....وايد عرب برا؟
ام راشد: اللي عزمناهم كلهم يوا واكثر...
مهرة: يعني كل حرمه سحبت وياها اختها والا يارتها والا خت ريلها...
ام راشد: ههههههه مرحبابهم والله كلهم... صالاتنا كبار ويظمن...
مهرة: ومتى بتطلع شيخه..!!
ام راشد: بعدها شوي نص ساعه وعقب بنطلعها..ييت اطمن على انها جاهزه..
شيخه: امايه... مالبست ذهب..
ام راشد: آمنه عمة سهيل بتلبسج الشبكه يوم بتطلعين...لا تحاتين..
طلعت امي ورجعنا انا ومهرة نسولف....
بعد نص ساعه.. دخلت فاطمه وفي ايدها دفتر..
يوم شفته دب الرعب في نفسي....
فاطمه: يالله ست الحسن وقعي...
حطت الدفتر الكبير في حظني...ومدت لي ايدها بالقلم...
تقربت مهرة مني اطالع وثيقة الزواج...
قعدت تاشر..
مهرة: هذا توقيع ابويه اعرفه... هذا يمكن توقيع خالي....هذا توقيع سهيل هههههههه...
شيخه: هذا بعد توقيع ابويه....
مهرة: باقي توقيعج... سمي بالله ووقعي...
تنهدت بخوف...مب لاني مب واثقه من سهيل...بس بهالتوقيع اصير متزوجه...!!...
متزوجه من سهيل...!!
ابتسمت...مسكت القلم...ووقعت...
قعدت فاطمه ازغرط..... ظحكت انا ومهرة...
تقربت مني فاطمه وباستني...
فاطمه: مبرووك فديتج...
شيخه: الله يبارك فيج...
شلت فاطمه الدفتر وطلعت... اما مهرة فباستني هي بعد...
مهرة: مبرووووك ياحرمه اخويه...
شيخه: هههه الله يبارك فيج...عقبالج يالخبله..
حاست مهرة بوزها وقرصتني...
تم قلبي يرقص رقص من الوناسه والفرح...
خلاص انتهى الانتظار.. صرت زوجته... زوجه سهيل...!!...
بعد عشر دقايق محسوبات... يت امي وفاطمه اختي... وقادوني للمعازيم...
ما انكر اني كنت خايفه ومتوتره...كل العيون اطالعني ...بتفحص...
يلست على الكرسي المخصص لي بالوسط...وارتفعت التهاني والتباريك وكان المكان ازعاج من الخاطر...انا كنت لاهية بافكاري...
رفعت عيني ادور مهرة..حصلتها واقفه عدال عفرا حرمه اخوها....ابتسمت.. مهرة ماتحب التجمعات وايد..!!..

بعد مالبستني آمنه عمة سهيل الشبكة بفتره... راحوا المعازيم عشان يتعشون... مهرة استغلت الفرصه ويلست معاي تسولف..لكن يوم بدوا المعازيم يرجعون..تذكرت انها ماتعشت...اصريت عليه تروح تتعشى ..وراحت...

بعد ماخلصت الملجه ورجعت انا غرفتي افصخ الشبكه الالماس وحطيتها في العلبه مالتها...سمعت دق عالباب...
شيخه: مفتوح...تفضل...
انفتح الباب ودخل راشد...
ابتسمت له ورد لي الابتسامه...
راشد: هاااااه العرووس...سلام عليج..
دخل وسكر الباب وراه..
شيخه: وعليك السلااااااام هلا بالمعرس...
راشد: لا تو الناس عليه بعدني..
شيخه: شو بعد تراك خاطب وبتعرس في الصيف..
راشد: شو دراج عاد..هم الا قالوا في الصيف بس حتى الموعد ماحددناه لين احين... المهم ..مبروووووووك...
شيخه: الله يبارك فيك يارب عقبالك ان شاء الله..
راشد: آمين... يسلم عليج ريلج ويقولج مبروك...
شيخه: ههههههههههه الله يسلمك وياه من الشر...
راشد: ياج ابويه؟
شيخه: هيييييه ياني ابويه وخالي وعمي خلفان... انتو الا متاخرين...
راشد: تخبل سيف علينا...
شيخه: ههههههههههه شفيه؟!
راشد: اخترش...قام ايول وقام وياه سهيل من وناسته ومبارك حظرته بيدرب ونشيت انا بعد ..وكملوا علينا باقي الشباب.... اخر شي مصخوها قمت رغتهم كلهم من البيت...!
شيخه: ههههههههههههههههه صدق والله رغتهم؟!..
راشد: بادب...بس خلاص الساعه 1 لين متى بيتمون فبيتنا؟..
شيخه: حليلهم مستانسين...
راشد: وانتي؟...مب مستانسه...
شيخه: ارفض الجواب على سؤال خادع مثل هذا....
رفع راشد حواجبه..
راشد: ليييييش؟
شيخه: يعني ان قلت لا بتسوونها لي سالفه...وان قلت هي مستانسه بتقولون مقوااها من بنت مستانسه لانها عرست..!!
نقع راشد من الظحك...
راشد: هذي رمسه عيايز مب رمستي انا... جاوبي...
شيخه: الحمد لله...عادي..
راشد: جذوووب...
شيخه: ههههههههه صدق والله...مرتاحه نفسيا....احس ان اموري استقرت...
راشد: دووم ان شاء الله تكونين مستقره ومستانسه...
شيخه: الجميع يارب...
راشد: آمين..خلاص انا بخليج وبسير ارقد منهد حيلي.
شيخه: الله يعطيك العافيه....
راشد: يعافيج ان شاء الله...تصبحين على خير..
شيخه: وانته من اهله...
طلع راشد من غرفتي...ورحت انا قفلت الباب.بدلت ملابسي وتسبحت...
انسدحت على شبريتي وانا افكر...ياترى سهيل بشو يحس احين.؟!...مستانس مثلي؟
اكثر او اقل؟!..
متى بكلمه بحرية....!!... من متى وانا احلم بهاللحظة...اللي بكلم فيها سهيل عن كل اللي في خاطري بدون رقابه وبكل حرية...!!
ماعليه...مساله ايام...وبكون له كليا....
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

اليوم: الجمعة..
المكان: سيارة يوسف...
الوقت: الحادية عشره والنصف صباحا..
---------------------------------------
(منى)...

