ذكرياتنا..

[أميرة الأحزان]

سلام شامل.. عام للجميع

بسم الله الرحمن الرحين

لكل منا ذكريات.. كبير كان ام صغير..
ذكرياته سعيدة ام حزينة..مضحكة.. مبكية.. ايام صعبة.. مواقف طريفة.. لحظات مزعجة ام رائعة..
إذكرها كما تشاء..



همسة لــ
اختي زغردة..( ادري بتقولين كأنه عجايز.. بس ماعليه بصير احسن منش..
بقول..: اي عجزنا ونبغي الأيام ترجع شوي..: loool )
وهمسة لــ
المجرمة: (بتقولين كله تتذكر وبس هذي.. "اي فن الذكريات")


وهمسة لــ
الجميع:
لا تبخلوا علينا بحكاويكم..
فلنستمتع معاً.. ولنقضي لحظات.. علّها تكون ذكرى جميلة.. نسجلها غداً هنا.. عندما تفوت..




تحيتي القلبية لكم..
أميــرة الأحزان

..

 

[الصمت]

مشاركة: ذكرياتنا..

سلام عليكم


اني الصراحه صادني موقف بس مضحك

كنت اني او بنت اخويي في الماتم نتسمع المهم كان الشيخ توه مبتدي المحاضره يعني هدوء

مااسمع الاصوت شخير ادور الا بنت اخوي مغطيه وجهه او رايحه في سابع نوم وتشاخر ماشفت روحي الااضحك من الموقف

الموقف الثاني رحنا اني او بنت عمي السوق بنت عمي مسويه روحها كشخه او بنت عز مشينا اشوي ماشفت الا وحده منشطفه على وجهه وانقص انعالها

 

[الضمير الحي]

مشاركة: ذكرياتنا..

الموقف الثاني رحنا اني او بنت عمي السوق بنت عمي مسويه روحها كشخه او بنت عز مشينا اشوي ماشفت الا وحده منشطفه على وجهه وانقص انعالها

خوفي انتين اللي انشطفتين
خخخخخخخخخخخ

 

[أميرة الأحزان]

مشاركة: ذكرياتنا..

ههههههههههههههههههه

أويــلي..

اموووت على هالمواقف..

اي خوفي انتين مو بنت عمش..

اي اعترفي اعترفي..

هههههه

تسلمين اختي الصمت على المرور العجيب

شكراً اخوي الضمير..
بس ماجفنا شي؟!!


اهلاً وسهلاً

وينكم يااعضاء..؟!

 

[أميرة الأحزان]

مشاركة: ذكرياتنا..

:schmoll: وينكم يااصحاب القصص!!


ماعليه

اذكر موقف طريف.. وفشلني عدل..


في المدرسة.. في أول ثانوي.. الكورس الثاني..
كان عندنا محاضرة في صالة الرياضة.. ولما طلعنا رحت المكتبة ويه بنية.. رحنا نبغي نسوي برنت حق تقرير ضروووووري.. عاد جت الحصة اللي بعد المحاضرة وكان عندنا فايننس"مال" ....... مااهتمينا كلش.. لان المعلمة يازعم طيوبة.. >> طيوبة طل..

المهم
دخلنا الصف.. قامت المعلمة تزف وتشرشح فينا.. اللي وياي اجبن مني.. منخشة وراي.. واني متبهدلة حديييي..
كانت بتطلعنا من الصف.. بس بعدين دخلتنا بززززززف

الزبدة..
قعدت مكاني.. عادي جداً الوضع
مرررررررررررررة وحدة مااسمع إلا صوت رجّال يسعل ويتكلم.. طلع موجه في الصف
طفرت ومن الزهقة قمت اصيح..
وافضيحتاااه.. طول ما المعلمة تزفني الرجّال قاعد يطالع.... بللللل جداً احراااج



وبس


يالله انتظر

 

[زغردة الجراح]

مشاركة: ذكرياتنا..

سلام عليكم ..

