رد: قط مرة حصلت تعهد في المدرسه(خلنا نشوف الفضايح هههههههههههههههههه)
أنا الحمد لله طيلة عمري الدراسي حتى الثانوية العامة رايتي بيضة ولا مرة حصلت على تعهد
بس يمكن في الصف الثالث الثانوي كنت بنفصل من المدرسة لسبب تافه
وهو باختصار أن شباب الفصل كانوا في حالاتهم الإعتيادة من المشاغبة والإستعباط
وانا أسبح في فضاء خارجي عنهم
مستعير لي ديوان شعر من مكتبة المدرسة وحاطه في الدرج وقاعد أقرا فيه
و ما ارجع إلى كوكب الأرض إلا بعد رن الجرس أو بعد بح صوت المدرس..
المهم المدرس - وكان مدرس كيمياء - تخسبق ما عرف وش يسوي
ظل يلتفت يمين وشمال يبي يصيد واحد يضحك وللا يهرج مع خويه..
بس الصف كله يبلبل إلين سكنت الأصوات شيئاً قليلاً بعد استعطاف ورجاء من المدرس
وانا كنت أصلاً أول الساكتين بس ما أذكر وش اللي خلاني أضحك فالتفت صوبي المدرس
وما صدق يحصل واحد - لا وبعد واحد في حال سبيله -
حولني على الإدارة بعد عملية طرد غير محترمة منه بلعتها لاني مو فاضي أتلاغى معه
والمدير العزيز كان ماكل حصا وقدامه صف من الطلبة اللي يسببون الأمراض الفتاكة بالمدرسين وانا صرت واحد من القائمة السوداء
ويوم شاف جبيني يبرق وابتسامتي تبي تولد ذبحها على الفور وهو يردد: عطوه ملفه !!
أنا الصراحة ذيك الساعة ما كنت مستشعر باللي حولي لاني أول مرة أنطرد من الفصل
لا واول مرة أفصل من مدرسة بدون مقدمات!!!
أخذت الملف بعد نقاش فاشل وحوار غير حضاري مع الإدارة
,ورحت على طول إلى مدرسة عمّي حيث كان مدرس فيها ..
وبالواسطة وحب خشوم الأسف والإعتذار..رجعت ولله الحمد ومن ذياك الوقت قلت لا مساس للمشاغبة..
والحمد لله أنا الآن في الجامعة و على بوابة التخرج ...دعواتكم
..
دمتم بعافية..