كنت حاطه البومات شخصية..لي ولكنه داخل كيس...كنت انوي اني اشلها معاي...لكني خليت الكيس وطلعت من دونه... ماريد اضغط على كنه بانها تتذكر... يمكن عقب تستظيج مني..!!..
نزلت على الدري ركظ...
في الصالة...مسكتني امي..
ام محمد: وين سايره..؟!
منى: بسير ويا يوسف بيت يدووه...
ام محمد: من احين؟
منى: هي ابا اقعد مع كنه شوي... لين ما انتوا توون...
فكرت امي شوي بتردد عقب سمحت لي بالسيره وطلعت...
قوم يدوه مسوين عزيمه عائلية اليوم...عالغدا... انا ويوسف بنروح قبل..وهم بيلحقونا عقب...
مثل ماعرفت ان مايد وصل امس من السفر...والله يستر شو سوابهم يوم درا...
ركبت السياره عند يوسف المعصب عالدنيا كلها بسبب حالة كنه....
منى: سوري عالتاخير..
يوسف: .... عادي..
حرك يوسف السياره وطلع برا البيت....
منى: قالولي مايد رد امس من السفر..سرت تسلم عليه؟
يوسف: لا..قلت بينشغل بالموضوع ومافيني اثقل عليه....
منى: الله يستر جان ماعفس عليهم البيت...
يوسف: يستاهلون...
منى: اليوم بحاول اكلم كنه عن امورها الخاصه... يمكن تتذكر شي... ومحد يعرف خصوصيات كنه غيري..
توتر يوسف..
يوسف: بتخبرينها عني؟!
منى: لا ..
يوسف: ليييش؟!..
منى: ماريد افرض عليها هالشي... اذا كانت تحبك صدق ومن الخاطر...بروحها بتعرف انك مميز بالنسبه لها...وانك شي كبير فحياتها...
يوسف: يمكن تبطي لين ماتعرف هالشي...
منى: مايهم...المهم اني ما افرض عليها واقع انها تحبك..
سكت يوسف وما علق عالموضوع...
يوم وصلنا البيت... طلع مايد يشوف منو ياي...
نزلنا نحن من السياره وسلمنا عليه.... وعشان يسلم يوسف على يدووه وام مايد والبقية..رجع مايد يدخل البيت يسوي له درب...بمعنى ثاني ..يقول لحرمته خوله تندس في وحده من الغرف...
دخلت انا قبلهم وسلمت عالكل...كنه كانت يالسه في واحد من الكراسي...
سرت صوبها وسلمت عليها...توني كنت بقعد الا وبمايد ويوسف داخلين...
كنت اراقب ملامح كنه اكثر من ملامح يوسف.... شفت الفضول والاهتمام مسطور في ويهها... وهي تتبع حركات يوسف حركه حركه...!!..
اما يوسف سلم على يدوه وام مايد والبنات...عقبها صد صوب كنه...يطالعها بنظرات عتاب واضحه...
يوسف: شحالج كنه..؟!...
فزت كنه يوم التفت يوسف لها...وقالت بتوتر..
كنه: بخير..الحمد لله بخير...شحالك انته؟
يوسف: الحمد لله على كل حال....
صد عنها يوسف والتفت لمايد وهو يقعد عداله وعدال يدووه... كان جاف معاها..لكن هي حتى ما انتبهت...
قربت راسها من راسي وعينها مازالت مسلطه على يوسف..
قالت لي بصوت واطي...
كنه: اقولج..منو هذا؟؟؟!!!....
ابتسمت لسؤالها..طمنتني... مابيمر اسبوع الا وهي متذكر كل تفاصيل علاقتها مع يوسف...انا متاكده...
حب يوسف في قلب كنه مب شي يستهان به.... ومافي أي نوع من فقدان الذاكره بينسيها هالحب...!!
منى: هذا يوسف اخويه...ولد عمج...
كنه:....يوسف..!!...
قالتها بلهجة حالمه...
منى: هي يوسف...
تعمدت تكرار الاسم...وبكرره وبكرره لين ما تتذكر شي عنه....
كنه: اهااا...
هزت كنه راسها بادراك...عقب التفتت لي وقالت..
كنه: استريحي.
منى: ماتبين نسير فوق احسن عشان نسولف...عندي امور اخبرج بها...!!
ابتسمت كنه..
كانها متحمسه تعرف هالامور...
كنه: اووكي نسير..
ساعدت كنه بركوب الدرج ...قفلت باب الغرفه ورانا... ويلسنا بحرية مثل ماتعودنا عالشبرية....
وكنه تراقب بفضول الحرية اللي امارسها في الغرفه....فريت الشيله والعباة...فتحت كبتها وطلعت لي شيلة بيظا مالت البيت...
منى: هههههههه لا اطالعيني جي...حتى انتي يوم تين بيتنا تتصرفين بنفس الطريقه...!
كنه: ههههههههههه لا عادي خذي راحتج...
انقهرت من ادب كنه في الكلام معاي....مب هذا الاسلوب اللي تعودته منها...
منى: هممم...شحالج انتي الحين..مرتاحه فيي البيت؟
كنه: الحمد لله... ريلي تظايقني شوي...
منى: اكيد... انتي حيويه وماتقرين بمكان...وكسر ريل كان من الممكن يسبب لج ماساة...هههه ..
كنه: والله..انا وايد اتحرك؟
منى: ماقصد يعني بطريقه مزعجه لا بالعكس..بس ..حيويه يعني..عرفتي...!!
كنه: ااهاا... هي فاهمه عليج...
منى: اسالج سؤال ما تظايقين ولا تحسين اني اضغط عليج..
كنه: افا عليج سالي...
منى: آآآآه...ماتذكرتي شي...ابدا...
كنه: همممممم ذكرى اللي هي ذكرى واضحه لا...بس...احس ان بعض الويوه ...مالوفه عندي بشكل...
منى: والله..؟؟ بشاااره....ههههه مثل منووو؟ خبريني...
ترددت كنه...
منى: تقدرين تثقين فيني...مابقولج هالكلام عشان اأثر فيج او شي لكن لانه الصدق والصراحه...انا بير اسرارج يا كنه....وانتي بير اسراري الوحيده...تقدرين تثقين فيني وتقولين اللي فخاطرج...
ابتسمت كنه..
كنه: عشان جي...
منى: عشان جي شو؟!
كنه: ويهج وايد مالوف...
فرحت...ابتسمت بوناسه...
منى: والله؟؟؟
كنه: هي والله...
منى: الحمد لله... ومنو بعد ويهه مالوف..
كنه: همم...امايه....يدوه... مايد اخويه يوم شفته امس....وو....
منى: منو بعد؟
كنه:...يوسف اخوج..!
قالتها كنه باحراج واضح...اما انا فضحكت...
كنت على وشك اقولها ان تذكرها ليوسف امر غير مستغرب...لكن تذكرت اني ماريد اضغط عليها بخصوص يوسف...فتحولت لموضوع ثاني...
منى: شو قال مايد اخوج يوم وصل البيت...
كنه: احتشر وايد....وايد قام يصارخ عليهم....
قالتها كنه بخوف...
منى: انا قلت لهم انه بيعصب...لانه مايد ماتهونن عليه يصير فيكن شي....
كنه: انا حسيت بعد جي...انا سمعت صريخه يوم كنت في الحجره هني وهو تحت تخيلي كيف صوته كان عالي..... فتحت الباب وقعدت اتسمع بخوف....عقب سمعته يقول انه بييني قمت سكرت الباب ورديت مكاني...يوم دخل لو شفتيه...لوا عليه بقوووو...وحبني على راسي وقال لي سامحيني لاني ماكنت موجود.... صيحني والله....
منى: حلييييييييييله....مايد وايد طيب والله....الله يخليه لكن ويخليكن له...
ابتسمت كنه..
كنه: آمين...
منى: هممم..بغيت اقولج اني وقفت لج هالكورس في الجامعه...ووقفت انا بعد...
كنه: قالولي انج وقفتي لي ...بس انتي ليش وقفتي بعد؟
منى: ماقدرت ادرس بدونج بصراحه...مابيكون لي بال للدراسه...
كنه: شكرا منى...
منى: العفووو... فتشتي في اغراضج هني..؟
كنه: مايخلون لي وقت اقعد في الحجره كله يزقروني تحت...ويوم ارجع لها يكون منهد حيلي وابا ارقد بس... لكني اقوم نص الليل احيانا وافتش... تعالي صدق..
منى: شوووه؟
كنه: هممم.... انا سالت اهل البيت كلهم... ماحد منهم يعرف الباسسوورد مالت كمبيوتري..
منى: الباسسوورد؟...هي صح كمبيوترج له باسسوورد...يعني ما استخدمتيه لين احين؟
كنه: ماقدرت ادخل.. تعرفينها؟
منى: هههههههه اذا كانت هي نفسها ماغيرتيها من وراي فانا اعرفها..لحظه بكتبها لج على ورقه....
كتبت لها الباسسوورد وخليتها عالمكتب...
كنه: ان شاء الله تطلع هي نفسها..
رديت قعدت عندها وقلت...
منى: شفتي عيال خالتج كلهم.. ؟!
كنه: هي...اول شي شفت احمد خطيب نوره...عقب شفت خليفه اللي كان غايب مثل ماقال كان مسافر...هممم وعقب يا حامد..
منى: وخالج سعيد؟ مايا..؟!
عقدت كنه حياتها..
كنه: منووه ؟...خالي سعيد؟!
منى: ماخبروج عنه... عندج خال كبر يوسف جذي تقريبا...هي صح تعالي اثره رد يسافر...
كنه: ليش يسافر؟
منى: ترا اول شي خوج مايد سافر ويا خالج سعيد للدراسه برا قبل كم سنه... مايد خلص ورجع...سعيد خالج رجع عقب في الاجازه ورد يكمل دراسه ماخلص...توني ذكرت..
كنه: اهاااا... وطلع عندي خااال...زين...
منى: هههههههههههههههه تحلي بالصبر...
كنه: انتي كم اخو عندج؟
منى: انتي منو شفتي؟
كنه: محمد ريل اختي ميثا...و...و يوسف ...
منى: باقي ناصر..بتشوفينه اليوم ان شاء الله...
كنه: ليش مايا من قبل؟
منى: ترا ناصر يشتغل في بوظبي عشان جي ساكن هناك وايينا كل اربعا وخميس وجمعه...بس هالاسبوع طلع له شغل عشان جي يانا امس الخميس في الليل ورقد...بتشوفينه اليوم اكيد بايي...
كنه: وكم عمره هذا ناصر متزوج والا.؟
منى: لا مب متزوج...مع انه امي تحن عليه عشان العرس... وعمره خمس وعشرين سنه...كبر مايد اخوج..
كنه: مايد اخويه عمره 25؟ تحسبته اكبر...!!
قعدت اظحك على كم المعلومات الهائل اللي المفروض مخ كنه يستوعبه الحين بعد مافقدت الذاكره...
مسكينه....
ناس وايد وامور اكثر لازم تتذكرها....!!..
ياترى بشو تحس...!!
يوم الناس يخبرونها منو تكون وكيف اطباعها..منو اهلها وكم عمارهم ...!!...
صعب...صعب الواحد يتقبل هالشي...
وتقبل كنه للامور اثبت لي مدى قوتها... حتى انها بالرغم من الوضع الصعب اللي هي فيه...
مازالت قادره على الضحك والسوالف...!!
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه




اليوم: السبت..
المكان: الجامعة..
الوقت: الثانية ظهرا..
-----------------------------------
(مهرة)....

طلعت من كلاسي وانا احضن كتبي... اووف مابغيت اخلص...!!..
وقفت برا الكلاس اتريا سلوى... قالت لي بتترياني هني....امس حاشرتني عشان اتغدى معاها اليوم...
ويوم خلصت محاضراتي احين ماحصلها؟؟!!..
ماعليه الاستاذ مطلعنا شوي من وقت...بترياها هني..
يلست عالكرسي اتريااهاتبين..وبعد عشر دقايق يت..
سلوى: ااااسفه ياعمري تاخرت عليج...
تقربت مني وباستني...
سلوى: شحااالج؟ اووف غزج بارد..!!
مهرة: هههههه من المكيف..انا بخير انتي شحالج؟
سلوى: الحمد لله...تاخرت عليج وايد؟
مهرة: يعني..حوالي عشر دقايق...وين كنتي..؟!
قالت سلوى بدلع وهي حط ايدها على كتوفي ونحن نمشي خارج المبنى...
سلوى: مسكتني بنية وقعدت تسولف معاي مارمت اتفجج منها...
مهرة: منو عاد هالبنت؟!
اطالعتني سلوى بطرف عينها بمكر..وابتسمت..
سلوى: تغارين؟!
مهرة: هههههه اغار؟؟ مادريت انج ريلي عشان اغار عليج...!!
وقفت سلوى معصبه من كلامي...
سلوى: مافيها شي... انا اغار عليج عادي...
وقفت انا اطالعها مستغربه وانا احظن كتبي..
مهرة: من شو تغارين بالله؟!
سلوى: يعني...ربيعتي...واخاف تسرقج مني بنت من هالبنات... عشان جي اغار عليج...
مشيت عنها وانا حايسه بوزي من هالمنطق ا لبايخ عند بنات هاليوم...
مهرة: معناته انتي مب واثقه من نفسج....
سلوى: كيف يعني...
مهرة: يعني لو كنتي واثقه من نفسج ومن ربعتج لي ماكنتي بتخافين من أي بنت مهما كانت من انها تسرقني منج...بعدين فيه شي احب اوضحه...
سلوى: اللي هو...
مهرة: انا مب ملك من ممتلكاتج يا سلوى عشان انسرق منج...
سلوى: اوف اوف اليوم معصبين الحلوين...شفيج حبيبتي..؟!
مهرة: مب معصبه ..بس قمت اتنرفز بصراحه من طريقتكن فيي الربعه هالايام...
سلوى: مافهمت...
مهرة: ماترابعن مثل الناس...!!...صداقتكن في البنات غريبه....
سلوى: مب عاجبتنج؟
مهرة: مستغربه منها لا اكثر... يعني..بصراحه سلوى...احس ان اغلب البنات يتصنعن حركاتهن...
سلوى: عطيني مثال...
مهرة: مثلا.... اول ماتعرفت عليكن...في اول مره اقعد فيها عالطاوله وياكن..مامرت ساعه الا وقمتن تتفدني ...حبيبتي وغناتي ..ومادري اشو..ويوم قلت بسير احتشرتن بطريقه خلتني استغرب...جني ربيعتكن من زمن وما تصبرن عن فراقي...يعني..انا مستغربه متى واحيتن تتعلقن فيني جي..!! احس اغلب التصرفات تصنع ...
سلوى: هذا يدل على ان قلوبنا طيبه ونحب كل البنات...المهم ليش رابعتينا اذا ما تعيبج تصرفاتنا...

لاني ماحصلت خيار ثاني اختاره؟!...
كنت بقولها هالكلام...لكني ادركت باني قسيت عليها شوي...
مهرة: رابعتكن لانكن فعلا طيبات رغم انه بعض التصرفات ماتعيبني...لكنكن فرفوشيات راعيات سوالف وفزعه.... لا تزعلين انا شوي اليوم مب على بعضي...
رجعت سلوى تحط ايدها حوالي وتتلزق..
سلوى: افا عليج انا ازعل من الغلا...المهم يالله مسوين لج غدا معتبر اليوم...
مهرة: مسوين؟ الا بنشتري من الكافتيريا...
سلوى: لااااااااء....طابخين نحن في السكن...
وقفت مكاني مصدومه...
مهرة: شووووه..؟!
سلوى: ماكنتي تدرين انه نحن نطبخ في السكن؟...
مهرة: بلى ادري بس...بس ماقلتيلي انه نحن بنروح نتغدا في السكن..؟!
سلوى: وين ممكن نرتاح فمكان غير السكن؟
مهرة: برتاح في أي مكان ماعدا السكن...!!
سلوى: مهرة...انتي من بداية هالكورس وانتي مش على بعضج... ماتقعدين معانا مثل قبل...كل مانقول بنسير السكن قلتي بروح البيت...شفيج؟
مهرة: الله يسلمج انا خلاص قررت اني ما اطب السكن موليه...
شهقت سلوى...
سلوى: لييييييييش؟
مهرة: لانه البنات بدن يتكلمن علي هناك...
سلوى: منو يتكلم عنج وشو يقولون؟ عطيني بس اساميهن وانا براويج شغل الله فيهن...
مهرة: الموضوع انتهى ...انا السكن مابسير واسمحيلي يا سلوى مادريت انج تعبلتي والله والا من قبل بقولج اني مابسير السكن.... سيري انتي تغدي ويا البنات وانا بتصل بهم في البيت وبرجع...
سلوى: لالالالا والله ماترجعين....خلاص نسير نتغدى في الكافتيريا المهم يابوج نقعد معاج حشى... من نيب طاري السكن شردتي...
وبهالاتفاق مشيت مع سلوى للكافتيريا...وتغدينا هناك...وقعدنا لين الساعه اربع...
بعدها اتصلت بعمتي...اللي يت وشلتني من الجامعه ورجعت البيت...
----------------------------------
اليوم: السبت..
المكان: غرفة كنه..
الوقت: الخامسة عصرا..
---------------------------------
(كنه)....