يلا عادد قولوا لنا موااقف حلوة بعد ..

الحين جى على بالي موقف ..
يوم انا في حصة التام .. كنت عن يازعم رافعة ايدي وقاعدة اطالع طوول ايدي .. صدق يعني طووويلة كانت ايدي .. الا اتقول ليي المعلمة قوومي جااوبي بسش مطالع في ايديش ..

وخب نفس هذا الموقف صار لش أميرة الأحزان ..


االتماس دعاء
اختكم
زغردة

 

[سراب الحزن]

مشاركة: ذكرياتنا..

ههههههههههههه
راح الذكريااااااااات الى في بيت امورة يوم احنه اضغر اشوووي ويم كااااااااان عندهم حوي(حووش)

اول ما تعلمنه شلوون نصفر كآأنه نصفر في الحوي في بيتهم في مره كاان ابووه اميرة في غرفته ناايم شكله ما اذكر بس سمع احنه نصفر هههه طالع لناااا من الدرشة يقوول من الى يصفر قالت له اميرة هذلين الصبيان بره هههههههه ما انساه هذا المووقف لانه كاان ابوه معصب يوم يقول لنااا .........



حتى يوم كأنه نتهاااااااااوش ويه اميرة يوم صغار ما نفهم عدل كانت اميرة تصارخ لين نتهاوش وتعصب بسرعه وترضى بسرعه عاد مراات بس في مره كان ابوو أميرة ناايم سمع صارخ أميرة قاام طلع لينااا يصارخ علينااا ههههههههه
هوو معصب هههههههههه قال بس انتي لا تجين بيتنه ههههههه اني ما كأني اسمع في الليل اني في بيتهم خخخخخخخخ لانه كأن ابووه يقول هو معصب هوو طبعااا مثل ابووي ...

ادري عورت رأسكم بس هذي ذكرياتي في بيت أمورة في بعد بس رااح اعور رأسكم أكثر ..

 

[أميرة الأحزان]

رد: ذكرياتنا..

زغردة.. ويلي على هالموقف.. تطنزت عليش.. وصار لي


سراب الحزن.. فضحتينا عاااااااااااااد
صدق اياام كنا جهالو.. عجيييييييييييييب..
وين راح هالحووش.. اندفن.. مدري انبنى عليه خخ.. بلاوي مو بس بنااي
جان زين نرجع لو يوم واحد.. ونتهاوش شوي.. عجيب كنت اعصب
خخخ

 

[المجرمة]

رد: ذكرياتنا..

هاي شباب
الموقف مايخصني آنا يخص زغردة وأميرة معاي

اتذكر اللعام بعد ماطق جرس الفسحة كنا رايحين الصف الحصة الرابعة وكانت قدامنا معلمة الدين اني قمت اصافر وبعد ماكملت قمت أصرخ : ليش جذي عاد احنا وين قاعدين في مدرسة اصبيان؟ (على أساس اني ماسويت شي صج مجرمة لا؟)

المهم زغردة يوم شافتني اصرخ ولا كأني مسوية شي قامت تسأل بكل برائة (اقصد استهبال): من اللي صافر؟؟

ماعليه زغردة نشرت غسيلج ناصع البياض

 

[الضمير الحي]

رد: ذكرياتنا..

أختي الفاضلة أميرة الأحزان أعود بعد وقت طويل منذ أن قطعت الوعد

سأذكر بعض من ذكريات رحلت وعادت وسترحل


أتذكر أول إسبوع لي في عالم الإنترنت
وحين اخترت هذا الإسم وبالتحديد
ملتقى البحرين

حيث كنت عاطلا عن العمل واليأس أستولى على كل أقسام عقلي
كنت أتابع هذا الملتقى حرفا بحرف ولم أكن أغفل عن كلمة هنا أو هناك

كنت أنظر لهم كلهم كفة واحدة ولا وجود للكفة الأخرى أبدا
فكتبت الموضوع الأول والذي كان عن تساؤلات عن حقيقة أهداف لجنة العاطلين ومصداقيتهم في التحركات،،

