الدرع وحزام

[شاكر الشرهان]

اعطيتنا يا وقت حملٍ و شلنا
وماقد جزعنا بيوم من بين الايام



ماني بقول ان فينا حنا و حنا
العلم هات اقصاك والوعد قدام



مهما تثاقل ما تباين حَزنّا
وماغرّنا منك خيالات و اوهام



نعرف مباغيها ونقصد غرضنا
ومانتبع المقفي ولا نجرح ايتام



واليا طلع عند الملاقى احدنا
اصغر ولد فينا على الموت ضرغام



وما ننتظر منهو يكف كف وهدنا
فضل من الله نعمة العزم واقدام



بايديننا الماكل وكسب و حطبنا
وقفاتنا تشهد على مر الاعوام



الداني والقاصي والاغراب اهلنا
كل من تجمع تحت رايات الاسلام



والاجنبي آمن فأراضي وطنّا
حقٍ علينا الضيف طيبٍ وإكرام



واما العدا واللي طمع في سعدنا
ماللخيانه غير ساحات الاعدام



ياوقت معك العلم واضح نهجنا
مالك علينا سلك لاشوك لاسهام



ماودنا الا القابله لا حصدنا
نلقى حصاد العام الدرع وحزام


#ش_م