اليوم في غمرة تفتيشي للغرفة..حصلت صورة لريال..قديمه نوعا ما...تحت المخده....تاملتها لفتره بعجب..!! منو هذا..!!...
قمت من مكاني وفتحت باب الغرفه....
كنه: نووووره.....يا نووووره....
زقرت نوره لانه غرفتها عدال غرفتي... وحسب ما اذكر.. دخلت غرفتها العصر وماطلعت للحين..والا كنت بسمعها...
طلعت نوره من الغرفه وعلى ملامحها الظيج..
نوره: هاااااه...!!
كنه: لو سمحتي اذا ماكنتي مشغوله...تعالي شوي غرفتي..
نورة: ان شاء الله...
دخلت انا الغرفه ودخلت نوره من بعدي...
كنه: قفلي الباب...
قفلته نوره وهي متعجبه من هالسرية....يلست عدالي عالشبرية...
نورة: خير..شفيج؟
كنه: منو هذا؟
طلعت لها الصوره وعطيتها اياها...اول ماشافتها ابتسمت...
وبعد ماتاملتها رجعت لي الصوره..
نورة: ابويه الله يرحمه...
ابتسمت انا بفرح ورجعت اطالع الصوره...هذا ابويه..!!... الله يرحمه...حضنت الصوره واطالعت فويه نوره...
نورة: بس هذا اللي كنتي تبغينه..؟!

كنت بقولها هي..بس..فكرت باني اسالها كم سؤال... لمجرد التاكد...في النهاية هي اختي ومابتجذب عليه وبتقولي الصدق...
كنه: بغيت اسالج...عن بعض الامور...عن حياتي ...
نورة: تفضلي سالي اللي تبغينه..وبجاوبج...
ابتسمت نوره...
ابتسامه ماطمنتني...حسيتها متكلفه...
كنه: آآه... ابا اعرف كيف كانت علاقتي معاج؟
فكرت نوره شوي عقب قالت بابتسامه حنونه....
نوره: علاقتي بج وايد وثيقة... في النهاية نحن خوات وورا بعض.. كل شي فخواطرنا نقوله لبعض...
استغربت... عيل ليش تعاملني بجفاء..!!
كنه: يعني انا وانتي وايد قراب من بعض؟..
نورة: بالضبط..
كنه: واسرار كل وحده عند الثانيه؟!
نورة: طبعا... شي طبيعي هذا بين الخوات...
كنه:...صح...بس...بس منى قالت لي انها هي وايد وايد قريبه مني...ولازم اثق فيها..!
اختفت ابتسامه نوره..
نورة: منى هذي وحده تتلزق... من سنين وهي تحاول تكون قريبه منج بس انتي ماتثقين فيها... ولا تصدقين أي شي تقوله لج تراها استغلالية ووحده لزقه...
حسيت بالم في مكان مجهول...ليش تقول عن منى جي؟!...معقوله؟!.. ماشفت في منى أي تصرف خبيث...!!
كنه: ليش تقولين جي هذي بنت عمنا...
نورة: ادري بنت عمنا بس مب ظروري انها مثلنا.... نحن مانرتاحلها...
كنه: بس انا ادرس معاها في الجامعه ..حتى هي اللي وقفت لي ووقفت لنفسها. لانها ماقدرت تدرس بدوني...
تاففت نوره بظيج..
نورة: قلت لج من كثر ماهي لزقه.... كان المفروض احذرج منها بس ماحصلت الوقت....
تنهدت انا بحزن... للاسف ...ماكنت ادري انه منى من هالنوع مب مبين عليها...
كنه: تقولين الصدق نوره...
نورة: انا اختج كنه...بجذب عليج يعني..؟!..
كنه: لالا انا ماقلت جي بس...بس مابين عليها...
نورة: لانها خبيثه...تعرف تمثل..واستغلت فرصه فقدانج الذاكره لصالحها...
كنه: بس هي فعلا تعرف عني امور..يعني..اقل شي عرفت باسسوورد كمبيوتري انتي نفسج ماعرفتيها...
نورة: عرفتها لانها طلبت منج تستخدمه مره...وانتي اضطريتي تعطينها الباسسوورد...لا اكثر ولا اقل...
كنه: عيل ليش انا يوم فتحت عيوني يا نوره ماشفتج لا انتي ولا امي...شفتها هي وامها...هم اللي كانوا معاي...
نزلت نوره عيونها متوتره..
نورة: آآه... نحن كنا دوم نقعد عندج...غيبوبتج استمرت عشر ايام... كنا مانفارقج...لكن في اليوم العاشر اضطرينا نخليج معاهم..تدرين انا على ويه عرس وعندي بروفات في دبي وجي..واضطريت اروح..ماكنت متوقعه انج بتقومين في ذاك اليوم والا ماخليتج معاهم...تاكدي من هالشي...

سكت انا عنها....مب عارفه منو اصدق...منى...والا نوره...
فجاه قالت لي نوره بظحكه...
نورة: شو رايج بخليفه..!!
عقدت انا حياتي...لين اتذكر ويه خليفه ولد خالتي...
كنه: شفيه؟؟
نورة: ماحسيتي بشي يوم شفتيه؟؟ كنتي قبل تتخبلين عليه....!!
انصعقت من كلام نوره....
اتخبل عليه؟ على شووووه..!!...وليش..؟!
كنه: انا؟؟!.. انتي شو تقولين؟!
نورة: ياعمري...ماشفتيه كيف انصدم يوم عرف انج ماتذكرينه...ماشفتيه كيف يا ركض او ماعرف انج سويتي حادث..!!
كنه: بس هذا شي طبيعي انا بنت خالته....
نورة: وحبيبته...
كنه: لاااا...انتي شو تقولين..!!
نورة: مافيها شي ..خليفه فنان وولد خالتج... ويحبج ويعزج وايد..وانتي بعد تحبينه... بس ناسيه...
كنه: انتي اكيد تمزحين...
نورة: شوية وقت وبتتذكرين...خليفه بالنسبه لج..حب حياتج....

سكت انا مصدومه من كلام نوره.... معقوله؟ انا احب خليفه؟؟!.. عيل ليش ماحسيت بهالشي..؟!...
اذا كنت احبه لهالدرجه بحس بشي تجاهه مهما كان غامض...بحس باي شعور...مثل ماحسيت يوم شفت يوسف...!!.. حتى اني ماشفت فعيون خليفه أي تعبير عن الحب..!!..يمكن لاني كنت مستحيه وما اطالعت فيه زين...!!
عيل دام اني احب خليفه ولد خالتي.... يوسف شو يكون بحياتي؟!... ليش قال كلامه اللي قاله في المستشفى؟
ليش بين انه مقهور... ليش طلعت اللهفة في عيونه يوم جاوبت بالنفي على سؤال الدكتور اذا كان زوجي او لا...!!..
هزيت راسي مب قادره استوعب شي..
كنه: انتي متاكده نوره.؟!..
نورة: 100%...
كنه: مب قادره اصدق اللي تقولينه....
نورة: وليش ماتصدقين؟!...شفيه خليفه؟
كنه: مافيه شي بس...بس ماحس تجاهه باي شعور...ولا اناحسيت انه يحبني او شي...
نورة: مساله وقت يا كنه... بخليج انا احين تستوعبين هالامور...ادري انه ياج الصداع ... يمكن تتذكرين شي...
خلتني نوره وراحت برا الغرفه....
انا مسكت راسي مب قادره اصدق اللي اسمعه...كاني طايحه بمصيبه.... لو حد قال لي انتي تحبين يوسف ما بستغرب لهالدرجه لاني من قبل حاسه تجاهه بشعور غريب...لكن خليفه..!!!...
ماحسيت تجاهه باي شي....
كيف اتاكد منو اللي تقول الصدق....
نوره....او منى..!!...
في النهاية نوره اختي ...اكيد تحبني وتخاف علي مابتقص عليه...اما منى...فبنت عمي بس...لا اكثر ولا اقل...!!..
آآآخ ياراسي... يارب ساعدني.... ساعدني خلني اتذكر شي....أي شي ...!
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه



بعد عشرة ايام من الاحداث السابقة..
-----------------------------------
اليوم: الثلاثاء...
المكان: في اسواق ابوظبي..
الوقت: الثامنه مساءا
-----------------------------------
(ناصر)....

كنت مع سعاد في السوق...نشتري اغراض للياهل... طول السيره ونحن نتظارب... اذا بنشتري لبس..خذت هي الوان ولادية...اقوم انا ارجعه واخذ الوان بناتية..
ناصر: شفيج انتي نحن بنيب بنت....
سعاد: شو عرّفـَـك..!!
ناصر: لاني انا اباها بنت...
سعاد: ياربي...مابدنا نجيب بنت ناصر...
ناصر: بنيب...انتي اوص...
وعقب ظرايب..قررنا ناخذ اللوون الابيض وكفايه..يناسب للجنسين...
خذنا منز خشبي مع مستلزماته... يافرحه حسيت فيها وانا اشوفه واتخيل بنتي فيه...!!..
كانت سعاد تحس بتعب وقالت لي ناجل مشترى المستلزمات الباقيه لبعد الولاده..دام ان نحن خذنا الضروري حاليا...
لكني رفضت واصريت عليها نكمل مشترى ونخلص مره وحده احسن...بعد الولاده بتكون تعبانه...وانا احس انه بنمر بظروف صعبه...
شكلي بخبر اهلي قريب بالموضوع.... لكن الله يهديهم مايعطون الواحد فرصه... من مشكله لمصيبه ..من تخلص مصيبتهم طاحوا فمشكله ثانيه...احين الكل مرتبش بكنه وزعلان على حالتها...
والوقت مب مناسب عشاان اخبرهم بزواجي...
لكن سعاد في اخر الخامس الحين وداخله السادس... باقي ثلاث شهور وتولد ان شاء الله....
لازم في هالثلاث شهور احصل فرصه اني اقول لهم هالخبر....مهما كانت العواقب....
ماريد عيالي ينولدون واهلهم مب دارين فيهم...!!...

وصلنا الشقه والبواب ورانا شال كرتون المنز وهو مبطل...
سعاد: هلأ مين بدو يزبّط المنز؟!... انا مابئدر..
ناصر: افا عليج منز بنتي انا بسهر عليه الليله وبركبه... انتي بس ارتاحي لا اتعبينها...
ظحكت سعاد ويلست عالكرسي وايدها على بطنها...
سعاد: بشوفك عم بتحب اللي فبطني اكتر مني..!!
ابتسمت لها ويلست عدالها...بستها على راسها ...
ناصر: افا عليج انتي الخير والبركه...

بعد العشا...

ناصر: حطيلي ثياب يديده باجر في الشنطه...
سعاد: تكرم عينك...بس ليه؟ في مناسبي؟!
ناصر: هي..عرس نسيبنا هالخميس...ولازم نحظره...
بلعت ريجي وانا اتذكر عرس سهيل اخو مهرة...
حسب ماعرفت عرس الرياييل والحريم في نفس المكان واليوم... طبعا من سابع المستحيلات اني اشوف مهرة لكن ان شفتها...!!!..آآآخ ياربي...
سعاد: مين بالزبط؟!
ناصر: اسمه سهيل..يستوي ولد خالة راشد خطيب اختي منى...
سعاد: اهااااااااا ايي تزكرت....! ..بدي إييلاك.. مرتو لعبد العزيز جارنا..عازمتني انا وامل عالغدا يوم الخميس..بدي روح طيب؟!..
ناصر: مب مشكله...برايج الا هذوا بيتهم خطوتين...