وكانت الردود أقسى من أن أقول أنها قاسية عليّ
فبعضهم شتم وبعضهم قال الموضوع أقل من أن أقرأه
هذا فضلاً عن الرسائل الخاصة التي كانت تناديني بعنوان
أيا من تدعي بالضمير الحي وغيرها من مسميات

وكانت الصدفة أنني وجدت أحدا من هؤلاء يدافع بكل ما أوتي من قوة
حتى أخبرته أنني أعرف هذه اللجنة معرفة شخصية،،
وطلب مني أن أعددهم له وكان هذا عبر حوار في المسنجر حسب طلبه،،
وبالفعل عددتهم جميعهم مع أرقام هواتفهم التي نشرت في الملتقى ذات يوم،،

فقال: بقي شخص لم تذكره فقلت له إنه أنا الذي رفض آليات العمل،، وفضل إستقلالية اللجنة بعيداً عن أي لجان أخرى،،

فقال مندهشا لماذا إذا تفعل هذا وأنت تعلم أهدافنا،، وحقيقة تحركاتنا،،
فأجبته إن الآليات التي أنتم عليها لا تدل على صدق إدعاءك،،
هذا وأرغب في توعية الناس من أجل محاسبتكم لاحقا ماإن تخليتم عنهم،،

وكان الحوار ساخنا بيننا وكان كثير التهجم،، وكان يطالبني بالعودة لأرض غربتي أوال لأكون معهم وأنصرهم في قضيتهم البطالة،،
وبالفعل كنت ألبي معظم الدعوات،،

وبعدة زمن قرابة أي في شهر رمضان المنصرم
وجدته في إحدى الدوائر الحكومية وسألته

كيف هي لجنة العاطلين وما هي المستجدات لديها؟
فقال::
أي عاطلين تقصد..! من تم توظيفه ليس عليه التواجد بينهم،، وأنا الحمد لله توظفت حيث تجدني الآن...!

فذكرته بكلماتي التي كتبتها ذات وم وقامت الإدارة بحذف الموضوع بعد أقل من 48 ساعة،،

قائلا له: ألم أكن صادقا معكم،، أنتم لستم أهلا للقيادة،،

وانصرفت عنه دون أن أنتظر منه مبررا



وكان أخي معي يقول،، فقط اليوم عرفت الذي ترمي إليه ساعتها،،



وأعتذر ع الإطالة




أسألكم الدعاء



أخوكم
الضمير الحي

 

[أميرة الأحزان]

رد: ذكرياتنا..

السلام عليكم..
المجرمة.. هالموقف.. اففف انه موقف..
زغردة من كثر ماهي تمشي ويانا.. ماتدري وش نسوي
خخخ.. اقصد وش تسويين
لكن ابداااااع






أخي الضمير..
ذكرت لنا موقف.. تغبط عليــه.. رائع
هنيئاً لك ذلك.. صحيح أن الذي ذمرته ربما لايعجب الجميع في ملتقى البحرين وخارجه.. ولكنه الواقع..

شكــراً للمرور

لاعدمناك

وننتظر زياراتك القادمة

 

[الضمير الحي]

رد: ذكرياتنا..

سأذكر لكم أحبتي موقف آخر تعود ذكراه قريبا
لمرور عامين على إعتقالي في مركز النعيم لمدة 22 يوم وأربع ساعات ونصف الساعة،،

سيكون الموضوع محملا ببعض صور للإعتقال



أخوك
الضمير الحي

 

[أميرة الأحزان]

رد: ذكرياتنا..

موقف صادني أول يوم في المدرسة هالسنة

ياربي

احترق وجهي قدام المعلمااات.. كله من سرابو وربعها


الله يسلمكم.. سراب الحزن توها أول ثانوي.. ماتدلي شي في المدرسة.. هي وربعها..
عاد اني صرت مرشدة ليهم من الصبح.. يعني قبل مايجون ربعي..