بعد ماتعشيت.. سرت الغرفه الظيوف وين حطوا كرتون المنز... انا اركب فيه وسعاد تحاول انها تساعدني بس طلعت فاشله بهالامور...بالتالي قعدت تسليني... لين ماخلص المنز وركبته...عدلنا الفراش فيه...
عقبها فاجئت سعاد باني شليتها هي بين ايدي...قعدت تصارخ...
سعاد: نزلني...شو عم تعمل..!!..
ناصر: ابا بنتي اجرب منزها من احين...
سعاد: هههههههههههههههه لك بدوا ينكسر حرام عليك ناصر..
ناصر: من ثقلج عاد ينكسر...
حطيت سعاد في المنز وانا اظحك عليها...اما هي ماطاعت تفجني تمت متمسكه فيني عشان ارد اشلها واطلعها من المنز...
طلعتها وانا بعدني اظحك عليها...
ناصر: المهم بنشل المنزل بنحطه في حجرتنا...
سعاد: خليه هووون...
ناصر: لا..بنتي بتم تصيح نص الليل وانتي مابتسمعينها...
سعاد: لحتى اوولد خليه هون..بعدين بدنا نجيبوا لغرفة النوم... مابدنا نجيب بنت...
ناصر: بنت غصبن عنج.. المهم نسير الصالة انا واعد عمي نتصلبه اليوم...
رحنا الصالة واتصلت بعمي فيي سوريا وكلمته وسلمت عليه عقب عطيته سعاد يكلمها عشان يطمن عليها...
اما انا فتميت افكر ببعد باجر..بعرس سهيل.... هناك بشوف اهل مهرة كلهم...صغيرهم لين كبيرهم...
اتمنى اشوفها....!!..
اخاف انسى شكلها مع اني اعرف ان هالشي مستحيل ...
بس ابا اشوفها...!!
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

بعد يومين..
--------------------------------
اليوم: الخميس...
المكان: صالة الافراح..
الوقت: التاسعه مساءا...
-----------------------------------
(مهرة)....

طلعت من الحمام بعد ماتاكدت من مكياجي والتسريحه... احس بتوتر فظيع.... احس كل الانظار مسلطه علي...
خت المعرس...شي طبيعي...!!... كم حرمه سالتني اليوم اذا معرسه او لا....كله اجاوبهن بالنفي...
قالت لي عفرا يوم يسالنج معناته حاطات العين عليج....حطيت ايدي على قلبي...ماريد أي وحده منهن تي وتخطبني..ماريد...
من بعدها قررت اني ما اسلم عالحريم ابدا... خلهن يولن...قوم خالووه وعموه وعفرا وفاطمه بنت خالتي بيتكفلن بهم... انا مافيني...
مشيت صوب عفرا وانا ارسم ابتسامه على ويهي...
مهرة: عفرا...متى بيطلعون شيخه..؟!..
عفرا: بعده شوي الوقت....
مهرة: انتوا بتعشونهم قبل ماتطلع والا العكس؟
عفرا: لا بنعشيهم قبل...عقب بنطلعها... ترا العرب يوم يشوفون العروس خلاص يسيرون ويحلفون عن العشا..ونحن مانبا حد يسير مب متعشي...اول يتعشون عقب بيشوفون العروس..ومحد بيروح من دون مايشوف العروس...
مهرة: اهااااااا منطق والله.... المهم انا بسير عند شيخه انزين...
عفرا: مهرة...عيب جذي الحريم يتخبرن عنج وانتي اتخششين عنهن...
مهرة: لاني اشوفهن يتخبرن...بسير عند شويخ..ماباهن يشوفني واين يخطبني..
عفرا: انتي شو من البنات؟!!...
مهرة: وحده عاقله...
عفرا: مبين...
مهرة: كلكن خبايل لانكن عرستن... محد عاقل غيري انا وعموووه...برايج..
بابتسامه استئذنت من عفرا ورحت عند شيخه في الغرفه....كانت عندها المصوره...صحيح عفرا تتحسبني امزح فكلامي...لكني كنت اعنيه 100%....
اما بخصوص شيخه...فكانت اتنافض من الزياغ... مع انها كانت قمة في الجمال...بشعرها المفتوح ومكياجها الهندي الرهيب...
مهرة: شيخه ..ريلاااااااااكس... اخويه مب سفاح لهالدرجه...بس شويه... ههههههههه
لكن شيخه ما تجاوبت مع المزحه ...هزت راسها بخوف..
شيخه: ياويلي يامهرة ياويلي...!..
مهرة: لاتقولين ياويلي...
شيخه: ميته من الزياغ.... وهذي شو تصور بعد الصور كلهن لوعه جبد بيطلعن...!!
مهرة: والله...عيل لحظه بعدل عليهن...
تقربت من شيخه وانا اسحب ذيل فستاني وراي...وقفت عدالها وابتسمت للمصوره...
مهرة: يالله تشيييز....
دزتني شيخه بقهر دزة خفيفه....
شيخه: متفيجه...
مهرة: ههههه اسولف وياج شفيج...يالله ماصورت وياج ابتسمي ان طلعت صورتنا خايسه بسببج بطر النص اللي فيه صورتج وبخلي صورتي...
شيخه: هههههههه ياحماره انا مب في بال ظحك احين...
مهرة: بالعكس انتي اللي محتاجتنه احين الضحك... هذا يوم عرسج ويا هالويه...مب يوم دفنج..لا سمح الله يعني بعد عمر طويل ان شاء الله...
شيخه: حتى لو مهرة ...ياربي....وايد حريم برا؟!
قلت لها بغياظ...
مهرة: كثر النمل...
برطمت شيخه..
شيخه: بصيح...!!...
مهرة: ياويلج...ماباهم يقولون عن حرمه اخويه شينه...
شيخه: اظني تحاتين اخوج ماتحاتيني انا...
مهرة: هي تصدقين..!!..
سكتت شيخه مقهورة..
مهرة: ههههههههههههههههه فديت هالويه ياربي لا والله اني احاتيج انتي والا هو ماحفلته الحمار..تلقينه مسخسخ برا يسولف ويظحك وايوول ويعبر عن فرحته...الا انتي هني قاعده تتنافظين...
شيخه: شو تبيني يعني ارقص.؟
مهرة: لا مايستوي ترقصين احين يمكن بعدين...لكن نعشي...
شيخه: اووف..خبالج زايد اليوم اشوفج...
مهرة: ههههههههههه انخطبت اليوم وايد عشان جي...ههههههههه...
شيخه: قولي والله...؟!
اخيرا ظحكت شيخه بحماس للفكره....
مهرة: وايد حريم ياختي قعدن يتخبرن عني عشان جي يييتج...وبقعد عندج لين ماتطلعين..
شيخه: لالالا روحي ماباج روحي خلي الحريم يشوفنج...
مهرة: عنلاااااااتج..هذا وانا اللي حارمه عمري من العشا عشان اقعد معاج...!!! تروغيني..!!
شيخه: هي اروغج بشبع من شيفتج عقب في البيت احين سيري...
مهرة: مابا...خلينا نصور ويالله اوووص...
قعدنا انا وشيخه نصور صور تذكاريه... غصبتها انها تظحك فيهم..لين طلعت فعلا ظحكتها طبيعية وارتاحت شوي...
وبعدها خليتها مع المصوره وقعدت انا اتفرج ... خلصت المصوره شغلها خذت اغراضها وطلعت برا استعدادا لتصوير الزفه....
مهرة: تعالي منو بيزفج؟...
برطمت شيخه ..
شيخه: امبوني طلبت راشد طلبه انه يزفني...
مهرة: ماطاع؟
شيخه: اون يستحي حريم بيتمن يطالعنه...!!...
مهرة: ههههههههه يعني؟
شيخه: امايه بتمشيني...ياويلي والله اني زاااااايغه لا اتخرطف والا شي... امبوني مطمنه ان راشد بيمسكني ان طحت ووجوده بيغطي شوي عالفشله...بس امايه وين تروووم ان تخرطفت بتندبغ وياي..؟!!

مت انا من الظحك على خيال شيخه وقعدت اتخيلها هي وخالوه والمصخره اللي بتصير ان صدق تخرطفن وطاحن...
شيخه: عشوو تظحكين يالخسفه...!!
مهرة: هههههههههههههههههه اتخيلج انتي طايحه وعدالج خالووه...هههههههههه..
شيخه: ياحماره هذا بدال ما اطمنيني تخوفيني زياده..!!...
مهرة: انتي مخاوفج اظحك صراحه.... شو بيعقج يعني؟!
شيخه: روحي روحي بس... يبالي سبب بعد عشان اطيح انا ريولي مب رايمه تشلني...!!..
مهرة: استهدي بالله لا اعطيج طراق يصحصحج شوي...
ظحكت شيخه وهي اطالعني..
شيخه: انتي شو صايرلج اليوم؟!
مهرة: متخبله ياختي...مادري شفييني...
لكن انا ادري.. اليوم ولاول مره شفت مبارك لابس سفره وعقال.... يالله كيف كان يخبل..!!... يالله يالله مسكت نفسي من اني اتنهد باعجاب وانا اطالعه.... كانت عفرا معاي..وكنا انا وهي نوايج من الدريشه..
الله يسامحك يا مبارك كيف حطمت حبي البريء لك بكلمه اخت...!!...

يا وقت زفه شيخه...خليتهم انا يستعدون وطلعت اوقف مع عفرا برا عشان نتفرج عالزفه حالنا حال المعازيم...
وبفرح غامر..وبرعشه فقلوبنا...طلعت شيخه...زفه ولا اروع في نظرنا نحن طبعا...
كانت "ظاهريا" هادية....واثقة...ومشت بكل رزانه...لين ماوصلت للكوشه....
ويوم استقرت على كرسيها .. رجعت انا انضم لها...
مهرة: الحمد لله عدت على خير وماطحتي...
شيخه: ههههههههههه سباله... ايه سكتي لا تظحكيني بيشوفني العيايز بيقولن يافرحتها يوم عرست..!!
مهرة: ههههههههههه انتي وايد تحاتين رمسة العرب...
شيخه: ياختي رمسة العرب تهد بيوت منو اكون انا عشان ماخاف...
مهرة: انتي عنز بصراحه... اليوم عرسج وانتي تحاتين فلان وعلان وقاعده تتحرطمين شرا العيايز..ياخي استانسي شفيج...
ابتسمت شيخه عشان ترضيني.... حريم وايد منعن الكلام بيني وبينها..كانن يسلمن ويسلمن ويسلمن ولا وقفن...طروووووق...!!...
بعد ساعه...قالوا لنا ان المعرس بيدخل...ظحكت انا مستانسه....اخيرا اخويه بيدش....
ربعت اييب عباتي...لبستها وتغشيت... لاني اعرف راشد بيدخل معاهم اكيد...
وفعلا على غنا المطربه والدق دخل سهيل مع ابوي وخالي وريل خالتي خليفه...وطبعا راشد....وهو كاشخ جنه هو المعرس...
وقفت انا بعيد لين مايستقر اخويه بمكانه...شفت الرياييل يسلمون...يوقفون للتصوير...يسلمون مره ثانيه وينسحبون...
اما اللي يطالع سهيل...فبيشوف الفرحه الغامره تطفح من ويهه.... تاثرت..... يالله كيف من زمان ماشفت اخويه يظحك مستانس جي... تحولت ابتسامة الفرح لابتسامه حزن....ليت امي تشوفه..!!..
عقب رديت هزيت راسي وانا ارفض اني اكرر نفس المناحه اللي سويتها في عرس حمد اخويه...
كنت يومها فعلا اتمنى من امي تكون موجوده عشان تشوفه وتبارك له...
ابتسمت يوم طرت على بالي فكره....
الفال لك ياسيف... الدور عليك احين ..!!
بس خله ينجح اول....
-------------------------------
اليوم: الجمعه...
المكان: غرفة بالفندق...
الوقت: العاشره والنصف صباحا...
-------------------------------
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

(سهيل).... تجلبت في رقدتي عالشبرية المريحه... مديت ايدي عدالي..وانا مازال مسيطر علي النعاس... طاحت ايدي على شي غريب... كنت ناسي اني مب راقد اروحي...بطلت عيني والتفت بكسل... شفته راس شيخه..سحبت ايدي بسرعه عن اقومها...
تميت اطالع ملامح ويهها المسترخية بالنوم...ابتسمت...اخاف احسد نفسي عالفرحه اللي احس فييها...
حبيبة قلبي ...صارت زوجتي..!!.. وهذيه نايمه عدالي..!!...تقربت منها...بستها بين عيونها...بوسه طويله..بس قطعتها يوم لاحظت شيخه تتحرك منزعجه... ابتعدت عنها وقمت...اطالعت الساعه...
بعده فيه وقت.. طيارتنا الساعه اربع العصر... بيواحيلنا نسير بيت خالووه وبيتنا...ونروح دبي بعدين للمطار..!!..
دخلت الحمام وتسبحت .. طلعت من الحمام وانا انشف شعري... رفعت عيني لشيخه... وابتسمت مره ثانيه... حصلتها شبه راقده..لكنها مسكت مخدتي اللي انا كنت راقد عليها ولاويه عليها...يعني ودرت المخده اللي هي امبونها عليها وخذت مخدتي انا....
حست بي شويخ اني طلعت من الحمام بس مازالت مغمضه عينها... عرفت بالغريزه انها واعيه...
فريت الفوطة عالكرسي وقلت باعتراض...!!
سهيل: لا والله...!!
ابتسمت شيخه وهي بعدها مغمظه عينها...
سهيل: يوم انا راقد ماقربتي صوبي راقده على طرف الشبريه..ويوم نشيت عفدتي على مخدتي...!!!
هالمره ظحكت شيخه ولفت ويهها الصوب الثاني عني....
تخبلت...!!... بغيت اسير وافعص ويهها من غلاها... تقربت صوبها ويلست عالارض عدال الشبريه...
سهيل: مابتقومين؟!...
شيخه: ..فيني رقاد...
سهيل: فيج كسل..
شيخه: نفس الشي...
سهيل: قومي تسبحي وبتصحصحين....لين مااتعدلين يبالج ساعه شويخ...
تلحفت شيخه باللحاف وعدلت رقدتها..
شيخه: ماريد اقوم..ابا ارقد...
سهيل: عقب رقدي الوقت اللي تبينه احين قوومي..
مسكت الروب مالها وعطيتها اياه عشان تلبسه وتقوم بس هي لبستني...قمت سحبتها من ايدها...
شيخه: اوووه خلني ارقد سهيل..
سهيل: مالي خص ليش انا واعي وانتي راقده...
شيخه: ارقد انزين...
سهيل: خلاص طار الرقاد عني...
نشت شيخه متاففه....
سهيل: هههههههههه ويا هالكشه...!!..
شيخه: ماعليه يالمعرس...!
لبست شيخه الروب مالها ودخلت الحمام تتسبح... اما انا فقعدت البس كندورتي واتسفر عدل...
اطالعت ويهي في المنظرة.... حتى احسه تغير..!!!...يمكن لاني حسيت بالسعادة الصدقية اللي ماحسيتها من زمن طويل..!!...
ابتعدت عن المنظرة وقعدت الم ثيابي واحطهن في الشنطه اتسلى لين ماتطلع شيخه وتخلص تجهيزها...
وبعد نص ساعه كنا على وشك انه نطلع من الغرفه مسكت شيخه من ايدها ووقفت هي اطالعني باستغراب...
شيخه: شفيك سهيل؟!
ابتسمت لها بحنان...
سهيل: نسيت اقولج شي...
شيخه: شوو..؟!
سهيل:... احــــبّــــج...!...
بطلت شيخه عيونها مصدومه وهي اطالعني....
سهيل: احبج وايد يا شويخ ومن زمان....وما ارتاح قلبي الا يوم خذتج....
رقت ملامح شيخه وابتسمت..والابتسامه تحولت لضحكه... وماكفاها... رفعت يديها ولوت عليه بالقوو...
ظحكت انا من ردة فعلها ومسكتها بين ايدي....
شيخه: انا بعد احبك سهيل.... احبك وايد والله....ياربي ماصدق انك قلتها لي....!!
شيخه كانت شوي وتصيح من الوناسه.... وانا تميت مغمض عيني ومبتسم مب مصدق ان الدنيا تظحك بويهي...!!

اول شي سرنا بيت خالووه...يلسنا عندهم هناك ساعه..وعقب صلاة الجمعه... روحنا كلنا بيتنا... حتى قوم خالوه وعمي وراشد وقوم خالي..كلهم كانوا معزومين فبيتنا عالغدا...
هناك كانت الفرحه منتشره في الجو..خصوصا مهرة اللي مستانسه بانه شيخه خلاص صارت عندها في البيت....
ارتحنا بعد الغدا شوي في غرفتنا...شيخه عيبتها الغرفه وايد واستانست عليها... لكن ماطولنا... شلينا الشنط...وسلمنا عالكل... وركبنا مع راشد وتوجهنا لدبي...
في المطار ....
راشد: ماوصيك يا سهيل...شيخه تراها غاليه علينا....
سهيل: افا عليك شيخه فعيوني وانته تعرف هالشي عدل..
راشد: ماتبوني اسافر وياكم..؟!.. عادي بخذ اجازه من زمان ماسافرت..
شيخه: حياك الله...
سهيل: وين تبا ياخي رزه...في كل شي بترز ويهك..!!
راشد: ههههههههههههههههه طلعت على حقيقتك...
سهيل: هي بصراحه انا فهالشهر ماعرفكم... خلوني اخذ راحتي من متى حارميني...
راشد: تراك ملجت قبل العرس باسبوعين هب باسبوع بعد مثل ما نحن متفقين...
سهيل: مالت على ذيج الملجه...تيلفون ممنوع..شوووفه ماشفتها غير ثلاث مرات ...ليييش؟ العروس مشغوله تجهز لعرسها ماخلت بقعه ماسارتها...
شيخه: حرام عليك زين اني خلصت عالوقت بعد...
راشد: احمد ربك انك شفتها ..زين؟؟!.....
سهيل: هههههههه الحمد لله والشكر ماقلنا شي...
راشد: يعني ماتباني اسير وياكم...
سهيل: لا ماباك...
راشد: انزين عيل هاتولي هدايا...
شيخه: ههههههههههههه فالك طيب....بترس لك شنطه...
راشد: هي جهزوني انا بعد للعرس هههههاي...
سهيل: هي والله وراك عرس اقعد اكرف هني...
راشد: والله مب عارف راسي من ساسي... احس مابعرف اسوي شي وانته محد...
سهيل: ماعليه انا معاك بالروح لو تفرقنا المسافات...هههههههههه
شيخه: ياويلي ياويلي عالحب ايييييه يابويه شو هذا خلولنا شوي...
سهيل: انتي حسابج بعدين...
راشد: استوت قوية ويه...!!!
شيخه: لا والله اني اسوولف حرام عليك الا انا عاد...
سهيل: اييه..الا شيخه عاد اسكت لا تقولها شي...
اطالعنا راشد انا وشيخه بملامح تضحك...!!
راشد: تلوعون بالجبد...!!
نقعت انا من الظحك....
سهيل: ماعليييييييه بنشووووفك انته وحرمتك...
شيخه: هي صح راشد... شحالها بنت عمهم اللي مسويه حادث؟!
راشد: طلعت من المستشفى...
شيخه: والله..ياحيها..
راشد: بس قالولي فاقده الذاكره مسكينه...
شيخه: شوووووه؟!!..حلييييييييلها يعني ماتذكر؟
راشد: لا ماتذكر شي حليلها....
شيخه: مسكينه...

وبعد شوية سوالف مع راشد... خلصنا شغلنا بالمطار...سلمنا عليه ووصيناه عالاهل...وركبنا الطياره وسافرنا..
وانا متفائل حدي عالشهر هذا اللي بقضيه مع شويخ....
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه




اليوم: الجمعة..
المكان: بيت سلطان..
الوقت: الثالثة ظهرا...
-----------------------------------------
(يوسف)....

دخلت المغسل اغسل ايدي ... ياشين الغدا يوم اتغدى اروحك..!!...
طلعت من المغسل ..نشفت ايدي...وقعدت فيي الصالة اجلب القنوات... دقايق واسمع سيارات يدخلن البيت...
اكيد هم هذيلا يوا من عند قوم يدووه....
كلهم ساروا الا انا...
السبب اني ما اتحمل اشوف كنه وهي ماتذكر منو انا ...وشو انا بالنسبه لها...! وشو هي بالنسبه لي...
ماتذكر أي شي....
وفوق هذا... المرتين اللي طافن يوم سرت لهم خلال الاسبوعين اللي مرن..كانت تعاملني بتحفظ غريب..
ماتخطى كلامنا السلام العادي....ولا حتى حطت عينها بعيني يوم اطالعها....
اول مره يوم سرت وشليت منى معاي كانت اطالعني بشكل عادي....بس من عقبها انجلبت...
وهالشي كثير علي اني اتحمله...ماقدر...!
دخل ابويه وامي ومنى ومحمد اللي شكله خلى حرمته وعياله فبيت يدوه اليوم....
سلموا ورديت السلام عليهم...ابويه سيده سار يرقد شوي..ومحمد بعد لحقه وراح غرفته ..منى يت وقعدت عدالي عالكرسي وسكتت.... امي وقفت اطالعني بعطف..
ام محمد: تغديت فديتك.؟!
يوسف: هي توها البشكاره شالة الغدا...وين ناصر؟
ام محمد: قال بيقعد ويا مايد شوي.... ليش ماسرت غناتي؟ يدتك تتشره عليك اليوم...
يوسف: كنت تعبان وابا ارقد تدرين امس سهرنا في عرس سهيل ....
ام محمد: ماشاء الله عرسهم كان غاوي...
التفت لامي وتذكرت انها راحت هي بعد العرس..
يوسف: هي صح انتي ثرج رحتي بعد عرسهم...
ام محمد: اكيييد اني بسير.. ابوك قال لازم تروحين هذيلا نسابتنا...وفوق هذا ابو سهيل ربيع ابوك من سنين...وامه بعد الله يرحمها خويتنا...وفوق هذا كله العروس خت راشد ريل منى..لازم نقوم بالواجب...
منى: صح امايه ماقلتيلي شو شيخه طالعه فنانه...؟!
ام محمد: مابوصف لج العروس جدام اخوج حرام...
منى: هههههه انزين شو عرسهم ربشه؟
ام محمد: والله يايبين مطربه...
منى: يعني فيه دق وهالسوالف...
ام محمد: هي هي لازم... بس عاد صوتهن وايد عالي طرّن رووسنا...
يوسف: ههههه ولا وحده طلعت زيارينها..؟!
ام محمد: ههههههههه لا ربك ستر..
منى: اماايه..عندهم بنات؟!..
بغا يزل لساني انا واقول هي... عقب سكت...بيسالني شو عرفني؟ شو اقولهن؟ وحده من بناتهم اغمى عليها جدامنا؟!..
ام محمد: هممم..انتي تدرين راشد ماعنده غير اختين ...شيخه وفاطمه...وكلهن عرسن... اما سهيل.. عنده اخت وحده...
انا تم قلبي يدق بالقو...مادري ليش زايغ....يمكن لاني افكر بردة فعل ناصر على هالكلام... طلع سهيل ماعنده غير اخت وحده..!!..وهالاخت احتمال تكون مهرة...
ثواني واتاكد....
منى: صغيره عوده؟
ام محمد: كبرج في السن اظني والاانها اصغر بسنه..هي في الجامعه بعد تخبرت عنهاانا...
منى: هيييييي قالت لي شيخه عنها...مهرة.... قالت لي تدرس في الجامعه...

ابتسمت... رحت وطي ياناصر...!!..