في لفت "مصعد" في المدرسة في الادارة.. يعني حق المعلمات بس
أصروا الجهالو "سراب وربعها.." يبون يركبوونه.. يجربون كجارة المدرسة.. اني خفت عليهم يضيعون وركبت ياحظي
أسكت فيهم واهدئهم..

نزل اللفت في الادارة.. تبطل.. ماشاءالله تبارك الرحمن.. مدرسات فوق السبع وحدات في وجهنا
هههههههههه
رجعونا فوووووق.. عقاب يازعم
ومن ضمنهم مدرستي.. تطالعني واني منزلة راسي من الاحراج


يقولون مساكين توهم أول.. ومايعرفون شي المدرسة..
وحدة من المدرسات سألت انتوا أول..
قالوا اي..
واني كنت واقفة صوب هالمعلمة

سألتني.. قلت لها لا توجيهي.. ووجهي طمطووووومة خايسة
بااااااااااااااااااااااااااااال

والله العظيم..
حرمت اركب في هاللفت

صدق صدق صدق فشييييييييييييييييييلة

 

[أميرة الأحزان]

رد: ذكرياتنا..

أخي الضمير

ننتظر


حقاً وبكل شوق..

أنا في الانتظار


مع الصور

شيء رائع

 

[سراب الحزن]

رد: ذكرياتنا..

ههههههههههههههههههههههه
فشلتينه امورة عااد
توني بيبي في المدرسة خخخخخخخخخ

 

[المجرمة]

رد: ذكرياتنا..

ههههههههههههههههههههههه

صج موقف حلو .. عاد كان خاطري أشوف أمورة علشان أتطنز عليها خسارة


أكره موقف صادني في حياتي هو أول يوم في المدرسة السنة لما رحت ادور اسمي على باب الصفوف ولا اسمي مب موجود مع البنات كانو كلهم مع بعض وآنا خلوني في صف ثاني صج موقف مب شي الله لايوريكم هالموقف

وحضراتهم زغردة وأميرة وسراب الحزن بدل لايواسوني قاعدين يتطنزون علي الله يسامحهم

آنا متحسفة على شي واحد بس هو ان البنات معلماتهم اوكي واحنا مأساة


يالله الفصل الثاني معلماتهم بيون لنا ومعلماتنا بروحون لهم علشان يحسون فيني

 

[أميرة الأحزان]

رد: ذكرياتنا..

هههههههههه

واللــه مانتطنز..

وحشتينا في الصف يالكريهة..

مو للــه مو عاجبينش المعلماات.. خخخ

ماعليه.. قدرش جذي.. يمكن احسن ليش..

ومافكرتين فيها.. ليش بدلووش من الصف..؟!!!!!!!!!!!!!!!

هههههههههه



لأنش مجرمة

لوووول

ياللـه انجوفش

 

[المجرمة]

رد: ذكرياتنا..

لكن ماعليه


لو صج وحشتكم جان سألتو عني مب آنا كل حصة أجيكم

 

[أميرة الأحزان]

رد: ذكرياتنا..

يااختي احنا جماعة..
وانتين وحدة.. صدق وياش بنات.. بس انتين وحدة بعد

بلا دلع
احنا ربع حتى لو فرقونا

اما اليوم حصة الدين ابداعات
حليوة كانت
لان مادرسنا
والمجرمة كانت ضيفة عندنا

 

[المجرمة]

رد: ذكرياتنا..

أصلا الكل قالي انتي مب ضيفة الصف صفج وانتي أولهم وماقصرتوا على الإستضافة بس ماخليتوني اختار موضوع معاكم خسارة


على الفكرة البنية اللي ماسجلت اسمها المعلمة وذبحت عمرها وهي تنادي من ماسجلت اسمة آنا اللي استنتجتها بذكائي


يالله ماقصرتوا لأنكم خليتوني أكلمها بعد



عندي سؤال : ليش أول مادخلت صار الضحك حتى المعلمة نفسها ضحكت ؟