منى: شو امايه فنانه؟
ام محمد: تستحي وايد...لكنها سبحان الله ماخلت عن امها شي...
منى: حلوه والا؟
ام محمد: اذيتيني تراج الا حلوه والا شينه..قلنالج مابوصف البنات جدام اخوج حرام...انا بقوم اطيح شويه قبل الصلاة...
راحت امي ودخلت غرفتها... وانا التفت لمنى... كنت ابغي اقولها ان مهرة فعلا حلوه وناعمه... لكن طبعا مافي مجال...
بالتالي سكت عن الموضوع وانا اتامل في ويه منى... اشوف كنه فملامحها..
يوسف: شحالها؟!..
التفتت لي منى اطالعني بعتاب...
منى: ليش مارحت...؟!
يوسف: دامها ماتذكرني مابراويها رقعة ويهي...!..
منى: بالعكس المفروض تسير وايد عشان اتم تشوفك وتتذكرك...هي من الاساس مهتمة وايد فيك..تحس بالفضول اتجاهك... هي بروحها حاسه انك شي مهم بالنسبه لها...
حست بوزي انا مب مصدق...
يوسف: كانت....لكن الحين لا... شفتيها اروحج كيف تتحاشاني يوم اسير....
سكتت منى وتنهدت....
منى: تبى الصدق... انا بعد احسها متغيره...
التفت لها... تذكرت ان هالوضع صعب على منى بعد....مب بس علي انا...!!
يوسف: حتى عليج متغيره؟!
منى: هي... يعني يوم سرنالها ذاك اليوم..عادي كلمتني وحسيتها طبيعية معاي ومرتاحه لي...بس من عقبها...وهي موول غريبه معاي..منغلقه على نفسها... ماتصارحني باللي في خاطرها... وكل ماقولها نسير الحجره ترفض وتغصبني اقعد مع البقية في الصالة وكل حد يسمع رمستنا ماروم اقولها شي خاص...!..

يوسف: تدرين...!!
منى: شو..
يوسف: هذي محشاي راسها علينا...!!..
منى: شو قصدك؟... حد قايللها رمسه عنا؟! عشان جي ماخذه هالموقف.؟
يوسف: عندج تفسير ثاني؟!...مهما كانت يامنى فاقده الذاكره وماتذكر... لكن قلبها مازال موجود...القلب يحس عنبوو...
منى: معاك حق...بس ماظني حد عنده قلب يشوش ذكريات كنه مثل ما انته شاك... ماظني حد يتجرأ....
يوسف: انا مب متطمن شراتج...
رن تيلفوني في هاللحظة... طلعته من مخباي وشفت اسم "خالد" ظاهر عالشاشه..
يوسف: آآلوووه...
خالد: مرحبااا.. هلا والله حبيبتي شحالج؟
ظحكت بصوت عالي ومنى اطالعني بفضول...
يوسف: فديت هالصوت انا وراعيه هلا والله بحبيبي..انا بخير انته شحالك غناتي..؟
سمعت منى تقول وهي عافسه ويهها..
منى: آآآع....
اشرت لها عشان تسكت ولصقت راسي براسها عشان تسمع خبال خالد وتخوز عنها الكدر والظيجه اللي سببته لنا حالة كنه...سمعنا صوت خالد...
خالد: اشتقت لج موووووووووت....
يوسف: حتى انا والله هههههههه...
خالد: سمعي حبيبتي... انا واقف جدام بيتكم بسيارتي... اهلج في البيت؟
يوسف: هاااه!!...هممم توهم داخلين يرقدووون...
خالد: حلوووو...عيل الجو خالي لنا.... طلعي من الباب الوراني وركبي السياره .. يلسي عندي شوي خليني اجحل عيني بشوفتج ياقمر...
شهقت انا وانا اتابع التمثيل... منى حاطه ايدها على ثمهاعشان تمنع الظحك...
يوسف: لالالالالا اخاف يزخووووني...
خالد: محد بيزخج احين الناس ظهر.. الطير مايطير...منو بيشوفنا...
يوسف: انزين بس وين بتوديني...
خالد: بحبسج في قفصي الصدري ولا بطلعج...
يوسف: اللــــــــه احلى مكان ....
خالد: مب احلى عنج ياعمري...هاااه شو قلتي بتطلعين؟...
يوسف: اوكي احيين بيييك...
خالد: عطيني بوسه...
يوسف: هههههههههههه بعدين بعدين...
خالد: هههههههههههاي الله يغربل شيطانك...يالله بسرعه اطلع اترياك في السياره...
يوسف: ههههههههههه خلاص باييك احين...باي..
خالد: باي..
سكرت عن خالد وانا ميت من الظحك على سوالفه اللي ماتخلص....
من يتصل لازم يظحكني... التفت لمنى اللي ميته من الظحك بعد...
يوسف: سمعتيييه...!! مينون هذا مب صاحي...
منى: شو هذا انتوا جي تسولفون دوم؟
يوسف: لا هو كل يوم يطلع لي بمنكر يديد... يالله برايج...
منى: هههههه باي...
طلعت من البيت وركبت سياره خالد...ورحنا نرفه عن عمارنا شوي... باجر دوامات...يا لوعه الجبد..!
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

بعد شهرين من الاحداث السابقه...
---------------------------------
اليوم: الثلاثاء...
المكان: الحرم الجامعي..
الوقت: العاشرة صباحا..
---------------------------------
(مهرة).....

طلعت من محاظرتي وانا احس بزعل خفيف....الامتحان اليوم كان صعب... هذا سعي ثاني وجذي..كيف عيل النهائي...!!
الله يستر...
المشكله انه ماقاام عندي وقت اروح للدكاتره عشان يشرحون لي زين في المكاتب...
لانه دوامي متواصل... ومن اخلص ارجع البيت ماعندي وقت اقعده في الجامعه...
ماعدا في بعض الايام يو اتاخر مع الشله...
رحت للقاعه الثانيه عشان احضر محاضرة الكمبيوتر... لكني شفت مسج في الللوح بانه الاستاذ مابيحظر اليوم ومعتذر...
التفت اسال البنات وطلع الخبر صحيح...
استانست..يالله فرصه اروح الكافتيريا اشوف البنات واعين خير واتريق...
في الكافتيريا ماحصلت غير فايزه.. وحده من بنات الشله...تزوجت من شهرين وقررت تكمل دراسه وهي سنه ثانيه....
يلست عدالها وانا ابتسم...
مهرة: مرحبا فااايزه...
التفتت لي فايزه وابتسمت لي ابتسامه حزينه..
فايزه: اهلين مهرة...
مهرة: شفيج؟!
فايزه: ماشي..
سكت عنها..يمكن ماتبا تتكلم... طلعت بوكي من الشنطه وانا اخطط اروح اشتري لي ريوق..
مهرة: تبين شي ؟
فايزه: لا ماريد شي مشكوره....
لكني ماقدرت اتحرك..تميت اطالعها بياس....البنت حالتها صعبه...!!
مديت ايدي ومسكت ايدها وضغطت عليها بمواساة..
مهرة: تقدرين تكلميني فايزه...قلبي يعورني على حالتج شفيج عيونج مليانه دموع ولسانج يقول مافيني شي؟!..
وبشكل غير متوقع... انفجرت فايزه بالصياح....انصدمت... ماتوقعتها تصيح مره وحده جي...
التفت باحراج بسيط حسيت البنات كلهن يطالعنا باستغراب وفضول..
قمت مسكت ايد فايزه...شليت اغراضي وطلعنا من الكافتيريا...رحنا قاعه من قاعات المبنى المجاور ويلسنا...
كانت القاعه فاظيه الا منا نحن...!!..
طلعت من شنطتي كلينكس وعطيته لفايزه تمسح فيه دموعها...خذته عني شاكره...
فايزه: اسفه اني انفجرت بهالشكل...احس بقهر ماتتخيلينه....
مهرة: انا حاسه انه في داخلج شي مب هين زعلانه عليه...بس ممكن اعرف شو هو؟..يمكن اخفف عليج..
تمالكت فايزه نفسها ودموعها...وتنهدت ...
فايزه: ريلي يبا يطلقني يا مهرة...
شهقت....طلاق..!!
مهرة: لييييش فايزه؟!. مامر على زواجكم شهرين... شفيكم...!!
فايزه: الغلط مب منه هو...الغلط مني انا... أي ريال بمكانه كان طلقني من اول يوم...لكن هو صبر عليه لين مل من الصبر....
مهرة: ليش؟..شو سويتي بريلج انتي؟!..
هزت فايزه راسها باسف...
فايزه: ماقدرت اعطيه حقوقه....
مهرة: كيف يعني مافهمت...
فايزه: مب قادره اتاقلم معاه...ماقدر اعيش معاه بشكل طبيعي كاي زوج وزوجه... مع انه هو طيب...بس انا مب قادره...
مهرة: ليش؟..ماقدرتي تحبينه.؟!..
فايزه: مايخص الحب بهالامور... مادري كيف اشرح لج لكن انتي اكيد بتفهمين لانج على وشك انج اطيحين بالوضع نفسه...!
شهقت انا وبطلت عيوني...صابني رعب...ليش تفاول علي..!!
مهرة: اناااا..؟!
فايزه: هي انتي... تراج على علاقة مع سلوى...
مهرة: شوووووووووه..!!... علاقتنا هي ربعه وبس..
فايزه: آآه.... يعني بعدكن؟!
عقدت حياتي معصبه من المنحنى اللي قام ياخذه هالحديث...
مهرة: انتي لشو قاعده تلمحين يا فايزه؟ انا مب فاهمه عليج....
رجعت فايزه تذرف الدموع...
فايزه: انتي تعرفين اهلي يوزوني غصبن عني...انا ماقدرت ابتعد عن جمّوول...
تذكرت جميله اللي هي "كلوزه" فايزه....
مهرة: انزين ما اظني ريلج بيمنعج عن ربيعتج....
ابتسمت فايزه بسخرية..
فايزه: مب اذا قامت هالربيعه شوي شوي ..تحل مكان الزوج...
قالتها فايزه وعينها للارض....اما انا فوقفت من مكاني وانا منصدمه....
قلت لها باشمئزاز واضح...
مهرة: انتي بعد....طلعتي من هالبنات..!!
فايزه: للاسف..ماحسبت حساب يوم مثل هذا....وتماديت...
مهرة: ماكنت اتصور فيوم انكن جذي يا فايزه... اتحسبكن ربع بس..
فايزه: انتي يا انج بريئه وايد يا انج تستهبلين....كيف يعني ماتصورتي؟..كل الشله جذي...
ترددت جملتها الاخيره مثل الجرس في عقلي...."كل الشلة جذي".... بما فيهن انا.... لا ...لا...
ابتعدت عنها وانا مب مصدقه...
فايزه: اشوفج مصدومه....
مهرة: مب كل الشله يا فايزه...
فايزه: كلهن..بما في ذلك سلوى... انا مستغربه انكن لين احيـــ ...
قاطعتها بصوت عالي..
مهرة: بس....بس لا تكملين كلامج...
بحركه سريعه سحبت شنطتي وكتبي وطلعت من القاعه ركظ....
ومن المبنى لمركز الباصات...ركبت فيه وانا افور من الغيظ في داخلي...
نزلت جدام سكن سلوى...حسب علمي.. هي موجوده في السكن هالحظه لين الساعه 1....
مشيت بسرعه في الشارع لين المبنى..ومن المبنى للمصعد...ومن المصعد لغرفه سلوى...
دقيت الباب بسرعه....
وفتحت لي هي....لابسه بنطلون وقميص بودي راص على جسمها....والادهى...ماكانت بروحها...
ابتسمت لي سلوى...
سلوى: هلا والله بمهرة..شو هالمفاجاه...
دخلت انا للغرفه وفريت كتبي وشنطتي عالشبرية بعصبية واضحه..
مهرة: ممكن اكلمج ...على انفراد لو سمحتي...
التفتت سلوى لربيعتها بتوتر...تكلمت معاها شوي...في النهاية انسحبت البنت بهدوء وسكرت الباب...
كانت سلوى بتقفل ...
مهرة: لا تقفلين.... ماله داعي تقفلين...
سلوى: جذي احسن...
مهرة: قلت لج....لا ...تقفلين....
تراجعت سلوى عن الباب ووقفت جدامي بتوتر وهي تلاحظ عصبيتي اللي مب طبيعية....
عقدت ايدي جدام صدري...
مهرة: منو هذي البنت وشو تسوي هني؟
ابتسمت سلوى بخبث..
سلوى: هذي الغيره اللي اتكلم عنها....
غمضت عيوني بقهر....اهدي نفسي.... غيره..!!...انا..اغار عليها؟!
مهرة: سلوى... انتي أي نوع من البنات بالضبط...!
رفعت سلوى حواجبها مستغربه...
سلوى: هدّي ياعمري...انتي وايد معصبه..قعدي وكلميني باللي مظايقنج بهدوء...
مهرة: سالتج سؤال..جاوبي..
سلوى: سؤالج غريب ماعرف كيف اجاوب عليه...
حاولت مره ثانيه...
مهرة: صح اللي عرفته عنج...؟!
سلوى: اللي هو.؟!
مهرة: اني مثل...مثل فايزه وجمول وغيرها..؟!..
سلوى: شفيهن فايزه وجمول..؟!
صرخت عليها وانا اقول بقهر وغيظ...
مهرة: شــــــواذ...!!!!!...
بدل ما احصل ردة فعل متفاجئه....حصلت ظحكه عاليه ساخره... اطالعت سلوى بتعجب... حتى اني ماقدرت اقول شي من كثر ما انا مستغربه من موقفها اللا مبالي...
سلوى: ياعمري هاللفظ مايستخدمونه هني...!!..
مهرة: لااه؟...عيل شو تقولون بالضبط؟
سلوى: مانقول شي...هالشي ينفهم بين البنات... وانتي تدرين من البدايه ليش متفاجئه؟!
مهرة: ماكنت ادري....لو كنت ادري جان ايدي ما لمست ايدج حتى....
تذكرت ساعتها بقرف شكثر سلوى باستني وشكثر حظنتني...واكثر.... الفاظها التحببية ماكنت ادري انها تعتبرني حبيبه من هالنوع...!!...
سلوى: شوفي عاد يا مهرة... لا تلوميني لانج انتي على نياتج... انذكر هالشي كذا مره جدامج بس انتي تتجاهلينه وتصدقين اللي تبغينه...في النهاية نحن مب اقل عن البنات ...
مهرة: ماكنت اصدق فيج....كنت اتحسبج طيبه وربيعه وفية....مب من هالنوع...
سلوى: انا فعلا ربيعه وفية...لكن هالشي مايمنع انه نكون اكثر من جذي بعد....مهاااري..
تقربت مني وهي تمد ايدها...اما انا ابتعدت عنها بقرف..
مهرة: لا تصكيني.... لا تحطين ايدج علي ابدا...
سلوى: انا صبرت عليج وايد... عطيتج اكثر من ست شهور عشان تتاقلمين من طبيعتي...وحسيتج تاقلمتي...
مهرة: ماكنت ادري انج شاذه.... فايزه احين ريلها يبا يطلقها بسبب علاقتها مع جمول...تبين يصير فيني جذي في المستقبل؟!!....
ابتسمت سلوى بسخرية وهي تحط ايدها في جيوب البنطلون...
سلوى: ليش ناويه تعرسين؟
مهرة: هذي سنه الحياة وانتي تعرفين هالشي...
سلوى: بس انتي...انتي قلتيلي انج ماتحبين الرياييل...!!
تذكيرها لي بجملة قلتها لها في لحظة غيظ كان مثل الصفعه على ويهي.... انا قلت لها اني ماحب الرياييل لاني كنت افكر بذاك الريال وبالتحرش اللي صابني...ماكنت ادري انها بتفسر جملتي هذي على كيفها...
سكت ولا عرفت شو اقولها...
سلوى: مب صح؟!... انتي قلتي انج ماتحبين الرياييل... معناته تحبين البنات.... اذا هذا مب شذوذ فشو يكون يامهرة؟!...
امتلت عيني دموع وانا اصرخ فيها...
مهرة: انتي ماتعرفين عن شو تتكلمين... انا فعلا ماحب الرياييل لكن هذا مايعني اني شاذه...هذا يعني اني بس ماحب الرياييل لا غير...انتي ماتعرفين عن تتكلمين...ماتعرفين...!!
رجعت لي ذكرى التحرش واضحه جدام عيني... لدرجه اني غمضت عيني بس عشان ماشوف ويهه جدامي...
لكن مافي مفر.... لانه هو مب جدام عيوني..... لكنه في عقلي وذكرياتي..ومستحيل ينمحي...بشكل غريب حسيت بايدينه حوالي ماسكتني.... سمعت صوته بكل وضوح... ((مثل ماتوقعت...صوتج وجسمج عيبنّــي من قبل...والحين ويهج بعد حلووو وناعم....شو اسمج حبيبتي..؟؟))
تردد صوته في راسي ...مثل الصدى المزعج...
مسكت راسي وانا اصيح....حسيت بايد تمسك ايدي.
سلوى: مهرة..انتي بخير...شفيج؟! مهرة..!!
سحبت ايدي من ايدها بقو وانا افتح عيوني...
مهرة: قومي عني لا تلمسيني.... انا جازّه نفسي لاني خليتج تحطين ايدج علي من قبل بس ماكنت ادري ان نواياج خبيثه.....شوفي يا سلوى.... لا اعرفج ولا تعرفيني...وانا العن الساعه اللي عرفتج فيها...وان حاولتي تتصلين فيني او تشوفيني ماتلومين الا نفسج ....فاهمه..!!
صرخت عليها بكلامي ...خذت شنطتي واغراضي وطلعت ركظ مثل مادخلت.... وانا امسح دموعي المنهمرة...
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

كيف وصلت الرسبشن ماادري....!!..دخلت الحمام وغسلت ويهي من آثار الدموع... طلعت بطاقة التيلفون واتصلت بسهيل...
ماطاع اييبني... كان في شغله ومايروم يستاذن....قمت اتصلت بتيلفون بيتنا...
آمنه: آآلوووه..
مهرة: هلا عمووه..انا مهرة..
آمنه: شفيج مهرة؟
مهرة: ترومين تيبيني من الجامعه احين؟
آمنه: ماقدر مهروه عندي حرمه انا احين...
مهرة: انزين ابويه؟
آمنه: ابوج من شوي راد تعبان وقال بيرقد ما اروم ازعجه...
مهرة: بمنووه يعني اتصل سهيل في دوامه مايروم يستاذن...
آمنه: اووففف..مادري اتصلي باي حد مهرة...برايج..
سكرت عموه فويهي...اطالعت السماعه بقهر وغيظ...ناقصة انا..!! ..احين بمنوه ادق...
بدون حاسية دقيت رقم مبارك...
مبارك: مرحبا...
مهرة:..هــ...ــلا مبارك...
مبارك: اهلين...
مهرة: انا مهرة...
مبارك: هلاااا مهرووه والله ماعرفت حسج..شفيج؟!
مهرة: ماشي..تروم تيبني من الجامعه احين؟ كلهم مشغولين ماحد طاع اييبني..
مبارك: افا عليج احين باييج...
مهرة: ادل الجامعه؟
مبارك: هي ادلها...الباب اللي ورا صح..
مهرة: هي صح...
مبارك: خلاص برايج عيل بتلبس وباييج...
مهرة: مشكوور...باي..
مبارك: باي..
سكرت عن مبارك ورجعت للرسبشن...قعدت على زاوية بروحي...ابتعد عن ازعاج البنات...
بعد عشر دقايق نادوا اسمي..وقالوا ان السياره خارج الجامعه...حست بوزي انا متظايقه...بعدني بدق خط...!!.. مادخلوا سيارة مبارك لانه ماعنده تصريح للدخول...!!
يالله ماعليه هو يوم واحد بس...
خذت كتبي ..تغشيت وطلعت....
وقفت عدال الباب الخارجي ادور سياره مبارك... شفته واقف برا السياره ياشر لي عشان انتبه...
مشيت صوبه...وركبت في الكرسي الوراني...وهو ماقال شي ولا علق...
تحرك بسيارته بينما انا اعق غشوتي واتحجب...
دورت في شنطتي كلينكس...لكني تذكرت اني عطيته فايزه الزفته...!!..
مهرة: مبارك عطني كلينكس...
مد مبارك ايده وعطاني الباكيت كامل...
مبارك: مهرة شفيج.؟!..ليش راده من الدوام من وقت؟!...
مهرة: بس...
مبارك: مهرة...مبين انج كنتي تصيحين...حد منازعنج من الدكاتره؟!..
مهرة: لا...
مبارك: متظاربه ويا حد من البنات..
امتلت عيوني دموع مره ثانيه ولا جاوبت...
مبارك: وقسم بالله يا وقف السياره ولا اتحرك الا يوم تقولين....شفيج زيغتيني..!!!
اسندت انا ويهي على ايديني ...
مهرة: ليش انا دوم غبية مبارك..؟!..ليش دايما انخدع بالناس... ؟!.. ليش دوم يقصون عليه مخليني لعبه بين يديهم بدون ما انتبه..!!
مبارك:.....مهرة... انتي بس...على نياتج وايد...والا انتي مب غبية..!!
مهرة: انا ماريد اكون على نياتي....ابا اكون ذكية افهم الناس من اول مره مب اعرض نفسي للاحراجات والمواقف البايخه وانا اخر من يعلم..!!
مبارك: لازم تكون عندج خبره بالناس والحياة يا مهرة وانتي مب اجتماعية ذاك الزود... خبريني شو صاير شو اللي مظايقنج...
كنت بقوله.... لكني تراجعت في اللحظة الاخيره قبل مايزل لساني...
لا مابقوله...عقب اخافه يفكر فيني بطريقه مب حلوه ويتحسب اني تعرضت للتحرشات او شي...مب زين..!!.. هو عايش في بريطانيا اكيد شايف وايد من هالامور وذهنه متفتح ويفهمها عالطاير...!!
مهرة: ماشي...
سمعت مبارك يتنهد متظايق...
مبارك: على راحتج مابغصبج تقولين.... بس هوني على نفسج انتي لا غبية ولا شي... الغلط في الناس مب فيج...
سكتنا طول الدرب لين البيت...يوم وصلنا... كانت عيوني بعدها مليانه دموع...
نزلت وشليت كتبي والشنطه..
مهرة: مشكور مبارك..تعبتك معاي...
مبارك: افا عليج يامهرة انتي تامرين امر....
ابتسمت له ...
مهرة: تسلم...فمان الله..
مبارك: الله يحفظج...
سكرت باب السياره ودخلت البيت وانا اسمع سياره مبارك تريوس وتطلع من الحوش...

نسيت كليا ان عمتي عندها حرمه..!!.. دخلت على ويهي للصالة...ووقف مصدومه...
حصلت عمتي..وشيخه وعفرا يالسات مع حرمه ماذكر اني شفتها من قبل...!!..
تصنعت ابتسامه وانا امش دموعي..
مهرة: الســ....ــلام علييكم...
نشت الحرمه وهي تقول..
الحرمه: مرحبتين الساع وعليكم السلام والرحمه هلا والله ...
تقربت منها ووايهتها...
مهرة: شحالك خالتي .؟ عساج طيبه...
الحرمه: بخير فديتج شحالج انتي؟..عساج بخيير..
مهرة: بخير وسهاله...
شيخه: هااه مهرة اشوفج اليوم يايه من وقت من الجامعه..
مهرة: هيي...تعبت ومابغيت اقعد....
قعدت الحرمه عالكرسي مره ثانيه..ويلست انا عدال شيخه...
شيخه: مهرة هذي خالتج ام محمد...عمة راشد... ام منى خطيبة راشد اخويه..!!
مهرة: هيييي يا مرحبا الساع.....
كنت قافطه موووت من شكلي ... لا مكياج ولا شي وبالعباة والشيله...
ام محمد: لمرحب باجي بنتي... اشوف ويهج مب طبيعي غناتي شفيج؟
مهرة: هاااه...لا مافيني شي...
ام محمد: بلى فيج شي...صايحه...
ابتسمت انا متفشله...مكشوفه مكشوفه...ماكنت ادري ان ويهي يبين عليه لهالدرجه...
مهرة: آآه...الامتحان شويه كان صعب...
ظحكت عفرا وعمتي والحرمه بعد...
عفرا: تصيحين عشان امتحان..؟!...
ام محمد: الله يوفقج يابنتي ..حليلها خايفه على دراستها....هي هاجذه اباج شدي حيلج..
مهرة: هههههههه ان شاء الله...
آمنه: تشوفينها يا ام محمد...ماخلت عن امها شي موليه... جنها مريم في شبابها يالسه...الله يرحمها..
ام محمد: هي ماشاء الله انا شفتها من قبل انها شرات المرحومه...ماخربتي الساع يابنت خلفان...
ابتسمت انا بفرح يوم شبهوني بامي...ياريت بس اشبهها بالثقة في النفس والحكمه والرزانه.... جان انا بخير...!!
مهرة: تسلمين خالتي...عن اذنكم بروح ابدل ثيابي...
الكل: اذنج معاج...
تقربت مني شيخه وصاصرتني..
شيخه: عاد ردي يلسي عقب ماتبدلين فظيحه...
مهرة: انزين...
خليتهن ورحت فوق عشان ابدل ملابسي وارتاح واتعدل شوي وارجع تحت...
مع انه ماكان لي خاطر اقعد تحت معاهن....مالي نفس...بس شو اسوي بينقدون علي....
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه



بعد يومين...
-------------------------------------
اليوم: الخميس..
المكان: بيت سلطان...
الوقت: الخامسة والنصف مساءا...
------------------------------------
(ناصر)....

كنت يالس في الصالة مع منى وفي ثباني شماس...
ناصر: هالعيوز متى بتمشي ياناس...!!...بتخبلبي...
مسكت شماس من ايدها وخليتها توقف على ريولها وهي مب قادره تتوازن..
منى: عيااازه شماس من نوقفها قعدت ماتبا تمشي...
ناصر: عنبوو..ماشاء الله هي احين بتكمل سنه... انتي يوم كبرها تمشين ...
منى: هههههه فديتني انا نشيطه...
قربت ويهي من شماس وانا اضحك لها...
ناصر: ليش ماتسوين تاتا....؟!..
ظحكت شماس وصفقت وهي تقول تاتا شراتي...لويت عليها وحبيتها...
ناصر: فديييتج انا....
ورديت قعدتها في ثباني...
ناصر: شحالها بنت عمج؟
تنهدت منى....
منى: على حالها...
ناصر: ماجنها طولت...شهرين مر عالحادث...
منى: والله كلهم يقولون مساله وقت...
ناصر: كيف علاقتها مع يوسف؟! .. ماعرفته هو بعد.؟!
قالت منى بحزن..
منى: مايتلاقون... بروحك تشوفه يوم يسير هناك يتم في الميلس... واذا بيدخل يسلم على يدوه دقيقه وبيطلع مول مايقعد عشان تشوفه وتذكره..
عقدت حياتي..
ناصر: ليش جي يسوي الغبي؟!
منى: اون مايبا يشوفها دامها ماتذكر منو هو...
ناصر: طاااالع...شدراها هي يوم محد خبرها...!!
منى: صدقه ناصر... لو انا مكانه مابتحمل..
ناصر: الله يعين...ورييلها ماتحسنت؟
منى: بلى..عقوا عنها الجبس الاولي وحطولها واحد ثاني اخف...بس بعدها بعكاز...
ناصر: وهذيج الخقاقه...سمعت انهم ردوا من شهر البصل...آآه اقصد يعني شهر العسل...
منى: هههههههههههههه نوره؟!... هي ردوا...مستانسه يقولولي...احمد مدلعنها آخر دلع...
ناصر: ماااااااااااالت عليه وعليها...ليش ماكملوا شهر...؟!
منى: هممممم مادري يمكن احمد عنده شغل...
ناصر: هههههههه الا قولي خلصت فلوسه وخسرته عشان جي ردها...
منى: ههههههههههههههه والله انته...ايييه لا تقعد تتشمت..بنشوفها حرمتك شقا بتطلع...
تذكرت سعاد وابتسمت..
ناصر: فديت حرمتي انا...
منى: اندوكم....يالوهقة... يتفداها وهي بعدها مايت....
ناصر: هههههههه...اقول منى... لو كنت معرس وحرمتي حامل... شو تتوقعين اييب اول ولد والا بنت؟
منى: هممممممممم ولد....
اختفت ابتسامتي...
ناصر: مالت عليج...
منى: ههههههههه خلها تي اول هالحرمه وتحمل عقب بنشوف....ليش انته تباها بنت...؟!
لويت على شماس اللي قاعده تلعب بتيلفوني وهي يالسه في ثباني...
ناصر: هي...ابا بنت مثل شماس... فديت دلعها محلااه....!! تعالي وين اهلها؟!
منى: توك سالت هههه... سايرين العين مول وشالين سلطان وياهم...وخلوا عندي شماس...
ناصر: حمير ليش مايشلونها تلعب...!
منى: شو عرفها هاذي باللعب....
ناصر: المهم.... سمعت انكم قررتوا تجدمون الملجه....!!
تنهدت منى..
منى: هيي... راشد يبا يملج قبل العرس بشهر...
ناصر: وانتي ماتبين؟!
منى: مادري...زايغه.... اخاف هالملجه تخرب على علاقتنا عقب..
ناصر: لا مابتخرب لا تخافين... راشد عاقل..وبترتاحين وياه ان شاء الله..
منى: ان شاء الله....
دخلت امي في هاللحظة ....ويلست معانا..
ام محمد: اشوفكم قاعدين...
ناصر: امبوني بسير....بس يوم شفت هالعيوز مارمت افجها...
ام محمد: هههههههههههه الله يعطيك مثلها ان شاء الله....
ناصر: آآآآآآآآآمين يا امايه....
ام محمد: هااااه ناصر... اشوف خاطرك بلعيال...!!
سكت انا شوي بعد ما ادبّست..
ناصر: خاطري بلعيال مب بلحرمة...
ام محمد: خل عنك انته هالرمسات... لين متى يعني تبا تصبرنا مانفرح فيك..
ناصر: فرحوا بيوسف انزين...
ام محمد: مانقدر احين ماشي مجال نفرح بيوسف... بنت عمه حالتها ماتسمح الحين انه نخطبها ... لين ماتتذكر هي كل شي ...عقب بتروم تاخذ قرارها بقناعه...احين لا..وبعدين مايصير نيوز الصغير والعود موجود...
ناصر: هالعود هذا مايبا يعرس...
منى: آآآآه..ناصر عطني شماس ببدل لها...
عطيت شماس لمنى وانا احسدها انها قدرت تشرد قبل ماتبدا الحشره....لكن انا شو اللي بيشردني..!!
ام محمد: هاااه شو قلت...انا محصلة عرب حشام مابنحصل اخير عنهم ...
ناصر: قلت لا اله الا الله.... كم بعيد وبزيد في هالموضوع يامي...ماريد اعرس انا...
ام محمد: عذرك الاولي انك ماتبغي نوره....نوره وعرست....احين شو عذرك...؟!..
حمدت ربي لانه تيلفوني رن في هاللحظه...لانه ماعندي عذر مقنع اجاوب به امي...
ناصر: لحظة امايه....
شفت في الشاشه اسم عبد العزيز...
ناصر: مرحبااا....
عبد العزيز: هلا ناصر...شحالك؟
ناصر: الحمد لله بخير....شحالك انته؟
عبدالعزيز: بخير وسهاله...اقولك...انته في العين صح..
ناصر: هي نعم يالس في البيت ....شو فالخاطر؟؟
عبدالعزيز: اباك تي مستشفى الـ(.....).. فبوظبي.. الحين...
تم قلبي يدق بخوف...وملامحي تجمدت...
ناصر: شفيك شو صاير؟
عبدالعزيز: حرمتك في حالة ولاده ياناصر....ختها عندها توها يايه بس لازم تكون انته بعد موجود...
ناصر: شووووووووه..!!.. الحين..!!
عبدالعزيز: انا مثلك مستغرب...تقولي الحرمه بعدها في الشهر الثامن...
ناصر: الحين باييكم...
عبدالعزيز: لا تسرع...
ناصر: فمان الله...
سكرت عن عبدالعزيز وانا كلي خووف...سعاد بتولد الحين؟!!... بس هي بعدها في الشهر الثامن.... وموعدها مب قبل شهر...!!...
قمت بلا حاسيه من قعدتي لكن ماحسيت الا وبامي ماسكه ايدي وردت تسحبني عشان اقعد..
ام محمد: وين ساير وانا ارمسك..!!!
ناصر: امايه مضطر اروح....
ام محمد: الا قووول شارد...دومك تشرد يوم افتح وياك هالموضوع لكن اليوم ابدا مابتقوم مني...
اطالعت امي بقهر.... افهمي يا امايه انا مضطر اروح....!!!
ناصر: امايه غير المره بنكمل الموضوع هذا اوعدج....
ام محمد: لا ابدا.... انا تعبت منك ياناصر تعبت....ومافيني شدة اكلمك بهالموضوع مره ثانيه... اصلا نحن متى نشوفك غير في السنه حسنه...والايام تركظ ياناصر اخاف اموت قبل مافرح فيك...
ناصر: امايه ليش تقولين هالكلام انتي احين هاااه...قتلج عقب بنرمس في هالموضوع...
ام محمد: لا...الحين...
ناصر: اوهووووو ماتفهمون الرمسه انا لازم اروح احين....
قمت من قعدتي مره ثانيه ومشيت صوب الباب بعصبية.... سمعت صوت امي العالي يوصلني...
ام محمد: والله يا ناصر وهذا انا حلفت...ان طلعت من هالباب قبل مانخلص رمستنا ياغضب عليك لين يوم القيامه...!!
وقفت مكاني متجمد....ربطتني امي بحلفتها.... بس انا ابا اسير.... سعاد بحاجتي احين ولين ما اوصل هناك يبالي ساعه ونص...!!...
التفت لامي بياس..
ناصر: امايه...افهميني...عندي شي ظروري ابا اروح عشانه الله يخليج يامايه...
ام محمد: انا حلفت.... مابتطلع الا يوم اخذ موافقتك...
صرخت وانا افور من غيظي...ما اهتميت ساعتها هذي امي...ابوي.... اصغر عيالي اللي قاعد اصرخ عليه... ماكنت مهتم الا اني اطلع من هالباب واروح....!!
ناصر: شوووو تاخذين موافقتي على شووووووو....!!
ام محمد: بخطب لك...
قلت بلا حاسية وانا بعدني اصارخ....
ناصر: خطبي اللي تبينها ومن العرب اللي تبينهم.... قوليلي بس متى موعد العرس وبكون موجود...بس خليني اطلع يا امايه دخيلج....
سكتت امي شوي وهي اطالع فويهي بعصبيية....
ام محمد: خلاص برايك سير...
ماصدقت على الله تطلع هالكلمه منها... برايك روح....
طلعت من البيت وانا مب حاس بنفسي... ركبت السياره وشغلتها...حتى اني انتبهت ليوسف وهو يدخل بسيارته وينزل...شكله كان ياشر لي ويكلمني بس انا ما انتبهت زين له....
طرت برا البيت.... مسكت خط بوظبي...وانا مب مهتم الا بحالة سعاد....
يارب سهّل عليها يارب....!

----------------------

نهايه الجزء الــ37 >> متأثره
 
مشاركة: ::][مــــوعــــد مــع الـــســـــعـــادة][ :: قصه في منتهى الروعه

يعطيك العافيه اختي
 
يجب تسجيل الدخول أو التسجيل كي تتمكن من الرد هنا.
عودة
أعلى